Jesus het regtig opgestaan

Heidelbergse Kategismus - SONDAG 17

45  Vraag: 

Watter nut het die opstanding van Christus vir ons?

Antwoord: 

Ten eerste het Hy deur sy opstanding die dood oorwin sodat Hy ons die geregtigheid wat Hy deur sy dood verwerf het, deelagtig kon maak (a). 

Ten tweede word ons nou ook deur sy krag tot 'n nuwe lewe opgewek (b). 

Ten derde is die opstanding van Christus vir ons ’n betroubare waarborg van ons salige opstanding (c).

(a) Rom. 4:25;  1 Pet 1:3;  1 Kor. 15:16.  (b) Rom. 6:4;  Kol 3:1, 5;  Ef. 2:5, 6.  (c) 1 Kor. 15:20, 21.

 

Het Jesus regtig opgestaan? Reeds van die begin af word daar twyfel gesaai oor Jesus se opstanding. Net na Jesus se opstanding het die priesterhoofde en familiehoofde alreeds saamgesweer om Jesus se opstanding te ontken. Hulle het vir die soldate wat getuies van die opstanding was ’n groot som geld gegee en gesê: “Julle moet sê: ‘Sy dissipels het in die nag gekom en sy liggaam gesteel terwyl ons geslaap het’.” En getrou aan die sondige aard van die mens het die wagte toe die geld gevat en gemaak soos hulle voorgesê is.

       Vandag nog is daar baie mense wat skepties is oor Jesus se opstanding. Volgens sekulêre denke van ons tyd word verklaar: “Die wetenskap en ons ervaring het bewys: dood is dood en klaar!” Daarom kan die opstanding van Jesus Christus nie as ’n werklikheid, as ’n historiese feit, aanvaar word nie. Dit pas gewoon net nie in hul denkraamwerk in nie. Daarom word dit as ’n mite en ’n legende afgeskryf.

       Selfs mense wat hulself steeds Christene noem verklaar dat Jesus nooit werklik opgestaan het nie. Dit word hoogstens as ’n simbool beskou wat vir ons sê: “Hy leef in my hart”, of “Ek ontmoet Hom in die prediking.” Mens kan maar net wonder wat die inhoud van sulke prediking is? So word ’n gees van skeptisisme gesaai wat selfs opregte gelowiges kan begin laat wonder of Jesus werklik opgestaan het?

       Die probleem daarmee is dat twyfel in die opstanding van Jesus inderdaad twyfel in die wese van ons Christelike geloof is. Die Christelike geloof staan of val by die werklikheid dat Jesus waaragtig uit die dood opgestaan het! As Christus egter in die dood vasgehaak het onstaan die vraag: “hoe moet mens die bestaan en voortbestaan van die kerk verklaar?” Sonder die opstanding is ons geloof waardeloos soos ons inderdaad ook in 1 Kor. 15:17-19 hoor:

En as Christus nie opgewek is nie, is julle geloof waardeloos en is julle nog gevange in julle sondes. Dan is ook dié wat in Christus gesterf het, verlore. As ons net vir hierdie lewe ons hoop op Christus vestig, is ons die bejammerenswaardigste van alle mense.

        As Christus nie opgestaan het nie, dan is alles wat ons hier as kerk saam doen tevergeefs. Dis tevergeefs dat ons, ons kinders laat doop. Dis tevergeefs dat ons eredienste bywoon. Dis tevergeefs dat ons enigsins as kerk bestaan.

       Wat maak ons dan met die aanklag dat ons as Christene maar net ’n blinde geloof het wat teen al die bewyse die onmoontlike en onlogiese glo? As gelowiges glo ons inderdaad dat dit ’n historiese feit is dat Jesus uit die dood opgestaan het, want die Woord van God laat hoegenaamd geen twyfel hieroor nie. Volgens die Bybel is die Opstanding ’n feit. Dit het werklik gebeur.

       Dwarsdeur die Nuwe Testament weerklink dit: Die Here het regtig opgestaan! As mens dit nie wil aanvaar nie, watter geloofwaardigheid het die res van die Nuwe Testament of die Bybel nog? Watter sin sou dit in elk geval maak om ’n dooie Heer en Meester te verkondig of tot Hom te bid, as Hy tog nie kan hoor nie?

       Ten spyte van ’n aanklag van ’n irrasionele onlogiese geloof teen alle bewyse in, maak ons geloof in die historiese opstanding juis sin omdat dit die beste verduideliking gee vir die feite rondom dit.

       Die eerste historiese feit rondom die saak is die leë graf van Jesus. Byna al die erkende navorsers aanvaar die leë graf as ’n historiese feit wat deur die getuienis daaroor bevestig word. Enkele van hierdie getuienisse is byvoorbeeld die feit dat die opstanding verkondig is in die stad waar dit plaasgevind het. As die graf nie leeg was nie sou hierdie verkondiging geen geloofwaardigheid gehad het nie.

       ’n Volgende getuienis is dat die Jode wat teen Jesus was, erken het dat die graf leeg was en daarom het hulle die wagte omgekoop om die storie te versprei dat Jesus se liggaam gesteel was soos ons hoor in Mat 28 : 11-15. Dit word ook bevestig in vroeë Joodse geskrifte. Daar is ook bewyse dat selfs in die tweede eeu NC die Jode nog steeds erken het dat die graf leeg was en dat hulle allerlei verskonings gehad het om te verduidelik hoekom.

       Die leë graf het nie juis in hulle guns getel nie, maar tog het hulle dit erken omdat die bewyse daarvoor onomstootlik moes gewees het. As daar nie ’n leë graf was nie, sou dit hulle saak versterk en sou hulle dit beslis as argument ter verdediging van hulle teenstand gebruik het.

       Markus se weergawe van die leë graf en opstanding dateer so ver terug as net 7 jaar NC. Die beskrywing van Josef van Arimethea as die een wat Jesus begrawe het bevestig Markus se verhaal want hy was ’n bekende in die Joodse samelewing van sy tyd en daarom sal Markus nie valse berigte oor hom kon versprei nie. Dit sal dadelik deur die mense van sy tyd as vals uitgewys gewees het.

       Verder is dit ook so dat die vroeë datering van die Evangelie volgens Markus daarop wys dat daar nie genoegsame tyd verloop het vir legendes om te ontwikkel het nie. Legendes onstaan eers baie lank (eeue) na die gebeure waaroor die legende gaan.

       Jesus het eerste aan die vroue verskyn soos ons hoor in al vier die Evangelies. In daardie tyd het vroue se getuienis nie getel nie. Hulle mag nie eers as getuies in die hof getuig het nie. As die verhaal van Jesus se opstanding ’n mite was sou vroue nooit as eerste getuienisse voorgehou gewees het nie, want hulle getuienis het dan geen waarde gehad nie.

       Die feit dat Hy eerste aan die vroue verskyn het, is nog ’n verdere bewys van die historiese akkuraatheid van die opstandingsverhaal. Dit is ook die bewys dat Jesus die volle waardigheid van vroue in die samelewing herstel.

       So is daar nog baie vaste bewyse dat Jesus se graf leeg was en die opstanding van Jesus gee die beste verduideliking vir die historiese feit dat Jesus se graf leeg was.

       Nog enkele bewyse is die feit van die dissipels se prediking. As hulle Jesus se liggaam gesteel het sou hulle geweet het dat hulle ’n leun verkondig. Hulle prediking het daartoe gely dat hulle vervolg en gemartel is en selfs doodgemaak is. Hoekom sou hulle dit verduur het om ’n leuen te verkondig?

       Hierdie bewyse is nie die basis van ons geloof nie. Ons baseer nie ons geloof op historiese feite nie. Ons glo omdat die Heilige Gees ons oortuig dat die Skrif die waarheid is. Bogenoemde bewyse bevestig egter dat ons geloof nie irrasioneel of onsinnig is nie. Inderdaad gee ons geloof die beste verduideliking vir die historiese feite wat daar oor Jesus se opstanding is.

 Waarom is die opstanding van Jesus Christus so belangrik? Hoekom maak dit saak? Wat beteken dit vir elke gelowige se lewe?

       Die Opstanding bevestig dat Jesus se aanspraak dat Hy God is, waar is. As Jesus as ’n dooie in die graf agtergebly het sou dit onsinnig wees om sy aanspraak dat Hy God is te glo. Maar omdat Hy werklik opgestaan het sal dit dwaas wees om nie te glo dat Jesus God is nie. Inderdaad bevestig die Opstanding dat dit wat Jesus oor Homself gesê het, naamlik dat Hy ten volle God en mens is, die waarheid is.

       Is daar enigsins rede om te glo dat die Bybel waar is? Of is die Bybel maar net outydse mites en legendes? As Jesus opgestaan het bevestig dit dat Hy God is.

       As Hy God is dan is sy uitsprake ten opsigte van die Bybel waar en gesagvol. Daarom moet die Bybel die waarheid wees en daarom kan ons glo dat die Bybel waar is en dat dit deur God as sy openbaring geïnspireer is. Daarom kan ons sonder twyfel vashou aan God se beloftes van hoop in die Bybel.

       Ons Here leef en daarom is ons godsdiens nie ’n terugkyk nie, maar is dit inderdaad ’n toekomsperspektief. Ons kan die enigste lewende God ken en ons lewenspad vorentoe saam met Hom stap.

       Ons is nie alleen in die lewe nie en daarom bely ons ook dat Jesus die straf van die sonde naamlik die dood oorwin het en dat ons inderdaad deel in sy geregtigheid. Ons kan die Skrif glo dat ons op grond van Jesus se kruisiging en opstanding voor God staan asof ons nooit enige sonde gedoen het nie. Jesus het vir al ons sondes ten volle betaal en daardeur word die wortel van die dood afgesny.

       Ons bely ook verder dat Hy deur sy krag ons tot ’n nuwe lewe opgewek het. Ons is nie meer vasgevang in die negatiewe van die sondige wêreld nie. Ons is nie meer gevangenis van die haat, onmin, verdeeldheid, vyandskap en al die negatiewe dinge van die lewe nie.

       Ons het nou deel aan die ware lewe waarin liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing deel is van ons lewe. Ons kan deel hê aan die positiewe in die lewe te midde van die hartseer gevolge van die sonde waarin die wêreld nog vasgevang is. Ons kan bo dit uitstyg.

       Ons bely ook dat sy dood en opstanding ook ons dood en opstanding is. Die dood is nie meer iets wat ons vrees nie en die verskrikking en hopeloosheid wat die dood gehad het, het nie meer ’n houvas op ons nie. Die dood is nie meer ’n koning van verskrikking nie, maar ’n deurgang tot die ewige lewe.

       Met Paasfees herdenk ons in besonder die kruisdood en opstanding van ons Here. Dit is egter nie iets wat net tot een maal ’n jaar beperk is nie. Jesus se opstanding het ’n effek op elke dag van ons lewe en daarom herdenk ons inderdaad elke Sondag sy opstanding waar ons, ons krag vandaan kry om die lewe wat Hy met sy opstanding vir ons gegee het, te gaan lewe.

       Jesus se opstanding is `n geweldige troos vir elke Christen. Dit verseker ons dat Christus die straf vir ons sondes met sy kruisdood gedra het sodat ons vlekkeloos voor God staan asof ons nooit enige sonde gedoen het.

       Jesus se opstanding is vir ons `n troos omdat dit ons opwek tot `n nuwe lewe waar ons nie meer slawe van die sonde is nie.

       Jesus se opstanding is vir ons `n troos omdat dit ons waarborg dat ons nie vir die dood bang hoef te wees nie. Dit verseker ons dat die dood maar net `n salige deurgang is om ewig saam met God te wees.

       Jesus se opstanding is egter net `n troos vir diegene wat waarlik glo dat Hy aan `n vervloekte kruishout gesterf het, maar verder ook dat Hy die dood oorwin het met sy opstanding.

     Glo jy dit geliefdes? 

    Glo jy dat Glo dat Hy vir jou sondes aan `n vervloekte kruishout gesterf het? 

    Glo jy dat Hy uit die dood opgestaan het?

Amen

 

 

Jesus se opstanding waarborg dat ons waarlik léwe, nou en in die toekoms.

3Die belangrikste wat ek aan julle oorgelewer het en wat ek ook ontvang het, is dit: Christus het vir ons sondes gesterf, volgens die Skrifte; 4Hy is begrawe en op die derde dag opgewek, volgens die Skrifte.

Heidelbergse Kategismus Sondag 17

45  Vraag:  Watter nut het die opstanding van Christus vir ons?

Antwoord: 
Ten eerste het Hy deur sy opstanding die dood oorwin sodat Hy ons die geregtigheid wat Hy deur sy dood verwerf het, deelagtig kon maak (a). 

Ten tweede word ons nou ook deur sy krag tot 'n nuwe lewe opgewek (b). 

Ten derde is die opstanding van Christus vir ons ’n betroubare waarborg van ons salige opstanding (c).

(a) Rom. 4:25;  1 Pet 1:3;  1 Kor. 15:16.  (b) Rom. 6:4;  Kol 3:1, 5;  Ef. 2:5, 6.  (c) 1 Kor. 15:20, 21.

Inleiding

Met Paasfees herdenk ons in besonder die kruisdood en opstanding van ons Here. Dit is egter nie iets wat net tot een maal ’n jaar beperk is nie. Jesus se opstanding het ’n effek op elke dag van ons lewe en daarom herdenk ons inderdaad elke Sondag sy opstanding waaruit ons, ons krag vandaan kry om die lewe wat Hy met sy opstanding vir ons gegee het, te gaan lewe.

 Wat beteken dit vir ons dat Christus opgestaan het?

Ons bely elke Sondag:

Christus het vir ons sondes gesterf, volgens die Skrifte; Hy is begrawe en op die derde dag opgewek, volgens die Skrifte.

Maak hierdie belydenis enigsins ’n verskil in ons lewens?

 Die vraag by Sondag 17 van die Heidelbergse Kategismus is:

Watter nut het die opstanding van Christus vir ons?

Dit beteken doodeenvoudig: “Maak Christus se opstanding ’n verskil in my lewe?”

 In 1 Kor. 15 v 14 hoor ons wat die gevolge is as Christus nie opgestaan het nie:

En as Christus nie opgewek is nie, is ons prediking sonder inhoud en julle geloof ook sonder inhoud.

As Christus nie opgestaan het nie, dan is ons almal besig om vanmore ons tyd te mors. Dan kan ons maar net sowel die kerkdeure toesluit en iets anders gaan doen. Dan help dit nie dat ons Bybellees en bid nie. Dan het ek 15 jaar van my lewe vermors om te gaan studeer en predikant te word. As Christus nie opgestaan het nie, dan was al die tyd en moeite wat ons as kerk van die Here daaraan bestee het tevergeefs!

 Die Christendom staan of val by die opstanding van Jesus Christus.

In 1 Kor. 15 v 17 tot 19 hoor ons:

as Christus nie opgewek is nie, is julle geloof waardeloos en is julle nog gevange in julle sondes. Dan is ook dié wat in Christus gesterf het, verlore. As ons net vir hierdie lewe ons hoop op Christus vestig, is ons die bejammerenswaardigste van alle mense.

Jesus Christus se opstanding is een van die kern aspekte van ons geloofslewe en daarom MOET dit ’n verskil in ons lewens maak.

In 1 Kor. 15 v 20 hoor ons hoe Paulus triomfantlik uitroep:

Maar nou, Christus is opgewek uit die dood, as eersteling uit dié wat gesterf het.

Omdat die Here dit vir ons in sy lewende Woord sê, weet ons dat Christus se opstanding ’n verskil in ons lewens KAN maak!

 Watter verskil maak Jesus Christus se opstanding in jou lewe?

Daar is drie areas wat ons hele lewe omvat, naamlik die lewe wat agter ons lê (my verlede), die lewe vorentoe (die toekoms hier op aarde) en dit wat na die dood vir ons voorlê. In Kort kan ons sê: “Jesus se opstanding waarborg dat ons waarlik léwe, nou en in die toekoms!”

 Die eerste groot voordeel wat Christus se opstanding inhou is:

My verlede het nie meer ’n houvas op my nie!

Die mens is ’n slaaf van sy verlede. Dit wat in my verlede gebeur het is dikwels die tronk wat my vashou en keer dat ek die wonderlike geleenthede wat voor my lê kan aangryp. Elke verkeerde ding wat ek in die verlede gedoen het en elke verkeerde ding wat met my gebeur het, is soos slawekettings wat my vasbind en vashou. Dit bind my vas aan alles wat sleg en verkeerd is in hierdie lewe. Dit bind my vas aan my sondige natuur sodat ek nie daarvan kan loskom nie.

 In Gal 5 v 19 & 20 hoor ons ’n paar voorbeelde van so ’n sondige natuur:

Die praktyke van die sondige natuur is algemeen bekend: onsedelikheid, onreinheid, losbandigheid, afgodsdiens, towery, vyandskap, haat, naywer, woede, rusies, verdeeldheid, skeuring, afguns, dronkenskap, uitspattigheid en al dergelike dinge.

My sondige verlede keer dat ek loskom van verkeerde begeertes wat dan aanleiding gee tot onsedelikheid, onreinheid, losbandigheid.

 My sondige verlede gee aanleiding tot afgodsdiens en towery, dit wil sê ek vertrou op iets of iemand anders as die lewende God om my deur die lewe te help. Ek vind dit onmoontlik om by God troos te vind en ek probeer maar self regkom met die gevolg dat ek in absolute moedeloosheid verval elke slag as daar iets in my lewe gebeur wat nie goed is nie.

 Ek kry nie reg om die mense in my verlede te vergewe nie en daarom is vyandskap, haat, naywer, woede, rusies, verdeeldheid, skeuring en afguns deel van my lewe.

 My sondige verlede bind my vas aan dronkenskap en uitspattigheid. Dit maak dat mense hulle dronk drink om byvoorbeeld ’n geleentheid te vier. Dit maak dat kinders aand vir aand in kuierplekke rondhang sodra hulle onder hul ouers se toesig uit is.

 Jesus se opstanding maak ons los van hierdie sondes wat keer dat ons werklik die lewe leef wat God vir ons beplan het.

In 1 Kor. 15 v 22 sê die Here vir ons:

Net soos almal deur hulle verbondenheid met Adam sterf, so sal almal in Christus lewend gemaak word.

 Daarom bely ons ook:

Die Here het deur sy opstanding die dood oorwin sodat Hy ons die geregtigheid wat Hy deur sy dood verwerf het, deelagtig kon maak

Dit beteken eenvoudig dat die sonde in ons verlede geen houvas op ons het nie en dat ons nie meer voor God skuldig staan daaroor nie omdat Christus met sy opstanding die dood oorwin het en daarmee het Hy die straf vir die sonde (die dood) ten volle betaal.

 Die eerste ding wat Christus se opstanding in my lewe verander is dat my sondige verlede nie meer ’n houvas het op my nie.

 Die tweede voordeel wat Christus se opstanding inhou is:

Ek kan nou die lewe leef wat God vir my beplan het.

In 1 Pet 1v3 hoor ons

Aan God, die Vader van ons Here Jesus Christus, kom al die lof toe! In sy groot ontferming het Hy ons die nuwe lewe geskenk deur die opstanding van Jesus Christus uit die dood.

Die tweede groot verandering wat Christus se opstanding in my lewe teweeg bring is dat ek nou ’n nuwe lewe het. Daarom is onsedelikheid, onreinheid, losbandigheid, afgodsdiens, towery, vyandskap, haat, naywer, woede, rusies, verdeeldheid, skeuring, afguns, dronkenskap en uitspattigheid nie meer deel van my lewe nie.

 In die plek van hierdie sondige lewe waaraan ek verslaaf was het ek nou ’n nuwe lewe en daarom is die vrug van die Gees ook deel van my lewe.

In Gal 5 v 22 hoor wat die vrug van die Gees is:

Die vrug van die Gees, daarteenoor, is liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing.

My lewe word deur vreugde en vrede gekenmerk. Ek is dankbaar teenoor die Here wanneer dit goed gaan met my. Ek beleef die Here se seën in die groot en klein dinge in my lewe. Wanneer ek byvoorbeeld in die oggend wakker word is ek dankbaar teenoor die Here dat ek nog ’n dag het om te lewe. Wanneer die beproewings in die lewe soos siekte en al die ander moeilikhede wat ons in die lewe ervaar, oor my pad kom, dan is ek geduldig en blymoedig omdat ek weet dat die Here my nie in die swaarkry dae verlaat nie. Inteendeel ek ervaar hoe die Here my deur die swaarkry dae dra.

 My lewe word gekenmerk deur vriendelikheid, goedhartigheid, getrouheid, nederigheid en selfbeheersing. Ek dra nie wrokke en bitterheid in my rond nie en ek kry reg om na die Here te luister wanneer Hy in Kol 3 v 13 vir my sê:

Wees geduldig met mekaar en vergewe mekaar as die een iets teen die ander het. Soos die Here julle vergewe het, moet julle mekaar ook vergewe.

 In kort vind ek dit al hoe makliker om die Here se liefdesopdrag in sy wet na te kom. Wanneer ek struikel en val dan vind ek vergifnis en verlossing by Jesus en sy opstanding.

 Die tweede verandering wat Jesus se opstanding in ons lewens teweeg bring is dat ons nou die lewe kan leef wat God vir ons beplan het en daarom bely ons ook dat ons nou deur sy krag tot 'n nuwe lewe opgewek is.

 Die derde voordeel wat Jesus se opstanding vir ons inhou is:

Ons het ’n lewende hoop waaraan ons vashou

Daar is een ding in die lewe waarvan ons seker is, naamlik dat elkeen van ons een of ander tyd gaan doodgaan. Vir baie mense is daar egter saam met hierdie sekerheid ook ’n groot onsekerheid omdat hulle nie weet wat gaan van hulle word nie.

 Christene wat met geloof vashou aan Christus se opstanding het nie laasgenoemde onsekerheid nie omdat ons ’n vaste hoop het waaraan ons vashou. In 1 Kor. 15 v 53 & 54 hoor ons:

Hierdie verganklike liggaam moet met die onverganklike beklee word, en hierdie sterflike liggaam met die onsterflike. En wanneer hierdie verganklike liggaam met die onverganklike beklee is, en hierdie sterflike liggaam met die onsterflike, dan sal die woord wat geskrywe staan, vervul word: “Die dood is vernietig, die oorwinning is behaal.”

 Ons hoef nie meer bang te wees vir die dood nie omdat ons ’n lewende hoop het. Vir die Christen wat met geloof vashou aan Jesus se opstanding is die dood nie die einde nie, maar slegs ’n heerlike deurgang na die volgende bedeling waar ons ewig saam met God sal wees, verlos van die elende en hartseer van hierdie wêreld. Daarom bely ons ook dat die opstanding van Christus vir ons ’n betroubare waarborg van ons salige opstanding is.

 Slot

Die opstanding van Christus is die belangrikste aspekte van ons geloofslewe wat ons lewens drasties verander.

In die eerste plek beteken dit
       my sonde verlede het nie meer ’n houvas op my nie.

In die tweede plek beteken dit
       ek kan nou hiervandaan vorentoe die lewe vol liefde leef
       wat God vir my beplan het.

In die derde plek beteken dit
       ons hoef nie meer vir die dood bang te wees nie,
       want ons het ’n lewende hoop om ewig saam met God te wees
       sonder hartseer, dood of pyn.

 As hierdie lewensverandering nog nie deel is van jou lewe is nie, kom na Jesus Christus toe en neem sy uitnodiging aan wat Hy in

Mat 11 v 28 aan ons rig:

“Kom na My toe, almal wat uitgeput en oorlaai is, 
    en Ek sal julle rus gee."

Glo in Jesus.

Glo dat Hy vir jou sondes aan `n vervloekte kruishout gesterf het.

Glo dat Hy opgestaan het.

 Hou in geloof vas aan die verlossing wat Jesus met sy kruisiging en opstanding vir jou gegee het en leef die nuwe lewe vol liefde wat Christus vir jou gee, want

Jesus se opstanding waarborg
   dat ons waarlik léwe, nou en in die toekoms!

Amen

God is die Skepper van die hemel en die aarde en jy is Beeld van God

 

6 Apr 2025

God is die Skepper van die hemel en die aarde en jy is Beeld van God

 

Skriflesing Gen. 1 v 1 tot 2v4 Teksverse Gen. 1v26 & 27

God praat met ons deur sy ewige Woord en in Gen. 1 hoor ons in die eerste plek van God en ons hoor ook `n paar belangrike dinge van die mens wat God geskep het.

1. Wat leer ons in Genesis 1 van God?

Hier hoor ons dat God die oorsprong van alles is en die fokus hier in Genesis 1 is in die eerste plek ten volle op God.

Die Bybel begin nie met `n verduideliking om te bewys dat God bestaan nie. Dit begin net dood eenvoudig met “In die begin het God.......” Hier leer ons dat God is. En dit is ook hoe Hy Homself aan Moses voorstel daar by die brandende braambos in die woestyn. “Ek Is wat Ek Is.” God is nie `n object wat ons kan evalueer en annaliseer nie. Hy is ons Skepper wat ons gemaak het.

As God ons en alles wat daar is geskep het, het dit groot implikasies vir elke mens. As God die Skepper is, kan ons nie maar net met ons lewens aangaan asof Hy nie bestaan nie of dat Hy nie eintlik belangrik is nie. As Hy die Skepper is, dan is elke mens verantwoordbaar teenoor Hom.

Die wêreld sê so maklik dat die Christene se God wat hulle aanbid maar net een is van vele ander godsdienste en gode. Dit is dieselfde probleem waarmee die Israeliete ook geworstel het met al die nasies om hulle se gode. Genesis 1 het vir Israel verseker dat daar net een ware God is en dit verseker ons vandag ook; te midde van al die warboel godsdienste; dat daar net een ware God is.

Die filosofie van die sekulere materialisme konfronteer ons met die gedagte dat daar geen God is nie, maar dit bied nie `n bevredigende antwoord op een van die groot lewensvrae waarmee die mens worstel nie, naamlik “waar kom ons vandaan?”

Volgens hierdie filosofie het alles maar net toevallig ontstaan en die mens toevallig ontwikkel d.m.v. `n ongereguleerde evolusie proses. As dit waar is, dan kan die mens maar net op homself fokus sonder om vir enigeiets of enige iemand anders om te gee. Hierdie denke is so algemeen in die samelewing dat Christene ook daardeur beinvloed word. Daardie selfsugtige neiging wat net op die eie ek fokus.

Teenoor hierdie denke sê God vir ons in sy Woord dat Hy die Skepper is en dat alles nie maar net toevallig ontstaan het nie.

Genesis 1 sê ook vir ons dat God verhewe is bo sy skepping. Ons hoor ook dikwels die vraag: “As God dan alles geskep het, wie of wat het God gemaak?” Dit is egter ‘n onsinnige vraag, want as God alles geskep het, hoe kan Hy gebonde wees aan die reël van oorsaak en gevolg wat inherent deel is van die Skepping? God is nie gebonde aan tyd wat `n begin en `n einde het nie, want Hy het tyd gemaak. God is ewig sonder `n begin of einde.

In die begin het God die hemel en die aarde geskep. In Gen. 2V2 hoor ons dat die skepping woes en leeg was. Daar was nog geen grense, vorm of orde nie. Dan hoor ons hoe God orde uit hierdie chaos voortgebring het. Dit het Hy gedoen deur te praat. In elk van die skeppingsdae hoor ons: “God het gesê.....”

Hieruit leer ons dat God nie `n afsydige veraf God is nie. Daar is ook `n gedagtestroom dat die skepping soos `n horlosie is wat God gemaak het en opgewen het. Daarna het Hy dit gelos om op sy eie voort te gaan sonder Hy daarby betrokke is. Nee, geliefdes, God is nie `n onbetrokke veraf God nie.

God het geskep deur te praat en nadat Hy vir Adam en Eva geskep het, het Hy persoonlik met hulle gepraat. God is persoonlik by sy skepping betrokke. Dit gee vir ons die wonderlike troos dat God in beheer is en dat ons nie maar net aan die wispelturigheid van die noodlot oorgelaat is nie.

Wanneer ons Genesis 1 lees moet ons onthou dat die Bybel nie `n wetenskap handboek is nie. Die primêre doel van die Bybel is om God te openbaar. Wie en wat is God en dit is dan ook wat ons hier Genesis 1 mee begin. Dit is `n tema wat dwarsdeur die Bybel loop en hoe verder mens deur die Bybel vorder hoe beter leer ons God ken.

Die beeld van `n roosknop wat metertyd oopvou is `n goeie vergelyking om dit te verduidelik. Aanvanklik is die roosknop nog styf toegevou in sy groen blaartjies en dit is wat ons hier in Genesis 1 vind.

Dan metertyd soos die roos ontwikkel en oopvou sien ons die volle glorieprag van die roos soos wat dit in al sy kleur en geur ontwikkel. Net so leer ken ons God en sy liefde en genade beter soos wat ons deur die Bybel vorder en dit is `n taak wat `n leeftyd neem om te voltooi. Moet dit nie afskeep nie! Maak tyd in jou lewe om God deur sy ewige Woord te leer ken.

Ons hoor ook hier dat daar net een God is en dit word verder dwarsdeur die Bybel herhaal. Tog is hier reeds in die begin `n voorsmakie dat die saak nie so eenvoudig is nie. Reeds hier in die begin hoor ons iets van die Drie-Eenigheid van God. In Gen. 1v2 hoor ons van die Gees van God wat oor die waters sweef en in Gen. 1 v26 hoor ons hoe God sê: “Kom ons maak die mens as ons verteenwoordiger.”

Weereens is dit nog net die groen roosknop wat ons hier van hoor. Wat dit wel vir ons sê is dat God nie eenvoudig is nie en dat ons Hom nie sommer met ons verstand kan vasvang nie. Op die uiteinde bly die Drie-Eenigheid `n misterie en die beste wat ons kan antwoord op die vraag: “Verstaan jy dit?” is “NEE, maar ek glo dit, want dit is hoe God Homself in sy ewige Woord aan ons openbaar.”

Verder leer Genesis 1 ons dat God goed is. Ten spyte van die lewe wat soms moeilik is, weet dit. God is goed! Nadat Hy alles geskep het, het Hy gerus. Daarmee sê God vir ons dat ons, ons rus net in Hom sal vind.

Samevating: Wat leer ons hier in Genesis 1 van God?

In die eerste plek leer ons dat Hy is. Ons leer dat Hy verhewe is bo sy skepping. Ons leer dat God nie `n veraf afsydige God is nie en ons kry so `n voorsmakie van sy kompleksiteit in terme van sy Drie-Eenigheid. Ons leer ook dat God goed is en dat ons, ons rus alleen in Hom moet vind.

2. Wat leer ons in Genesis 1 van die mens?

Genesis 1 vertel ons ook van `n paar belangrike dinge van ons as mense wat God geskep het.

In Gen. 1v26 & 27 hoor ons dat die mens die hoogtepunt van God se Skepping is:

Toe het God gesê: “Kom Ons maak die mens as ons verteenwoordiger, ons beeld, sodat hy kan heers oor die vis in die see, die voëls in die lug, die mak diere, die wilde diere en al die diere wat op die aarde kruip.”

God het die mens geskep as sy verteenwoordiger, as beeld van God het Hy die mens geskep, man en vrou het Hy hulle geskep.

Ons leer hier dat God die mens as man en vrou geskep het en in Genesis 2 hoor ons hoe man en vrou mekaar aanvul om saam as `n eenheid te funksioneer. God het nie mans geskep wat as vrouens identifiseer nie en ook nie andersom nie. Toe jy as man of vrou gebore is, het God nie `n fout gemaak nie.

Ons leer ook dat God die mens geskep as sy verteenwoordiger om die wêreld namens Hom te bestuur. Dit beteken nie dat die mens nou maar kan maak en breek soos hy wil nie.

Wanneer die eienaar van `n maatskappy `n bestuurder aanstel dan het daardie bestuurder die die verantwoordelikheid om daardie maatskappy tot voordeel van die eienaar te bestuur en dat hy nog steeds verantwoording teenoor die eienaar moet doen.

As verteenwoordiger van God het ons steeds `n verantwoordelikheid teenoor God oor hoe ons hier op aarde dit wat aan God behoort verantwoordelik bestuur.

Die belangrikste is egter dat God die mens na sy beeld geskape het. Dit beteken dat daar `n spesiale band tussen God en die mens is. As beeld draer moet God in jou lewe sigbaar wees. God se liefde, sy omgee moet in jou lewe sigbaar wees.

Hoe doen jy dit? Die beeld van `n spiëel gee `n goeie verduideliking. Jy is soos `n spiëel Wat na die son toe gedraai is wat dan die son se lig reflekteer. As die spiëel nie na die son toe gedraai is nie, kan dit nie die son se lig reflekteer nie. Hoe kan ons regkry om God se liefde en omgee deur ons lewens sigbaar te maak? Ons kan dit alleen regkry deur op Jesus Christus te fokus.

In Kol. 1v15 & 16 hoor ons:

Hy(Jesus) is die Beeld van die onsienlike God, die Eersgeborene van die hele skepping; want in Hom is alle dinge geskape wat in die hemele en op die aarde is, wat sienlik en onsienlik is, trone sowel as heerskappye en owerhede en magte — alle dinge is deur Hom en tot Hom geskape.

In Christus het God sigbaar geword. God se onvoorwaardelike liefde en omgee het deur Jesus se offer aan die kruis sigbaar geword.

Weens die sondeval is die beeld van God in die mens skeefgetrek. Ons kan sê dat die spieël van die ware lig weggedraai is. Omdat jy beeld van God is, is dit inherent deel van jou menswees om na God te soek sodat jy in `n verhoeding met Hom kan leef.

Weens die sondeval soek die mens op al die verkeerde plekke na God. In die tyd van Israel het die mense allerlei afgode gehad en vandag nog is daar vele afgode.

Die grootste afgod van ons tyd is egter die eie ek. Net soos Israel so maklik agter Baal aangeloop het, loop ons net so maklik agter die afgod van die eie ek aan, waar ek my eie belange as hoogste prioriteit stel.

Dit is net deur Christus wat ons verlos kan word van die afgode van ons tyd. As beeld van God moet God in jou lewe sigbaar wees. Sy liefde en omgee moet in jou lewe sigbaar wees en dit kan slegs gebeur wanneer jou fokus op Christus is. Jy moet glo dat Jesus Christus jou enigste Verlosser en Saligmaker is.

Geliefdes, ons as die Gereformeerde Kerk Bloemfontein Suidheuwels moet God in ons lewens aan die wêreld sigbaar maak. Dit begin deur ons omgee vir mekaar wat dan oorfloei na omgee vir ons naaste buite die gemeente. Ons kan dit egter net doen wanneer ons, onself aan Jesus Christus vasbind deur geloof en om te begin lewe volgens daardie geloof.

Wat het ons vandag in Genesis 1 geleer?

Ons het geleer dat daar net een God is wat wat alles geskep het en dat Hy persoonlik in ons lewens betroke is. Hy is nie `n afsydige veraf God nie.

Ons het geleer dat God ons na sy beeld geskep het. Maak God in jou lewe sigbaar deur jou geloof in Jesus Christus en leef die liefde wat Hy aan ons betoon het uit.

Jy is beeld van God. Leef dit.

Amen

Wat is jou enigste troos in lewe en in sterwe?

Skriflesing Rom. 1 v 16 – 32 ; (TV Rom. 1 v 17) en Sondag 1 Heidelbergse Kategismus. (geplaas aan die einde van die preek. lees dit saam met die skrifgedeelte hierbo genoem)

Die lewe is nie maklik nie.

'n Druppel gal is in die soetste wyn;

'n traan is op elk' vrolik' snaar,

in elke lag 'n sug van pyn,

in elke roos 'n dowwe blaar.

Hierdie woorde van Eugene Marais is so waar! Daar is maar altyd ’n kinkel in die kabel.

 Hoekom?

 Hoekom moet die lewe so moeilik wees? Hoekom moet daar altyd iets verkeerd loop?

God sê vir ons hoekom, geliefdes. In Rom. 8 v 20 hoor ons:

Die skepping is immers nog aan verydeling onderworpe, nie uit eie keuse nie, maar omdat God dit daaraan onderwerp het.

Hoekom het God dit gedoen? Hy sê vir ons hoekom geliefdes. In Rom. 1 v 18 hoor ons:

God openbaar vanuit die hemel sy toorn oor al die goddeloosheid en ongeregtigheid van die mense wat die waarheid deur hulle ongeregtigheid probeer onderdruk.

Ons sonde is die oorsaak dat God die Skepping aan die verydeling onderwerp het, geliefdes.

En dit is net hier waar die probleem inkom, want dit is nie in ons aard om verantwoordelikheid te aanvaar nie. Toe God vir Adam en Eva oor hulle rebelse opstand gekonfronteer het, het beide skuld ontken. En niks het verander nie. Die mens weier nog steeds om verantwoordelikheid te aanvaar. Ons leef in ’n wêreld wat verkondig, die mens is inherent goed.

Maar dit is nie so nie geliefdes! In Rom. 1 v21 hoor ons dat alhoewel die mens weet wie God is, eer en dank hulle Hom nie as God nie.

Dit is hier waar die kern van die probleem lê, geliefdes. Die algemene opvatting is dat sonde eintlik nie so erg is nie, maar ons kyk die wortel van die probleem mis, wanneer ons so redeneer geliefdes. Ons is so geneig om die ernstigheid van sonde af te maak. Sonde is nie maar net dat ons een of ander reël oortree het nie.

In sy diepste wese, is sonde opstand teen God soos ons in Rom. 1 v 23 hoor:

In die plek van die heerlikheid van die onverganklike God stel hulle beelde wat lyk soos ’n verganklike mens of soos voëls of diere of slange

Die wortel van sonde lê daarin dat die mens iets anders in die plek van God stel. Moenie julle blindstaar teen die afgode wat in die Bybel genoem word nie. Ons het ons eie afgode, rykdom, aansien eer en die grootste afgod wat daar is, is die eie ek.

Die dieptepunt van sonde is dat jy van die Bron van lewe afgesny word en die gevolge is verskriklik. Wanneer jy van die Bron van lewe, d.w.s. God afgesny word is die enigste alternatief die ewige dood. Ons leef in ’n wêreld wat die werklikheid van die hel en satan ontken. Die gevolg is dat ons ernstige gevolge van sonde miskyk.

Dit is eers wanneer jy die ernstige gevolge van jou sonde besef, dat jy verstaan dat jy Troos nodig het.

Wat is jou enigste troos in lewe en in sterwe? Die wêreld vertel jou, dat jy jouself kan red. Vir elke onderwerp is daar verskeie selfhelp boeke beskikbaar. Volg net stappe een, twee en drie en siedaar, jou probleem is opgelos!

Maar die hartseer werklikheid is dat jy jouself nie kan help nie, want maak nie saak wat jy doen nie, jy bly steeds gebonde aan die vloek van die sonde. Jy kan jouself nie red nie, want jy is van nature geneig om God en jou naaste te haat.

Daar is net een uitweg. Jy moet glo in die Goeie Nuus. Jy moet die Evangelie glo dat Jesus vir jou met sy bloed d.w.s met sy lewe betaal het. Hy het met sy kosbare bloed vir al jou sondes ten volle betaal en jou uit alle heerskappy van die duiwel verlos, soos Die Here ook vir ons in Rom. 1 v 17 sê:

In die evangelie kom juis tot openbaring dat God mense van hulle sonde vryspreek enkel en alleen omdat hulle glo. Dit is soos daar geskrywe staan: “Elkeen wat deur God vrygespreek is omdat hy glo, sal lewe.”

Jesus het die verskriklike gevolge van die sonde oorwin. Hy het met sy lewe aan die kruis daarvoor betaal, maar Hy het ook die gevolge van sonde tot niet gemaak met sy opstanding. Hy het die vloek van die sonde dood oorwin.

Wat is jou troos geliefdes? Die troos is dat jy kan lewe, dat jy met liggaam en siel in lewe en in sterwe nie aan jouself nie, maar aan jou getroue Verlosser, Jesus Christus behoort.

Beteken dit dat God nou die swaarkry in hierdie lewe gaan wegvat? Nee geliefdes. Soms neem Hy wel ’n struikelblok uit jou weg, maar nie altyd nie. In hierdie lewe bly die vloek van verydeling steeds daar. Dit is eers in die volgende bedeling, God sê ewigheid waar ons verlos word van die verydeling wat hierdie lewe kenmerk. Wat wel waar is, is dat jy nie meer alleen is nie. God is by jou en wanneer die lewe te swaar rak, dra Hy jou.

Jou troos is dat jy in lewe en in sterwe aan Jesus Christus behoort. Die Here sê vir ons in Rom. 1 v 17 “Elkeen wat deur God vrygespreek is omdat hy glo, sal lewe.” En daarom bely ons ook “Hy verseker my ook deur sy Heilige Gees van die ewige lewe en maak Hy my van harte gewillig en bereid om voortaan vir Hom te lewe.

Wat beteken dit om vir God te lewe? Die duiwel probeer ons oortuig dat ons nou die “lekker” dinge in die lewe moet prysgee wanneer ons vir God begin lewe. MOET HOM NIE GLO NIE! Onthou, hy is ’n liegbek! Dit is sy manier van die begin af. Daar in die paradys het hy met leuens vorendag gekom en hy doen dit nog steeds! Hy het nie sy strategie verander nie, want dit werk so goed!

Kom ons kyk wat is hierdie “lekker” dinge wat jy moet prysgee. In Rom. 1 v 28 hoor ons dat dit al die dinge is wat onbetaamlik is. En in Rom. 1 v 29 hoor ons dat hierdie onbetaamlike dinge beslis nie lekker is nie.

Dit is ongeregtigheid, slegtheid, hebsug en gemeenheid; jaloesie, moord, twis, bedrog en kwaadwilligheid. Verder is dit ook skinder en kwaad praat; haat teenoor God, hooghartigheid, aanmatigendheid en verwaandheid. Dit is ook om kwaad uit te dink, ongehoorsaam aan hul ouers en om onverstandig, onbetroubaar, liefdeloos, hardvogtig te wees.

Wat gee God in die plek van die satan sê “lekker” dinge? Hy gee vir ons sy liefde soos ons hoor in 1 Joh. 4 v 19. Ons het lief omdat God ons eerste liefgehad het.

In teenstelling met die onbetaamlikhede gee liefde vir ons die volgende soos ons in 1 Kor. 13 v 4 - 7 hoor:

Die liefde is geduldig, die liefde is vriendelik; dit is nie afgunstig nie, is nie grootpraterig nie, is nie verwaand nie. Dit handel nie onwelvoeglik nie, soek nie sy eie belang nie, is nie liggeraak nie, hou nie boek van die kwaad nie.

Dit verbly hom nie oor onreg nie, maar verheug hom oor die waarheid. Dit bedek alles, glo alles, hoop alles, verdra alles.

 

Wanneer jy vir ander mense begin omgee, weet dit is God sê liefde wat Hy in jou ingeplant het wat in jou werk. Wanneer jy God sê liefde begin uitleef dan leef jy vir God. Dan begin jy die doel bereik wat God vir jou gegee het.

 

Slot

Wat is jou enigste troos in lewe en in sterwe?

Jou enigste troos is dat jy met liggaam en siel in lewe en in sterwe nie aan jouself nie, maar aan jou getroue Verlosser, Jesus Christus behoort.

 

Wat moet jy weet om in hierdie troos salig te kan lewe en sterwe?

Drie dinge.

Ten eerste, hoe groot jou sonde en ellende is. Jy moet verstaan wat die verskriklike gevolge van die sonde is, naamlik die hel, d.w.s om ewig van God geskei te wees.

ten tweede;  hoe jy van al jou sonde en ellende verlos word. Jy moet die Evangelie glo, die Goeie Nuus dat Jesus Christus jou enigste Verlosser en Saligmaker is. Jy moet glo dat Hy vir jou sondes aan ’n vervloekte kruishout gesterf het en dat Hy opgestaan het uit die dood en daardeur vir jou die ewige lewe gee.

en ten derde hoe jy God vir so 'n verlossing dankbaar moet wees. Jy moet die liefde wat God deur die Heilige Gees in jou geplant het leef.

Amen 

Heidelbergse Kategismus - Sondag 1.

1  Vraag:  Wat is jou enigste troos in lewe en in sterwe?

Antwoord:  Dat ek met liggaam en siel in lewe en in sterwe (a) nie aan myself (b) nie, maar aan my getroue Verlosser, Jesus Christus behoort (c).  Hy het met sy kosbare bloed vir al my sondes ten volle betaal (d) en my uit alle heerskappy van die duiwel verlos (e).  Hy bewaar my op so 'n wyse dat sonder die wil van my hemelse Vader, geen haar van my kop kan val nie (g).  Alles moet inderdaad tot my saligheid dien (h).  Daarom verseker (i) Hy my ook deur sy Heilige Gees van die ewige lewe en maak Hy my van harte gewillig en bereid om voortaan vir Hom te lewe (k).

(a) Rom 14:8.  (b) 1 Kor 6:19.  (c) 1 Kor 3:22;  Tit 2:14:  (d) 1 Pet 1:18, 19;1 Joh 1:7;  2:2, 12.  (e) Heb 2:14;1 Joh 3:8;  Joh 8:34-36.  (f) Joh 6:39;  10:28;  2 Tess 3:3;  1 Pet 1:5.  (g) Matt 10:30;  Luk 21:18.  (h) Rom 8:28.  (i) 2 Kor 1:22;  5:5;  Ef 1:14;  Rom 8:16.  (k) Rom 8:14;1 Joh 3:3:

2  Vraag:  Hoeveel dinge moet jy weet om in hierdie troos salig te kan lewe en sterwe?

Antwoord:  Drie dinge (a):  Ten eerste, hoe groot my sonde en ellende is (b);  ten tweede;  hoe ek van al my sonde en ellende verlos word (c) en ten derde hoe ek God vir so 'n verlossing dankbaar moet wees (d).

(a) Matt 11:28-30;  Ef 5:8.  (b) Joh 9:41;  Matt 9:12;  Rom 3:10;1 Joh 1:9;10.  (c) Joh 17:3;  Hand 4:12 10:43.  (d) Ef 5:10;  Ps 50:14;  Matt 5:16;  1 Pet 2:12;  Rom 6:13;  2 Tim 2:15:

Hou moed want God is in beheer - Openbaring 7:3-13

 

Sondag 26 Jan. 2025

Tema: Hou moed want God is in beheer.

Skriflesing Open. 3 v 7 - 13 Teksverse Open. 3 v 11

Hou moed want God is in beheer.

Dit is die boodskap wat die HERE vandag vir ons uit sy Woord uit bring.

Wanneer ons na ons situasie kyk kan ons kan met reg vra: “Is die kerk nog relevant in vandag se samelewing?” Gemeentes word al kleiner, veral op die platteland. Al hoe meer mense maak hulself los van die kerk en die samelewing is selfs vyandig gesind teenoor die kerk.

Die norme en waardes wat die kerk voorhou word as belaglik afgemaak. Dit voel of die moderne mens die kerk ontgroei het en dit maak dat ons wat nog kerk is maklik moedeloos kan word.

Wanneer ons terugkyk na die geskiedenis van die kerk dan sien ons dat die kerk dikwels swaar gekry het. Daarom het God in sy Woord ook vir ons die boek Openbaring gegee om sy kerk te bemoedig in tye van swaarkry.

Die sewe briewe in Openbaring is in die eerste plek gerig aan die sewe gemeentes in Klein Asië, maar dit is ook gerig aan die kerk van alle eeue en daarom gaan ons vandag luister na die brief wat aan die gemeente in Filadelfia gerig is want dit spreek tot ons situasie.

Lees Open. 3 v 7 tot 13.

Die boodskap aan Filadelfia

⁷Skrywe aan die leraar van die gemeente in Filadelfia:

So sê die Heilige, die Ware God, Hy wat die sleutel van Dawid het, wat die deur oopsluit en niemand sal dit weer toesluit nie, en dit toesluit en niemand sluit dit weer oop nie:

⁸Ek weet alles wat julle doen. Kyk, Ek het ’n deur voor julle oopgesluit en niemand kan dit weer toesluit nie. Ek weet dat julle min krag het, en tog het julle aan my boodskap vasgehou en My nie verloën nie.

⁹Kyk, ek beskik dat van die lede van die sinagoge van die Satan, die mense wat daarop aanspraak maak dat hulle Jode is, en dit nie is nie, maar lieg—kyk, Ek sal maak dat hulle kom en voor julle kniel en erken dat Ek julle liefhet. ¹⁰Omdat julle aan die boodskap van my volharding in lyding vasgehou het, sal Ek julle ook vashou in die tyd van beproewing wat oor die hele wêreld gaan kom om die bewoners van die aarde op die proef te stel. ¹¹Ek kom gou. Hou vas wat julle het, sodat niemand julle kroon wegvat nie.

¹²Elkeen wat die oorwinning behaal, sal Ek ’n pilaar in die tempel van my God maak, en hy sal vir altyd daar bly. Ek sal op hom die Naam van my God skrywe en die naam van die stad van my God, die nuwe Jerusalem, wat van my God af uit die hemel uit afkom. En Ek sal ook my eie nuwe Naam op hom skrywe.

¹³Elkeen wat kan hoor, moet luister na wat die Gees vir die gemeentes sê.

Filadelfia was `n gemeente van gelowiges wat hulle nie van stryk laat bring deur Joodse of heidense invloede nie en daarom het hulle saam met Smirna ook nie ’n vermaning ontvang soos die ander vyf gemeentes nie. Albei gemeentes het egter deurgeloop onder Joodse intimidasie in hul alledaagse lewe, maar dit het hulle nie van hulle belydenis laat afsien nie dat Christus die Seun van God is en dat Hy saam met Vader en die Heilige Gees die enigste ware God is.

In die brief inleiding hoor hulle dat hierdie brief van Christus wat hulle as ware Gode bely, afkomstig is. Dit is vir hulle iets kosbaars waaraan hulle kon vashou.

Die gelowiges in Filadelfia was deur die Jode uitgesluit uit die sinagoge met die implikasie dat hulle uit die hemelryk ook uitgesluit is. Hier bevestig Christus dat Hy alleen toegang tot die hemelryk kan gee. Die Jode wat hulle so teenstaan kan hulle nie in die hemelryk uit sluit nie.

In Open. 3 v 8 hoor ons:

⁸Ek weet alles wat julle doen. Kyk, Ek het ’n deur voor julle oopgesluit en niemand kan dit weer toesluit nie. Ek weet dat julle min krag het, en tog het julle aan my boodskap vasgehou en My nie verloën nie.

Filadelfia het aan die ware evangelie vasgehou en daarom is die hemelryk vir hulle oopgesluit.

Kan julle insien hoe belangrik dit is dat ons aan die Gereformeerde leer vashou en hoe kosbaar ons belydenis is? Dit is ons geloof dat Jesus ons enigste Verlosser en Saligmaker is wat vir ons die deur oopsluit na ewige saligheid saam met God.

Daar is soveel dwaalleer daarbuite en dit kom verskuil met slinksheid wat dit soos die waarheid laat klink. Hou vas aan die Gereformeerde leer waar ons bely:

• Sola Scriptura –die Skrif alleen

• Sola Gratia –Genade alleen

• Sola Fidé –Geloof alleen

• Solus Christus –Christus Alleen

• Soli Deo Gloria – Aan God alleen die eer

Dan sê Jesus vir hulle: “Ek weet dat julle min krag het.”

Die gemeente in Filadelfia was ’n klein gemeente binne die samelewing en dink net wat dit vir hulle beteken het dat Christus dit vir hulle gesê het.

Wat sê Hy vir hulle wanneer Hy sê: “Ek weet dat julle min krag het”? Hy sê vir hulle: “Ek verstaan julle situasie. Ek weet hoe moeilik dit vir julle is. Moenie moedeloos word nie!”

Geliefdes, God praat met ons deur sy Woord en Christus sê vanoggend vir die Gereformeerde Kerk Kriel: “Ek weet dat julle min krag het. Ek weet hoe klein julle geword het. Ek verstaan julle situasie. Moenie moedeloos word nie! Hou aan met die werk waarvoor Ek julle geroep het. Hou aan om die Goeie Nuus van Jesus Christus aan die wêreld te verkondig.”

In Open. 3 v 9 hoor ons dat daardie Jode wat die gelowiges in Filadelfia so teengestaan het nie die volk van God is nie. Dit is net diegene wat Jesus Christus as ware God bely wat die ware volk van God is. Verder hoor ons ook dat daardie valse Jode sal bely dat God die gelowiges liefhet.

Daar is soveel mense wat Christus verloën en wat die spot met die gelowiges dryf wat in Hom glo. Jesus sê vir ons dat elke knieg voor Hom sal buig omdat Hy die Koning van die hemel en die aarde is. Soli Deo Gloria. Aan God alleen die eer.

Dis nie ons werk om mense te oortuig nie. Ons werk is om die Goeie Nuus te verkondig. Dit is die Heilige Gees wat die saad van die evangelie in mense se harte laat groei. En diegene wat hulle rug op die evangelie draai sal op die oordeelsdag rekenskap voor die Almagtige God gee oor hul rebelsheid teen Hom. Wie gered word en wie verdoem word is God se saak, nie ons sin nie. Ons moet maar net die evangelie bly verkondig. Geliefdes, bly getrou aan julle roeping.

In Open. 3 v 10 hoor ons dat Christus diegene wat aan die boodskap van volharding in lyding vashou, sal vashou in die tyd beproewing.  Watter geweldige troos is dit nie geliefdes? Nêrens word ons beloof dat ons lyding en swaarkry sal vryspring nie. Wat Christus vir ons hier sê is dat ons nie alleen is daarin nie.

Jy staan nie alleen nie. God is by jou. Ek is seker dat elkeen van ons wat terugkyk na ons swaarkry tye sal kan bely: “Ek was nie alleen nie. God was daar. Dis Hy wat my gedra het toe ek nie meer kon nie”. Die troos wat ons vanoggend hier uit God se Woord ontvang is dat Hy ook in die toekoms daar sal wees waar ons deur swaarkry moet gaan. Hy sal ons dra. Ons sal nie alleen wees nie.

Dan hoor ons in Open. 3 v 11:

¹¹Ek kom gou. Hou vas wat julle het, sodat niemand julle kroon wegvat nie.

Geliefdes hou vas aan God wat jou liefhet se genade. Hou vas aan jou geloof dat Jesus Christus jou enigste Verlosser en Saligmaker is. Hou vas aan jou burgerskap van die koninkryk van God. Hou vas aan die belofte van Christus se wederkoms. Hou vas aan die Goeie Nuus van Jesus se verlossing en volhard enduit daarin. Hou vas aan die belofte wat ons in Open. 3 v 12 hoor. Hou vas aan die belofte van jou ewige saligheid saam met God, daar waar daar geen trane, hartseer, lyding of dood sal wees nie. Ewig saam met God in sy heerlikheid.

Geliefdes, Elkeen wat kan hoor, moet luister na wat die Gees vir die gemeente sê:
Hou moed want God is in beheer.

Amen