Die HERE sluit jou toe binne sy ark van veiligheid teen die storms van die lewe

 This medetation is also available in English

Die HERE sluit jou toe binne sy ark van veiligheid teen die storms van die lewe

Gen. 7 v 13 – 16

'Dit was die dag waarop Noag en sy seuns, Sem, Gam en Jafet, en sy vrou en sy drie skoondogters almal saam in die ark ingegaan het. Hulle, en elke soort wilde dier en mak dier, en al die soorte diere wat kruip, en elke soort voël, alles wat vlieg, het ingegaan. Van al wat leef, het daar pare-pare na Noag toe in die ark gekom. Hulle het ingekom, manlik en vroulik, soos God vir Noag gesê het. En toe het die HERE die ark agter Noag toegesluit.' (eie beklemtoning)

 Noag het die ergste storm in die geskiedenis van die mensdom in die gesig gestaar. Daar was net een moontlike uitkoms vir oorlewing. Hy moes 'n ark bou presies volgens die voorskrifte wat die HERE vir hom gegee het. En hy het dit gedoen soos ons hoor in Gen. 6 v 22: 'Noag het alles gedoen presies soos God hom beveel het.'

 Is dit omdat Noag alles gedoen het presies soos God hom beveel het, wat verseker het dat hy, sy gesin en al die diere veilig oorleef het? Nee. Die rede hoekom Noag en almal wat saam met hom op die ark oorleef het was omdat die HERE die ark agter Noag toegesluit het.

 Ons het 'n verantwoordelikheid wat ons nie mag nalaat nie, maar dit is die HERE wat ons veilig toesluit binne sy ark van veiligheid teen die storms van die lewe.

 Jy moet verantwoordelik lewe, maar onthou altyd, dit is nie die feit dat jy jou huis toegesluit het, wat jou snags veilig hou nie. Dit is nie jou goeie bestuursvernuf wat jou veilig op die pad hou nie en ook nie jou gesonde eetgewoontes wat jou gesond hou nie. Dit is net die HERE wat ons veilig toesluit binne sy ark van veiligheid teen die storms en gevare van die lewe.

 Hou vas aan die troos dat dit jou Vader in die hemel is wat jou veilig hou. Maar onthou ook dat jy Hom net Vader mag noem indien jy die evangelie glo dat Jesus Christus vir jou sondes gesterf het sodat jy met God versoen kan word.

 Kyk terug na hierdie jaar en besef hoeveel keer God jou gedra en gehelp het deur soveel dinge wat jy nie op jou eie sou kon doen nie. Onthou, dit is die HERE wat jou toesluit binne sy ark van veiligheid teen die storms van die lewe.

Amen

Soek jou beskerming by God wanneer die lewe dreig om jou te oorweldig.

Covid19 Afsondering bemoediging

Tema: Soek jou beskerming by God wanneer die lewe dreig om jou te oorweldig.

Skrif: Ps. 57 v 2

Wees my genadig, o God! Wees my genadig,

want by U soek ek skuiling.

Onder u vleuels sal ek skuil tot die bedreiging verby is.

Soos wat die tyd van afsondering aanstap begin die werklikheid van daarvan tot jou deurdring. Wanneer mens jouself in 'n situasie bevind waar jy nie eintlik in beheer is nie, kan dit meebring dat jy gevoelens van wanhoop en moedeloosheid begin ervaar. Veral wanneer die werklikheid van hoe hierdie situasie jou negatief gaan beïnvloed begin deurdring.

Daar is baie van ons wat heeltemal alleen is in hierdie tyd en dit kan tot gevolg hê dat jy eensaam en uitgesluit voel.

Waar kry jy krag vandaan om op te staan en die lewe in die oë te kyk wanneer dit vir jou voel of alles donker is om jou? Daar is baie bemoedigende boodskappe wat basies daarop neerkom dat jy beheer moet neem van jou lewe. Jy moet opstaan en die lewe in die oë kyk. Jy is die stuurman wat die rigting van jou lewensreis bepaal.

Die probleem kom in wanneer jy nie die krag of moed het om op te staan om die lewe in die oë te kyk nie. Wanneer dit vir jou voel of hierdie situasie jou in 'n donker gat gegooi het waaruit jy nie op jou eie kan uitklim nie.

Dit is nou maar eenmaal in die lewe so dat wanneer jy net op jouself staatmaak, sal jy vind dat jy een of ander tyd op 'n punt kom waar jy net nie meer kan nie. Op die uiteinde kort jy 'n bron van krag wat groter as jyself is.

Waar vind jy hierdie bron van krag?

Luister na wat sê die Here vir ons in Ps.  57 v 2

Wees my genadig, o God! Wees my genadig,

want by U soek ek skuiling.

Onder u vleuels sal ek skuil tot die bedreiging verby is.

Die psalmdigter maak gebruik van die beeld van 'n voël wat haar kuikens onder haar vlerke beskerm wanneer gevaar dreig. Net so beskerm God jou wanneer jy by Hom gaan skuiling soek.

Deur jou geloof in Jesus Christus as jou enigste Verlosser en Saligmaker kry jy die reg om by God skuiling te soek. Soek jou beskerming by God wanneer die lewe dreig om jou te oorweldig.

Amen