Gebed 12 - Onse Vader

 

'n Reeks oordenkings oor gebed

These medetations are also available in English

Die 1ste oordenking: Gebed 01 - Hoekom moet 'n gelowige bid

Die vorige oordenking: Gebed 11 - Aan U behoort die koninkryk en diekrag en die heerlikheid tot in ewigheid – Amen

Hierdie is die laaste oordenking oor die reeks oor gebed

Gebed 12

Onse Vader

 

Onse Vader wat in die hemel is.

U is deur Christus ons Vader en daarom kom ons in geloofsvertroue na U toe met die wete dat U ons gebed verhoor en dat U in U almag in alles vir ons sal sorg wat ons vir liggaam en siel nodig het.

 

Laat u Naam geheilig word.

Help ons om U reg te ken sodat ons U kan heilig, roem en prys in al u werke waarin u almag, wysheid, goedheid, geregtigheid, barmhartigheid en waarheid so skitter.

Gee verder dat ons, ons hele lewe, gedagtes, woorde en werke daarop sal rig dat u Naam nie om ons ontwil gelaster word nie, maar geëer en geprys word.

 

Laat u koninkryk kom. 

Regeer ons so deur u Woord en Gees dat ons, ons hoe langer hoe meer aan U sal onderwerp.  Bewaar u kerk en laat dit groei.  Vernietig die werke van die duiwel, elke mag wat teen U opstaan, en alle kwaadwillige planne wat teen u heilige Woord bedink word, totdat die volkomenheid van u ryk kom, waarin U alles in almal sal wees.

 

Laat u wil geskied, soos in die hemel net so ook op die aarde. 

Gee dat ons en alle mense ons eie wil prysgee om aan u wil, wat alleen goed is, sonder enige teëpratery gehoorsaam sal wees, sodat elkeen sy amp en beroep net so gewillig en getrou kan beoefen en uitvoer soos die engele in die hemel.

 

Gee ons vandag ons daaglikse brood.

Versorg ons met alles wat vir die liggaam nodig is, sodat ons daardeur erken dat U die enigste Bron is van alles wat goed is en dat al ons sorge en arbeid en ook u gawes sonder u seën ons nie kan baat nie. Gee daarom dat ons, ons vertroue van alle skepsele aftrek, en op U alleen stel.

 

Vergeef ons, ons skulde, soos ons ook ons skuldenaars vergewe.  

Reken ons, arme sondaars, al ons misdade asook die boosheid wat ons nog aankleef, ter wille van die bloed van Christus, nie toe nie.  Ons bid dit van U omdat ons hierdie bewys van u genade in ons vind. Gee aan ons die ernstige voorneme om ons naaste van harte te vergewe.

 

En lei ons nie in versoeking nie, maar verlos ons van die Bose.

Ons is in onsself so swak dat ons nie een oomblik staande kan bly nie.  Daarby hou ons doodsvyande, die duiwel, die wêreld en ons eie sondige natuur, nie op om ons aan te val nie.  Wil U ons tog deur die krag van u Heilige Gees staande hou en versterk, sodat ons teen hulle sterk teenstand kan bied en in hierdie geestelik stryd nie beswyk nie, totdat ons eindelik die oorwinning volkome behaal.

 

Want aan U behoort die koninkryk en die krag en die heerlikheid tot in ewigheid.

Ons bid dit alles van U omdat U as ons Koning, wat mag oor alles het, ons alle goeie dinge wil en kan gee sodat ons nie vir onsself die roem toeëien nie, maar dat u heilige Naam ewig geprys sal word

Amen

Gebed 11 - Aan U behoort die koninkryk en die krag en die heerlikheid tot in ewigheid - Amen

'n Reeks oordenkings oor gebed

These medetations are also available in English

Die 1ste oordenking: Gebed 01 - Hoekom moet 'n gelowige bid

Die vorige oordenking: Gebed 10 - Laat ons nie in die versoeking komnie, maar verlos ons van die bose

Die laaste oordenking in hierdie reeks oor gebed: Gebed 12 - Onse Vader

Gebed 11

Aan U behoort die koninkryk en die krag en die heerlikheid tot in ewigheid - Amen

Jer. 33 v 8 & 9

Ek sal hulle reinig van al die sondes waarmee hulle teen My oortree het en al hulle sondes vergewe waarmee hulle teen My oortree het, en in opstand gekom het. Dit sal my Naam groot maak en aan My blydskap verskaf, aan My lof en eer gee voor al die nasies van die aarde wanneer hulle hoor van al die goeie wat Ek vir my volk gedoen het. Die nasies sal bang wees en My dien oor al die goeie wat Ek doen en oor die vrede wat Ek vir Jerusalem gee.

 Ons sluit ons gebed af met: “Aan U behoort die koninkryk en die krag en die heerlikheid tot in ewigheid – Amen” omdat ons Hemelse Vader so magtig is. Daarmee huldig ons die grootsheid van sy mag.

 Verder erken ons daarmee ook dat ons alles van ons Vader bid omdat Hy as Koning mag oor alles het en dat Hy ons alle goeie dinge uit sy ryke oorvloed wil en kan gee.

 Deur die grootsheid van ons Vader te besing word nie ons nie, maar sy heilige Naam ewig geprys.

 Wanneer ek ‘Amen’ sê dan erken ek dat dit baie sekerder en waar is dat my Vader my gebed verhoor as wat ek in my hart voel dat ek dit van Hom begeer.

 Nader tot jou Hemelse Vader in gebed met die sekere wete dat Hy op grond van die soen verdienste van Jesus Christus na jou sal en wil luister.

Amen

Gebed 10 - Laat ons nie in die versoeking kom nie, maar verlos ons van die bose

`n Reeks oordenkings oor gebed

These medetations are also available in English

Die 1ste oordenking: Gebed 01 - Hoekom moet 'n gelowige bid

Die vorige oordenking: Gebed 09 - Vergeef ons, ons oortredinge soos ons ook dievergewe wat teen ons oortree

Die volgende oordenking: Gebed 11 - Aan U behoort die koninkryk en die krag en die heerlikheid tot in ewigheid – Amen

Gebed 10

Laat ons nie in die versoeking kom nie, maar verlos ons van die bose

1 Pet. 5 v 8

Wees nugter, wees wakker! Julle vyand, die duiwel, loop rond soos ’n brullende leeu, op soek na iemand om te verslind.

 Met ons gebed het ons in ons binnekamer tot ons Hemelse Vader gebid. Ons het ons lewensnood en sondeskuld voor sy voete kom neerlê, maar nou moet ons verder gaan op die gevaarlike lewenspad en daarvoor bid ons ook.

 Ons bid hierdie bede omdat ons so swak is. Die gevaar van versoeking wag ons in soos 'n brullende leeu wat op soek is na iemand om te verslind en in onsself is ons so swak dat ons nie een oomblik staande kan bly nie.

 Daarom bid ons tot ons Vader dat Hy ons so in sy wyse beskikking moet lei en versterk deur die Heilige Gees sodat ons die sonde kan misloop, want ons vertrou ons in alles toe aan sy bewaring en leiding.

 Ons bid hierdie bede omdat ons vyande so gevaarlik en sterk is. Hulle is inderwaarheid doodsvyande, naamlik die duiwel, die wêreld en ons eie sondige natuur.

 Die duiwel is 'n leuenaar en moordenaar. Die Bybel beskryf hom in Open. 12 v 3 en 20 v 2 as 'n listige slang van verleiding en 'n draak van verwoesting.

 Die wêreld daarbuite ontken dat God bestaan en dit sluit al die sondige praktyke in wat in rebelse opstand teen God se gesag is.

 Ons eie sondige natuur is ons eie vyandskap teen God wat voortspruit uit die verwoestende rebelse opstand teen God deur ons eerste voorouers, Adam en Eva. Die kenmerke daarvan wat ons ook in ons eie lewens vind, is onsedelikheid, onreinheid, losbandigheid, afgodsdiens, towery, vyandskap, haat, naywer, woede, rusies, verdeeldheid, skeuring, afguns, dronkenskap, uitspattigheid en al dergelike dinge.

 Hierdie doodsvyande span saam om ons ondergang te bewerk en hulle hou nie op ons aan te val nie.

 Bid daarom in geloofsvertroue vir die leiding en beskerming van ons Hemelse Vader om jou te versterk in hierdie stryd (aangesien ons self so swak en ons vyande so sterk is) totdat ons eindelik die oorwinning volkome behaal.

Amen

 

Gebed 09 - Vergeef ons, ons oortredinge soos ons ook die vergewe wat teen ons oortree

`n Reeks oordenkings oor gebed

These medetations are also available in English

Die 1ste oordenking: Gebed 01 - Hoekom moet 'n gelowige bid

Die vorige oordenking: Gebed 08 - Gee ons vandag ons daaglikse brood

Die volgende oordenking: Gebed 10 - Laat ons nie in die versoeking kom nie, maar verlos ons van die bose

Gebed 09

Vergeef ons, ons oortredinge soos ons ook die vergewe wat teen ons oortree

Luk. 15 v 17 & 18

“Toe kom hy tot inkeer en sê: ‘My pa het wie weet hoeveel dagloners, en hulle het almal oorgenoeg kos, en hier vergaan ek van die honger. Ek sal dadelik na my pa toe teruggaan en vir hom sê: ‘Pa, ek het teen God en teen Pa gesondig!

In die vorige bede het ons gebid vir ons liggaamlike nood en nou bid ons vir ons geestelike nood. Die verlore seun kom in hierdie bede huis toe om vergifnis by sy Vader te soek.

Hier smeek ons dat God ons nie ons misdade en boosheid wat ons nog aankleef sal toereken nie. Ons bid hier vir die erfskuld wat ons nog aankleef asook ons eie skuld wat ons ontdek onder die verkondiging van die Woord en die getuienis van die Heilige Gees. Hierdie is 'n voortgaande proses, want uit ons eie maak ons, ons skuld nog elke dag net groter.

Ons smeek hier dat God ons misdade en boosheid ter wille van die bloed van Christus, ons nie toereken nie. Hierdie is 'n eerlike belydenis waar ons nie ons sonde en skuld ontken nie. Die enigste gronde waarop ons hierdie pleidooi kan maak is die bloed van Jesus Christus.

Vergewingsgesindheid is 'n genadegawe. Die vergewensgesindheid in my eie hart is die bewys van God se genade in my lewe. Alhoewel ons dit uit genade ontvang sonder enige verdienste aan ons kant lê dit ook 'n verantwoordelikheid op ons om dit wat ons van God ontvang te gebruik en toe te pas. Daarom moet daar ook 'n ernstige voorneme by ons wees om ons naaste te vergewe.

In hierdie bede kom ek met 'n skuldbesef en belydenis na die genadetroon van God en ek vind vergifnis en vergewensgesindheid.

Hou aan om hierdie gebed te bid totdat ons met die Wederkoms, volmaak en sonder sonde, voor die genadetroon vergader.

Amen

Gebed 08 - Gee ons vandag ons daaglikse brood

 

`n Reeks oordenkings oor gebed

These medetations are also available in English

Die 1ste oordenking: Gebed 01 - Hoekom moet 'n gelowige bid

Die vorige oordenking: Gebed 07 - Laat U wil ook op die aarde geskied, net soos in die hemel

Die volgende oordenking: (Sal eersdaag gepubliseer word)

Gebed 08

Gee ons vandag ons daaglikse brood

Fil. 4 v 6

Moet oor niks besorg wees nie, maar maak in alles julle begeertes deur gebed en smeking en met danksegging aan God bekend.

 

Terwyl ons nog op die aarde woon, het ons behoefte aan ons daaglikse brood, dit wil sê ons lewensonderhoud. Daarom leer die Here ons om met ons daaglikse behoeftes in gebed na Hom te kom en daarvoor te bid. Elkeen wat in die verlossing van Jesus Christus glo, kan met vrymoedigheid na ons Vader toe kom met sy daaglikse behoeftes.

 

Wanneer ons bid vir ons daaglikse brood, is dit 'n versoek wat baie meer omvat as net brood. Ons bid hiermee vir alles wat ons vir ons daaglikse lewensonderhoud nodig het soos gesondheid, klere, kos, werk, vergoeding vir ons arbeid en die opbrengs daarvan.

 

Hierdie bede beteken nie dat ons maar net handjies gevou moet sit en wag dat ons daaglikse brood wonderbaarlik sal verskyn nie. Nee, hiermee vra ons vir die moontlikheid om deur ons werk in ons lewensonderhoud te voorsien, want ook dit is alleen net genade.

 

Hiermee erken ons, ons diepe afhanklikheid van ons Vader se versorging omdat Hy die enigste Bron is van alles wat goed is en dat sy gawes sonder sy seën ons niks sal baat nie.

 

Verder bely ons ook ons kinderlike vertroue in die sorg van ons Vader en dat ons daarmee ons vertroue van alle skepsele aftrek en dit op Hom alleen stel.

 

In hierdie bede vra ons ook dat die Here vir ons sal gee wat ons nodig het sonder dat ons deur bekommernisse of geldgierigheid verteer word vir meer as wat ons nodig het. Maar ons reik ook daarmee in ons verwagtinge uit bokant die brood nood van die tyd na die oorvloed van die ewigheid.

 

Bid en werk vir jou daaglikse brood, terwyl jy in stille tevredenheid alles van jou Vader in geloofsvertroue verwag, totdat Hy eenmaal alles nuut sal maak op die nuwe aarde waar daar geen honger of kommer meer sal heers nie.

Amen

Gebed 07 - Laat U wil ook op die aarde geskied, net soos in die hemel

 

`n Reeks oordenkings oor gebed

These medetations are also available in English

Die 1ste oordenking: Gebed 01 - Hoekom moet 'n gelowige bid

Die vorige oordenking: Gebed 06 - Laat U koninkryk kom

Die volgende oordenking: Gebed 08 - Gee ons vandag ons daaglikse brood

Gebed 07

Laat U wil ook op die aarde geskied, net soos in die hemel

Miga 6 v 8

Mens, die Here het jou bekend gemaak wat goed is: Hy vra van jou dat jy reg sal laat geskied, dat jy liefde en trou sal bewys, dat jy bedagsaam sal lewe voor jou God.

Rom. 8 v 28

Ons weet dat God alles ten goede laat meewerk vir dié wat Hom liefhet, dié wat volgens sy besluit geroep is.

 

Die wil van God. Dit is van die begin af 'n struikelblok gewees waarteen die mens in opstand kom. Om God se wil bo jou eie sondige wil te plaas is menslik gesproke onmoontlik. Dit kan alleen gebeur wanneer ons deur ons geloof in die evangelie verlos is en God ons deur sy Gees daartoe lei. Dit is dan waarvoor ons in hierdie bede bid.

 

Die gebed om aan God se wil gehoorsaam te wees behels dat ons vra dat God ons deur sy Gees lei om ons eie sondige wil prys te gee, want ons eie wil is die oorsaak van al ons ellende. Die prysgee van ons eie wil is dus 'n saak van bekering, want alhoewel ons vra dat God ons deur sy Gees daartoe lei, is jy nie passief in die opgee van jou eie wil nie.

 

In die prysgee van my eie wil moet ek myself aan God se wil oorgee. Dit beteken dat ek moet aanvaar dat God se wil goed is, want alleen ons Goeie Vader se wil is goed en heilig.

 

Al kan ons God se wil nie altyd verstaan nie, moet ons beide sy geopenbaarde wil (soos in sy Woord vergestalt) asook sy verborge wil wat in sy beskikking tot uitdrukking kom as volmaak en goed aanvaar sodat ons in alle teëspoed geduldig en in voorspoed dankbaar sal wees.

 

Verder dat ons ook vir die toekoms 'n vaste vertroue in ons getroue God en Vader kan stel dat geen skepsel ons van sy liefde sal skei nie, aangesien alle skepsels so in sy hand is dat hulle sonder sy wil nie kan roer of beweeg nie.

 

Dit beteken ook dat ek berus en nie fout vind met en beterweterig wees teenoor God se wil nie. Verder ook dat ek nie God se wil probeer verdraai om my eie wil te pas nie.

 

Hierin bid ons ook dat God ons deur sy Gees sal lei om die posisie waarin Hy ons plaas binne sy kerk (amp van gelowige, diaken, ouderling of leerouderling) gehoorsaam sal aanvaar en dat ons die pligte daaraan verbonde so sal uitvoer dat dit sal strek tot sy eer en die uitbreiding van die sy Koninkryk.

 

Hierdie gehoorsaamheid behels ook dat ek my dagtaak in welke vorm ook al sal sien as die plek waarin God my geplaas het en dat ek dit sal uitvoer asof dit vir die Here is.

 

Die afsluiting ‘soos in die hemel’ is dat ons soos die hemelinge voor sy troon, God se wil met vreugde sal volbring en dat ons daarmee ook bid vir die voleinding wanneer ons as nuwe mense geen botsing met God se wil meer sal ken nie.

 

In hierdie derde bede bid ons dus dat God ons deur sy Gees sal lei en ons die vermoë gee om gehoorsaam te wees sodat ons, ons eie wil sal prysgee en sy wil sal uitvoer soos dit in die hemel geskied.

 

Amen

Gebed 06 - Laat U Koninkryk kom

 

`n Reeks oordenkings oor gebed

These medetations are also available in English

Die 1ste oordenking: Gebed 01 - Hoekom moet 'n gelowige bid

Die vorige oordenking: Gebed 05 - Ons Vader wat in diehemel is

Die volgende oordenking: Gebed 07 - Laat U wil ook op die aarde geskied, net soos in die hemel

Gebed 06

Laat U Koninkryk kom

Markus 1 v 14 & 15

Nadat Johannes in die tronk opgesluit is, het Jesus na Galilea toe gegaan en die evangelie van God verkondig. Hy het gesê: “Die tyd het aangebreek, en die koninkryk van God het naby gekom. Bekeer julle en glo die evangelie.”

 Die koninkryk van God is 'n onderwerp waaroor baie boeke geskryf is. John Bright sê die volgende daaroor: “For the concept of the Kingdom of God involves, in a real sense, the total message of the Bible.”

 Die koninkryk van God verwys na God se heerskappy oor die ganse skepping en die mensdom en dit verkondig God se genade en die goeie nuus van sy verlossing in Jesus Christus van die sonde heerskappy in mense se lewens.

 In hierdie bede vra ons vier dinge:

1. Onderwerping van onsself aan God se heerskappy

Die koms van die Koninkryk begin by onsself en daarom moet ons bid dat God ons so deur sy Woord en Gees sal regeer dat ons, ons hoe langer hoe meer aan Hom sal onderwerp.

 2. Bewaring en opbou van Jesus se bruidskerk

Onthou, elk gelowige is een van die lewende boustene van Jesus se kerk. In hierdie bede is daar dus ook 'n versugting, naamlik: bewaar U kerk teen sy vyande (dit wil sê ons eie sondige natuur, die wêreld en die aanslae van satan) en laat dit groei deur die verkondiging van die evangelie.

 3. Neerwerping van alle vyandelike magte

Met hierdie bede vra ons dus ook spesifiek dat God die werke van die duiwel (dit wil sê die groot teenstander van God wat teen Hom en sy Kerk stry met bedrog en leuens) asook elke mag wat teen God opstaan, sal vernietig.

 Verder vra hierdie bede ook dat God alle kwaadwillige planne teen sy heilige Woord sal vernietig, soos byvoorbeeld die verwerping, vervalsing daarvan.

 4. Die aanbreek van die staat van volkomendheid

Hierin is ook ons versugting en verlange na die volmaakte staat van heerlikheid by die voleinding.

 Met hierdie bede bid ons dat ons Vader ons en ook al die bose magte, aan sy heerskappy sal onderwerp en dat Hy die staat van volkomendheid oor die kerk en heelal sal laat aanbreek.

 Amen

Die volgende video verduidelik dit op 'n praktiese manier, waar Wayne Cordeiro verduidelik hoekom hy eerder sal bid dat die kerk wat vry van vervolging is, soos die kerk in Sjina moet word as wat hy sal bid dat die kerk in Sjina ‘vry’ moet wees soos ander kerke wat nie vervolg word nie.

Gebed 04 - Ons Vader wat in die hemel is

 

`n Reeks oordenkings oor gebed

These medetations are also available in English

Die 1ste oordenking: Gebed 01 - Hoekom moet 'n gelowige bid?

Die vorige oordenking: 

Gebed 03 - Wat moet die inhoud van 'n opregte gebed wees?

Die volgende oordenking: 

Gebed 05 - Laat U Naam geheilig word

Joh. 1 v 12

Maar aan almal wat Hom aangeneem het, dié wat in Hom glo, het Hy die reg gegee om kinders van God te word.

 

Waarom het Jesus ons beveel om God as ‘ons Vader in die hemel’ aan te spreek, wanneer ons bid?

 

Sodat ons heel aan die begin van ons gebed ons kinderlike vertroue en respek ten opsigte van God sal bevestig. Dit is die vertroue dat net soos wat 'n vader vir sy kind sorg, ons vertrou dat God as ons Vader in Christus alles sal voorsien wat ons in die lewe nodig het.

 

Daarmee nader jy in eenvoud en nederigheid tot God, want jy het nie nodig om God te probeer imponeer wanneer jy bid nie.

(Mat. 6 v 5 & 6)

“Verder, as julle bid, moet julle nie soos die skynheiliges wees nie. Hulle hou daarvan om in die sinagoges en op die straathoeke te staan en bid sodat die mense hulle kan sien. Dit verseker Ek julle: Hulle het hulle beloning klaar weg.

 

Nee, as jy bid, gaan na jou kamer toe, maak die deur toe en bid tot jou Vader wat jy nie kan sien nie. Jou Vader wat sien wat verborge is, sal jou beloon.”

 

Wanneer jy in gebed tot God nader praat jy gewoonweg met Hom net soos wat 'n kind met sy vader praat sonder om disrespekvol te wees. Deur die Gees wat ons ontvang het, roep ons in kinderlike vertroue: “Abba, Vader!” (Rom. 8 v 15; Gal. 4 v 6 & 7)

En om ons, wat aan die wet onderworpe was, los te koop sodat ons as kinders van God aangeneem kon word. En omdat ons sy kinders is, het God die Gees van sy Seun in ons harte gestuur, en in ons roep Hy uit: “Abba!” Dit beteken: Vader! Jy is dus nie meer ’n slaaf nie; jy is nou ’n kind van God. En omdat jy sy kind is, het God jou ook sy erfgenaam gemaak.

 

Wanneer jy God as jou Vader aanspreek dan bevestig jy daarmee die grond van jou kinderlike vertroue, naamlik dat God deur Christus ons Vader geword het en dat Hy veel minder dit wat ons in geloof bid, sal weier as wat ons aardse vaders ons aardse dinge sal ontsê.

 

Deur God as jou Vader in die hemel aan te spreek bevestig jy dat jy nie aards van Hom dink nie en dat jy nie sondige menslike kwaliteite aan Hom toedig nie. Hiermee bevestig jy ook dat jy nederig bely dat jy van jouself en die wêreld as bron van hulp afsien en dat jy jou vertroue op God alleen stel.

 

Bid tot God as “jou Vader wat in die hemel is” en begin daarmee jou gesprek met God in nederige ootmoed en vertroue in jou almagtige en ewige Vader.

 

Amen

Gebed 02 - Wat is die vereistes van 'n opregte gebed?

 

`n Reeks oordenkings oor gebed

These medetations are also available in English

Die eerste oordenking: Gebed 01 - Hoekom moet 'n gelowige bid?

Die volgende oordenking: 

Gebed 03 - Wat moet die inhoud van 'n opregte gebed wees?

Open. 19 v 9 & 10

Toe sê die engel vir my: “Skryf op: Geseënd is hulle wat na die bruilofsmaal van die Lam uitgenooi is.” Verder sê hy vir my: “Dit is die woorde van God, en hulle is waar.” Toe het ek voor sy voete op my knieë neergeval om hom te aanbid. “Pas op, moenie!” sê hy toe vir my. “Ek is ’n mededienaar van jou en van jou medegelowiges wat aan die getuienis vashou wat Jesus gelewer het. Aanbid God, want dit is Jesus wat die getuienis gelewer het, en dit is die Gees wat die profesie gegee het.”

 

Ons moet bid, maar wat is die vereistes van 'n opregte gebed?

Daar is basies drie vereistes:

1. Opregtheid:

Jy kan nie maar net enige god in gebed aanroep nie. Jy moet bid tot die enige ware God soos Hy Homself in sy Woord in Christus openbaar het en van wie die Heilige Gees in die Woord getuig. Gebed is net geldig as dit gerig word tot God die Vader, God die Seun en God die Heilige Gees.

 

Jy moet verder in opregtheid met 'n onverdeelde hart tot God bid en vra vir alles wat Hy ons in sy Woord beveel het om te bid. As jou gebed gaan om selfsugtige redes, dan bid jy verkeerd.

 

2. Ootmoed:

Dit beteken dat jy jou nood en ellende reg en grondig moet ken sodat jy jou voor sy majesteit kan verootmoedig. Verootmoediging beteken dat jy moet erken dat jy vanweë jou sonde doemwaardig voor God is en dat jy alleen van sy genade afhanklik is.

 

3. Vertroue:

Jy moet vertrou dat God jou gebed ter wille van die soenverdienste van Christus sal verhoor soos Hy dit vir ons in sy Woord beloof het.

 

Bid in opregtheid tot die enigste ware God, Vader Seun en Heilige Gees.

 

Amen