God is juis daar waar ons Hom nie verwag nie

GKE 15 Jun. 2014

Skriflesing Psalm 14

Ps. 42-1:1,2 & 5

Ps. 1-1:1-4

Ps. 119-2:1,11 & 15

Ps. 14-2:1,3 & 6

Inleiding

As ons na die lewe om ons kyk dan sien ons dat verdraaide morele waardes aan die orde van die dag is. Kyk maar na die korrupsie wat besig is om al hoe erger te word op alle vlakke van die samelewing. Die gewelddadige mynstakings wat veroorsaak dat die gemeenskap in Rustenburg en omgewing in armoede gedompel word. Verder het dit daartoe bygedra dat Suid-Afrika se kredietgradering afgeskaal is wat meebring dat die ekonomie ook negatief geraak gaan word. Ons moet onself in tronke toesluit omdat misdaad besig is om ons veiligheid dag na dag te bedreig. Die haat en onmin en wantroue wat veroorsaak dat mense mekaar met woorde en dade daagliks doodslaan en so kan ons aangaan.

In Ps. 14 gee die Here vir ons hoop hiervoor. Al lyk dit of Hy nie meer daar is nie en dat die onreg besig is om te wen, moet ons nie wanhopig raak nie, want God is juis daar waar ons Hom nie verwag nie. In Ps. 14 hoor ons van die mens se opstand teen God, die gevolge van die mens se opstand en dat God redding bring.

Die mens se opstand teen God

In die tyd van Dawid is Israel bedreig deur vyande wat nie die morele waardestelsel wat God in wet voorskryf gehoorsaam het nie. Verder is hulle ook van binne bedreig deur hul eie morele verval. Met Ps. 14 het die Here Israel verseker en hoop gegee dat die bose nie sou oorwin in tye van bedreiging nie. Hierin is daar ook vir ons ’n tydlose boodskap van versekering opgesluit dat God juis daar is waar ’n mens Hom nie verwag nie en dat Hy ons daarom ook sal beskerm.

In Ps. 14:1 sê die Psalmdigter basies

Net dwase sê vir hulleself: “Daar is geen God nie.” Hulle is korrup en hulle dade is boos. Niemand doen die goeie nie!

Die normale betekenis van ’n dwaas is iemand wat dom is en geen verstand het nie. Die Hebreeuse woord, nabal wat hier met dwaas vertaal is, beteken iets meer as net sonder verstand of dom. Letterlik beteken dit iemand wie se morele waardes korrup is. Sy morele waardes is korrup omdat hy nie die regverdigheid van God se wet wil aanvaar nie. Die bose mens leef dus asof die geregtigheid van God nie bestaan nie. Met ander woorde die bose mens is in opstand teen God se gesag. Wanneer jy ontken dat God bestaan, ontken jy ook sy gesag. Wanneer God se gesag ontken word maak elkeen maar net soos hy wil.

In vers 2 hoor ons dat die Here niemand vind wat vra na sy wil nie. Hiermee sê die Here vir ons hoe belangrik regverdigheid vir Hom is en dat dit die ideaal is waarna die mens moet streef. In vers 3 hoor dat almal afgedwaal het en dat daar nie een is wat regverdig is nie daarom kan ons net by die Here regverdigheid vind. Dit is tipies nie wat die mens wat in opstand teen God se gesag is wil hê nie. Dit is die wese van die sondeval naamlik dat die mens nie wil hê dat God moet besluit wat goed en reg is nie, maar dat hyself wil besluit.

Die gevolge van die mens se opstand teen God

In vers 4 hoor ons wat die gevolge is van die mens se opstand teen God. Daar is absolute morele verval. Die beeld wat hier gebruik word is dat net soos iemand wat brood verorber, oorval die onregverdiges die mense wat volgens God se wil, wil leef. Daardeur bewys hul ook hul opstand teen God. Dit wat hulle nodig het om te oorleef verkry hulle deur oneerlike metodes. God se regverdigheid word in skrille kontras met die onregverdigheid van die bose mense voorgehou.

Dit is wat ons vandag ook sien in ons samelewing. Ons moet egter versigtig wees om net die vinger na ander te wil wys, want dan hoef ons nie na onsself te kyk nie. Dis maklik om die korrupsie by ander raak te sien, maar wat van die oneerlike gedagtes in my hart? Ons verdoem maklik die geweld en onreg by misdadigers (met reg), maar ons sien nie die geweld in ons eie lewens raak nie. Wat van die haatdraendheid en onvergewingsgesindheid in ons eie lewens?

In vers 5 hoor ons dat die mens se opstand nie sonder gevolge is nie. God is heilig (dit wil sê sonder sonde) en daarom straf Hy die sonde. God kan nie toelaat dat sonde sy heiligheid aantas en besoedel nie en daarom moet die sonde met wortel en tak uitgeroei word deur dit te straf met die dood. Die mens wat teen God in opstand kom sal nie sy oordeel vryspring nie.

Die Here bring redding

In vers 5b, 6 & 7 hoor ons dat daar hoop is. Daar waar die lewe op sy donkerste is en dit lyk of ons hulpeloos staan teen die mag van die sonde ontmoet ons God in sy genade. In vers 6 hoor ons dat die boosdoeners nie sal oorwin nie. Daar is hoop om die verwoesting wat die sonde in mense se lewens veroorsaak te oorwin. Daardie hoop word by die Here alleen gevind. Vir die regverdige wat by God skuil is daar hoop. Die volk word teen die boosheid van hul vyande beskerm deurdat hulle op God vertrou. Hulle geloof in God maak hulle regverdig.

In vers 7 hoor ons die Psalmdigter se gebed vir redding. Dis ’n baie spesifieke gebed vir redding uit Sion uit. Die verwysing na Sion dui baie spesifiek op die belofte waaraan Israel vashou, naamlik dat daar ’n Messias, dit wil sê ’n Koning deur God gestuur sal word om die volk te red.

Hoe kry ons troos en hoop uit Ps. 14?

Die mens het God se gesag verwerp. Ons is self ook skuldig. As ons in gedagte hou dat die Here dit duidelik gestel het in vers 1 dat daar nie een is wat goed nie en dan beklemtoon Hy dit weer in vers 3 met die woorde:

daar is niemand wat goed doen nie, selfs nie één nie.

Die implikasie daarvan is dat elkeen van ons onder die oordeel staan wat in vers 5 aangekondig word.

Die hartseer gevolge van die opstand teen God se gesag is dat die hele mensdom as gevolg daarvan korrup geraak het.  Dit veroorsaak lyding. Ons ly oor ons eie sondige optrede, maar ook as gevolg van die sondige optrede van ons medemens. In hierdie donker hopelose toestand gee die Here ons met Ps. 14 die versekering dat die sonde en die gevolge van die sonde nie sal oorwin nie. Al lyk dit soms of God nie daar is nie, is Hy juis daar waar ons Hom nie verwag nie.

Daarom kan ons ook saam met die Psalmdigter bid:

“Ag, mag daar tog uit Sion vir ons redding kom!”  Mag daar vir ons ’n Messias Koning kom wat ons sal red uit die doodsbestaan van hierdie sondige wêreld. In die Nuwe Testament kry ons dan ook die versekering dat daardie Koning wel gekom het soos ons hoor in:

Matt 21:5

“Sê vir Sion: Kyk, jou Koning kom na jou toe; Hy is nederig en Hy ry op ’n donkie, op die vul van ’n pakdier.” 

Johan 12:15

“Moenie bang wees nie, Sion! Kyk, jou Koning kom, en Hy ry op ’n donkie.” 

Romein 9:33

“Kyk, Ek sit in Sion ’n klip neer waaroor ’n mens struikel, ’n rots waarteen jy jou stamp, maar wie in Hom glo, sal nie teleurgestel word nie.” 

Romein 11:26

en op hierdie manier sal die hele Israel gered word. So staan daar geskrywe: “Uit Sion sal die Redder kom, en Hy sal die goddeloosheid van sy volk Jakob verwyder.

1 Petr 2:6

Daarom staan daar in die Skrif: “Kyk, Ek lê in Sion ’n hoekklip, uitverkies vir die ereplek. Wie in Hom glo, word nooit teleurgestel nie.” 

Daardie Koning het gekom. Hy het die doodstraf in ons plek gedra wat vir die goddelose bestem is sodat ons kan lewe. In Ps. 14 is die troos dat elkeen wat by die Here skuiling soek gered sal word. Ons vind skuiling by die Here deur in Jesus Christus te glo. Die oproep in Ps. 14 tot Israel is dat hulle by die Here moet skuiling vind en sodoende sal hulle lewenswandel in gehoorsaamheid aan die voorskrifte van die Here bewaar bly. Hulle ontvang die belofte dat hul redding uit Sion sal kom.

Die oproep tot ons in Ps. 14 is dat ons by die Here in Jesus Christus moet skuiling soek teen ons doodsvyand die sonde en die gevolge daarvan. Ons vind skuiling deur in Jesus Christus te glo. Die belofte wat gemaak is van ’n Redder uit Sion is in Jesus Christus vervul en daarom kan ons ook nou ’n lewe begin leef vry van die slawebande van die sonde. Die wat nie in Jesus Christus glo nie staan egter nog steeds onder die oordeel van God.

Geliefdes kom ons skuil by God wanneer die aanslae van die sonde dreig om ons te oorweldig deur te glo in die verlossing wat Jesus Christus vir ons gebring het. Hoe meer mense dit doen hoe beter plek sal ons samelewing word. Die evangelie is die enigste antwoord vir die korrupsie, geweld en onreg in ons samelewing. Kom ons leef die evangelie en vertel almal daarvan.

Amen

Jesus lei ons op die pad van ongeloof tot geloof

Joh. 20 v 19-31; teksvers Joh. 20 v 31

04 Mei. 2014 GKE

Lof-Psalm Ps. 42 v 1 & 7(OAB)

Na Wet Ps. 103 v 2 (OAB)

Na Gebed Ps. 9 v 1 & 7 (OAB)

Slotsang Ps. 42 v 2 & 3 & 5

Inleiding

Sien is glo. Dit was Tomas se benadering tot die lewe. Hiermee het Tomas dan ook die bynaam gekry van ongelowige Tomas. Ongeloof! Hoe dikwels sukkel ons nie ook maar self daarmee nie? Dis gewoonlik nie iets wat ons maklik openlik erken nie, maar dit is daar om ons te treiter. Daardie stemmetjie hier in die agterkop: “jy kan God nie vertrou nie!” Ons erken dit nie maklik nie, maar dit maak nie dat dit makliker is nie. Inteendeel, dit maak die hele saak net moeiliker!

Wat maak ’n mens wanneer hierdie twyfelstorms binne jou gemoed woed? In hierdie verhaal van Tomas se twyfelstorms sien ons hoe onbeholpe mense reageer wanneer die twyfelstorms van ongeloof toeslaan en aan die ander kant sien ons God se genade en liefde midde in die twyfelstorms van ongeloof. Wanneer geloofstwyfel oor ons pad kom dan lei Jesus ons op die pad van ongeloof tot geloof.

Die mens se onbeholpenheid binne die twyfelstorms van die lewe

Tomas beleef seker een van die grootste krisisse in sy lewe met Jesus se kruisdood. Vir drie jaar het hy Jesus gevolg. Hy was self bereid om vir Jesus te sterf soos ons in Joh. 11v16 hoor toe Jesus na Lasarus toe gegaan het en die dissipels bang was vir die Jode:

Tomas, wat ook Didimus genoem is, sê toe vir die ander dissipels: “Kom ons gaan ook, sodat ons saam met Hom kan sterwe.”

En nou is Jesus dood. Al die hoop wat hulle gekoester het dat Jesus hulle sou verlos is nou daarmee heen. Tomas het sy vertroue in Jesus verloor. Hierdie teleurstelling was vir hom net een te veel. Daarom sonder hy homself ook eenkant af van die ander dissipels. Daarmee mis hy die eerste geleentheid om die opgestane Here te sien. Maak ons nie ook dikwels so nie? Een of ander gebeurtenis in ons lewens veroorsaak dat dit vir ons voel dat die Here ons in die steek gelaat het. Nou begin die twyfelstorms van ongeloof in ons binneste woed. Daardie stemmetjie wil net nie stilbly nie “Jy kan die Here nie vertrou nie!” En wat maak ons? Ons vermy ons broeders en susters in die geloof. Ek sien nie kans om kerk toe te gaan nie.

Wat doen ons wanneer ons geloofsgenote ons wel opsoek? Ek stel onredelike voorwaardes en glo nie wat hulle vir my sê nie! Ons maak maar net soos Tomas gemaak het (vgl Joh. 20v25)

Die ander dissipels sê toe vir hom: “Ons het die Here gesien!”

Maar hy sê vir hulle: “As ek nie die merke van die spykers in sy hande sien en my vinger in die merke van die spykers steek en my hand in sy sy steek nie, sal ek nooit glo nie.”

Vol opgewondenheid kom die ander dissipels by Tomas met die goeie nuus dat Jesus opgestaan het, maar hy weier om hulle te glo. Die dissipels het ook aanvanklik gesukkel met ongeloof. Jesus het verskeie male vir hulle gesê dat Hy weer gaan opstaan uit die dood uit. Toe die vroue egter by hulle kom en hulle vertel dat Jesus opgestaan het en dat sy graf leeg is, het hulle ook nie geglo nie soos ons hoor in Luk. 24v11:

Maar vir hulle het hierdie verhaal na onsin gelyk en hulle het die vroue nie geglo nie.

Dit was dus nie net Tomas wat ongelowig was nie, maar die ander dissipels ook. Een of ander tyd beleef elkeen van ons ’n geloofskrisis. Die genade van die Here is egter dat Hy nie sy rug op ons draai nie. Kort na sy opstanding verskyn Jesus aan sy dissipels maar Tomas was nie daar nie. Wanneer ons onself afsonder van die geloofsgemeenskap dan verbeur ons die geleentheid om die Here te ontmoet.

Wat doen ons in tye van geloofskrisisse? Ons sonder ons af en ons stel onredelike verwagtings. Ons draai weg van God af en vertrou Hom nie meer nie. Ons glo nie meer nie. Daardeur mis ons die heerlike teenwoordigheid van ons Here.

Aan die ander kant betoon die Here eindelose genade en geduld met ons, want

God betoon sy genade en liefde midde in die twyfelstorms van ongeloof

Jesus verskyn aan sy dissipels en Hy herstel hul geloof. Die gevolg is dat hulle blydskap ervaar soos ons hoor in Joh. 20v20:

Die dissipels was baie bly toe hulle die Here sien.

Die Here doen nog meer. Hy stuur die Heilige Gees as Trooster om ewig by ons te bly soos Hy belowe het in Joh. 14v16-17:

¹⁶ Ek sal die Vader vra, en Hy sal vir julle ’n ander Voorspraak stuur om vir ewig by julle te wees, ¹⁷ naamlik die Gees van die waarheid.

In Joh. 20v22 word hierdie belofte nagekom:

Nadat Hy dit gesê het, blaas Hy oor hulle en sê: “Ontvang die Heilige Gees!

Hy betoon eindelose geduld. Alhoewel Tomas die eerste geleentheid gemis het, is daar tog weer nog ’n geleentheid soos ons hoor in Joh. 20v26&27:

²⁶ Ag dae later was Jesus se dissipels weer bymekaar, en Tomas was by julle. Hoewel die deure gesluit was, het Jesus gekom en tussen hulle gaan staan en gesê: “Vrede vir julle!”

²⁷ Daarna sê Hy vir Tomas: “Bring jou vinger hier en kyk na my hande; en bring jou hand en steek hom in my sy; en moenie langer ongelowig wees nie, maar wees gelowig.”

Die Here kom nie met verwyte en beskuldigings nie. Hy kom met liefde en geduld en daardeur herstel Hy ons geloof. Tomas het ’n absolute voorwaarde gestel voordat hy sou glo (Vgl. Joh. 20v25b):

“As ek nie die merke van die spykers in sy hande sien en my vinger in die merke van die spykers steek en my hand in sy sy steek nie, sal ek nooit glo nie.”

Die Here wys egter dat dit nie ons voorwaardes is wat geloof bring nie, maar dat dit die opgestane Jesus is soos ons hoor in Joh. 20v28:

En Tomas sê vir Hom: “My Here en my God!”

Toe Tomas die Here ontmoet het, het hy dadelik geglo sonder dat hy die spykermerke gevoel het soos hy vereis het.

Ons wil ook dikwels allerlei “bewyse” hê vir God se genade. Ons stel so dikwels voorwaardes wat gerig is op ons eie selfsugtige behoeftes. Wil ons nie ook die voorreg van die dissipels hê om God te sien nie? Het u al ooit gewonder hoe dit sou wees om die Here van aangesig tot aangesig te sien? Dit is egter nie nodig nie. Die Jode het Jesus ook in lewende lywe gesien en hulle het nie geglo nie. Ons ontmoet die Here deur sy Woord en die Heilige Gees wat Hy gestuur het om ewig by ons te bly. Ons het nie nodig om die Here fisies te sien nie soos Hy ook vir sê in Joh. 20v29:

Toe sê Jesus vir hom: “Glo jy nou omdat jy My sien? Gelukkig  is dié wat nie gesien het nie en tog glo. ”

Wat wel nodig is, is dat ons moet glo (vgl. Joh. 20v27)

moenie langer ongelowig wees nie, maar wees gelowig.

Die dissipels het Jesus gesien en geglo, maar vir ons wat na hulle kom het die Here ’n ander pad tot geloof bepaal soos hy in Rom. 10v14 vir ons sê:

Maar hoe kan ’n mens Hom aanroep as jy nie in Hom glo nie? En hoe kan jy in Hom glo as jy nie van Hom gehoor het nie? En hoe kan jy van Hom hoor sonder iemand wat preek?

Die Heilige Gees werk die geloof in ons harte deur die Woord van die Here en die verkondiging daarvan. Wanneer die geloof in Jesus wat opgestaan in ons harte begin brand dan kom ons ook soos Tomas tot die belydenis dat Jesus ook my Here en my God is.

Wat is die inhoud van ons geloof? Die Here sê vir ons in Joh. 20v31:

Maar hierdie wondertekens is beskrywe sodat julle kan glo dat Jesus die Christus is, die Seun van God, en sodat julle deur te glo, in sy Naam die lewe kan hê.

Ons moet glo dat Jesus ons Verlosser is en dat Hy die Seun van God is. Daardeur verkry ons die ewige lewe.

Slot

Geliefdes ons reaksie op die twyfelstorms van ongeloof is om van die Here weg te draai. Sy reaksie is om ons op te soek deur sy Woord en Prediking en daardeur lei Hy ons op die pad van ongeloof tot geloof. Maak dus tyd om na die Here te luister deur besig te wees met sy Woord deur Bybelstudie en deur te luister na die verkondiging daarvan.

Amen.

God gee aan ons die oorwinning oor die dood deur ons Here Jesus Christus, leef daarom elke dag uit die krag van daardie oorwinning!

Die lewe is vir my Christus en die sterwe wins

1 Kor. 15 teksverse 55-58

^{27 Apr. 2014 GKE}

Lof-Psalm Ps. 92 v 1 (OAB)

Na Wet Ps. 38 v 1 (OAB)

Na Gebed Ps. 42 v 1 (OAB)

Slotsang Sb. 1-1 v 1 & 2 (Sb 24 in ou Swart Ps. boek)

Vooraf

1 Kor. 15 is die omvattendste gedeeltes in die Bybel wat oor die opstanding handel. Ons gaan vanoggend by die slotgedeelte van hierdie hoofstuk stilstaan waar die betekenis van die opstanding vir ons lewens nou saamgevat word.

Inleiding

Daar sal ’n tyd kom wanneer ons glo dat ons nou by die einde is. Dit sal die begin wees. Daardie Vrydag toe Jesus gekruisig is het sy volgelinge gedink dit is die einde. Alles waarvoor hulle gehoop het, het tot ’n einde gekom. Dit was alles tevergeefs. Die man waarop hulle hul hoop geplaas het is nou dood. Kan u uself indink hoe verslae Jesus se volgelinge moes gewees het toe hulle Hom daar aan die kruis sien hang het? Jesus het wel vir hulle verskeie kere vertel wat die verloop van gebeure sou wees, maar hulle het nie verstaan nie. Dit het vir hulle gevoel of die magte van die bose oorwin het.

In ’n sekere sin is ons lewens ook baie soos hulle sin. Ons het gehoor van die krag van die Jesus se opstanding, maar ons verstaan dit nie eintlik nie. Ons het verlede naweek Paasfees gevier waar ons terugdink het aan die betekenis van Jesus se kruisiging en sy opstanding. En wanneer Paasfees verby is, wat dan? Hoeveel van ons leef maar net voort asof die gebeure 2000 jaar gelede tydens die Joodse Paasfees nooit plaasgevind het nie! Ons gaan maar net aan met ons lewens soos voorheen. Ek is nog steeds nie bereid om te vergewe nie. Ek wil nog steeds ten alle koste wraak neem. My eie selfsugtige belange dra nog steeds ’n groter gewig as medemenslikheid.

Lewe in die plek van dood

As dit waar is in my lewe dan besef ek nog nie watse groot verandering Christus se opstanding meegebring het nie. Jesus se opstanding is diè belangrikste aspek van ons geloofslewe soos ons ook hoor in 1 Kor. 15:14

En as Christus nie opgewek is nie, is ons prediking sonder inhoud en julle geloof ook sonder inhoud.

Daarom kan ons nie maar net ongeërg voortgaan asof Jesus se opstanding maar net ’n teoretiese saak is wat geen impak op my lewe het nie.

Jesus se opstanding verander ons swakheid in krag. God bring groot dinge tot stand deur klein mense. Dit wat soos ’n neerlaag gelyk het verander God in ’n oorwinning. God gebruik alledaagse mense soos ek en jy om sy Koninkryk te bou. Die rede waarom ons dit kan doen is omdat die mag van die ewige dood gebreek is. Met sy opstanding het Jesus die angel van die sonde gebreek en daarom het dit nie meer mag oor ons nie soos ons hoor in 1 Kor. 15:54 & 55

“Die dood is vernietig, die oorwinning is behaal.”

“Dood, waar is jou oorwinning? Dood, waar is jou angel?”

Die geestelike doodsheid wat maak dat die mens na binne gekeer is waar net die eie ek van belang is, is oorwin. Daarom kan ons nou die lewe leef wat God vir ons beplan het. Daarom is ons nie meer bang vir dit wat anderkant die liggaamlike dood wag nie, want ons weet dat God daar is. In die plek van die dood het God vir ons lewe gegee soos ons hoor in 1 Kor. 15:56

Maar ons dank God dat Hy aan ons die oorwinning gee deur ons Here Jesus Christus.

Leef die lewe wat God vir ons gegee het

1 Kor. 15 word afgesluit met ’n opdrag om die lewe te leef wat God vir ons gegee het soos ons hoor in 1 Kor. 15:58

Daarom, liewe broers, wees standvastig , onwankelbaar, altyd oorvloedig in die werk van die Here, omdat julle weet dat julle inspanning in diens van die Here nie tevergeefs is nie.

Wees standvastig: Met ander woorde staan stewig. God is daar en daarom kan ons vas staan wanneer die lewe moeilik raak. Omdat ons nie uit eie krag werk nie, maar uit die krag van die Heilige Gees wat altyd by ons is, word ons nie vernietig deur die aanslae van die lewe nie. Dit beteken nie dat die lewe nie moeilik sal wees nie. Dit beteken wel dat God ons sterk maak om die lewe te hanteer wanneer dit moeilik raak. Dit beteken dat ons sterk staan wanneer ons teenkanting kry omdat ons die werk van die Here doen.

Wees onwankelbaar: Met ander woorde ons staan sterk in die geloof. Ons bly glo in die waarheid en ons laat nie toe dat ons geloof ondermyn word nie soos byvoorbeeld wanneer die mense met ’n sekulêre denkraamwerk sê dat wonderwerke nie kan plaasvind nie en dat Jesus nie werklik uit die dood uit opgestaan het nie, dan bly ons glo in die waarheid van God se Woord. Wanneer die sekulêre wêreld sê dat Jesus maar net ’n mitiese figuur is en dat Hy nie waarlik geleef het nie, bly ons glo dat Hy God is wat werklik mens geword het.

Ons bly glo dat die Bybel die Woord van God is en dat dit nie maar net stories is wat deur mense uitgedink is nie. Wanneer die lewe moeilik raak dan hou ons steeds moed omdat ons God vertrou. Al verstaan ons nie rede vir sekere gebeurtenisse in ons lewe nie, vertrou God nog steeds. Al sien ons nie dadelik die resultaat van ons werk in God se Koninkryk nie, vertrou ons steeds dat God weet wat Hy doen en dat Hy besig is om deur ons swakheid sy doel te bereik.

Wees altyd oorvloedig in die werk van die Here: Met ander woorde, werk met ywer in God se Koninkryk. Hou aan om sy liefdesgebod teenoor alle mense uit te leef. Hou aan om vir mense van God se genade, dit wil sê die goeie nuus van Jesus Christus te vertel deur ons leefwyse en ook deur ons woorde. Wees betrokke in die gemeente waar God my geplaas het. Dra mekaar se laste. Wees daar vir my broers en susters in die geloof. Wees ’n steunpilaar vir hulle wat swaarkry. Deel in mekaar se vreugdes. As die Here my roep om as ampsdraer te dien, doen ek dit.

Ons kan bogenoemde opdragte uitvoer omdat ons weet dat ons inspanning nie tevergeefs is nie. Die werk wat ons vir God doen is nie sonder resultate nie en ons weet dat God sy doel bereik deur die werk wat ons doen, hoe gering dit ook al mag wees. Wanneer ons glo dat Christus deur sy dood en opstanding die mag van die sonde gebreek het, weet ons dat ons werk in God se Koninkryk is nie tevergeefs nie.

Slot

Jesus Christus se opstanding is nie net ’n storie wat ons tydens Paasfees weer onthou nie. Dit is die krag waaruit ons elke dag leef. God gee aan ons die oorwinning oor die dood deur ons Here Jesus Christus, leef daarom elke dag uit die krag van daardie oorwinning! Getuig saam met Paulus: “Die lewe is vir my Christus en die sterwe wins”

Amen

Moenie toelaat dat blokkasies jou van die krag van Jesus Christus se opstanding beroof nie want ons Here het regtig opgestaan

^{20 Apr. 2014 GKE}

Joh. 20 v 1-18; teksvers Luk 24 v 33 (Lees ook Mat. 28; Mar 16; Luk 24 & Joh. 20-21)

Lof-Psalm Ps. 92 v 1 (OAB)

Na Wet Ps. 38 v 1 (OAB)

Na Gebed Ps. 42 v 1 (OAB)

Slotsang Sb. 1-1 v 1 & 2 (Sb 24 in ou Swart Ps. boek)

Inleiding

Met Paasfees herdenk Christene wêreldwyd Jesus kruisdood en daarmee saam ook sy opstanding. Paasfees word as een van die belangrikste feeste op die Christelike kalender beskou. Die opstanding van Jesus Christus is die Christen se waarborg tot ’n nuwe lewe in God of anders gestel dit is ons waarborg van die ewige lewe wat nou reeds saam met God begin. Sonder die opstanding is ons geloof waardeloos soos die Here vir ons in 1 Kor. 15 v 17 – 19 sê:

¹⁷ En as Christus nie opgewek is nie, is julle geloof waardeloos en is julle nog gevange in julle sondes. ¹⁸ Dan is ook dié wat in Christus gesterf het, verlore. ¹⁹ As ons net vir hierdie lewe ons hoop op Christus vestig, is ons die bejammerenswaardigste van alle mense.

Christus se opstanding beteken vir ons die volgende:

1)    Ons Here leef! Ons aanbid nie ’n dooie God nie. Ons kyk nie terug in die verlede na God nie, maar ons kyk vorentoe na ’n lewe saam God.

2)    Ons kan dit doen want Jesus het die skeiding wat sonde tussen ons en God veroorsaak het, met sy kruisdood weggeneem. Sy opstanding is ons waarborg dat Hy die dood oorwin het. Dit gee vir ons die waarborg dat ons voor God staan asof ons nooit enige sonde gedoen het nie.

3)    Deur die opstanding word ons tot ’n nuwe lewe opgewek waar ons die heerlike teenwoordigheid van God ervaar.

4)    Verder is die opstanding ook vir ons ’n waarborg van ons eie salige opstanding in Christus. Die dood hou nie meer vir ons verskrikking in nie. Dit is ’n deurgang tot God waar ons vir ewig saam met God kan lewe sonder trane hartseer pyn of dood.

Hoekom ervaar ons dan nie altyd hierdie wonderlike voordele van die opstanding nie? Hoekom voel dit soms vir ons of God so ver is? Hoekom sukkel ons om hierdie nuwe lewe saam met God te leef? Hoekom kry my ou sondige natuur so dikwels die oorhand in die lewe?

Hier in ons teksgedeelte sien ons dat daar ’n paar blokkasies is wat kan keer dat ons die nut van opstanding in ons lewens kan ervaar. In die eerste plek is daar die blokkasie van vyandskap teen God. Tweedens is daar die blokkasie van woede teenoor God. Derdens die blokkasie van skuldgevoelens. Vierdens is daar die blokkasie hartseer en ’n gevoel van Godverlatenheid.

Blokkasie van Vyandskap:

Ons staan in die eerste plek stil by die blokkasie van vyandskap. In Mat 28v11-15 hoor ons:

¹¹ Terwyl die vroue op pad was, kom party van die wagte in die stad aan en vertel vir die priesterhoofde alles wat gebeur het. ¹² Die priesterhoofde het saam met die familiehoofde vergader en die volgende plan gemaak. Hulle het vir die soldate ’n groot som geld gegee ¹³ en gesê: “Julle moet sê: ‘Sy dissipels het in die nag gekom en sy liggaam gesteel terwyl ons geslaap het.’¹⁴ En as die goewerneur daarvan hoor, sal ons hom tevrede stel en sorg dat julle nie bekommerd hoef te wees nie.”

¹⁵ Die wagte het toe die geld gevat en gemaak soos hulle voorgesê is.

Hierdie storie word tot vandag toe onder die Jode vertel.

Die wagte wat hierdie gebeure aan die Priesterhoofde vertel was daar. Hulle het presies gesien wat gebeur het soos ons hoor in Mat. 28 v 2 – 4:

² Skielik was daar ’n geweldige aardbewing. ’n Engel van die Here het van die hemel af gekom, na die graf toe gegaan, die klip weggerol en daarop gaan sit.

³ Sy voorkoms was so blink soos weerlig en sy klere so wit soos sneeu. ⁴ Van skrik vir hom het die wagte gebewe en soos dooies geword.

Ten spyte daarvan weier die Priesterhoofde om die ware gebeure te glo en hulle dis ’n ander verduideliking daarvoor op. Net so is daar vandag ook mense wat weier om die vertelling van ooggetuies te aanvaar. Hulle glo nie die Bybel nie soos een persoon Donderdag op ’n internet besprekingsforum geskryf het in ’n bespreking oor hoe ons Goeie Vrydag moet vier:

Miskien moet julle eerste van alles uitvind of die karakter van Jesus ooit bestaan het want anders is al die menings pure verniet?

So is daar persone wat die absolute wonder en krag van Christus se kruisiging en opstanding mis omdat hulle weier om in Jesus Christus te glo. Die hartseer is dat as mens hiermee volhard, jy die moontlikheid in die gesig staar om vir ewig sonder God te wees.

Die blokkasie van woede

In die verhaal in Luk. 24v20-23 hoor ons van Kleopas wat bitter ontsteld was:

²¹ Ons het so gehoop dat dit Hy is wat Israel sou verlos. Maar boonop is dit vandag al die derde dag vandat die dinge gebeur het. ²² En nou het ’n paar vroue uit ons kring ons ook nog ontstel. Hulle was vanmôre vroeg by die graf ²³ en kon sy liggaam nie kry nie.

Kleopas is kwaad omdat hy meen dat Jesus hulle in die steek gelaat het. Hulle het so hard gehoop dat Jesus vir Israel sou verlos van die Romeinse onderdrukking.

Hoe dikwels gebeur dit dat ons ook teleurgesteld voel? Ons het een of ander verwagting gehad wat nie uitgewerk het nie en nou is ons kwaad vir die Here. Die probleem wat Kleopas gehad het was dat hy ’n verkeerde verwagting van Christus gehad het en dat hy ook nie die groter prentjie verstaan het nie. Hy het ’n aardse verwagting van Jesus gehad en hy het nie die groter prentjie van God se koninkryk raakgesien nie. Hoe dikwels is verwagting van Jesus net maar eintlik oor materiële gewin. Ons wil hê dat dit hier en nou moet goed gaan en dit verblind ons vir die teenwoordigheid van God net soos Kleopas en sy metgesel verblind was ten opsigte van Jesus se teenwoordigheid nie. Deur die Woord het Jesus egter Kleopas se verkeerde verwagting reggestel soos ons hoor in Luk 24v27:

Daarna het Hy by Moses en al die profete begin en al die Skrifuitsprake wat op Hom betrekking het, vir hulle uitgelê.

As ons dus kwaad is vir God omdat ons voel dat Hy ons teleurgestel het dan is dit nodig dat ons met sy Woord moet besig wees en wanneer ons dit doen dan sal God Homself aan ons bekendmaak.

Die blokkasie van skuldgevoelens

Petrus het die Here drie maal verloën. Dink net watter skuldgevoel Petrus moes gehad het. Dit is Petrus wat ewe manhaftig verklaar het soos ons in Luk. 22v33 hoor:

“Here, ek is bereid om saam met U selfs gevangenskap en dood in te gaan.”

Daarom dat hy ook so half terughoudend is wanneer hy en Johannes gaan kyk na Jesus se leë graf soos ons hoor in Joh. 20v3-4:

³ Petrus en die ander dissipel het toe uitgekom en na die graf toe gegaan. ⁴ Die twee het saam begin hardloop, maar die ander dissipel het vinniger as Petrus gehardloop en eerste by die graf gekom.

Dink net wat moes binne in Petrus se gemoed aangegaan het. Het Jesus regtig opgestaan? Hy moes weet en daarom het hy by die graf ingegaan waar Johannes net by die ingang bly staan het soos ons hoor in Joh. 20v6:

Ná hom het Simon Petrus ook daar aangekom, en hy het in die graf ingegaan.

In Luk. 24v12^b hoor ons:

Vol verwondering oor wat gebeur het, is hy terug huis toe.

Hoe dikwels word ons nie ook as gevolg van skuldgevoelens afgesny van Jesus af nie. Ek het al weer in sonde geval ten spyte van my beste intensies. Ewe grootpraterig het ek net soos Petrus verklaar:

“Here, ek is bereid om saam met U selfs gevangenskap en dood in te gaan.”

En nou staan my sonde al weer soos ’n muur tussen my en die Here. Skaam skuldig sien ek nie kans om vir Jesus in die oë te kyk nie. Genadiglik is dit die beste posisie om in te wees om die Here se genade te ontvang. Dit is eers wanneer ek besef dat ek tot die dood toe skuldig is dat ek werklik kan begryp hoe groot God se genade is. Jesus is getrou en Hy hou nie sy genade terug nie soos ons hoor in Luk. 24v34:

“Die Here het regtig opgestaan en Hy het aan Simon verskyn!”

Geliefdes, as ons deur skuldgevoelens oorweldig word is dit net nodig dat ons weer by Jesus uitkom sodat ons weereens die heerlikheid van sy teenwoordigheid kan ervaar.

Die blokkasie van hartseer en ’n gevoel van Godverlatenheid.

Maria Magdalena se hartseer het gekeer dat sy Jesus herken soos ons hoor in Joh. 20v11:

Maar Maria het buite by die graf bly staan en huil.

In Joh. 20v15 hoor ons:

Jesus vra haar toe: “Mevrou, waarom huil jy? Vir wie soek jy?”

Sy het gedink dit is die tuinopsigter, en sy het vir hom gesê: “Meneer, as u Hom weggevat het, sê vir my waar u Hom begrawe het, en ek sal Hom daar gaan haal.”

Dit gebeur soms dat hartseer ons heeltemal verblind vir die liefdevolle teenwoordigheid van die Here. Dit is die tye wanneer dit vir ons voel of die lewe net te veel is. Die genade is dat die Here verstaan en daarom laat Hy ons nooit alleen nie. Jesus het bange Godverlatenheid ervaar sodat ons nooit weer deur God verlaat sal word nie. Ons moet maar net luister vir sy stem. Jesus het nie vir Maria alleen gelaat nie. Hy het geduldig by haar gebly totdat sy Hom herken het soos ons hoor Joh. 20v16:

Jesus het vir haar gesê: “Maria!”

Sy draai na Hom toe en sê in Hebreeus vir Hom: “Rabboeni!” Dit beteken leermeester.

Wanneer ons deur hartseer verblind word moet ons maar net besig bly met die Here se Woord en ons sal sy liefdevolle stem daar hoor.

Slot

Die blokkasies wat keer dat ons deur die krag van Jesus se opstanding die liefdevolle teenwoordigheid van die Here ervaar is vyandskap teen God, woede, skuldgevoelens en hartseer. As hierdie blokkasies in die pad staan van u verhouding met die Here, kom na Jesus toe. Moenie toelaat dat blokkasies jou van die krag van Jesus Christus se opstanding beroof nie want ons Here het regtig opgestaan !!!!!

Amen

God is vir ons ’n toevlug en ’n beskerming

6 Apr 2014

Skriflesing Ps. 46 teksvers fokusvers Ps. 46:2

Liturgie

Ps. 46-1:1 & 6

Sb. 9-3:1 & 2

Sb. 15-7:4 & 5

Ps. 46-2:1 – 3

Inleiding

Die lewe is vol onsekerheid en benoudheid. Ons weet nie wat die toekoms vir ons inhou nie. Wie van ons weet of ons more nog hier gaan wees? Een van die lewensvrae wat baie onsekerheid en benoudheid by baie mense veroorsaak is: “wat wag vir my anderkant die dood?” Die hoofrede waarom mense bang is vir wat anderkant die dood lê is as gevolg van die mens se opstandigheid teen God. Die mens wat God se gesag in sy lewe verwerp en dit veroorsaak dat daar skeiding tussen mens en God is.

God se straf daarvoor is die ewige dood waar die mens vir ewig van God en sy liefde geskei sal wees. Elkeen van ons verdien daardie straf. As dit jou nie benoud maak nie, dan verstaan jy nie werklik die erns van die saak nie. Geliefdes, weet u wat wag anderkant die dood? Daar is twee alternatiewe, of ewig beskerm en getroetel in God se liefde of ewig sonder Hom in uiterste nood en ellende.

Waar kry ek sekerheid daaroor? In Ps. 46 hoor ons waar die Psalmdigter gaan troos en sekerheid soek het. Hy vertrou dat God se volk veilig en beskut is onder God se beskerming. In hierdie Psalm word God se konkrete bystand aan sy bedreigde volk in die loop van die geskiedenis besing. Dwarsdeur die Ou Testament is die verdrukking van Israel en God se verlossing ’n heenwysing na Christus wat die mensdom van die slawerny van die sonde verlos. Die uittog uit Egipte waar God sy volk verlos van die slawerny van Egipte. Die verlossing van die Jode uit die slawerny van die Ballingskap. Die doel van hierdie Psalm is om die aandag op die God van Israel wat op Sion in die tempel woon, te vestig en hoe Hy sy volk verlos van hul vyande. Ons grootste vyand is die sonde wat ons van God af wegskeur.

God beskerm ons (Ps. 46:2-4)

In Ps. 46:2-4 hoor ons hoe God sy volk beskerm teen hul vyande. In vers 2 bevestig die Psalmdigter :

God is vir ons ’n toevlug en ’n beskerming ;

Hy was nog altyd bereid om te help in nood

Die Hebreeuse woord wat met “toevlug” vertaal is, wys op die absolute vertroue wat op iets of iemand geplaas word om jou teen gevaar te beskerm. Die Hebreeuse woord wat met “beskerming” vertaal is, beteken letterlik ’n plek van veiligheid. God is vir die wat by Hom skuiling soek so ’n plek van veiligheid.

Mens kan God vertrou, want Hy is altyd te bereid om te help wanneer jy in nood verkeer. Die Hebreeuse woord wat met “nood” vertaal is, beteken ’n diepe emosionele pyn en ellende wat mens ervaar as gevolg van ’n sekere situasie of omstandigheid. Die mens se grootste nood is dat hy vanweë sy sondige opstand teen God van Hom geskei is. God het die mens gemaak om in ’n verhouding met Hom te leef. Wanneer daardie verhouding gebreek is, ervaar die mens diep emosionele pyn en ellende.

Wanneer jy so voel dan moet jy weet, jy kan God vertrou, maak nie saak wat gebeur nie. Al skud die berge. As daar aardbewings is wat ’n tsoenami veroorsaak kan jy God vertrou om jou te help. ’n Gevaar wat egter groter is as enige nood wat deur aardbewings, tsoenami, siekte of wat ook al hier op aarde is, is die gevaar van die ewige dood weens ons sondige opstand teen God. Wat is die ergste wat mens hier op aarde kan tref? Die liggaamlike dood. Wat is erger as die liggaamlike dood? Die ewige dood waar mens vir ewig helse smart en pyn sonder God se vertroosting ervaar.

God is nog altyd bereid om te help met die nood wat ons ervaar omdat ons sonde die verhouding tussen ons en God gebreek het.

Blydskap in die Godstad (Ps. 46:5-8)

Om te beklemtoon dat mens veilig by God is, beskryf die Psalmdigter op ’n ander manier God se sorg vir sy volk. In verse 5-8 word die volk se blydskap beskryf omdat God Homself as ’n lewendgewende rivierstroom aan sy volk gee. Water verteenwoordig lewe. Sonder water is daar nie lewe nie. In Open 21:6 hoor ons:

Ek is die Alfa en die Omega, die Begin en die Einde. Aan elkeen wat dors het, sal Ek te drinke gee uit die fontein met die water van die lewe, verniet.

God is die lewende water wat aan sy uitverkore kinders die ewige lewe gee.

Hy is snags teenwoordig by sy volk en daarom sal die Godstad niks oorkom nie. Die volke en nasies kan maar probeer om teenoor God in opstand te kom, dit sal hulle niks baat nie want God is almagtig.

In vers 8 word God se almag vir ons beskryf met sy Hebreeuse Naam Sebaot. Dit beteken letterlik ’n Almagtige heerser wat oor die heelal heers. Alles, dit wil sê elke mag of natuurkrag en elke volk en nasie, elke mens is aan sy heerskappy onderworpe. In die 83 Vertaling is sy naam vertaal met “die Here die almagtige” en in die Ou Vertaling is dit met “die Here van die Leërskare” vertaal. Ons kan dit ook vertaal met “die Here wat oor alles regeer.”

Die klem is dus hier op die almag van God. Daarom kan ons met vertroue by Hom skuiling soek omdat daardie skuiling wat Hy gee nie deur die vyand ingeneem kan word nie. Dit is soos ’n fort wat op ’n hoë berg wat omring is deur onklimbare steil kranse met hoë mure wat die fort bo-op daardie kranse omring. Dit is dus ’n vesting wat nie deur die vyand ingeneem kan word nie. Ons kan God dus vertrou om te help wanneer ons in nood verkeer omdat Hy almagtig is en daarom vir ons ’n veilige skuilplek gee. Die situasie of omstandighede verander nie, maar daai hopelose benoudheid (verlammende vrees) wat jy ervaar neem Hy weg en Hy dra jou veilig deur die gevaar. As ons eers eenmaal deur God se genade gered is, is daar niks wat ons van sy liefde kan skei nie.

Kom kyk wat die Here gedoen het (Ps. 46:9-12)

In hierdie laaste verse val die klem nou op wat die Here vir sy volk doen. God die Almagtige laat oorloë ophou. Hy breek die opstandige nasies se spiese en verbrand hulle oorlogswaens sodat hulle kan weet en erken dat Hy alleen God is. Daarom voel sy volk veilig by Hom.

In hierdie Psalm sê die Here vir ons hoekom sy volk vir niks bang was nie. Hulle het in hul nood gedink aan God se dade in die verlede en terwyl hulle dit gedoen het, het hulle onthou wat Hy alles vir hulle beteken het. Toe het hulle geweet dat hulle Hom kan vertrou en dat hulle vir niks meer bang hoef te wees nie. Op grond van God se troue verbondsliefde kan ons ook die beloftes vertrou wat Hy in Open 21:3-5 vir ons gee.

³Toe het ek ’n harde stem van die troon af hoor sê: “Kyk, die woonplek van God is nou by die mense. Hy sal by hulle bly; hulle sal sy volke wees, en God self sal by hulle wees as hulle God. ⁴Hy sal al die trane van hulle oë afdroog. Die dood sal daar nie meer wees nie. Ook leed, smart en pyn sal daar nie meer wees nie. Die dinge van vroeër het verbygegaan.”

⁵Toe sê Hy wat op die troon sit: “Kyk, Ek maak alles nuut.”

Hoe vind ons troos in hierdie Psalm?

As daar by my nog enige onsekerheid is oor wat anderkant die dood vir my wag en as dit my doodsbenoud maak kan ek my troos in Jesus Christus vind. Dan kan ons vashou aan ons belydenis in Sondag 1 van die Heidelbergse Kategismus dat my enigste troos in lewe en in sterwe is dat ek aan Jesus Christus behoort.

Toe ons op die punt gestaan het om veroordeel te word tot die ewige dood het God sy Seun in ons plek laat sterwe. Toe Jesus so benoud was dat Hy bloed gesweet het, was daar vir Hom geen skuilplek teen gevaar gewees nie. Daar was nie vir Hom ’n toevlug en beskerming gewees nie. In helse pyn en smart het Hy in bange Godverlatenheid uitgeroep: “My God my God, waarom het U my verlaat?” Daar was vir Hom geen troos of beskerming toe Hy die dood tegemoed gegaan het nie. Hy het dit gedoen sodat daar vir ons ’n toevlug en beskerming kan wees teen die vyand van ons sondige geaardheid. Op grond van wat Jesus Christus vir ons aan die kruis gedoen het kan ons ook met sekerheid sê:

Die Here, die Almagtige , is by ons, die God van Jakob is vir ons ’n beskutting

God is vir ons ’n toevlug en beskerming en daarom kan ons ook daarna uitsien dat Hy Homself as ’n lewendgewende rivierstroom aan ons sal gee. Hy is in die persoon van die Heilige Gees altyd by ons teenwoordig en daarom kan ons veilig by Hom voel. Kom ons soek skuiling teen die vyand van die sonde by God, want Jesus is vir ons ’n toevlug en ’n beskerming.

Amen

Kom saam met My en Ek sal julle vissers van mense maak

30 Mar 2014

Skriflesing Mat 4:12-22 teksvers Mat 4:19

Liturgie

Ps. 111-2:1 & 3

Ps. 112-2:1 & 3

Ps. 119-2:7,18 & 19

Sb 3-4:1 & 5

Inleiding

Wanneer mens belydenis van geloof aflê erken jy daarmee dat jy ’n volgeling / dissipel van Jesus wil wees. Wat beteken dit om ’n volgeling van Jesus te wees?

Tyd van voorbereiding

In ons teksgedeelte hoor ons van Jesus wat met bediening (sy werk) hier op aarde begin het en ook waar Hy sy eerste volgelinge geroep het. Om dit egter mooi te verstaan is dit nodig dat ons na die groter prentjie, dit wil sê die agtergrond van die gebeure kyk (konteks). Voor hierdie gebeure het daar twee belangrike gebeurtenisse in Jesus se lewe plaasgevind: sy doop en sy versoeking deur satan in die woestyn soos ons hoor in Mat. 3:31-4:11.

Hierdie gebeure was ’n belangrike tyd van voorbereiding vir Jesus se werk hier op aarde. Daarin het Jesus vir ons gewys dat Hy Homself volledig aan sy Vader se wil onderwerp het. Met sy doop wou Johannes Hom aanvanklik nie doop nie, want hy het gemeen dat hy wat Johannes is eerder deur Jesus gedoop moes word. Jesus maak egter sy besware stil deur te sê (Mat 3:15):

“Nogtans moet jy dit nou doen, want op hierdie manier moet ons aan die wil van God voldoen.”

Met sy versoeking het Hy gewys dat ons die satan oorwin deur volkome gehoorsaamheid aan God. Hiermee het Jesus gewys dat Hy self bereid was om te doen wat Hy van sy volgelinge verwag om te doen. Verder het Hy ook gewys dat oorgawe aan God se wil rus en kalmte bring.

Omdat Jesus egter die sondigheid van die mens geken het, het Hy baie meer gedoen as om net ’n voorbeeld te stel. Hy was tot die dood toe gehoorsaam aan God deur ons straf vir die sonde te dra en daarmee het Hy ons in staat gestel om aan God gehoorsaam te wees. Om ’n volgeling van Jesus te word beteken dus vir ons dat ons ook ’n tyd van voorbereiding moet deur gaan (katkisasie). Ons voorbereiding is egter anders as wat Jesus sin was. In ons tyd van voorbereiding moet ons God leer ken en leer hoe ons, ons verhouding weer met Hom in Jesus Christus herstel kan word.

Toe Jesus na die Woestyn toe gegaan het is Hy deur die Heilige Gees gelei om dit te doen soos ons hoor in Mat 4:1

Toe is Jesus deur die Gees die woestyn in gelei om deur die duiwel versoek te word.

Ons voorbereiding beteken ook dat ons deur die Heilige Gees gely word om die verlossing in Jesus Christus deur middel van geloof aan te gryp. Met ander woorde Ons kry kennis van die verlossing in Jesus Christus se kruisiging en opstanding deur te hoor en die Gees wek in ons die geloofsvertroue dat dit wat ons geleer het die waarheid is. Daarom word die belydenis van geloof ook ingely met “Glo u .....” Ons sal later tydens die belydenis aflegging in meer detail daarby stilstaan.

Daar is dus ’n tyd van voorbereiding nodig sodat ons kan weet wat ons moet glo om ’n volgeling van Jesus Christus te word.

Bekering

Bekering is ’n volgende aspek van ’n volgeling van Jesus. In Mat 4:17 hoor ons:

“Bekeer julle, want die koninkryk van die hemel het naby gekom.”

Wanneer jy ’n volgeling van Jesus is moet mens jouself bekeer. Bekering beteken ’n radikale rigting verandering in jou lewe. As jy ’n volgeling van Jesus word, kan jy nie maar net met sy ou lewe voorgaan nie. ’n Volgeling van Jesus is nie meer in opstand teen God se wil nie, maar daar is ’n opregte begeerte by hom/haar om gehoorsaam te wees aan God se wil.

Roeping

Bekering bring ’n radikale verandering in mens se lewe te weeg. Gely deur die Heilige Gees luister jy na die roepstem van Jesus. In Mat 4:20 hoor ons:

Hulle het dadelik die nette gelos en Hom gevolg.

en in Mat 4:22 hoor ons weer

hulle het dadelik die skuit en hulle pa verlaat en vir Jesus gevolg.

Dit beteken ’n volkome gehoorsaamheid aan die wil van God.

Wanneer Jesus ons roep om Hom te volg, maak Hy ook ’n belofte: (Mat 4:19)

Kom saam met My, en Ek sal julle vissers van mense maak.

’n Belofte dat Hy ons sal gebruik om te werk in sy koninkryk.

Jesus begin sy bediening deur die lig van God se Koninkryk te bring na daar waar die duisternis oorheers. Hy vestig Homself in Kapernaum aan die bopunt van die meer van Galilea. Dit is die gebied van Sebulon en Naftali wat verag was. In Jes. 8:23 hoor ons dat daar na hierdie gebied verwys word as die land van duisternis. Een van die groot temas in die Bybel is dat God lig is. As mens God dus nie ken nie, woon jy in die duisternis. Dit is juis na hierdie mense wat God nie ken nie, wat Jesus gaan.

Wanneer jy ’n volgeling van Jesus is, het jy die roeping om die evangelie (die goeie nuus van die versoening met God in Jesus Christus) te bring aan mense wat nog in die duisternis leef sonder God omdat hulle Hom nie ken nie. Dit is egter nie ’n taak wat ons in eie krag moet aanpak nie. Hy maak ons vissers van mense. God rus ons toe om die werk te doen wat Hy van ons vra.

Samevatting

Om ’n volgeling van Jesus te word, beteken dat ons moet leer wie Hy is en hoe Hy ons weer met God versoen. ’n Volgeling van Jesus luister na God en daar is by hom/haar ’n opregte begeerte om te doen wat God van ons vra. Jesus gebruik sy volgelinge om aan mense wat Hom nie ken nie te vertel wie Hy is en dat as hulle in Jesus glo hulle God ook persoonlik kan leer ken.

Die Here roep ons: “Kom saam met My” en wanneer ons belydenis van geloof aflê, antwoord ons Hom deur te sê: “ja Here ek wil die pad saam met U stap. Gebruik my in U koninkryk.”

Amen

Niks kan in hierdie wêreld vir ons blywende geluk gee nie, slegs God kan dit doen.

23 Mar 2014

Skriflesing Pred. 2 Teksvers Pred. 2v10&11

Liturgie

na Votum Ps. 48 v 1 & 3  (OAB)

Na Wet Ps. 119 v 1  (OAB)

Na gebed Ps. 119 v 39  (OAB)

Slotsang Ps. 46 v 1 & 6 (OAB)

Inleiding

Het u al ooit vir die grootste leuen in hierdie wêreld geval? As ek maar net ’n miljoen kan kry of wen dan sal ek gelukkig wees! As ek maar net genoeg geld het sodat ek nie meer so hoef te sukkel nie, dan sal ek gelukkig wees. As ek genoeg geld het dan kan ek bekostig om soveel plesier te hê as wat ek wil. As ek genoeg geld het dan kan ek koop wat my hart begeer. Dan kan ek daardie huis bekostig wat ek nog altyd wou gehad het. Ons dink so dikwels dat geld die sleutel tot geluk in hierdie lewe is. Die groot vraag is egter: “kan geld werklik vir ons blywende geluk kan verskaf?”

Hier in ons teks hoor ons hoe die Prediker (wat volgens die beskrywings in die boek Salomo is) ook geluk nagejaag het. Daarin vind ons sy soeke na geluk en die rede waarom hy dit nie gevind het nie. Daarna gaan ons ook hoor waar ons ware blywende geluk kan vind. In die eerste plek gaan ons nou stilstaan by Salomo se soeke na geluk.

Die soeke na geluk

Salomo wou bepaal hoe hy blywende geluk kon vind en daarom het hy ’n eksperiment uitgevoer om te bepaal hoe hy blywende geluk kon vind. In die eerste plek het hy plesier probeer soos ons hoor in Pred. 2v1:

Ek het by myself gedink: laat ek my oorgee aan plesier, laat ek die lewe geniet!

Dit het egter nie geslaag het nie soos ons hoor in Pred. 2v1b&2

Maar ook dit het niks opgelewer nie. Van lag moes ek sê: dis sinloos, en van plesier: wat bring dit?

Toe dit nie slaag nie het hy drank oorweeg soos ons hoor in Pred. 2v3:

Ek het gewonder wat sal gebeur as ek my aan wyn oorgee maar tog nog op soek bly na wysheid, as ek soos ’n dwaas leef totdat ek vasgestel het wat die beste is waarmee ’n mens hom sy lewe lank in hierdie wêreld besig kan hou.

Hierin kan ons sien dat hy nie maar net homself onnadenkend aan lewe van plesier en drank oorgegee het nie, maar dat hy werklik besig was om te probeer uitvind of mens daardeur blywende geluk kon vind, daarom sê hy dat hy bly soek het na wysheid.

Die volgende ding wat Salomo getoets het was om groot bouprojekte aan te pak. Hy het huise gebou het en wingerde aangeplant. Hy het tuine en parke aangelê waarin hy allerhande bome en vrugte bome geplant het. Hy het die nodige damme aangelê wat water vir die tuine moes verskaf. Verder het hy ook genoeg slawe en slavinne aangeskaf wat na al die werk moes omsien. Hy het besittings opgegaar en ook baie geld bymekaar gemaak soos ons hoor in Pred. 2v8a:

Ek het vir my silwer en goud opgegaar wat ek gekry het van konings en provinsies.

Verder het hy gesorg vir genoeg ontspanning soos ons hoor in Pred. 2v8b:

Ek het vir my sangers en sangeresse gewerf, talle mooi meisies met wie ek die lewe kon geniet.

Omdat hy dit kon doen, het hy alles vir hom gekry wat sy hart begeer het soos ons in Pred. 2v10 hoor:

Alles wat ek begeer het, het ek my veroorloof; ek het my geen plesier ontsê nie.

Dit laat mens dink aan die ryk filmsterre met hulle groot weelderige huise daar in Hollywood. Die groot partytjies wat hulle hou en al die meisies wat in sulke klien bikini’s daar om die swembad rondloop.

Dit bring ons maar net weereens by die vraag: “kan geld, werklik geluk koop?” Ons moet egter mooi dink voordat ons te vinnig “nee” antwoord omdat ons weet dat dit die regte antwoord is. Salomo het tog ook tot daardie slotsom gekom het soos ons hoor in Pred. 2v11:

Maar toe ek goed nadink oor alles wat ek gedoen het en oor alles waarmee ek my met soveel sorg besig gehou het, het ek gesien dat alles niks  was, ’n gejaag na wind. In hierdie wêreld bevredig niks nie

As ons doodeerlik met onsself is, dan sal ons erken dat ek ook graag so ’n miljoen of twee op die Lotto sal wil wen (selfs al speel ons nie Lotto nie, en dalk koop ek maar so dan en wan ’n Lottokaartjie). Is die denke dat geld geluk kan koop, nie maar die rede waarom soveel mense vir geldslenters gevang word nie en dan al hulle reserwefondse daardeur verloor? Is dit nie die rede hoekom ons soms so maklik ons swaarverdiende geld op riskante beleggingskemas waag nie?

Dit is eers wanneer ons die werklike rede verstaan waarom geld en rykdom nie geluk kan koop nie, dat ons verlos sal word om na rykdom te smag. Dit help nie ons staan net stil by vers 11 omdat Salomo gesê het dat die soeke na rykdom maar net ’n gejaag na wind is nie. Dit help selfs nie eens as ons ’n paar voorbeelde ophaal van die superrykes in ons wêreld wat ten spyte van al hul rykdom sielsongelukkig is nie, want daar is ook ryk mense wat wel gelukkig is. Rykdom en plesier is opsigself nie boos en verkeerd nie (ons gaan later stilstaan waarom nie). Vervolgens gaan ons nou stilstaan by die rede waarom geld en rykdom op hul eie nie geluk kan verskaf nie.

Geld en rykdom kan op hul eie nie geluk verskaf nie

Waarom het Salomo tot die slotsom gekom dat alles waarmee hy homself met soveel sorg besig gehou het, op niks uitgeloop het nie. Waarom was dit ’n gejaag na wind? Hy het wel gesê dat wysheid beter as dwaasheid is soos ons hoor in Pred. 2v14a:

Die wyse weet wat hy doen, vir die dwaas is daar net donkerte

Maar tog kom hy tot die slotsom dat selfs wysheid ook nie kan help nie, want so sê hy vir ons in Pred. 2v14b:

maar dit weet ek: een en dieselfde lot tref albei.

In Pred. 2 v 16 hoor ons die rede:

Die wyse sal net so min as die dwaas altyd onthou word. In tye wat kom, word alles vergeet. Die wyse sterf net soos die dwaas!

Die wyse sterf net soos die dwaas! Salomo was baie ryk en wys soos ons hoor in Pred. 2v9:

Ek was magtiger en ryker as almal voor my in Jerusalem. My wysheid het my goed te pas gekom.

Ten spyte van sy rykdom en wysheid kon hy nog steeds nie die straf vir die sonde ongedaan maak nie. Die wyse sterf net soos die dwaas. Met die sondeval is die mens uit die Paradys verban en is die mens aan die straf vir die sonde onderwerp, naamlik die dood. Met al die rykdom en wysheid van hierdie wêreld kan die mens nie die gevolge van die sondeval ongedaan maak nie! Die wyse sterf net soos die dwaas!

Is dit dan verkeerd om die lewe te geniet en is rykdom verkeerd? Nee geliefdes, rykdom opsigself is nie verkeerd nie, solank mens besef dat dit ’n gawe van God is soos ons ook hoor in Pred. 2v24:

Dit is nie aan die mens self te danke dat hy kan eet en drink en onder al sy arbeid nog die goeie kan geniet nie. Ek het ingesien dat dit ’n gawe uit die hand van God is.

Dit is slegs wanneer die soeke na rykdom en plesier ’n doel opsigself word, dat dit ’n gejaag na wind word. Wanneer mens jou geluk in rykdom en plesier soek, dan vind mens dat leeg en sinloos word. Sonder God word die lewe ’n gejaag na wind. Dit is net by God waar mens ware geluk en vrede kan vind.

Waar vind ons dus ware en blywende geluk?

Ons vind ware en blywende geluk alleen by God. Sonde veroorsaak dat ons van God afgeskei raak en wanneer ons van God geskei is, raak die lewe sinloos en leeg. Sonder God is die lewe ’n gejaag na wind. Dit is slegs deur Jesus Christus wat ons God weer kan vind omdat Hy alleen weer vir ons die lewe wat ons verloor het kan teruggee soos ons hoor in Joh. 11v25:

“Ek is die opstanding en die lewe. Wie in My glo, sal lewe, al sterwe hy ook

In Joh. 14v6 hoor ons dat Jesus die enigste weg tot die Vader is:

“Ek is die weg en die waarheid en die lewe. Niemand kom na die Vader toe behalwe deur My nie.

Samevatting

Deur die boek Prediker wys die Here vir ons watter lewenspad na leegheid lei en help Hy ons om te ontdek wat die ware doel met die lewe is. Hierdie kennis kan ons beskerm teen die leegheid wat daar in ’n lewe sonder God is. Hy leer vir ons dat dinge soos kennis, geld, plesier, werk en gewildheid geen betekenis het nie.  Ware bevrediging kom as ’n mens weet dat die dinge wat ons doen, deel van God se plan vir ons lewens is.  Deur sy lewende Woord in die boek Prediker help die Here ons om ons te bevry van ons ewige sug na mag, goedkeuring en geld én kan ons ook daardeur nader na God gebring word.

Geliefdes moenie geluk by verkeerde plekke soos plesier en rykdom soek nie. Laat ons eerder ons geluk by die Here in Jesus Christus soek, want niks kan in hierdie wêreld vir ons blywende geluk gee nie, slegs God kan dit doen.

Amen