Wat is werklike liefde en hoe lyk dit?

 1 Joh. 4 v 7 tot 21  Teksverse 1 Joh. 4 v 9 - 10

 Sing

Ps. 18-1 v 1

Sb. 9-3 v 1 & 2

Ps. 119-1 v 19

Sb. 2-4 v 1 & 3

 Inleiding

Wat is werklike liefde? Liefde is ʼn abstrakte begrip en dit is nie maklik om dit te definieer nie. Die woordeboek gee ʼn definisie maar nog steeds nie ʼn bevredigende verduideliking nie. Om werklik te weet wat liefde beteken, is dit nodig om na die bron van liefde te gaan.

 In 1 Joh. 4 v 8 hoor ons

“Wie nie liefhet nie, het geen kennis van God nie, want God is liefde..”

Om dus werklik te verstaan wat liefde is, is dit nodig om God te leer ken. Ons kan God op twee maniere leer ken. Eerstens deur die grootsheid van die natuur is dit duidelik dat daar ʼn God is wat alles geskep het. Tweedens leer ons God persoonlik ken deur sy Woord. Derhalwe om ʼn antwoord te kry op ons vraag: “Wat is werklike liefde en hoe lyk dit?” is dit nodig dat ons, ons antwoorde in die Bybel soek.

 Dwarsdeur die Bybel hoor ons van God en liefde. Vandag staan ons stil by 1 Joh. 4 v 7 tot 21 om ʼn beter begrip te kry van wat liefde is en hoe dit lyk.

 Wat is liefde?

In 1 Joh. 4 v 10 hoor ons wat werklike liefde is:

Werklike liefde is dít: nie die liefde wat ons vir God het nie, maar die liefde wat Hy aan ons bewys het deur sy Seun te stuur as versoening vir ons sondes.

Weereens bevestig die Bybel dat God die Bron van liefde is, want liefde begin nie by ons nie, dit begin by God.

 En dan hoor ons wat liefde is. Ten diepste het liefde te doen met ʼn verhouding. Die verhouding tussen God en die mens en dan die onderlinge verhouding tussen mense. Ons hoor in die vers dat versoening nodig is omdat sonde ons verhouding met God gebreek het. Ten diepste is sonde die mens se rebelsheid wat weier om God se gesag te aanvaar.

 In 1 Joh. 4 v 9 hoor ons:

Híerin is God se liefde vir ons geopenbaar: sy enigste Seun het Hy na die wêreld toe gestuur sodat ons deur Hom die lewe kan hê.

Hier hoor ons dat die gevolg van die mens se sondige rebelse opstand teenoor God, die dood is. God wys sy liefde deur sy Seun na die wêreld toe te stuur om die straf van die dood op Hom te neem. Jesus het die dood wat ons verdien op Homself geneem. Omdat Jesus God is, is Hy magtiger as die dood. Jesus het die dood oorwin deurdat die Heilige Gees Hom uit die dood uit opgewek het. Jesus het die dood gevat en in die plek daarvan lewe gegee.

 In 1 Joh. 4:16^b hoor ons hoekom God die opoffering gemaak het:

God is liefde; wie in die liefde bly, bly in God en God bly in hom.

Omdat God die mens liefhet, het Hy van sy kant af die gebreekte verhouding wat die sonde veroorsaak het, reggemaak.

 In 1 Joh. 4 v 13 hoor ons dat die Heilige Gees vir ons God se liefde wys en in 1 Joh. 4 v 15 & 16 hoor ons dat ons deur geloof in Jesus deel het in die verhouding wat God uit liefde herstel het.

 Dit is wat ware liefde is, God wat van sy kant af die gebreekte verhouding tussen God en mens herstel het.

 Vandag wys die Here vir ons dmv die sakrament van die Heilige Nagmaal met die tekens van brood en wyn hoe Hy van sy kant af die gebreekte verhouding tussen God en mens herstel het.

 Hoe lyk ware liefde?

Ons hoor in 1 Joh. 4 v 7, 11 en 21 ons behoort mekaar lief te hê. Die liefde wat God vir ons gee behoort ook in ons lewens sigbaar te wees. Maar hoe lyk die liefde wat in ons lewens sigbaar behoort te wees?

 In 1 Joh. 4 v 9 & 10 hoor ons, liefde is opoffering. Nie net ʼn klein opoffering nie, nee dis ʼn opoffering wat alles vra. Jesus het sy lewe geoffer. Wanneer die Here dus vir ons sê dat ons mekaar behoort lief te hê, sê Hy vir ons dat ons opofferings vir mekaar moet maak. Ons behoort mekaar se belange op die hart te dra en nie toe te laat dat ons selfsug in die omgee vir mekaar se pad staan nie.

 In 1 Joh. 4 v 17 & 18 hoor ons dat vrees vir God se straf en oordeel nie deel is van God se liefde nie. God se liefde verseker jou dat jy nie meer hoef bang te wees vir die doodsheid van die sonde nie, want deur sy liefde het God vir jou lewe gegee.

 Liefde vra opoffering en werklike liefde beteken dat jy daardie opoffering doen omdat jy van jou kant af dit wil doen en nie omdat jy deur vrees gedwing word nie.

 Maar selfs hierin gee God vir ons die liefde wat Hy vra. Ons hoor in 1 Joh. 4 v 19:

Ons het lief omdat God ons eerste liefgehad het.

 God gee vir jou sy liefde. Vat sy liefde deur geloof, maak dit deel van jou lewe en leef God se liefde deur mekaar lief te hê.

 Kom ons sit nou aan by die tafel van die Here om deur die tekens van brood en wyn te sien hoe sy liefde lyk.

Amen 

Geseënd is die armes van gees wat treur

 

Geseënd is die armes van gees wat treur

Skriflesing: Mat. 5 v 1 – 12    Teksverse: Mat. 5 v 3 & 4

In Sondag 1 van die Heidelbergse Kategismus bely ons dat daar drie dinge is wat ons moet weet om getroos te word met die wete dat ons aan Jesus Christus behoort.

1. Ons moet weet dat ons verlore sondaars is sonder God.

2. Ons moet weet hoe ons verlos kan word deur te glo dat Jesus vir jou sondes aan die kruis gesterf het en dat Hy die dood oorwin het met sy opstanding.

3. Die derde ding is dat ons moet dankie sê vir ons verlossing.

Met Nagmaal is die fokus op die eerste twee dinge wat ons moet weet. Nagmaal troos ons met die wete dat ons op grond van Jesus se kruisdood verlos word van die vloek van die sonde.

Vandag fokus ons op die derde ding, naamlik, hoe moet ons dankie sê?

Die verkeerde manier om dankie te sê, is om te dink dat ons nou vir God moet wys hoe ʼn goeie lewe ons kan leef. Hoekom is dit verkeerd? Dit is verkeerd wanneer my fokus is op hoe ʼn goeie mens ek is. Veral wanneer ek begin neersien op die “sondaars” hier om my. Ons trap so maklik in daardie slaggat van die belangrikheid van die eie ek.

Die Fariseërs het daarop geroem oor hoe pligsgetrou hulle die wet nagekom het en dit is juis hulle wat Jesus die skerpste gekritiseer het. Die rede daarvoor is dat hulle hartsgesindheid op hulself gerig was. Hulle was hoogmoedig en het hulself beter as ander mense geag.

Dit sê vir ons dat ons dankbaarheidslewe baie meer moet wees as om net nougeset wettiese reëls na te kom. Hoe moet ons dankbaarheidslewe dan lyk?

Hier in die Bergrede (Mat. 5 – 7) hoor ons hoe ons dankie moet sê vir God se genade. Die Bergrede was Jesus se eerste uitvoerige toespraak, of preek. In die Bergrede verduidelik Jesus vir ons wat die Grondwet van die Koninkryk van God is.

Hier hoor ons wat ons Here van ons verwag in ons dankbaarheidslewe. Burgers van die Koninkryk van God is nie hooghartig en dink dat hulle beter is as ander mense nie. Burgers van God se Koninkryk is nie op hulself aangewese nie en weet dat hulle van God afhanklik is. Daarom begin Jesus die Bergrede ook met: “Geseënd is dié wat weet hoe afhanklik hulle van God is, want aan hulle behoort die koninkryk van die hemel.”

Dit is die uitgangspunt vir jou dankbaarheidslewe –

afhanklikheid van God.

Letterlik staan daar in Mat. 5:3 “Salig is die wat arm van gees is, want aan hulle behoort die koninkryk van die hemele.”

Armes van gees verwys nie hier na mense wat nie so baie verstand het of wat verstandelik vertraag is nie. Dit verwys na mense wat hulle saligheid buite hulself in Christus soek. Mense wat besef dat hulle in alles in die lewe afhanklik van God is. Wanneer jy besef dat jy hulpeloos en bankrot sonder God is, is jy arm van gees.

Om God se seën te ontvang moet jy arm van gees wees. Jy moet weet dat jy in jouself totaal en al fisies en geestelik hulpeloos is. Jy moet besef dat dit net God se genade is wat jou staande hou. Jy moet besef dat daar waar jy ‘goed doen’ dat dit God se liefde is wat in jou werk.

Geseënd is die armes van gees wat treur. Geseënd is die mense wat treur oor hulle ontoereikendheid. Geseënd is die mense wat treur oor hulle skuld, hulle mislukkings, hulle hulpeloosheid, hulle onwaardigheid en hulle leegheid.

Geliefdes, dit is eers wanneer jy arm van gees is, dit wil sê wanneer jy werklik besef hoe afhanklik jy van God is, dat jy vanuit sy genade kan leef.

Die geweldige troos wat die Here vir ons hier gee is dat jy ʼn burger van die Koninkryk van God is, wanneer jy arm van gees is. God seën die wat arm van gees is.

Om te besef hoe afhanklik jy van God is kom nie uit jouself nie. Dit is alleen wanneer jy deur die werking van die Heilige Gees daartoe gedring word dat jy jou afhanklikheid van God erken. Dit is die Heilige Gees wat jou gewillig maak om God se wil te doen. Dus wanneer jy sien dat jy besig is om God se wil te doen, weet dit is die Heilige Gees wat in jou werk.

Dit is eers wanneer jy besef hoe afhanklik jy van God is, dat jy die saligsprekinge wat op verse 3 en 4 volg jou eie kan maak.

Geseënd is die sagmoediges, want hulle sal die nuwe aarde ontvang.

Wat beteken dit om sagmoedig te wees? Dit beteken NIE om swak en toegeeflik te wees nie. Dit beteken om alle hoogmoed neer te lê en om jouself gewillig en vreugdevol in die mag van God oor te gee om deur die Heilige Gees gelei te word. Dit wil sê, jy laat jou wil buig en bestuur deur die wil van God.

Geseënd is dié wat honger en dors na wat reg is, want hulle sal versadig word.

Om afhanklik van God te wees beteken dat jy honger en dors na wat reg is. Met ander woorde, jy honger en dors na God se wet. Jy wil in liefde met jou naaste en met God saamleef.

Geseënd is dié wat barmhartig is, want aan hulle sal barmhartigheid bewys word.

Om in liefde met jou naaste saam te leef beteken om barmhartig te wees. Dit wil sê jy ontferm jou oor jou naaste en jy buig neer na sy ellende toe deur emosionele ondersteuning en ook om met fisiese middele te help. Barmhartigheid is om werklik om te gee en om iemand op te help wat geval het.

Geseënd is dié wat rein van hart is, want hulle sal God sien.

Om rein van hart te wees beteken dat jy jou begeertes in lyn bring met God se begeertes soos Hy dit vir ons in sy ewige woord openbaar. Om rein van hart te wees beteken om God se teenwoordigheid in jou lewe te begeer.

Die belofte wat hiermee gepaard gaan is dat ons God sal sien. In hierdie lewe kan ons God nie met ons oë sien nie, maar ons kan Hom met ons geloofs-oë sien. Wanneer jy besef hoe afhanklik jy van God is, sien jy sy genade in jou lewe raak. Hiermee saam is ook die belofte dat ons God sal sien na hierdie aardse lewe. Dis die belofte dat ons ewig saam met God sal wees.

Geseënd is die vredemakers, want hulle sal kinders van God genoem word.

Hierdie sewende saligspreking loop hand aan hand met die vorige een want die blom van vrede bloei alleen in die gereinigde hart.

Vrede begin by jouself. Wanneer jy weet hoe afhanklik jy van God is, ervaar jy God se vrede in jou gemoed en dit is hiervandaan waar vrede voortvloei na jou medemens.

In Spreuke 15 v 18 hoor ons:

'n Opvlieënde man sit 'n stryery aan die gang,
maar 'n geduldige mens bring 'n geskil tot bedaring.

Vredemakers sal kinders van God genoem word. Moenie dit misverstaan nie, geliefdes. Dis nie die aksie van vredemaak wat jou ʼn kind van God maak nie. Dis maar alleen jou geloof in Jesus Christus wat jou ʼn kind van God maak. Een van die kenmerke van die kinders van God is dat hulle vredemakers is.

Een ding moet kinders van God egter ook weet. Christene se lewens is radikaal anders en daarom kan hulle teenstand van die wêreld verwag. Die wêreld hou nie van mense wat radikaal anders is as die wêreld se waardesisteem nie.

Christene is van die begin af vervolg vir hul geloof en dit neem net in velheid toe. Vandag word meer Christene vervolg en doodgemaak vir hul geloof as in enige ander tyd in die geskiedenis.

Dink in julle gebede aan ons broers en susters wat ter wille van hul geloof verdruk en doodgemaak word. Staan sterk waar ons geloofwaardes aangeval en belaglik gemaak word. Dit is maar alleen wanneer jy weet hoe afhanklik jy van God is dat jy kan sterk staan in die geloof.

Geliefdes, die Koninkryk van God is nie vir sussies nie. Dit kos moed om hoed in die hand voor God te staan. Dit kos moed om jou eie geregtigheid te bely. Dit kos moed om die juk van die Koninkryk op jou skouers te neem en Jesus te volg.

Geseënd is die armes van gees wat treur.

Amen

 

Psalm 23

Lees ook Joh. 10 v 1-21 hiermee saam.

       Hoeveel troos het die mensdom nie al uit hierdie Herderspsalm geput nie? Dit is maar net ses versies lank, maar tog is daar genoeg rykdom in die inhoud daarvan om ’n hele lewensboek mee vol te maak. Psalm 23 is ’n persoonlike belydenis van Dawid se absolute vertroue in die HERE se sorg.

       In vers 1 stel Dawid sy absolute vertroue in die Here se sorg, in verse 2 tot 5 vertel Dawid wat daardie sorg van die Here behels en in vers 6 sê hy wat die gevolge van die Here se sorg is.

       Hierdie Psalm was vir Dawid ’n groot vertroosting. Hoe kan jy die vertroosting van Ps. 23 ook jou eie maak? Hoe kan jy ook met sekerheid sê die Here is my Herder en ek kom niks kort nie?

       Dit is alleen maar moontlik omdat daar ’n persoon was wat alles kortgekom het. Selfs sy enigste aardse besittings naamlik die klere aan sy lyf is onder die soldate uitgeloot.

       Hy het geen rus en vrede geniet in die groen weivelde langs die stille waters nie. Al wat Hy gekry het om sy dors mee te les was ’n klein bietjie bitter asynwater.

       Daar was vir Hom geen beskerming toe Hy deur die vallei van die dood moes gaan nie en in bange Godverlatenheid moes Hy uitroep :
’My God, My God, waarom het U my verlaat?”

  In Joh. 10v10b-11 sê die Here vir ons:

^10b Ek het gekom sodat hulle die lewe kan hê, en dit in oorvloed.

¹¹“Ek is die goeie herder. Die goeie herder lê sy lewe af vir die skape.

       Elkeen wat in Jesus Christus glo kan net soos Dawid ook troos vind in Ps. 23 soos die gelowiges trouens deur al die eeu al gedoen het. Hierdie troos is egter net vir diegene wat glo in Jesus Christus. As jy nie in Jesus Christus glo nie, kan jy geen aanspraak op die troos van Psalm 23 maak nie.

       In vers 1 begin Dawid met ’n persoonlike belydenis. Die Here is my Herder en daarom kom ek niks kort nie. Die enigste manier om hierdie belydenis ook op jou persoonlik van toepassing te maak is om te glo in die verlossingsdaad van Jesus Christus aan die kruis en dat Hy die dood oorwin het.

       Kan jy met volle vertroue en eerlikheid vanoggend saam met Dawid sê: Die Here is ook my Herder?

       As jy dit nie kan doen nie, dan het jy nog nie by die hek van die skaapkraal uitgekom nie. (vgl. Joh. 10v1)

Wie nie deur die hek in die skaapkraal ingaan nie maar van ’n ander kant af inklim, is ’n dief en ’n rower.

Dan is dit nodig dat jy die volle betekenis van

Joh. 10 v 7-9 moet leer ken:

⁷Toe het Jesus verder gesê: “Dit verseker Ek julle: Ek is die ingang vir die skape. ⁸Almal wat voor My gekom het, is diewe en rowers; maar die skape het nie na hulle geluister nie. ⁹Ek is die ingang; as iemand deur My ingaan, sal hy gered word. Hy sal in en uit gaan en weiding kry.     

In vers 2 beskryf Dawid die absolute rustigheid wat Hy ervaar in die teenwoordigheid van die Here:

Hy laat my neerlê in groen weivelde;

na waters waar rus is, lei Hy my heen.

In die teenwoordigheid van die Here is daar rus en vrede weg van die dolle gejaag van ons daaglikse lewens.

In vers 3 hoor ons hoe die Here aan Dawid nuwe lewe gee:

Hy verkwik my siel;

Hy lei my in die spore van geregtigheid, om sy Naam ontwil.

Hierna wys die Here vir Dawid wat die regte pad is sodat hy die nuwe lewe wat die Here vir hom gegee het, ten volle kan geniet.

       Geniet jy ook die rustige teenwoordigheid van die Here in jou lewe? Of is die sorge van die lewe vir jou soos die droë Vrystaatse grasstoppels wat in ’n erge droogte vasgevang is?

       Is jou lewe soos ’n rustelose Oranje rivier wat besig is om vloed af te kom? Verlang jy ook na die vrede en gemoedsrus van groen weivelde en die waters van rus by die Here?

       As jy nog nie by hierdie groen weivelde en stil rustige waters uitgekom het nie, moet jy vir ’n slag weereens luister na Jesus se uitnodiging in Mat. 11v28:

“Kom na My toe, almal wat uitgeput en oorlaai is, en Ek sal julle rus gee.

       In vers 4 sien ons hoe groot Dawid se vertroue in die Here werklik is. Selfs in die aangesig van uiterste lewensgevaar en selfs in die aangesig van die dood, vertrou Dawid die Here tot so ’n mate hy geen onheil vrees nie. Hy het ’n absolute vertroue daarin dat die Here hom teen elke gevaar en selfs teen die dood sal beskerm.

Al gaan ek ook in ’n dal van doodskaduwee, ek sal geen onheil vrees nie; want U is met my: u stok en u staf dié vertroos my.

       Kan jy ook soos Dawid met sekerheid sê dat geen onheil jou sal tref wanneer jy deur donker dieptes gaan?

       Is jy ook seker van die Here se teenwoordigheid te midde van die skadu’s van die lewe wat oor ons hang?

       Volg jy die leiding van ons Herder wanneer jy in die werklikheid van siekte vaskyk, veral daardie siektes waar daar geen werklike genesing voor is nie?

       Vind jy skuiling by die Here wanneer jou huwelik deur hewige storms geteister word?

       Vind jy vertroosting by die Here wanneer jy met die dood gekonfronteer word?

       Het jy vrede met u eie sterflikheid? Verstaan jy dat jy nie meer vir die dood hoef bang te wees nie? Verstaan jy dat die dood vir die wat glo nie meer `n verskriklike einde is nie, maar dat dit `n heerlike deurgang is na die volgende fase waar jy ewig saam met God sal wees?

Indien jy nog twyfel, moet jy weer by Joh. 10v10^b  uitkom:

       Ek (Jesus) het gekom sodat julle die lewe kan hê, en dit in oorvloed.

Dan is dit nodig dat jy presies moet verstaan wat Jak. 1v2 vir jou beteken:

My broers, julle moet baie bly wees wanneer allerlei beproewings oor julle kom

       Dan is dit nodig dat jy verstaan dat die Here nie noodwendig die moeilike tye in die lewe van ons af weghou nie, maar dat Hy ons in alle omstandighede nooit alleen laat nie.

       Jy moet verstaan dat Jesus bange Godverlatenheid ervaar het sodat elkeen wat in Hom glo nooit deur God verlaat sal word nie.

Dan sal jy ook in vertroue die Here kan volg vgl. Joh. 10v40:

Wanneer hy al sy skape uitgebring het, loop hy voor hulle uit, en die skape volg hom, omdat hulle sy stem ken.

In vers 5 sien ons dat Dawid nie alleen net vertrou dat die Here vir hom rus sal gee en hom sal beskerm teen gevaar nie. Hy vertrou ook dat die Here vir hom sal sorg in oorvloed.

U berei die tafel voor my aangesig teenoor my teëstanders;

U maak my hoof vet met olie; my beker loop oor.

Beleef jy ook die oorvloed van God se genade in jou lewe?

Verstaan jy hoe groot sy genade vir ons werklik is?

Verstaan jy dat daar niks in hierdie lewe is wat ons kan doen om die Here meer van ons te laat hou nie? Of dat daar ook niks is wat ons kan doen dat Hy minder lief vir ons sal wees nie?

Besef jy dat jy met jou goeie werke niks van God se guns kan verdien nie?

       As jy nog sukkel om uit die oorvloed van God se genade te leef dan is dit nodig dat jy weer eens God se vertroosting van Ef. 2v8-10 jou eie moet maak:

⁸Julle is inderdaad uit genade gered, deur geloof. Hierdie redding kom nie uit julleself nie; dit is ’n gawe van God. ⁹Dit kom nie deur julle eie verdienste nie, en daarom het niemand enige rede om op homself trots te wees nie. ¹⁰Nee, God het ons gemaak wat ons nou is: in Christus Jesus het Hy ons geskep om ons lewe te wy aan die goeie dade waarvoor Hy ons bestem het.

In vers 6 bely Dawid dat dit in die teenwoordigheid van die Here net goed met hom sal gaan, selfs wanneer hy in gevaar is en dat die Here op grond van sy troue verbondsliefde vir hom sal sorg.

Net goedheid en guns sal my volg al die dae van my lewe;

en ek sal in die huis van die HERE bly in lengte van dae.

Is jy seker van jou ewige bestemming of twyfel u soms daaroor?

Indien jy nog twyfel, is dit nodig dat jy weereens seker maak van die vaste sekerheid wat die Here vir ons in sy Woord gee vgl. byvoorbeeld Hand. 16v31:

“Glo in die Here Jesus, en jy sal gered word, jy en jou huisgesin.”

of Rom. 5 v 9-10 om maar net enkele voorbeelde te noem:

⁹Aangesien ons nou vrygespreek is op grond van sy versoeningsdood, staan dit soveel vaster dat ons deur Hom ook van die straf van God gered sal word. 

¹⁰ Aangesien ons, toe ons nog vyande was, deur die dood van sy Seun met God versoen is, staan dit soveel vaster dat ons, noudat ons versoen is, deur die lewe van sy Seun gered sal word. 

As jy aan die soenverdienste van Jesus Christus vashou met die geloof wat God gee, kan jy ook met sekerheid weet dat Open. 21v3 vir jou waar sal wees, nou in hierdie bedeling en ook in die toekomstige bedeling na die wederkoms van ons Here:

Toe het ek ’n harde stem van die troon af hoor sê: “Kyk, die woonplek van God is nou by die mense. Hy sal by hulle bly; hulle sal sy volke wees, en God self sal by hulle wees as hulle God.

Dan sal jy ook saam met Dawid kan bely:

ek sal in die huis van die HERE bly in lengte van dae.

Is die HERE jou Herder?

Amen

  

Jesus het regtig opgestaan

Heidelbergse Kategismus - SONDAG 17

45  Vraag: 

Watter nut het die opstanding van Christus vir ons?

Antwoord: 

Ten eerste het Hy deur sy opstanding die dood oorwin sodat Hy ons die geregtigheid wat Hy deur sy dood verwerf het, deelagtig kon maak (a). 

Ten tweede word ons nou ook deur sy krag tot 'n nuwe lewe opgewek (b). 

Ten derde is die opstanding van Christus vir ons ’n betroubare waarborg van ons salige opstanding (c).

(a) Rom. 4:25;  1 Pet 1:3;  1 Kor. 15:16.  (b) Rom. 6:4;  Kol 3:1, 5;  Ef. 2:5, 6.  (c) 1 Kor. 15:20, 21.

 

Het Jesus regtig opgestaan? Reeds van die begin af word daar twyfel gesaai oor Jesus se opstanding. Net na Jesus se opstanding het die priesterhoofde en familiehoofde alreeds saamgesweer om Jesus se opstanding te ontken. Hulle het vir die soldate wat getuies van die opstanding was ’n groot som geld gegee en gesê: “Julle moet sê: ‘Sy dissipels het in die nag gekom en sy liggaam gesteel terwyl ons geslaap het’.” En getrou aan die sondige aard van die mens het die wagte toe die geld gevat en gemaak soos hulle voorgesê is.

       Vandag nog is daar baie mense wat skepties is oor Jesus se opstanding. Volgens sekulêre denke van ons tyd word verklaar: “Die wetenskap en ons ervaring het bewys: dood is dood en klaar!” Daarom kan die opstanding van Jesus Christus nie as ’n werklikheid, as ’n historiese feit, aanvaar word nie. Dit pas gewoon net nie in hul denkraamwerk in nie. Daarom word dit as ’n mite en ’n legende afgeskryf.

       Selfs mense wat hulself steeds Christene noem verklaar dat Jesus nooit werklik opgestaan het nie. Dit word hoogstens as ’n simbool beskou wat vir ons sê: “Hy leef in my hart”, of “Ek ontmoet Hom in die prediking.” Mens kan maar net wonder wat die inhoud van sulke prediking is? So word ’n gees van skeptisisme gesaai wat selfs opregte gelowiges kan begin laat wonder of Jesus werklik opgestaan het?

       Die probleem daarmee is dat twyfel in die opstanding van Jesus inderdaad twyfel in die wese van ons Christelike geloof is. Die Christelike geloof staan of val by die werklikheid dat Jesus waaragtig uit die dood opgestaan het! As Christus egter in die dood vasgehaak het onstaan die vraag: “hoe moet mens die bestaan en voortbestaan van die kerk verklaar?” Sonder die opstanding is ons geloof waardeloos soos ons inderdaad ook in 1 Kor. 15:17-19 hoor:

En as Christus nie opgewek is nie, is julle geloof waardeloos en is julle nog gevange in julle sondes. Dan is ook dié wat in Christus gesterf het, verlore. As ons net vir hierdie lewe ons hoop op Christus vestig, is ons die bejammerenswaardigste van alle mense.

        As Christus nie opgestaan het nie, dan is alles wat ons hier as kerk saam doen tevergeefs. Dis tevergeefs dat ons, ons kinders laat doop. Dis tevergeefs dat ons eredienste bywoon. Dis tevergeefs dat ons enigsins as kerk bestaan.

       Wat maak ons dan met die aanklag dat ons as Christene maar net ’n blinde geloof het wat teen al die bewyse die onmoontlike en onlogiese glo? As gelowiges glo ons inderdaad dat dit ’n historiese feit is dat Jesus uit die dood opgestaan het, want die Woord van God laat hoegenaamd geen twyfel hieroor nie. Volgens die Bybel is die Opstanding ’n feit. Dit het werklik gebeur.

       Dwarsdeur die Nuwe Testament weerklink dit: Die Here het regtig opgestaan! As mens dit nie wil aanvaar nie, watter geloofwaardigheid het die res van die Nuwe Testament of die Bybel nog? Watter sin sou dit in elk geval maak om ’n dooie Heer en Meester te verkondig of tot Hom te bid, as Hy tog nie kan hoor nie?

       Ten spyte van ’n aanklag van ’n irrasionele onlogiese geloof teen alle bewyse in, maak ons geloof in die historiese opstanding juis sin omdat dit die beste verduideliking gee vir die feite rondom dit.

       Die eerste historiese feit rondom die saak is die leë graf van Jesus. Byna al die erkende navorsers aanvaar die leë graf as ’n historiese feit wat deur die getuienis daaroor bevestig word. Enkele van hierdie getuienisse is byvoorbeeld die feit dat die opstanding verkondig is in die stad waar dit plaasgevind het. As die graf nie leeg was nie sou hierdie verkondiging geen geloofwaardigheid gehad het nie.

       ’n Volgende getuienis is dat die Jode wat teen Jesus was, erken het dat die graf leeg was en daarom het hulle die wagte omgekoop om die storie te versprei dat Jesus se liggaam gesteel was soos ons hoor in Mat 28 : 11-15. Dit word ook bevestig in vroeë Joodse geskrifte. Daar is ook bewyse dat selfs in die tweede eeu NC die Jode nog steeds erken het dat die graf leeg was en dat hulle allerlei verskonings gehad het om te verduidelik hoekom.

       Die leë graf het nie juis in hulle guns getel nie, maar tog het hulle dit erken omdat die bewyse daarvoor onomstootlik moes gewees het. As daar nie ’n leë graf was nie, sou dit hulle saak versterk en sou hulle dit beslis as argument ter verdediging van hulle teenstand gebruik het.

       Markus se weergawe van die leë graf en opstanding dateer so ver terug as net 7 jaar NC. Die beskrywing van Josef van Arimethea as die een wat Jesus begrawe het bevestig Markus se verhaal want hy was ’n bekende in die Joodse samelewing van sy tyd en daarom sal Markus nie valse berigte oor hom kon versprei nie. Dit sal dadelik deur die mense van sy tyd as vals uitgewys gewees het.

       Verder is dit ook so dat die vroeë datering van die Evangelie volgens Markus daarop wys dat daar nie genoegsame tyd verloop het vir legendes om te ontwikkel het nie. Legendes onstaan eers baie lank (eeue) na die gebeure waaroor die legende gaan.

       Jesus het eerste aan die vroue verskyn soos ons hoor in al vier die Evangelies. In daardie tyd het vroue se getuienis nie getel nie. Hulle mag nie eers as getuies in die hof getuig het nie. As die verhaal van Jesus se opstanding ’n mite was sou vroue nooit as eerste getuienisse voorgehou gewees het nie, want hulle getuienis het dan geen waarde gehad nie.

       Die feit dat Hy eerste aan die vroue verskyn het, is nog ’n verdere bewys van die historiese akkuraatheid van die opstandingsverhaal. Dit is ook die bewys dat Jesus die volle waardigheid van vroue in die samelewing herstel.

       So is daar nog baie vaste bewyse dat Jesus se graf leeg was en die opstanding van Jesus gee die beste verduideliking vir die historiese feit dat Jesus se graf leeg was.

       Nog enkele bewyse is die feit van die dissipels se prediking. As hulle Jesus se liggaam gesteel het sou hulle geweet het dat hulle ’n leun verkondig. Hulle prediking het daartoe gely dat hulle vervolg en gemartel is en selfs doodgemaak is. Hoekom sou hulle dit verduur het om ’n leuen te verkondig?

       Hierdie bewyse is nie die basis van ons geloof nie. Ons baseer nie ons geloof op historiese feite nie. Ons glo omdat die Heilige Gees ons oortuig dat die Skrif die waarheid is. Bogenoemde bewyse bevestig egter dat ons geloof nie irrasioneel of onsinnig is nie. Inderdaad gee ons geloof die beste verduideliking vir die historiese feite wat daar oor Jesus se opstanding is.

 Waarom is die opstanding van Jesus Christus so belangrik? Hoekom maak dit saak? Wat beteken dit vir elke gelowige se lewe?

       Die Opstanding bevestig dat Jesus se aanspraak dat Hy God is, waar is. As Jesus as ’n dooie in die graf agtergebly het sou dit onsinnig wees om sy aanspraak dat Hy God is te glo. Maar omdat Hy werklik opgestaan het sal dit dwaas wees om nie te glo dat Jesus God is nie. Inderdaad bevestig die Opstanding dat dit wat Jesus oor Homself gesê het, naamlik dat Hy ten volle God en mens is, die waarheid is.

       Is daar enigsins rede om te glo dat die Bybel waar is? Of is die Bybel maar net outydse mites en legendes? As Jesus opgestaan het bevestig dit dat Hy God is.

       As Hy God is dan is sy uitsprake ten opsigte van die Bybel waar en gesagvol. Daarom moet die Bybel die waarheid wees en daarom kan ons glo dat die Bybel waar is en dat dit deur God as sy openbaring geïnspireer is. Daarom kan ons sonder twyfel vashou aan God se beloftes van hoop in die Bybel.

       Ons Here leef en daarom is ons godsdiens nie ’n terugkyk nie, maar is dit inderdaad ’n toekomsperspektief. Ons kan die enigste lewende God ken en ons lewenspad vorentoe saam met Hom stap.

       Ons is nie alleen in die lewe nie en daarom bely ons ook dat Jesus die straf van die sonde naamlik die dood oorwin het en dat ons inderdaad deel in sy geregtigheid. Ons kan die Skrif glo dat ons op grond van Jesus se kruisiging en opstanding voor God staan asof ons nooit enige sonde gedoen het nie. Jesus het vir al ons sondes ten volle betaal en daardeur word die wortel van die dood afgesny.

       Ons bely ook verder dat Hy deur sy krag ons tot ’n nuwe lewe opgewek het. Ons is nie meer vasgevang in die negatiewe van die sondige wêreld nie. Ons is nie meer gevangenis van die haat, onmin, verdeeldheid, vyandskap en al die negatiewe dinge van die lewe nie.

       Ons het nou deel aan die ware lewe waarin liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing deel is van ons lewe. Ons kan deel hê aan die positiewe in die lewe te midde van die hartseer gevolge van die sonde waarin die wêreld nog vasgevang is. Ons kan bo dit uitstyg.

       Ons bely ook dat sy dood en opstanding ook ons dood en opstanding is. Die dood is nie meer iets wat ons vrees nie en die verskrikking en hopeloosheid wat die dood gehad het, het nie meer ’n houvas op ons nie. Die dood is nie meer ’n koning van verskrikking nie, maar ’n deurgang tot die ewige lewe.

       Met Paasfees herdenk ons in besonder die kruisdood en opstanding van ons Here. Dit is egter nie iets wat net tot een maal ’n jaar beperk is nie. Jesus se opstanding het ’n effek op elke dag van ons lewe en daarom herdenk ons inderdaad elke Sondag sy opstanding waar ons, ons krag vandaan kry om die lewe wat Hy met sy opstanding vir ons gegee het, te gaan lewe.

       Jesus se opstanding is `n geweldige troos vir elke Christen. Dit verseker ons dat Christus die straf vir ons sondes met sy kruisdood gedra het sodat ons vlekkeloos voor God staan asof ons nooit enige sonde gedoen het.

       Jesus se opstanding is vir ons `n troos omdat dit ons opwek tot `n nuwe lewe waar ons nie meer slawe van die sonde is nie.

       Jesus se opstanding is vir ons `n troos omdat dit ons waarborg dat ons nie vir die dood bang hoef te wees nie. Dit verseker ons dat die dood maar net `n salige deurgang is om ewig saam met God te wees.

       Jesus se opstanding is egter net `n troos vir diegene wat waarlik glo dat Hy aan `n vervloekte kruishout gesterf het, maar verder ook dat Hy die dood oorwin het met sy opstanding.

     Glo jy dit geliefdes? 

    Glo jy dat Glo dat Hy vir jou sondes aan `n vervloekte kruishout gesterf het? 

    Glo jy dat Hy uit die dood opgestaan het?

Amen

 

 

Jesus se opstanding waarborg dat ons waarlik léwe, nou en in die toekoms.

3Die belangrikste wat ek aan julle oorgelewer het en wat ek ook ontvang het, is dit: Christus het vir ons sondes gesterf, volgens die Skrifte; 4Hy is begrawe en op die derde dag opgewek, volgens die Skrifte.

Heidelbergse Kategismus Sondag 17

45  Vraag:  Watter nut het die opstanding van Christus vir ons?

Antwoord: 
Ten eerste het Hy deur sy opstanding die dood oorwin sodat Hy ons die geregtigheid wat Hy deur sy dood verwerf het, deelagtig kon maak (a). 

Ten tweede word ons nou ook deur sy krag tot 'n nuwe lewe opgewek (b). 

Ten derde is die opstanding van Christus vir ons ’n betroubare waarborg van ons salige opstanding (c).

(a) Rom. 4:25;  1 Pet 1:3;  1 Kor. 15:16.  (b) Rom. 6:4;  Kol 3:1, 5;  Ef. 2:5, 6.  (c) 1 Kor. 15:20, 21.

Inleiding

Met Paasfees herdenk ons in besonder die kruisdood en opstanding van ons Here. Dit is egter nie iets wat net tot een maal ’n jaar beperk is nie. Jesus se opstanding het ’n effek op elke dag van ons lewe en daarom herdenk ons inderdaad elke Sondag sy opstanding waaruit ons, ons krag vandaan kry om die lewe wat Hy met sy opstanding vir ons gegee het, te gaan lewe.

 Wat beteken dit vir ons dat Christus opgestaan het?

Ons bely elke Sondag:

Christus het vir ons sondes gesterf, volgens die Skrifte; Hy is begrawe en op die derde dag opgewek, volgens die Skrifte.

Maak hierdie belydenis enigsins ’n verskil in ons lewens?

 Die vraag by Sondag 17 van die Heidelbergse Kategismus is:

Watter nut het die opstanding van Christus vir ons?

Dit beteken doodeenvoudig: “Maak Christus se opstanding ’n verskil in my lewe?”

 In 1 Kor. 15 v 14 hoor ons wat die gevolge is as Christus nie opgestaan het nie:

En as Christus nie opgewek is nie, is ons prediking sonder inhoud en julle geloof ook sonder inhoud.

As Christus nie opgestaan het nie, dan is ons almal besig om vanmore ons tyd te mors. Dan kan ons maar net sowel die kerkdeure toesluit en iets anders gaan doen. Dan help dit nie dat ons Bybellees en bid nie. Dan het ek 15 jaar van my lewe vermors om te gaan studeer en predikant te word. As Christus nie opgestaan het nie, dan was al die tyd en moeite wat ons as kerk van die Here daaraan bestee het tevergeefs!

 Die Christendom staan of val by die opstanding van Jesus Christus.

In 1 Kor. 15 v 17 tot 19 hoor ons:

as Christus nie opgewek is nie, is julle geloof waardeloos en is julle nog gevange in julle sondes. Dan is ook dié wat in Christus gesterf het, verlore. As ons net vir hierdie lewe ons hoop op Christus vestig, is ons die bejammerenswaardigste van alle mense.

Jesus Christus se opstanding is een van die kern aspekte van ons geloofslewe en daarom MOET dit ’n verskil in ons lewens maak.

In 1 Kor. 15 v 20 hoor ons hoe Paulus triomfantlik uitroep:

Maar nou, Christus is opgewek uit die dood, as eersteling uit dié wat gesterf het.

Omdat die Here dit vir ons in sy lewende Woord sê, weet ons dat Christus se opstanding ’n verskil in ons lewens KAN maak!

 Watter verskil maak Jesus Christus se opstanding in jou lewe?

Daar is drie areas wat ons hele lewe omvat, naamlik die lewe wat agter ons lê (my verlede), die lewe vorentoe (die toekoms hier op aarde) en dit wat na die dood vir ons voorlê. In Kort kan ons sê: “Jesus se opstanding waarborg dat ons waarlik léwe, nou en in die toekoms!”

 Die eerste groot voordeel wat Christus se opstanding inhou is:

My verlede het nie meer ’n houvas op my nie!

Die mens is ’n slaaf van sy verlede. Dit wat in my verlede gebeur het is dikwels die tronk wat my vashou en keer dat ek die wonderlike geleenthede wat voor my lê kan aangryp. Elke verkeerde ding wat ek in die verlede gedoen het en elke verkeerde ding wat met my gebeur het, is soos slawekettings wat my vasbind en vashou. Dit bind my vas aan alles wat sleg en verkeerd is in hierdie lewe. Dit bind my vas aan my sondige natuur sodat ek nie daarvan kan loskom nie.

 In Gal 5 v 19 & 20 hoor ons ’n paar voorbeelde van so ’n sondige natuur:

Die praktyke van die sondige natuur is algemeen bekend: onsedelikheid, onreinheid, losbandigheid, afgodsdiens, towery, vyandskap, haat, naywer, woede, rusies, verdeeldheid, skeuring, afguns, dronkenskap, uitspattigheid en al dergelike dinge.

My sondige verlede keer dat ek loskom van verkeerde begeertes wat dan aanleiding gee tot onsedelikheid, onreinheid, losbandigheid.

 My sondige verlede gee aanleiding tot afgodsdiens en towery, dit wil sê ek vertrou op iets of iemand anders as die lewende God om my deur die lewe te help. Ek vind dit onmoontlik om by God troos te vind en ek probeer maar self regkom met die gevolg dat ek in absolute moedeloosheid verval elke slag as daar iets in my lewe gebeur wat nie goed is nie.

 Ek kry nie reg om die mense in my verlede te vergewe nie en daarom is vyandskap, haat, naywer, woede, rusies, verdeeldheid, skeuring en afguns deel van my lewe.

 My sondige verlede bind my vas aan dronkenskap en uitspattigheid. Dit maak dat mense hulle dronk drink om byvoorbeeld ’n geleentheid te vier. Dit maak dat kinders aand vir aand in kuierplekke rondhang sodra hulle onder hul ouers se toesig uit is.

 Jesus se opstanding maak ons los van hierdie sondes wat keer dat ons werklik die lewe leef wat God vir ons beplan het.

In 1 Kor. 15 v 22 sê die Here vir ons:

Net soos almal deur hulle verbondenheid met Adam sterf, so sal almal in Christus lewend gemaak word.

 Daarom bely ons ook:

Die Here het deur sy opstanding die dood oorwin sodat Hy ons die geregtigheid wat Hy deur sy dood verwerf het, deelagtig kon maak

Dit beteken eenvoudig dat die sonde in ons verlede geen houvas op ons het nie en dat ons nie meer voor God skuldig staan daaroor nie omdat Christus met sy opstanding die dood oorwin het en daarmee het Hy die straf vir die sonde (die dood) ten volle betaal.

 Die eerste ding wat Christus se opstanding in my lewe verander is dat my sondige verlede nie meer ’n houvas het op my nie.

 Die tweede voordeel wat Christus se opstanding inhou is:

Ek kan nou die lewe leef wat God vir my beplan het.

In 1 Pet 1v3 hoor ons

Aan God, die Vader van ons Here Jesus Christus, kom al die lof toe! In sy groot ontferming het Hy ons die nuwe lewe geskenk deur die opstanding van Jesus Christus uit die dood.

Die tweede groot verandering wat Christus se opstanding in my lewe teweeg bring is dat ek nou ’n nuwe lewe het. Daarom is onsedelikheid, onreinheid, losbandigheid, afgodsdiens, towery, vyandskap, haat, naywer, woede, rusies, verdeeldheid, skeuring, afguns, dronkenskap en uitspattigheid nie meer deel van my lewe nie.

 In die plek van hierdie sondige lewe waaraan ek verslaaf was het ek nou ’n nuwe lewe en daarom is die vrug van die Gees ook deel van my lewe.

In Gal 5 v 22 hoor wat die vrug van die Gees is:

Die vrug van die Gees, daarteenoor, is liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing.

My lewe word deur vreugde en vrede gekenmerk. Ek is dankbaar teenoor die Here wanneer dit goed gaan met my. Ek beleef die Here se seën in die groot en klein dinge in my lewe. Wanneer ek byvoorbeeld in die oggend wakker word is ek dankbaar teenoor die Here dat ek nog ’n dag het om te lewe. Wanneer die beproewings in die lewe soos siekte en al die ander moeilikhede wat ons in die lewe ervaar, oor my pad kom, dan is ek geduldig en blymoedig omdat ek weet dat die Here my nie in die swaarkry dae verlaat nie. Inteendeel ek ervaar hoe die Here my deur die swaarkry dae dra.

 My lewe word gekenmerk deur vriendelikheid, goedhartigheid, getrouheid, nederigheid en selfbeheersing. Ek dra nie wrokke en bitterheid in my rond nie en ek kry reg om na die Here te luister wanneer Hy in Kol 3 v 13 vir my sê:

Wees geduldig met mekaar en vergewe mekaar as die een iets teen die ander het. Soos die Here julle vergewe het, moet julle mekaar ook vergewe.

 In kort vind ek dit al hoe makliker om die Here se liefdesopdrag in sy wet na te kom. Wanneer ek struikel en val dan vind ek vergifnis en verlossing by Jesus en sy opstanding.

 Die tweede verandering wat Jesus se opstanding in ons lewens teweeg bring is dat ons nou die lewe kan leef wat God vir ons beplan het en daarom bely ons ook dat ons nou deur sy krag tot 'n nuwe lewe opgewek is.

 Die derde voordeel wat Jesus se opstanding vir ons inhou is:

Ons het ’n lewende hoop waaraan ons vashou

Daar is een ding in die lewe waarvan ons seker is, naamlik dat elkeen van ons een of ander tyd gaan doodgaan. Vir baie mense is daar egter saam met hierdie sekerheid ook ’n groot onsekerheid omdat hulle nie weet wat gaan van hulle word nie.

 Christene wat met geloof vashou aan Christus se opstanding het nie laasgenoemde onsekerheid nie omdat ons ’n vaste hoop het waaraan ons vashou. In 1 Kor. 15 v 53 & 54 hoor ons:

Hierdie verganklike liggaam moet met die onverganklike beklee word, en hierdie sterflike liggaam met die onsterflike. En wanneer hierdie verganklike liggaam met die onverganklike beklee is, en hierdie sterflike liggaam met die onsterflike, dan sal die woord wat geskrywe staan, vervul word: “Die dood is vernietig, die oorwinning is behaal.”

 Ons hoef nie meer bang te wees vir die dood nie omdat ons ’n lewende hoop het. Vir die Christen wat met geloof vashou aan Jesus se opstanding is die dood nie die einde nie, maar slegs ’n heerlike deurgang na die volgende bedeling waar ons ewig saam met God sal wees, verlos van die elende en hartseer van hierdie wêreld. Daarom bely ons ook dat die opstanding van Christus vir ons ’n betroubare waarborg van ons salige opstanding is.

 Slot

Die opstanding van Christus is die belangrikste aspekte van ons geloofslewe wat ons lewens drasties verander.

In die eerste plek beteken dit
       my sonde verlede het nie meer ’n houvas op my nie.

In die tweede plek beteken dit
       ek kan nou hiervandaan vorentoe die lewe vol liefde leef
       wat God vir my beplan het.

In die derde plek beteken dit
       ons hoef nie meer vir die dood bang te wees nie,
       want ons het ’n lewende hoop om ewig saam met God te wees
       sonder hartseer, dood of pyn.

 As hierdie lewensverandering nog nie deel is van jou lewe is nie, kom na Jesus Christus toe en neem sy uitnodiging aan wat Hy in

Mat 11 v 28 aan ons rig:

“Kom na My toe, almal wat uitgeput en oorlaai is, 
    en Ek sal julle rus gee."

Glo in Jesus.

Glo dat Hy vir jou sondes aan `n vervloekte kruishout gesterf het.

Glo dat Hy opgestaan het.

 Hou in geloof vas aan die verlossing wat Jesus met sy kruisiging en opstanding vir jou gegee het en leef die nuwe lewe vol liefde wat Christus vir jou gee, want

Jesus se opstanding waarborg
   dat ons waarlik léwe, nou en in die toekoms!

Amen