Vind God in die skuilte van die storm

Datum: . 2020 GKE

Skriflesing: Jona 1 & 2

Teksvers: Jona 1 v 4

Sing

Ps. 148-1 v 1

Die beeld van 'n storm word redelik wyd gebruik om vir ons te beskryf hoe hierdie pandemie van die Covid19 virus ons raak en hoe ons daarop moet reageer. In hierdie verhaal van Jona in die storm vind ons heelwat riglyne om ons te help in hierdie tyd van inperking.

Voordat ons begin net die volgende. In die eerste plek: die verhaal gaan nie oor 'n groot vis nie. Die vis word slegs twee maal genoem en maak net 'n klein element van die verhaal uit. Die Bybel bied die verhaal as 'n geskiedkundige gebeurtenis en ons aanvaar dit as sulks omdat die Bybel God se Woord is. Om in argumente betrokke te raak of dit moontlik was vir Jona om in die vis se maag te oorleef lei mens op 'n syspoor weg van die boodskap wat hierdie verhaal vir ons vertel.

Tweedens moet mens versigtig wees om die gebeure in die verhaal net so van toepassing op die gebeure wat ons tans beleef van toepassing te maak. Mens kan nie die gebeure as 'n direkte oorsaak en gevolg op ons van toepassing maak nie.

In die verhaal binne die historiese konteks waarin dit afspeel vind ons sekere beginsels wat ons kan gebruik om sin te maak van ons huidige situasie waarin ons tans is.

Derdens moet mens ook onthou dat hierdie verhaal so 'n ryke inhoud het dat dit onmoontlik is om al die detail daarvan in een preek te dek. Ons fokus vir vandag is:

hoe vind jy God en sy vrede wanneer jy binne in die onstuimigheid van 'n storm is?

Die tema van vandag se preek is: “Vind God in die skuilte van die storm.”

Julle mag nou dalk wonder, hoe kan daar 'n skuilplek binne in 'n onstuimige storm wees en hoe kan jy God daarbinne vind?

Die antwoord vind ons in hierdie verhaal van Jona.

Die verhaal begin waar Jona 'n opdrag van die Here ontvang om in Nineve te gaan preek. Hierdie opdrag maak nie vir Jona sin nie en daarom besluit hy om net mooi die teenoorgestelde te doen as wat die Here van hom vra.  Die Here beveel hom om na Ninive in die ooste te gaan, maar hy besluit om na Tarsis in die weste te vlug.

Dit herinner my aan die verhaal van Adam en Eva waar hulle ook gedink het hulle weet beter as God. Dit het droewige gevolge vir die hele mensdom veroorsaak. Dit het tot vervreemding tussen God en die mens gelei.

Jona het besluit om na Tarsis toe te vlug, weg van die Here af! Die eerste beginsel wat ons hier na vore kom, is dat ongehoorsaamheid aan God vervreemding tussen jou en God bring. Mense wat van God vervreem is, is die grootste nood van die mensdom.

Ten spyte daarvan dat Jona probeer om te vlug weg van die Here af, laat Hy dit nie toe nie. Hierin sien ons God se genade. Nadat Adam en Eva teen God gerebeleer het, het hulle weggekruip vir Hom. Tog kom God na hulle toe en vra “waar is jy?”

Ons hoor hier in die verhaal van Jona dat die Here letterlik 'n groot wind agter Jona en die skip waarop hy gevlug het gegooi het soos mens 'n spies sal gooi. Daardie wind het 'n GROOT storm veroorsaak. Ons hoor dat die gesoute seemanne wat sekerlik al baie storms op see deurleef het, absoluut vreesbevange was. Dit was nie maar net 'n gewone storm nie.

Die tweede beginsel wat ons hier op gaan fokus, is dat God selfs 'n storm sal gebruik wanneer Hy vra “waar is jy?” om jou aandag te kry.

Verder moet ons ook kennis neem dat die storm nie 'n strafmaatreël was nie. Dis BAIE belangrik dat ons dit raaksien. Die storm is deel van God se genade! God se genade is dat Hy jou nie maar net aan jou lot oorlaat nie. As Hy Jona maar net gelos het, sou Jona vir ewig van Hom vervreem gewees het.

Dan hoor ons hoe die mense op daardie skip reageer het. Die seemanne wat die Here nie geken het nie, het alles in hul vermoë gedoen om die storm te oorleef, maar dit het niks gehelp nie.

Aan die ander kant was Jona wat die Here geken het. Mens sou verwag dat hy sy toevlug tot God sou neem, maar hy doen nie. Hy het onder in die boot gaan lê en slaap. Dis ironies dat die skeepskaptein wat God nie geken het nie, vir Jona moes wakker skud en beveel om te bid, maar weereens doen Jona dit nie!

Die beginsel wat hier na vore kom, is dat selfs al ken jy die Here dan gaan dit jou niks help wanneer jy in 'n storm is, as jy afsydig teenoor Hom is nie. Dan is jy nog net so verlore soos die persoon wat Hom glad nie ken nie.

Verder hoor ons dat die Here vir Jona gebruik om Homself aan die ongelowige skeepsbemanning bekend te maak. Dis ironies dat Jona wat gevlug het omdat hy nie vir God aan die heidene in Nineve wou verkondig nie, tog deur God gebruik word om Homself aan die skeepsbemanning wat Hom nie geken het nie, bekend te maak.

Verder hoor ons ook dat die Here nie opgehou het met Jona totdat hy tot inkeer gekom het nie. Dit het tot gevolg gehad dat die skeepsbemanning Jona oorboord moes gooi en dit het meegebring dat hulle tot 'n diepe besef van die almag van die Here gekom het. Soveel so dat hulle tot Hom geoffer het en geloftes afgelê het.

Hulle wat die Here nie geken het nie, het Hom nou aanbid. Die beginsel wat hier na vore kom is dat die Here storms gebruik om ongelowiges na Hom toe te bring. In hierdie storm het die Here al die dinge waarop hulle gewoonlik staat gemaak het, weggeneem. Hulle vernuf as seemanne het hulle nie gehelp nie. Dit het niks gehelp dat hulle al hulle vrag oorboord gegooi het nie. Hulle gebede tot hul eie gode het hulle niks gehelp nie. Op die uiteinde was dit net hulle en God in die storm en dit het geverg dat hulle God moes vertrou.

Hulle het God binne in die storm gevind want die storm het dit wat hulle van God sou weghou vir hulle verskuil. Binne die skuilte van die storm het hulle die Here gevind.

Intussen is Jona oorboord gegooi. Weereens is dit duidelik dat die doel daarvan nie was om te straf nie. Dit was die Here se genade sodat Jona tot inkeer sou kom. Hy stuur 'n vis om te keer dat Jona nie verdrink nie.

Binne in die vis is Jona van alles gestroop wat tussen hom en die Here gestaan het. Daar het hy tot inkeer gekom. Daar het hy tot die besef gekom dat hy 'n sondaar was. Daar het hy besef dat hy volkome van God afhanklik was. In Jona 2 v 9 hoor ons hoe hy erken , “hulp kom net van die Here af.”

Jona was vir drie dae en drie nagte in die vis se maag. Dit is 'n profetiese heenwysing na Jesus Christus. Ons hoor in Mat. 12 v 40:

Soos Jona drie dae en drie nagte in die maag van ’n groot vis was, so sal die Seun van die mens drie dae en drie nagte binne-in die aarde wees.

Ons vind God se genade in Jesus Christus wat met sy lewe betaal het sodat die vervreemding wat sonde tussen jou en God veroorsaak het tot niet gemaak kan word sodat jy weer met God versoen kan word.

Nou kom ons by die vraag: “Wat leer hierdie verhaal van Jona ons oor die Corona storm waarin ons tans vasgekeer is?”

Die eerste beginsel is dat ons in 'n wêreld leef wat in opstand is teen God se gesag en dat daar selfs mense is wat Hom ken wat opstandig is teenoor Hom.

Die tweede beginsel is dat hierdie virus deel is van God se skepping en dat Hy dit gebruik om mense wat in opstand teen Hom is, terug te bring na Hom toe. Ons moenie hierdie pandemie sien as God se straf nie.

Die derde beginsel is dat daar baie sogenaamde kerkmense wat sê dat hulle God ken, maar tog afsydig teenoor Hom staan. As jy nog afsydig teenoor die Here staan moet jy tot inkeer kom.

Die vierde beginsel is dat God ook binne hierdie omstandighede sy kerk gebruik om Hom aan mense wat Hom nie ken nie, bekend te stel. Wereldwyd het daar nuwe deure oopgegaan vir kerke om die evangelie te verkondig.

Hy het kerkgeboue gesluit, maar tog bereik kerke nou baie meer mense met die evangelie as die wat Sondae in die kerkgebou bymekaar gekom het. Baie meer mense wat in normale omstandighede nie 'n erediens in 'n kerkgebou sou bywoon nie, word nou deur middel van die internet bereik.

Gebruik hierdie geleentheid wat die Here vir ons gegee het. Nooi mense uit om Sondae om 9h00 by ons aan te sluit. Stuur vir hulle die FaceBook skakel na ons blad of sê vir hulle dat hulle op Facebook moet soek na “Gereformeerde Kerk Empangeni.” Nooi hulle uit om die blad te “Like”. As u dit nog nie gedoen het nie, doen dit vandag nog. Sodoende ontvang jy kennisgewings van die dagstukkies en nuus wat op die blad geplaas word.

Die vyfde beginsel is dat die Here hierdie omstandighede gebruik om mense na Hom toe terug te bring. Ons sal nooit weet hoeveel mense wat God nie geken het nie tot geloof gekom het as gevolg van hierdie Corona storm.

Die laaste beginsel is dat jy slegs deur Jesus Christus tot God kan nader. Erken dat jou sonde tussen jou en God staan en dat jy totaal van Hom afhanklik is om jou te red. Glo dat Jesus vir jou aan die kruis gesterf het sodat jy weer met God versoen kan word.

Samevatting

Geliefdes, die meeste van ons is in afsondering by die huis. Dit laat my nogal dink dat ons binne die vis se maag is. Gebruik hierdie tyd om te besef hoe afhanklik jy van God is en dat jy net by Hom rus vir jou gemoed kan vind. Ons is gestroop van baie van dit wat ons as selfsprekend ervaar. Dalk doen die Here dit juis sodat ons aandag van al die normale dinge ;wat so maklik tussen ons en Hom staan; weggetrek kan word sodat ons Hom weer raak kan sien. Hierdie storm beskerm ons van die dinge wat ons aandag van God af wegtrek. Wanneer Jesus al is wat jy oor het, besef jy dat Jesus al is wat jy nodig het.

Ons staan midde in hierdie Corona storm. Gebruik die geleentheid wat die Here vir jou daarmee gee. Vind God in die skuilte van die storm.

Amen

Soek jou beskerming by God wanneer die lewe dreig om jou te oorweldig.

Covid19 Afsondering bemoediging

Tema: Soek jou beskerming by God wanneer die lewe dreig om jou te oorweldig.

Skrif: Ps. 57 v 2

Wees my genadig, o God! Wees my genadig,

want by U soek ek skuiling.

Onder u vleuels sal ek skuil tot die bedreiging verby is.

Soos wat die tyd van afsondering aanstap begin die werklikheid van daarvan tot jou deurdring. Wanneer mens jouself in 'n situasie bevind waar jy nie eintlik in beheer is nie, kan dit meebring dat jy gevoelens van wanhoop en moedeloosheid begin ervaar. Veral wanneer die werklikheid van hoe hierdie situasie jou negatief gaan beïnvloed begin deurdring.

Daar is baie van ons wat heeltemal alleen is in hierdie tyd en dit kan tot gevolg hê dat jy eensaam en uitgesluit voel.

Waar kry jy krag vandaan om op te staan en die lewe in die oë te kyk wanneer dit vir jou voel of alles donker is om jou? Daar is baie bemoedigende boodskappe wat basies daarop neerkom dat jy beheer moet neem van jou lewe. Jy moet opstaan en die lewe in die oë kyk. Jy is die stuurman wat die rigting van jou lewensreis bepaal.

Die probleem kom in wanneer jy nie die krag of moed het om op te staan om die lewe in die oë te kyk nie. Wanneer dit vir jou voel of hierdie situasie jou in 'n donker gat gegooi het waaruit jy nie op jou eie kan uitklim nie.

Dit is nou maar eenmaal in die lewe so dat wanneer jy net op jouself staatmaak, sal jy vind dat jy een of ander tyd op 'n punt kom waar jy net nie meer kan nie. Op die uiteinde kort jy 'n bron van krag wat groter as jyself is.

Waar vind jy hierdie bron van krag?

Luister na wat sê die Here vir ons in Ps.  57 v 2

Wees my genadig, o God! Wees my genadig,

want by U soek ek skuiling.

Onder u vleuels sal ek skuil tot die bedreiging verby is.

Die psalmdigter maak gebruik van die beeld van 'n voël wat haar kuikens onder haar vlerke beskerm wanneer gevaar dreig. Net so beskerm God jou wanneer jy by Hom gaan skuiling soek.

Deur jou geloof in Jesus Christus as jou enigste Verlosser en Saligmaker kry jy die reg om by God skuiling te soek. Soek jou beskerming by God wanneer die lewe dreig om jou te oorweldig.

Amen

Wees 'n ligbaken van hoop in donker onsekere tye

Datum: 29 Mar. 2020 Gereformeerde Kerk Empangeni

Sluit gerus by ons uitsaai dienste aan op die Gereformeerde Kerk Empangeni se FaceBook blad Sondagoggende om 9h00

Skriflesing: Mat. 14 v 13 tot 21; Mark 6 v 35 tot 44; Luk. 9 v 10 – 17;Joh. 6 v 1 tot 15

Teksvers: Mat. 14 v 16

Ons is tans in 'n situasie waarin die meeste van ons nog nooit was nie. Regte wat ons as vanselfsprekend ervaar is skielik opgehef. Baie onsekerhede oor wat ons mag en nie mag doen nie. Onsekerheid oor hoe toekoms gaan lyk en hoe dit ons ekonomies gaan affekteer. Baie mense ly groot finansiële verliese.

Dit maak mense benoud. Ander is kwaad daaroor. Mense is onseker en dit maak hulle bang en angstig. Ek dink elkeen van ons is so bietjie bekommerd.

Ons skrifgedeelte pas baie goed in by hierdie situasie waarin ons verkeer. Hierin gee die Here vir ons leiding oor hoe ons moet optree.

Dit is 'n baie bekende verhaal waar Jesus en sy dissipels na 'n afgesonderde plek toe gegaan het en hoe 'n skare van meer as 5 000 mense hulle gevolg het. Jesus het omgesien na die skare en hulle ook begin leer.

Hier teen die einde van die dag is die mense honger. Hulle is op 'n afgesonderde plek waar hulle nie maklik kos in die hande kon kry nie.

Dan verrig Jesus 'n wonderwerk. Met net twee vissies en vyf broodjies gee Jesus vir die skare kos.

Dit is inderdaad 'n indrukwekkende verhaal, maar wat het daardie gebeure van so bietjie meer as 2000 jaar gelede met ons situasie waar ons nou by die huis ingeperk is te doen?

In hierdie verhaal is 'n paar dinge wat baie relevant is vir ons in hierdie situasie waarin ons, ons nou bevind.

Die verhaal begin waar Jesus sy dissipels na 'n afgesonderde plek neem nadat hulle gehoor dat Koning Herodus Johannes die Doper laat onthoof het.

Toe hulle daar aankom was daar egter 'n groot klomp mense reeds daar. Was Jesus geïrriteerd omdat die mense sy rus kom verstoor het? Nee, geliefdes. Ons hoor dat Jesus hulle innig jammer gekry het en die siekes onder hulle gesond gemaak het.

Ons kan die mense wat daar saam met Jesus was in twee groepe verdeel. Aan die eenkant was daar die hulpelose en verdwaalde skare wat agter Jesus aangeloop het en aan die ander kant sy dissipels wat Hom in dit wat Hy gedoen het nagevolg het.

In 'n sekere sin val ons in beide kategorieë. Aan die een kant is ons ook soos die hulpelose skare wat sorg en vertroosting nodig het. Aan die ander kant is ons egter ook kerk van die Here wat Hy gebruik om uit te gaan in die wêreld en hoop te bring.

In 'n sekere sin is ons wat nou ingeperk is ook soos daardie skare wat vir Jesus ingewag het. Die Here troos ons met die wete dat Hy ons ook innig jammer kry. Dat Hy ons ook van die siekte van God vervreemding wil genees, want dit is die grootste nood wat daar in die wêreld is.

Om van God vervreemd te wees is om hulpeloos en verdwaald in hierdie wêreld te wees. Jesus kry elkeen wat van God vervreem is innig jammer. Daarom nooi Hy jou ook uit :

Kom na My toe, almal wat uitgeput en oorlaai is, en Ek sal julle rus gee.

Gaan lees gerus Mat. 11 v 25 – 30.

Jesus het jou so lief dat Hy bereid was om met sy lewe te betaal sodat Jy weer met God versoen kan wees. Het jy vrymoedigheid om tot God te nader? Neem Jesus se uitnodiging aan.

Die troos wat ons daarin vind is dat jy as God se kind tot Hom kan nader wanneer die lewe jou druk. Jy kan na God toe gaan wanneer jy bekommerd en benoud is oor al die onsekerhede wat ons nou so teister.

Wanneer jy Jesus se uitnodiging aanneem dan verander jou status van iemand wat net agter Jesus aanloop na 'n dissipel, dit wil sê wat Jesus navolg. Dan word jy iemand wat Hy gebruik om 'n verskil in die wêreld te maak.

In hierdie verhaal hoor ons dan ook dat Jesus se dissipels 'n probleem raaksien. Dit raak laat en omdat hulle op 'n afgeleë plek is, is daar nie kos vir die mense nie.

Die dissipels is pro aktief en stel 'n oplossing voor. Hulle oplossing is om die mense na die dorpe terug te stuur sodat hulle vir hulself kan gaan kos koop. Hierdie plan val egter nie met God se plan saam nie.

Luister na hoe Jesus sy dissipels antwoord:

“Hulle hoef nie weg te gaan nie. Gee julle vir hulle iets om te eet.”

In hierdie tyd van onsekerheid het mense hoop nodig meer as ooit. Die maklike oplossing is om vir die Here te vra: “Here, neem tog asb. net die probleem weg sodat die lewe tot normaal kan terugkeer.”

En dan antwoord die Here: “hierdie virus gaan vir eers by julle bly. Julle gaan die volgende 21 dae in afsondering moet bly. Die lewe gaan vir eers nie na normaal terugkeer nie, maar julle wat my dissipels is, gee vir die mense hoop!”

Heel moontlik gaan ons ook net soos die dissipels protesteer soos ons in Markus se weergawe van die verhaal hoor:

“Moet ons met twee honderd mense se dagloon brood gaan koop om vir hulle iets te ete te gee?”

Dink so daaraan, dis 2 derdes van hulle jaarlikse inkomste wat hulle op een slag moet uitgee om vir die mense kos te koop!

“Here U vra te veel, ons kan nie!” Voel dit vir jou ook of die Here nou te veel van jou vra?

Al wat die dissipels gehad het was twee vissies en vyf broodjies. Dit was genoeg om vir so ongeveer 15 mense kos te gee en nou vra Jesus dat hulle meer as 5000 mense daarmee kos moet gee!

Hier beleef ons egter die grootheid van God se genade. Hy verwag nie van die dissipels om die onmoontlike te doen nie. Hy verwag ook nie van jou om die onmoontlike te doen nie!

Hy vat dit wat hulle het en dank God daarvoor en dan maak Hy die onmoontlike moontlik! Dis wat Jesus ook in hierdie tyd vir jou vra. Bring wat jy het na Hom toe. Dank God vir die bietjie wat jy het en Hy sal dit genoeg maak om mee te doen wat Hy van jou vra.

Hoe lyk ons twee vissies en vyf broodjies? Ons het in die volgende drie weke tyd. Die meeste van ons het selfone en internet sodat ons op verskeie maniere met mekaar kan kommunikeer. Ons het God se liefde in ons harte. Bring dit na die Here toe en Hy sal dit seën.

Nadat Jesus God gedank het en Hy die broodjies en die vissies geseën het, het Jesus dit vir die dissipels terug gegee om uit te deel. Jesus gebruik sy kerk om sy werk te doen.

Reik uit na mense. Begin by die mense wat saam met jou in die huis is. Maak tyd vir mekaar. Met die lewe wat so gejaagd is, leef ons so maklik by mekaar verby. Nou het die Here vir ons geleentheid gegee om om weer bietjie by mekaar te kom.

Gaan dan na jou vriende en kennisse en die en jou bure, jou broers en susters in die gemeente. Hoor hoe dit gaan. Dink aan praktiese maniere om mekaar te help.

Vir die wat Jesus nie ken nie, vertel vir hulle die goeie nuus omtrent Hom, dat Hy sy lewe gegee het en aan 'n vervloekte kruishout gesterf het. Dat Hy die dood oorwin het en opgestaan het. Dat Hy vir jou 'n nuwe lewe saam met God gee. Vertel vir hulle hoe Jesus jou lewe verander het.

Al is dit net een of twee dan maak jy 'n verskil. As elkeen van ons na twee of drie mense uitreik in hierdie tyd sal ons 'n groot verskil in hierdie wêreld maak.

As jy nog net deel is van die skare wat agter Jesus aanloop, neem sy uitnodig aan. Kom na Hom toe almal wat uitgeput en oorlaai is en Hy sal vir jou rus gee.

As jy ’n dissipel is, dit wil sê 'n navolger van Jesus is, bring jou twee vissies en vyf broodjies na Jesus toe om dit te seën. Gaan deel dit dan uit aan mense wat Hoop nodig het.

Wees 'n ligbaken van hoop in donker onsekere tye.

Amen

Hoe vind jy kalmte binne die gekheid van 'n storm?

Datum: 22 Mar. 2020 Gereformeerde Kerk Empangeni

Skriflesing: Mat. 14 v 22 - 36

Teksvers: Mat. 14 v 27 “Wees gerus, dit is Ek. Moenie bang wees nie.”

Hoe vind jy kalmte binne die gekheid van 'n storm?

Verlede Sondagaand het ons president 'n ramptoestand aangekondig en streng maatreëls aangekondig om te probeer keer dat die virus ongehinderd duisende mense infekteer.

Dit het 'n paniek onder mense laat ontstaan. Sommige mense het die volgende dag die winkels ingevaar en met paniek aankope winkelrakke leeggekoop. Dis inderdaad of mens 'n gees van vreesagtigheid by mense waarneem.

Dit is nie seker hoe hierdie situasie ons lewens gaan beïnvloed nie, maar kenners is dit eens, dit gaan ons lewens drasties verander. Ons kan inderdaad sê dat die Korona storm in Suid-Afrika losgebars het.

Dit is hier waar ons roeping as Christene, as kerk van ons Here intree om ligdraers te wees. Om perspektief te bring binne 'n wêreld wat in chaos gedompel word. Dis ons roeping om hoop te bring aan 'n wêreld wat in donkerte toegevou word. Dis ons roeping om ligdraers te wees.

Hoe doen ons dit wanneer ons self ook benoud is? Met hierdie verhaal van Jesus se dissipels in 'n storm gee die Here vir ons die perspektief hoe ons, verby ons vrees en benoudheid gaan kom, want as jy 'n ligdraer wil wees moet jy eers kalmte en rustigheid in jou eie gemoed vind. Dan kan jy uitgaan in die wêreld en uit jou innerlike vrede hoop en lig in die wêreld indra.

In hierdie verhaal is daar 'n paar dinge waarop ons moet let. Jesus se dissipels het hulself binne in 'n storm bevind wat erg genoeg was om hulle te oorweldig.

Hoekom was hulle binne in hierdie storm? Het hulle iets verkeerd gedoen? Nee, geliefdes. Hulle was binne in hierdie storm omdat Jesus hulle uitgestuur het en hulle Hom gehoorsaam het.

Die storms in jou lewe is nie altyd omdat jy iets verkeerd gedoen het nie. Die Korona virus is nie omdat jy iets verkeerd gedoen het nie. Die siekte waarmee jy geteister word is nie omdat jy iets verkeerd gedoen het nie.

Ons hoor in Mat. 14 v 22 dat Jesus sy dissipels uitgestuur het. Het Hy geweet dat hulle binne in 'n storm gaan beland wanneer hulle wegvaar? Ja, geliefdes Hy het geweet.

Maak dit jou bang dat ons Here jou soms in 'n storm gaan instuur? Maak dit jou bang dat die Here ons binne in hierdie Korona virus storm geplaas het?

Die dissipels het heel nag teen die storm gestoei. Mens kan jou net indink hoe benoud hulle was. Jesus was nie saam met hulle in die boot nie. Beteken dit dat Hy hulle aan hulle eie lot oorgelaat het? Nee, geliefdes. Dit wat daar met die dissipels gebeur het was nog steeds binne God se beheer. Soms lyk dit of God ons binne die chaos van ons lewens in die steek gelaat het. Ons voel nie sy teenwoordigheid, maar Hy is daar. Hy het ons immers belowe dat Hy ons nooit alleen sal laat nie.

Nadat die dissipels die hele nag lank gestoei het, het Jesus met dagbreek die volgende oggend op die see na hulle toe aangeloop gekom. Was hulle bly toe hulle Jesus sien aankom? Nee, geliefdes, hulle het gedink Hy is 'n spook!

Sien jy vir Jesus raak binne die storms wat in jou lewe woed?

Was Jesus verontwaardig dat hulle Hom vir 'n spook aangesien het? Nee, geliefdes. Luister na wat Jesus vir die dissipels sê: “Wees gerus, dit is Ek. Moenie bang wees nie.” Letterlik staan daar “Ek is” wat hier vertaal is met “dit is Ek.”

Dit is hoe God Homself in die Ou Testament aan Moses voorstel by die brandende braambos. “Ek is.” In die Nuwe Testament hoor ons hoe Jesus Homself noem “Ek is.” “Ek is die brood van die lewe. Ek is die Lig van die wêreld. Ek is die ingang na redding. Ek is die Goeie Herder wat na sy skape omsien. Ek is die opstanding en die lewe. Ek is die weg en die waarheid en die lewe. Ek is die ware Wingerdstok. Julle is in My ingeënt.”

Jesus sê vir sy dissipels “Ek is.” Met ander woorde Hy sê vir hulle, Hy is almagtige God. Sien u raak dat die ewige almagtige God saam met u in die lewensstorm storm is?

Dan kom ons by daardie deel waar Petrus saam met Jesus op die water loop. Petrus het egter nie lank op die water geloop voordat hy begin sink het nie want hy het sy oë van Jesus afgehaal.

Hoekom het Petrus sy oë van Jesus afgehaal? Petrus antwoord Jesus se gerusstelling van “Ek is” met “Here, as dit regtig U is.....” Hoor u die ongeloof in Petrus se reaksie? Hy was nog nie oortuig dat Jesus werklik was wie Hy gesê het Hy is nie. Jesus bevestig Petrus se ongeloof nadat Hy hom gegryp het en hom sê: “Kleingelowige, waarom het jy begin twyfel?”  

Dis ongeloof wat maak dat ons in die golwe begin wegsink in die storms in ons lewens. God se genade is dat Hy ons nie maar net aan ons eie lot oorlaat nie. Jesus het Petrus se hand gegryp en hom in die boot in gehelp.

Glo jy dat Jesus die Seun van God is? Glo jy dat Hy aan 'n vervloekte kruishout gesterf het om vir jou sondes te betaal? Glo jy dat Hy die dood oorwin het en nou lewe? Glo jy dat Hy vir jou 'n nuwe lewe gee?

Christene leef vanuit hul geloof. Dit is hoekom Christene in die wêreld ingaan en 'n verskil gaan maak. Dit is hoekom gelowiges op praktiese maniere uitreik na hul naastes in krisis tye soos hierdie deur byvoorbeeld vir die wat afgesonder is en nie uit die huis mag uitgaan nie, te gaan inkopies doen. Dis hoekom gelowiges die nodige voorsorg maatreëls tref sodat hulle nie ander in gevaar stel nie. Christene doen hierdie dinge in geloof en nie uit paniek uit nie.

Geliefdes die verhaal sluit af waar die storm bedaar en die dissipels Jesus erken as Seun van God. Beteken dit dat hierdie storm met die korona virus gaan bedaar? Ja, dit gaan ook verbygaan.

Beteken dit dat dit nou binnekort gaan gebeur? Heel waarskynlik nie. Die dissipels het die hele nag lank in die storm gestoei. Die moontlikheid bestaan dat daar van ons ook deur die virus geïnfekteer gaan word.

Die moontlikheid bestaan dat daar van ons kan sterf as gevolg van die virus. Maar geliefdes selfs as dit sou gebeur hoef ons nie bang te wees nie, want Jesus belowe ons dat selfs die dood ons nie van sy liefde kan skei nie.

Onthou net dat dit steeds God is wat bepaal wanneer ons, ons laaste lewensasem gaan uitblaas. As dit jou tyd is, kan Hy moontlik die virus gebruik om jou te kom haal. As dit nie jou tyd is nie, kan geen virus hoe gevaarlik ook al, jou lewe neem nie, want jou lewe is binne God se hande.

Geliefdes, moenie dat hierdie pandemie u paniekerig en benoud maak nie. God is ook binne hierdie storm teenwoordig. Hou in geloof aan sy beloftes vas. Hou jou oë gerig op Jesus sodat jy nie in die golwe van vrees en wanhoop wegsink nie.

Amen 

Hoe maak jy 'n verskil in die lewe?

Datum: 15 Mar. 2020 GKE

Skriflesing: Mat. 28 v 10 en 16 - 20

Teksvers: Mat. 28 v 18 – 20

Hoekom is ek hier? Wat is die sin van die lewe? Dis een van die groot lewensvrae waarop elkeen vir hom of haarself 'n antwoord moet kry?

Ons leef in 'n tyd waar mense op hulself en hul eie behoeftes gefokus is. “Watse voordeel hou dit vir my in?” is die algemene beginsel en waarde waarmee die lewe benader word. “Hoekom is ek hier?” word beantwoord met “ek is hier vir myself.”

Dis 'n denkwyse wat ons selfs in die kerk vind. En tog leer die Here ons in sy Woord dat ons anders as die wêreld moet wees. In hierdie laaste woorde van Jesus aan sy dissipels voordat Hy opgevaar het hoor ons ons die essensie van wat dit beteken om 'n Christin te wees.

As jy jouself 'n Christin wil noem moet jy 'n dissipel van Jesus Christus wees. 'n Dissipel is 'n volgeling van Jesus. Die vraag wat ons onsself moet vra: “Is ek 'n ware dissipel van Jesus Christus?”

Om 'n dissipel van Jesus te wees beteken dat jy in Hom moet glo. Jy moet die evangelie glo, naamlik dat Jesus vir jou sondes aan 'n vervloekte kruishout gesterf het. Hy het jou sondeskuld wat tussen jou en God staan op Homself geneem deur die straf vir die sonde, naamlik die ewige dood namens jou te dra. Omdat Hy God is, het Hy die dood oorwin en daarmee gee Hy aan jou 'n nuwe lewe.

'n Dissipel van Jesus Christus is dus iemand wat in Hom glo en ook lewe soos 'n dissipel van Jesus Christus. 'n Dissipel van Jesus Christus se lewe lyk anders as die wêreld se lewe. 'n Dissipel van Jesus Christus is nie op hom of haarself gefokus nie, maar hy of sy maak 'n verskil in die wêreld.

In hierdie afskeidswoorde van Jesus hoor ons hoe 'n dissipel te werk moet gaan om 'n verskil in die wêreld moet maak.

In Mat. 28 v 16 & 17 hoor ons hoe Jesus weer sy dissipels ontmoet nadat Hy uit die dood opgestaan het. Hulle reaksie is om Hom te aanbid. Ons hoor ook dat sommige van hulle getwyfel het. Geliefdes, twyfel jy ook nog?

Luister dan mooi hoe Jesus Homself as te ware aan hulle bekendstel met hierdie herontmoeting. In Mat. 28v18 hoor ons:

“Aan My is alle mag gegee in die hemel en op die aarde.

Hy bevestig hiermee sy Goddelike gesag en daarom kan jy nie maar net sy opdragte wat gaan volg ignoreer nie. As jy dalk nog twyfel, Jesus bevestig hier Hy is die Seun van God. Hy is die Koning aan wie alle mag in die hemel en op die aarde gegee is.

Nou volg Jesus se opdrag in Mat. 29 v 19

maak die mense my dissipels

Dis die hoofopdrag wat Jesus aan sy volgelinge gee. Dit is hoe jy 'n verskil maak in die lewe. Stel Jesus aan die mense voor. Dink net daaraan hoe anders sou die wêreld gewees het as al die mense volgelinge van Jesus was, want 'n volgeling volg Jesus se voorbeeld na om lief te hê, om om te gee vir mense, om uit te reik na die nood in die wêreld. Hoe anders sou die wêreld gelyk het as almal lief was vir mekaar en soos Jesus geleef het?

Saam met hierdie opdrag verduidelik Jesus ook hoe mens te werk moet gaan om sy opdrag uit te voer, dit wil sê hoe maak mens dissipels.

Daar is drie aspekte daaraan verbonde:

Eerstens, “gaan na al die nasies toe.” Gaan uit. Moenie stilsit nie. Spring aan die werk.

Waar begin jy? Jy begin by jouself. Jy kan nie met oortuiging na ander toe gaan om hulle volgelinge van Jesus te maak as jy nie self 'n volgeling is nie. Aanvaar ek wie Jesus sê dat Hy is? Hy is die ewige Koning van hemel en aarde. Is ek bereid om myself aan sy gesag te onderwerp? Is ek bereid om te luister na en te doen wat Hy vir my sê om te doen?

Daarna gaan jy na jou huisgesin. Stel jy die voorbeeld vir jou gesin? Hoe tree jy teenoor jou vrou op? Hoe tree jy teenoor jou man op? Maak jy jou kinders volgelinge van Jesus? Lees julle saam Bybel? Bid julle saam? Bring jy jou kinders gereeld eredienste toe of wys jy vir hulle deur jou voorbeeld dat erediensbywoning nie belangrik is nie? Kom jy jou doopbelofte na?

Daarna gaan jy na jou groter huisgesin, jou broers en susters in die kerk. Ken jy jou broers en suster in die gemeente werklik? Of ken jy hulle maar net van sien af? Weet jy wat in hul lewens aangaan? Weet jy dat daar mense in ons gemeente is wat bitter eensaam is? Mense wat weens ouderdom en siekte nie meer kerk toe kan kom nie. Gesinne waar die vrou alleen is omdat haar man ver buite die grense moet werk. Het jy al besoek afgelê by die eensames? Het jy al aangebied om te hoor of daar iets is waarmee jy kan help?

Maak jy moeite om jou broers en suster wat deur beproewinge gaan te bemoedig? Bid jy vir hulle? Daar’s mense in ons gemeente wie se kinders oorsee is. Het jy al met hulle kontak gemaak om te hoor hoe dit met hulle kinders gaan? Kinders wat hier saam met ons groot geword het in die gemeente. Is jy bekommerd oor ons broers en susters wat weg raak? Wat het jy al gedoen om in liefde na hulle uit te reik?

Stel jy die vreemdelinge wat oor jou pad kom aan Jesus voor? Kan hulle Jesus se liefde in jou lewe raak sien?

Die tweede aspek wat Jesus noem oor hoe om dissipels te maak hoor ons in Mat. 28v19^b:

doop hulle in die Naam van die Vader en die Seun en die Heilige Gees

Met ander woorde hulle moet deel word van die kerk van Christus waarvan alle Christene deel is. Hulle word deel deur aan te sluit by 'n plaaslike gemeente waar broeders en suster in liefde mekaar ondersteun.

Weereens, eerstens die vraag aan jouself: “Is ek waarlik deel van die gemeente of is ek maar net deel in soverre my naam op 'n lidmaatregister is?” Het jy al iemand wat nie aan 'n kerk behoort nie uitgenooi om saam met jou 'n erediens te kom bywoon?

Die derde aspek wat Jesus noem oor hoe om dissipels te maak hoor ons in Mat. 28v 20^a:

leer hulle om alles te onderhou wat Ek julle beveel het.

Een van die belangrikste aspekte by onderrig gee is dat jy nie net vir iemand kan sê wat om te doen nie. Jy moet vir hom deur jou voorbeeld wys wat om te doen.

Hoe leer jy jou kinders? Kinders doen nie wat ons vir hulle sê om te doen nie. Hulle doen wat hulle ons sien doen.

Jesus sê vir ons in Mat. 11 v 28

“Kom na My toe, almal wat uitgeput en oorlaai is, en Ek sal julle rus gee.

Stel Jesus bekend aan mense. Moedig hulle aan om sy uitnodiging te aanvaar. Vertel vir hulle van die evangelie en wat die evangelie in jou lewe vir jou beteken het. Vertel vir hulle hoe die evangelie jou lewe verander het.

In Mat. 5 – 7 hoor ons die hoe Jesus die mense leer. Ons hoor byvoorbeeld in Mat. 5 16:

Laat julle lig so voor die mense skyn, dat hulle julle goeie werke kan sien en julle Vader wat in die hemel is, verheerlik.”

In Mat. 5:24b

maak eers vrede met jou broer en kom dan en bring jou gawe

En in Mat. 5v9 hoor ons:

Geseënd is die vredemakers,

want hulle sal kinders van God genoem word.

In Mat. 5v33 - 37 hoor ons dat jy nie 'n eed moet aflê nie want:

Laat julle ‘ja’ eenvoudig ‘ja’ wees en julle ‘nee’, ‘nee’. Wat meer gesê word as dit, kom van die Bose.”

In Mat. 5v44 hoor ons:

Maar Ek sê vir julle: Julle moet julle vyande liefhê, en julle moet bid vir dié wat vir julle vervolg,

Om maar net enkele voorbeelde te noem van wat Jesus ons beveel het.

In Mat. 22 v 37 – 40 som Jesus sy opdragte aan ons op:

“‘Jy moet die Here jou God liefhê met jou hele hart en met jou hele siel’ en met jou hele verstand. Dit is die grootste en die eerste gebod. En die tweede, wat hiermee gelyk staan, is: ‘Jy moet jou naaste liefhê soos jouself.’  In hierdie twee gebooie is die hele wet en die profete saamgevat.”

Saam met sy opdrag gee Jesus ook 'n belofte soos ons hoor in Mat. 28v20^b:

En onthou: Ek is by julle al die dae tot die voleinding van die wêreld.

Jesus begin deur sy Goddelike gesag te bevestig. Hy is die Koning wat tot in alle ewigheid sal regeer en dan sluit Hy af met hierdie belofte dat ons nooit alleen sal wees nie. Hy het na sy Hemelvaart vir ons die Heilige Gees gestuur as vertrooster.

God is met jou en sal jou nooit in die steek laat nie. In die swaarste aanvegtinge wat oor jou pad kom is Hy daar. Vertrou Hom wanneer Hy sê dat Hy jou nooit alleen sal laat nie. Ons grootste getuienis is juis wanneer ons vir die wêreld wys dat ons op God vertrou wanneer die lewe moeilik raak.

Geliefdes, hoe kan jy 'n verskil maak in die lewe? Stel mense aan Jesus voor. Wys hulle deur jou voorbeeld wat dit beteken om 'n volgeling van Jesus Christus te wees en watse verskil dit in jou lewe maak.

Amen

Waar vind jy skuilplek wanneer die lewensstorms dreig om jou te oorweldig?

Datum: 8 Mar. 2020 GKE

Lees:       Ps. 46

Teksvers: Ps. 46 v 11

Waar vind jy skuilplek wanneer die lewensstorms dreig om jou te oorweldig? Dwarsdeur die eeue het gelowiges hul troos in die Psalms gevind. Ons bely dat die Bybel die Woord van God is waarin Hy met ons praat. In die Psalms vind ons ook die stem gelowiges wat God antwoord by monde van die Psalmdigters.

In die Psalms word gelowiges se diepste emosies en versugtinge verwoord. Ons hoor hoe hul God loof en prys, maar ons hoor ook hoe hulle, hul diepste smart en vertwyfeling teenoor God uitstort. In die Psalms word God se Woord persoonlik, intiem, naby.

Ook hier in Psalm 46 vind ons 'n geweldige troos wat God se teenwoordigheid in jou lewe 'n werklikheid maak. Dit is een van die Sionsliedere. Psalms 46, 48, 76, 87 en 122 vorm deel van hierdie groep Psalms. Die tema van hierdie groep Psalms is die sentrale plek van Jerusalem in die volk se godsdiens en God se redding en bystand aan sy volk in hulle geskiedenis.

In Psalm 46 hoor ons dan ook hierdie lofsang wat verwoord hoe God sy volk beskerm en dat hulle veilig is by Hom. Die eerste reël van die berymde Psalm sê dit dan ook so treffend:

       God is 'n toevlug in die nood....

Hier teen die einde van die Psalm in vers 11 vind ons egter 'n reël wat so half in kontras is met die res van die lofsange in die Psalm:

Bedaar en erken dat Ek God is, hoog bo die nasies,

hoog bo die aarde.

In al die verse behalwe in vers 11 is dit die gelowige wat aan die woord is, maar hier in vers 11 praat God. Dit klink so amper asof Hy vermaan. Dit klink asof dit by 'n Psalm hoort waar die gelowige sy bekommernis en angs teenoor die Here bekla.

In hierdie antwoord van die Here spreek Hy 'n baie belangrike saak aan. Wanneer dit swaar gaan sal gelowiges dikwels bely dat God almagtig is en dat Hy in beheer is. Die probleem kom egter in by wat ek in my hart voel. Hier diep binne in my twyfel ek of God Homself regtig bemoei met my probleme. Ek is angstig en die bekommernis vreet my op.

'n Ander probleem is dat ons dikwels in ons versugtinge by die Here aandring dat Hy die moeilike tye van ons moet wegneem. Dat Hy die gesukkel met die finansies moet laat ophou. Dat Hy asseblief tog hierdie siekte moet wegneem.

Soms doen die Here dit ook inderdaad en neem Hy die oorsaak van my kommer weg en verander die situasie. Dit is egter ook so dat Hy baiekeer nie die probleem wegneem nie en dit juis dan dat die kommer ons begin opvreet.

Dink daaraan. Daar is een of ander omstandigheid in u lewe wat u bekommer en angstig maak. Elkeen van ons weet maar alte goed wat dit vir ons persoonlik is. En nou lees u Psalm 46.

God is vir ons ’n toevlug en ’n beskerming;

Hy was nog altyd bereid om te help in nood.

Hoe vind u troos in die woorde?

Kan u met eerlikheid saam met die Psalmdigter sê?

Daarom is ons nie bang nie, al gee die aarde pad,

al skuif die berge tot in die dieptes van die see,

al druis en skuim die waters van die see,

al skud die berge deur sy onstuimigheid.

Kan u met eerlikheid sê “daarom is ek nie bang nie?”

Die probleem is dat as u dit nie met eerlikheid kan sê nie, dan is daar geen troos in hierdie Psalm nie! Dan is dit eintlik maar net leë woorde.

Daarom is vers 11 so 'n belangrike deel van hierdie Psalm. Luister mooi na wat die Here antwoord op die lofsange van die Psalmdigter:

Bedaar en erken dat Ek God is, hoog bo die nasies,

hoog bo die aarde.

Die Hebreeuse woord wat met bedaar vertaal is, beteken letterlik, “los dit, laat gaan, hou op daarmee.”

Wat sê die Here hier vir ons? Hy sê vir ons “los jou bekommernis, laat dit gaan, hou op om te bekommer, bedaar nou.” Hy sê dat Hy as almagtige ware God ook jou bekommernisse kan hanteer.

En dan voeg Hy by “erken dat Ek God is, hoog bo die nasies,

hoog bo die aarde.” Hy sê vir ons dat Hy almagtig is. Hy is die enigste ware God wat die hemel en die aarde uit niks geskep het.

Daarom antwoord die Psalmdigter ook in vers 12 met:

Die Here, die Almagtige, is by ons,

die God van Jakob is vir ons ’n beskutting.

Kan u saam met die Psalmdigter bely dat die Here die Almagtige by u is? Hoekom sou ons dit kon sê? Op grond waarvan sal ons so 'n aanspraak kon maak?

Jy kan so 'n aanspraak maak op grond van God se liefde want Hy sê vir ons in Joh. 3 v 16-18:

“God het die wêreld so lief gehad dat Hy sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê. God het nie sy Seun na die wêreld toe gestuur om die wêreld te veroordeel nie, maar sodat die wêreld deur Hom gered kan word. Wie in Hom glo, word nie veroordeel nie; wie nie glo nie, is reeds veroordeel omdat hy nie in die enigste Seun van God glo nie.

Glo jy dat God jou so lief het dat Hy sy enigste Seun gestuur sodat jy die ewige lewe kan hê?

Geliefdes as jy dit glo, dan is die woorde van Psalm 46 nie maar net leë woorde nie. Dan kan jy met oortuiging sê dat God vir jou ook 'n toevlug in die nood is want die verhouding tussen jou en God wat as gevolg van sonde gebreek was, is nou herstel. Jy mag nou vir God sê Vader en daarom vertrou jy Hom ook.

Jy vertrou dat selfs as Hy jou nie uit die situasie haal wat jou so bekommer nie, dat Hy jou ook nie in die steek sal laat nie. Jy vertrou dat Hy jou daardeur sal dra selfs as die aarde pad gee en die berge tot in die dieptes van die see skuif, selfs al druis en skuim die waters van die see en al skud die berge deur sy onstuimigheid.

Jy vertrou dat God jou deur die lewensstorm sal dra wat hier om jou woed. Jy vertrou dat Hy jou sal dra deur die moeilike finansies. Jy vertrou dat Hy die pad saam met jou sal stap deur die siekte heen. Jy glo dat Hy daar is vir jou.

Jy glo dat selfs die dood jou nie van die liefde van Christus sal skei nie en dat die dood daarom vir jou geen verskrikking inhou nie.

Geliefdes, weet dat God vir jou 'n toevlug in die nood is. Weet dat Hy jou nooit in die steek sal laat nie. los daarom jou bekommernis, laat dit gaan, hou op om te bekommer, bedaar nou, want die Here die Almagtige is by jou. Die God van Jakob is vir jou 'n beskutting.

Amen