Waar vind jy hoop in die dieptes van vertwyfeling?

Datum: 10 Mei 2020 Gereformeerde Kerk Empangeni  Ds. George van der Walt

Skriflesing: Psalm 42 & 43

Die preek is ook in video formaat beskikbaar

Sing

Ps. 42-1 v 1

Ps. 42-1 v 3 & 5

Psalm 42 en 43 is eintlik een psalm wat in twee dele verdeel is. Dit is 'n klaaglied van iemand wat swaarkry en ervaar dat die Here hom vergeet het. Hierdie psalm is nogal baie relevant vir ons huidige situasie, veral in die lig dat Christine daarvan weerhou word om fisies eredienste by te woon. Mense smag daarna om net weer kontak met mekaar te hê en dis veral enkellopendes wat alleen is in hierdie tyd van afsondering wat swaarkry.

In hierdie psalm praat die psalmdigter met homself. In die meeste van die psalms is die psalmdigter in gesprek met God, maar in hierdie psalm praat hy met homself. Dit beklemtoon sy gevoel van Godverlatenheid.

Die psalmdigter begin met 'n beeld van 'n bok wat smag na water. Om hierdie beeld reg te verstaan moet ons kennis neem dat hy nie net 'n bok beskryf wat dors is nie. Dis 'n bok wat desperaat smag na water. Die gevoel wat die bok sal hê tydens 'n droogte wanneer hy na 'n watergat toe gaan en die gat droog vind.

Dis hoe die psalmdigter sy geestelike dors en verlange na God beskryf. In hierdie psalm is dit nie as gevolg van 'n skuldgevoel oor sonde soos in psalm 51 nie. Dit is ook nie as gevolg van vyande wat hom bedreig soos in psalm 35 nie. Die vyande wat in hierdie psalm genoem word dryf die spot met hom omdat dit vir hom voel dat God hom verlaat het.

Hier beskryf die psalmdigter iets wat gelowiges van tyd tot tyd oorkom. Daardie gevoel dat God ver is en dat hy 'n diep geestelike dors het na die lewende God. Op hierdie stadium voel dit vir hom of God nie werklik is nie.

Die psalmdigter noem 'n paar redes waarom hy nie op hierdie stadium God se teenwoordigheid in sy lewe voel nie. In Ps. 42 v 3 vra hy: “Wanneer kan ek voor God verskyn?” In Ps. 42 v 5 hoor ons hoe hy verlang om na die woonplek van God op te gaan. Daar is dus 'n ontwrigting wat keer dat hy God in die tempel kan ontmoet.

Ons kan op hierdie stadium baie goed met die psalmdigter hieroor identifiseer. Alhoewel ons as Nuwe Testamentiese kerk nie meer na 'n tempel opgaan nie, mis ons steeds ons gesamentlike ontmoeting met God waar ons fisies bymekaar gekom het om te aanbid. Alhoewel ons die voorreg het om via sosiale media op 'n afstand saam te kom vir eredienste, bly daar 'n verlange na werklike fisiese samekomste.

Verder is dit ook dat sy omstandighede nie goed is nie. Hy is tussen heidene wat die spot met hom dryf. Sy normale roetine is ook ontwrig. Ons hoor in Ps. 42 v 4 dat hy dag en nag in trane is. Hy slaap dus nie goed nie. Dit gaan dus nie goed in sy lewe nie en dit voel vir die psalmdigter of God hom in die steek gelaat het.

Dit voel vir die psalmdigter of hy in die diepte van sy wese nie meer aan God verbind is nie. Ons hoor in Ps. 42 v 6 hoe hy sy nood bekla: “waarom is ek so in vertwyfeling?”

Ons hoor ook in hierdie psalms hoe die psalmdigter hierdie nood aanspreek en dit gee vir ons ook riglyne wat om te doen wanneer dit vir jou voel of God nie naby is nie. Wanneer dit vir jou voel of God ver is skep dit inderdaad 'n gevoel van hopeloosheid.

In Psalm 42 en 43 vind ons 'n bron van hoop wanneer jy deur hopeloosheid oorweldig word. Die troos is dat daar lig is op die pad vorentoe. Die versekering dat alhoewel dit soms vir jou kan voel of God ver is, dat Hy inderdaad nie ver is nie en dat Hy ons nooit sal verlaat nie.

Hoe deel jy in hierdie troos?

Die Psalmdigter sê vir ons hoe hy troos gevind het.

In Ps. 42 v 5 hoor ons:

As ek my lewe voor my laat verbygaan, dink ek daaraan hoe ek opgetrek het na die woonplek van God, voor ’n skare uit na sy huis toe geloop het met gejuig en lofsang— ’n skare wat feesvier.

Letterlik staan daar: “Hieraan wil ek dink en my siel uitstort in my:”

Stort jou hart uit teenoor die Here. Praat met die Here. Veral wanneer dit vir jou voel of jou gebede teen die dak vasslaan, moenie ophou nie. Vertel vir die Here hoe jy voel. Sê vir Hom dat dit vir jou voel of Hy ver is. Praat met Hom en vertel vir Hom hoe jy na Hom verlang.

In Ps. 42 v 6, 12 en 43 v 5 hoor ons die refrein van die psalmdigter waar hy homself afvra: “waarom is ek so in vertwyfeling?” Hy herhaal dit drie keer en dit vertel vir ons van die opbouende intensiteit hiervan. Hy is besig om vir homself af te vra waarop plaas hy sy hoop?

Wanneer dit vir jou voel of God ver is, is dit 'n goeie geleentheid om introspeksie te doen en jouself eerlik af te vra waarop jy jou vertroue stel?

Deur jou hart, jou diepste wese af te vra waarop jy jou vertroue stel, sal vir jou wys of jy nie dalk jou vertroue op iets stel wat jou gaan teleurstel nie.

En dan telkemale wanneer die psalmdigter in vertwyfeling uitroep: “waarom is ek so in vertwyfeling?” volg hy dit op met: “vertrou op God!” Met ander woorde hy sê vir homself waarop hy sy vertroue moet plaas.

In Ps. 42 v 7 hoor ons:”

Uit my vertwyfeling roep ek na U hier van die Jordaangebied

In die 33/53 Bybelvertaling word dit meer letterlik gestel as: o My God, my siel buig hom neer in my; daarom dink ek aan U uit die land van die Jordaan

Hy dink na oor God en wat Hy in die verlede vir hom gedoen het. Wanneer jou hart in vertwyfeling is, onthou wat die Here vir jou gedoen het.

Wat die psalmdigter hier doen is om vir sy hart te preek. In plaas daarvan om na homself te luister, praat hy met homself. Hy herinner homself wat God alles vir hom gedoen het en dat hy daarom moet aanhou om op God te vertrou.

Dis 'n belangrike beginsel wat hier na vore kom. Hou op luister na die negatiewe in jou gedagtes. Hou op om om te luister na alles wat verkeerd is in jou lewe. Moenie luister na jou vrese nie. Vertel vir jouself van die positiewe. Plaas jou fokus op wie God is waarop jy jou vertroue moet stel (die Ewige Almagtige God wat die hemel en die aarde geskep het) en onthou ook wat Hy in die verlede vir jou gedoen het.

In Ps. 43 v 3 & 4 hoor ons:

“Stuur u lig en u waarheid dat dié my lei en my bring na u heilige berg, na u woning! Laat my ingaan na die altaar van God, die God oor wie ek wil jubel en juig, dat ek U kan loof met die lier, o God, my God!

In hierdie opsig het ons 'n voordeel bo die psalmdigter. Ons weet nog meer seker waarom ons na God toe kan gaan, waarom ons op Hom kan vertrou.

Die psalmdigter gebruik die beeld van 'n bok wat besig is om om te kom van dors. Jesus het aan die kruis uitgeroep “Ek is dors!” Sy vyande het Hom gespot: “As jy God is red jouself.”

Vir Jesus het dit nie net gevoel of God Hom verlaat nie. Hy was werklik deur God verlaat. Hy was werklik tot die dood toe dors. Almal het Hom in die steek gelaat. Hy het die verskriklikheid van die kruis alleen deurgemaak. Daar was niemand om Hom by te staan nie. Hy het in sy nood na God toe uitgeroep, “My God, My God, waarom het U my verlaat?” en God het Hom nie geantwoord nie.

Jesus het dit vir jou gedoen sodat jy in jou diepste vertwyfeling kan vashou aan die wete dat God jou NOOIT sal verlaat nie.

Waar vind jy hoop in die dieptes van vertwyfeling? Stort jou hart teenoor God uit want Hy luister na jou. Net soos wat Hy in die verlede saam met jou was, sal Hy ook in die toekoms saam met jou wees, nie net in die goeie tye wanneer jy intens bewus is van Hom nie, maar veral in die donkerte van vertwyfeling wanneer dit vir jou voel of Hy nie daar is nie. Dit is juis dan wanneer Hy die naaste aan jou is. Dit is juis dan wanneer Hy jou dra en jou vashou.

Geliefdes, God is te lief vir jou om jou ooit in die steek te laat en daarom kan jy verseker wees dat Hy dit nooit sal doen nie!

Amen

Ontdek die ware Bron van blydskap

Datum:3 Mei 2020 GKE

Skriflesing: Joh. 6 v 25 - 35

Teksvers: Joh. 6 v 35 
Die preek is in video formaat beskikbaar op ons 
Facebook blad Gereformeerde Kerk Empangenie

Sing

Ps. 32-1 v 1

Ps. 33-1 v 1 & 11

Iets wat my opgeval het oor hierdie inperking, is dat mense in hierdie tyd vol ontevredenheid is. Mense is gefrustreerd oor ons situasie. Daar is inderdaad sommige van die regulasies wat net nie sin maak nie en mense raak geïrriteerd daarmee. Hierdie inperking is egter vir sommige nie net ongemaklik nie. Dit is inderdaad besig om mense te verarm wat geen inkomste kry nie.

Is hierdie inperking besig om jou lewensvreugde te steel?

Dikwels soek ons lewens-tevredenheid op verkeerde plekke. Binne in elke mens is daar 'n soeke na iets meer. Mens kan dit 'n geestelike honger noem. Dis 'n soeke na blydskap en tevredenheid in die lewe.

As jou omstandighede maak dat jy iesegrimmig raak omdat dit nie op die oomblik verloop soos wat jy dit graag wil hê nie, sê dit vir jou dat jy dalk op die verkeerde goed vertrou vir lewensvreugde.

Nadat Jesus die mense op 'n wonderbaarlike wyse gevoed het met twee vissies en vyf garsbroodjies het sy dissipels in 'n skuit geklim om na die oorkant van die meer te vaar. Hulle het in 'n storm beland, maar Jesus het hulle gered nadat Hy op die water na hulle toe aangeloop gekom het.

Die volgende môre het Jesus saam met sy dissipels by Kapernaum aangekom. Die mense het Jesus en sy dissipels soontoe gevolg. Toe hulle by Jesus kom vra hulle: “Rabbi, wanneer het u hierheen gekom?”

Jesus se antwoord aan hulle is baie insiggewend om 'n antwoord te kry op die vraag: “wat is die ware bron van lewensvreugde en blydskap?”

Joh. 6 v 26 & 27^a:

“Dít verseker Ek julle: Julle soek My, nie omdat julle die wondertekens gesien het nie, maar omdat julle van die brood geëet en versadig geword het. Julle moet nie werk vir die voedsel wat vergaan nie, maar vir die voedsel wat nie vergaan nie en wat ewige lewe gee.”

Jesus weet dat hulle Hom gevolg het om die geestelike honger in hul lewens te voed, maar dat hulle dit met die verkeerde voedsel wil voed. Moenie werk vir voedsel wat vergaan nie.

Die probleem wanneer jy jou geestelike honger met dinge van hierdie wêreld wil versadig, is dat jy dit nie gaan regkry nie. Mense soek lewensgeluk en blydskap in wêreldse dinge. Geld, status, besittings, verhoudings.

Al hierdie dinge gaan jou teleurstel. As jy jou hoop op jou lewensmaat en/of kinders plaas om jou gelukkig te maak, dan gaan jy hulle op die uiteinde vernietig, want hulle sal nooit aan die verwagting kan voldoen nie.

As jy jou geluk op die dinge van hierdie wêreld bou, gaan jy teleurgesteld word. Wanneer dit goed gaan, dan kom jy nie agter dat jy besig is om jou lewensvreugde te voed met voedsel wat sal vergaan nie. Want, wanneer dinge begin skeefloop soos tans die geval is en hierdie dinge waarop jy jou geluk gebou het weggeneem word, dan tuimel jou lewensvreugde ineen.

Die ironie is dat hierdie dinge nie noodwendig slegte dinge is nie. Jou vrou, jou kinders, jou werk waarmee jy jou brood verdien is nie slegte dinge in jou lewe nie. Die probleem kom in wanneer jy liewer vir hierdie dinge is as wat jy vir God is.

Die oplossing is egter nie net so eenvoudig dat jy jouself moet voorneem om liewer vir God te wees nie. Die probleem is dat jy dit nie kan doen nie omdat jy vanweë jou sondige natuur geneig is om God en jou naaste te haat.

In Joh. 6 v 27b hoor ons dat jy nie iets daaraan kan doen nie, maar dat God uit genade vir jou dit gee, want Jesus sê verder dat Hy vir jou die voedsel sal gee wat ewige lewe gee:

“Dit sal die Seun van die mens vir julle gee, want God die Vader het Hom die mag daartoe verleen.”

Hoe kry jy deel aan die voedsel wat nie vergaan nie en ewige lewe gee? In Joh. 6 v 29 sê Jesus:

“Wat God van julle verlang, is dat julle moet glo in Hom wat Hy gestuur het.”

Jy moet in Jesus Christus glo.

Met hierdie beeld van brood verduidelik Jesus waarom Hy wat God is, mens geword het en aarde toe gekom het. Jesus sê nie vir die skare, Ek sal vir julle die brood van die lewe gee nie. Hy sê vir hulle: “Ek IS die brood wat lewe gee.”

Alles wat jy eet het doodgegaan sodat jy dit kan eet. Die graan waarmee brood gebak is, is fyngemaal. Wanneer jy die brood wat gebak is wil eet, moet dit eers in stukke gebreek word.

Wanneer Jesus se “Ek is die brood wat lewe gee,” dan sê Hy daarmee: “Ek is God wat breekbaar geword het. Ek is God wat kwesbaar geword het. Die Vader het My gestuur om vir jou aan die kruis te sterf. Ek het mens geword sodat jy kan lewe.”

Soos wat brood jou liggaam voed en vir jou lewe gee, so voed Jesus se soenoffer aan die kruis jou geestelike lewe. Wanneer Jesus sê dat Hy die Brood van die lewe is, sê Hy daarmee: “Ek het gekom om gebreek te word, sodat jy kan lewe.”

Wanneer iets verkeerd gedoen is, is daar 'n verlies en iemand moet die verlies dra. As jy 'n baie waardevolle item van iemand breek, dan moet jy die prys betaal om die eienaar daarvoor te vergoed. As daardie eienaar vir jou sê: “toemaar jy hoef nie te betaal nie, ek sal self die skade dra,” dan betoon daardie persoon genade aan jou. Jy ontvang iets wat jy nie verdien het nie.

Die prys wat betaal moet word vir die opstand en verwerping van God, is die dood, want daar is geen lewe sonder God nie. God se genade is dat Hy sy Seun stuur om die prys te betaal sodat jy dit nie hoef te betaal nie. Jesus het vir jou aan die kruis gesterf. Hy het die dood oorwin en sy opstanding is die bewys daarvan. Omdat Hy die dood oorwin het, kan Hy vir jou die ewige lewe gee.

Om die ewige lewe te ontvang moet jy glo dat Jesus vir jou aan die kruis gesterf het sodat jy kan lewe. Selfs die geloof wat God vra gee Hy ook vir jou. Die Heilige Gees gee dit vir jou sodat jy daarmee kan vashou aan God se genade en dat jy daarmee kan weet dat jy deel in die ewige lewe.

Wat is jou natuurlike reaksie wanneer jy iets groots ontvang? Jy is dankbaar. Wat is jou reaksie wanneer jy gered word van die dood? Jy is lief vir die persoon wat vir jou, jou lewe terug gegee het. Jy reageer op God se liefde en sy liefde verander jou sodat jy die liefde wat Hy vir jou gegee het, uitdeel. Jy kan liefhê, want God het jou eerste liefgehad.

In Joh. 6 v 35b sê Jesus:

“Ek is die brood wat lewe gee. Wie na My toe kom, sal nooit weer honger kry nie, en wie in My glo, sal nooit weer dors kry nie.

Deur jou geloof in Jesus word jou geestelike honger gevoed. Dit bring jou na die Bron van blydskap en lewensvreugde0. God wat vir jou lewe gee is die enigste bron van ware lewensvreugde.

Wanneer God in jou lewe teenwoordig is, dan kan tydelike moeilikheid soos hierdie Covid19 pandemie en die gepaardgaande inperkings ongerief nie jou lewensvreugde steel nie.

Kom in geloof na Jesus toe en ontdek die ware Bron van blydskap.

Amen

Jy hoef nie bang te wees nie, want God beskerm jou - Ps 91

Datum:26 Apr. 2020 GKE ds. J.G. van der Walt

Skriflesing: Ps. 91

Teksvers: Ps. 91 v 14 & 15

Sing

Ps. 91-1 v 1 & 8

Ps. 119-2 v 10 & 11

Die preek is ook in video formaat beskikbaar 

In hierdie tyd het ons hoop nodig, want sonder hoop gaan ons nie deur hierdie pandemie kom nie. Soos ons gehoor het gaan hierdie onderstebo wêreld nie op 1 Mei 2020 skielik weer reg wees nie. Die virus is nog steeds met ons en gaan nog steeds ons wêreld negatief beïnvloed.

Ons het hoop nodig. Christene soek hulle hoop by God en vind dit in sy Woord. Ps. 91 is een van die Psalms waaraan Christene vashou wanneer ons deur moeilike tye gaan. Die probleem is egter dat indien ons die Psalm nie reg verstaan nie, kan ons valse hoop daaruit haal.

Daar is drie afdelings in die Psalm: Eerstens vind ons in Ps. 91 v 1 – 4 die belofte dat God ons sal beskerm in tye van gevaar. Tweedens is daar dan in Ps. 91 v 5 – 13 'n paar voorbeelde wat verduidelik hoe die belofte werk en laastens hoor ons in Ps. 91 v 14 – 16 hoe jy die belofte moet verstaan om daarin te kan deel.

1 Belofte dat God ons sal beskerm in tye van gevaar

Die belofte behels basies dat indien jy God vertrou, sal Hy jou beskerm wanneer jy in gevaar verkeer. Die Here gebruik twee beelde om te verduidelik hoe Hy jou sal beskerm.

Die eerste is die beeld van 'n veilige vesting, 'n fort wat jou veilig bewaar wanneer jy deur 'n vyand bedreig word. Die tweede beeld is die van 'n voël wat haar kuikens onder haar vlerke beskerm wanneer gevaar dreig.

Die boodskap hier is dat jy nie bang hoef te wees nie, want God beskerm jou.

2) Hoe moet ons hierdie belofte verstaan?

In Ps. 91 v 5 – 13 hoor ons nou 'n paar voorbeelde van hoe God jou beskerm. Jy sal beskerm word wanneer 'n vyand jou met geweld bedreig.

Dan is daar ook die voorbeeld wat nogal baie relevant is in ons huidige situasie. Jy hoef nie bang te wees vir pes wat in die donker toeslaan of vir siekte wat helder oordag verwoesting saai nie. Geen plaag sal naby jou woonplek kom nie.

Die Here sal sy engele opdrag gee dat jy selfs nie eers jou voet teen 'n klip stamp nie. Jy hoef nie vir wilde gediertes wat jou lewe bedreig bang te wees nie.

Hoe moet ons hierdie gedeelte verstaan? Die populêre verklaring wat so sag op die oor val en wat ons so graag aan wil vashou, is dat jy God net genoeg moet vertrou en dan sal niks slegs met jou gebeur nie.

In hierdie tyd sal ons graag aan die belofte wil vashou dat as jy God net genoeg vertrou en jou geloof sterk genoeg is, dan sal jy nie siek word van hierdie virus wat ons lewens so omver gooi nie. Ek is seker dat as ek vanoggend hierdie boodskap met oortuiging so sou oordra, dat daar baie mense sal wees wat baie daarvan sal hou! Ons wil nie siek word van hierdie virus nie en hier is nou die oplossing wat ons gaan beskerm.

Daar is egter so 'n klein probleempie met bogenoemde boodskap. Christene en nie Christene word siek van die virus. Hoe moet ons nou verklaar dat Christene ook siek word van die virus en dat daar selfs Christene is wat sterf as gevolg van die virus?

Die logiese verklaring wat uit bogenoemde boodskap voortvloei is dat die Christene wat deur die virus geïnfekteer word God nie genoeg vertrou en hul geloof nie sterk genoeg is nie. Watse troos lê daar in so 'n boodskap? Kan ons werklik sê dat die Christin wat siek word se geloof nie sterk genoeg is nie?

Die ander ding wat net so relevant is vandag, is die geweldsmisdade teen die plaasboere. Beteken dit dat daardie boere wat aangeval word se geloof nie sterk genoeg is nie? Nee ons kan nie so sê nie !!!!!!!!!!

Dit is wel waar dat God ons beskerm teen onheil en gevaar, maar dit is ook waar dat Hy soms toelaat dat onheil en gevaar oor ons pad kom. Wanneer Hy dit toelaat is dit ook nie noodwendig omdat ons iets verkeerd gedoen het nie.

Dink maar aan Job. Sy drie vriende het hom beskuldig dat hy iets verkeerd gedoen het en dat dit die oorsaak was vir die rampe wat hom getref het. Hulle verklaring was egter nie waar nie en God het hulle bestraf daaroor.

Die ou satan wil graag hê dat ons moet glo dat as jy God net genoeg vertrou en jou geloof sterk genoeg is, dat niks slegs met jou sal gebeur nie. Want hy weet dat daar êrens op jou pad 'n tyd gaan kom waar iets slegs met jou gaan gebeur en as jy bogenoemde boodskap glo gaan dit jou vertroue in God skade aandoen.

Dis dieselfde strategie wat hy gevolg het toe Jesus in die woestyn versoek is. Hy het Ps. 91 v 11 en 12 aangehaal toe hy met die derde versoeking Jesus uitgedaag het om van die tempel se dak af te spring soos ons in Luk. 4 hoor. Jesus se antwoord dat jy die Here jou God nie op die proef mag stel nie, maak dit baie duidelik dat die satan se interpretasie verkeerd is.

Die satan se strategie met die versoeking was om Jesus sover te kry om nie die pad van die kruis te loop nie, want as Jesus nie die pad van lyding deur die kruis heen gevolg het nie, sou die hele mensdom verlore gewees het.

Jesus het egter nie vir die satan se versoeking geval nie en Hy het die pad van lyding deur die kruis gevolg. Jesus het helse smart, pyn en God verlatenheid deurgemaak ter wille van jou en my. Hy weet wat dit beteken om te ly. Hy weet wat dit beteken om deur die satan versoek te word.

Jesus verstaan waardeur ons gaan wanneer ons swaarkry. Hy was daar, Hy weet want Hy was self deur nog swaarder lyding as wat enige mens op aarde ooit sal verduur.

3) Hoe moet ons dan die belofte verstaan sodat ons daarin kan deel?

In Ps. 91 v 14 hoor ons:

“Omdat hy My liefhet, sal Ek hom red,” sê die Here,

“omdat hy My ken, sal Ek hom beskerm.

Soos wat 'n voel haar kuikens onder haar vlerke beskerm so beskerm die Here die wat Hom liefhet. 'n Voel sal selfs haar lewe gee terwyl haar kuikens veilig onder vlerke beskerm word. Jesus het met sy lewe betaal om ons te beskerm.

Hoe kan ons die Here liefhê? In 1 Joh. 4 v 19 hoor ons dat ons kan liefhê omdat God ons eerste liefgehad het en in 1 Joh. 4 v 9 & 10 hoor ons dat God sy Seun gestuur het omdat Hy ons liefhet. Die bron van ons liefde vir God is Jesus wat vir ons sondes gesterf het. Jou liefde vir God kom na vore wanneer jy glo dat Hy sy Seun gestuur het om te sterf sodat jy kan lewe.

In Ps. 91 v 15 hoor ons die sleutel hoe om die belofte van Ps. 91 te verstaan.

in sy nood sal Ek by hom wees, Ek sal hom red

Die Here sê nie hier dat daar nooit slegte dinge oor jou pad sal kom nie. Wat Hy wel vir ons hier sê, is dat wanneer daar slegte dinge oor jou pad kom, sal Hy daar wees vir jou. Hy sal die pad saam met jou stap.

Deur lyding word ons gevorm om al hoe meer gelykvormig aan Jesus te word. Die belofte is dat self lyding jou nie van die ewige lewe kan weerhou nie, want selfs as jy sou sterf as gevolg van jou lyding hier op aarde, sal jy steeds bly lewe. Die bose sal nie sy doel bereik om jou van God te vervreem nie.

In Ps. 91 v 16 hoor ons dat God vir die wat Hom liefhet 'n baie lang lewe sal gee. Elkeen wat in Jesus Christus glo ontvang die ewige lewe.

Weet daarom dat selfs binne in hierdie lyding wat die pandemie oor ons pad gebring het, dat jy nie alleen is nie. God stap saam met jou en Hy hou jou vas. Niks sal jou van die ewige lewe kan beroof nie.

Onthou dat ook in hierdie krisis, jy nie bang hoef te wees nie, want God beskerm jou.

Amen

6 Dagstukkies - Soek jou vrede by God wanneer bekommernis, vrees en spanning jou wil oorweldig

Dag 1 Dinsdag 14 Apr. 2020 GKE Covet19 dagstukkies

Skriflesing: PSALMS 23:4

Selfs al gaan ek deur donker dieptes,

sal ek nie bang wees nie,

want U is by my.

In u hande is ek veilig.

Ons is nou amper in die helfte van die verlengde inperkingstyd. Hierdie inperking bied inderdaad baie redes vir spanning, bekommernis en selfs om bang te wees.

In hierdie volgende klompie daaglikse dagstukkies gaan ons stilstaan hoe om deur die donker diepte van ons inperking te kom. Hierdie inperking hou verwoestende gevolge in waar besighede bankrot kan speel en baie mense hul werk en inkomste kan verloor.

Die moontlikheid dat dit verleng kan word, is ook nie uitgesluit nie. Derhalwe is dit belangrik dat ons geestelik sterk moet wees om nie in die greep van angs vasgevang te word nie, want dit is juis in sulke omstandighede wat ons so kwesbaar is dat die ou duiwel sy kans gebruik om jou aan te val.

In Psalm 23 v 4 hoor ons dat ons nie bang hoef te wees wanneer ons deur donker dieptes gaan nie. Die rede daarvoor is dat ons nie alleen daardeur gaan nie. Ons loop nie hierdie pad alleen nie. God loop saam met ons en Hy dra ons wanneer die pad te moeilik raak.

Ons het hierdie afgelope naweek weer die kruisiging en opstanding van Jesus Christus herdenk. Aan die kruis het Jesus die angste van die hel deurgaan en sy uitroep van bange God verlatenheid: “My God, My God, waarom het U my verlaat” gee vir ons die troos dat ons nooit deur God verlaat sal word nie.

Daarom kan ons ook vir seker weet dat God ook saam met ons deur die donker vallei van hierdie inperking gaan.

In die volgende paar dagstukkies gaan ons dan ook stilstaan by praktiese maniere hoe om hierdie pad saam met God te stap sonder vrees.

Moenie dat die hierdie inperking en die gevolge daarvan jou met vrees en bekommernisse lamlê nie.

Amen

Dag 2 – Verbly jou in die Here

Dinsdag 15 Apr. 2020 GKE Covet19 dagstukkies

Skriflesing: Fil. 3 v 1

Verder, my broers, wees bly in die Here!

Om dieselfde dinge aan julle te skrywe, is vir my nie moeite nie,

en vir julle gee dit sekerheid.

Fil. 4 v 4

Wees altyd bly in die Here! Ek herhaal: Wees bly!

Soos wat die tyd aanstap begin hierdie inperking op jou gemoed werk. As jy nie oppas nie, kan jy maklik in donkerte vasgevang word.

Ons loop hierdie pad egter nie alleen nie. In Joh. 14 net kort voor Jesus se kruisiging belowe Hy dat die Heilige Gees in sy plek sal kom as Trooster om ewig by ons te bly. Aan die kruis net kort voor sy dood het Jesus in bange Godverlatenheid uitgeroep: “My God, My God, waarom het U my verlaat?” Dit gee vir ons die sekerheid dat ons nooit alleen is in hierdie lewe nie.

In hierdie brief aan die gemeente in Filippie sê die Here vir ons hoe om die pad saam Hom te stap, veral in tye wanneer ons onder beproewing staan.

Paulus skryf hierdie brief terwyl hy in die tronk is. Hy was baie meer ingeperk met baie minder vryhede as wat ons het, selfs te midde van ons eie inperking. Sy kern boodskap in hierdie brief is om in alle omstandighede bly te wees in die Here.

Dis maklik om bly te wees wanneer jy voorspoed in jou lewe geniet. Paulus se opdrag: “verbly jou in die Here” is nie bedoel dat jy bly moet wees omdat dit goed gaan met jou nie. Sy opdrag is juis om jou aan te moedig om te midde van aanvegtinge, verdrukking en swaarkry bly te wees. Dit gaan nie daaroor dat jy die beproewings maar net moet verduur nie, maar dat jy midde in dit blydskap vind.

Die sleutel tot hierdie blydskap is dat jy dit in die Here moet vind. “Verbly jou in die Here.” Met ander woorde draai jou fokus weg van jou omstandighede af na die Here toe.

Die bron van jou blydskap is dat God in Jesus jou so lief het dat Hy ALLES gedoen het om jou te red van die ewige dood. Jesus het vir jou gesterf en Hy het vir jou opgestaan uit die dood sodat jy kan lewe.

Die ou duiwel se doelwit is om jou fokus weg van God af te draai op jou omstandighede. Toe Petrus op die water na Jesus toe geloop het, het hy op die wind en golwe om hom begin fokus en weggekyk van Jesus af. Daarom het hy begin sink en dit is wat met sal gebeur wanneer jy op jou omstandighede fokus, eerder as op ons Here.

As hierdie inperking jou gemoed begin donker maak, draai jou aandag weg van jou omstandighede terug na die Here toe. Die Heilige Gees is by jou. Bid dat Hy al die seëninge wat God vir jou gegee het waarvoor jy dankbaar kan wees, sal wys.

Bid dat Hy jou negatiewe gedagtes oor die sleg van die inperking sal vervang met positiewe gedagtes van dankbaarheid vir al die seëninge in jou lewe. 'n Verder praktiese manier is om te gaan sit en 'n lys te maak van alles waarvoor jy dankbaar moet wees.

Moenie dat hierdie tyd van inperking jou met donkerte vul nie.

Verbly jou in die Here!

Amen

Dag 3 – Fokus op die positiewe wat is en nie op die negatiewe wat mag wees nie.

Woensdag 16 Apr. 2020 GKE Covet19 dagstukkies

Skriflesing: Fil. 4 v 6-8 Fokusvers: 8

6Moet oor niks besorg wees nie, maar maak in alles julle begeertes deur gebed en smeking en met danksegging aan God bekend. 7En die vrede van God wat alle verstand te bowe gaan, sal oor julle harte en gedagtes die wag hou in Christus Jesus.

8Verder, broers, alles wat waar is, alles wat edel is, alles wat reg is, alles wat rein is, alles wat mooi is, alles wat prysenswaardig is – watter deug of lofwaardige saak daar ook mag wees – daarop moet julle julle gedagtes rig. Verder, my broers, wees bly in die Here!

In ons dagstukkies het ons gehoor dat God belowe dat ons nie alleen deur Corona Covid19 krisis gaan nie. Hy stap die pad saam met ons. Die Heilige Gees is by jou elke sekonde van elke dag. Die Heilige Gees is jou Trooster in hierdie lewe. Die Heilige Gees wek in jou die behoefte op om die pad saam met God te stap.

In Fil. 4 v 6 & 7 hoor ons dat jy in met jou vrese, bekommernisse en dankbaarheid in gebed tot God moet nader met die troosvolle belofte dat sy vrede wat alle verstand te bowe gaan, jou lewe sal vul. Daar is egter iets BAIE belangrik wat jy nie moet miskyk nie. Vers 7 sluit af met die woorde: “in Christus Jesus.”

Die enigste manier wat jy kan deel in die troos dat God die pad saam met stap en dat Hy jou nooit alleen sal laat nie, is dat jy die evangelie moet glo. Jy moet glo dat jy 'n kind van God is omdat Jesus vir jou sondes aan 'n vervloekte kruishout gesterf. Jy moet glo dat Jesus die dood oorwin het en dat sy opstanding die waarborg is dat jy nou 'n nuwe lewe ontvang het.

In hierdie brief aan die Filippense hoor ons hoe om prakties voete op die grond die pad saam met God te stap. Hoe jy hierdie nuwe lewe wat jy ontvang het moet leef.

In Fil. 4 v 8 hoor ons dat jy op die waarheid moet fokus. Dit is hoe jy positief gaan bly in hierdie virus storm waarin ons vasgevang is. Dis negatiewe gedagtes oor wat moontlik verkeerd kan gaan wat jou in die donkerte intrek. Dit is hierdie spiraal van negatiewe gedagtes wat jou sag maak om al die snert en fopnuus te glo wat op leuens gegrond is en dit vul jou gemoed met net nog meer donkerte. So beland jy in 'n bose spiraal wat jou net al hoe dieper in die donkerte intrek.

Moenie op die negatiewe van alles wat moontlik verkeerd kan loop fokus nie. Fokus op die positiewe wat is en nie op die negatiewe wat mag wees nie.

Amen

Dag 4: - Die Here gee vir jou die krag en genade om vandag se probleme te kan hanteer. Môre gee Hy weer krag vir môre se probleem.

Vrydag 17 Apr. 2020 GKE Covet19 dagstukkies

Skrif: Mat. 6:34; Heb. 4:16

Ons het baie bekommernisse oor wat gaan gebeur as gevolg van hierdie virus en wat die gevolge gaan wees van hierdie inperkingstyd. Dit is reeds eenkeer verleng en die moontlikheid is glad nie uitgesluit dat dit nog verder verleng kan word nie.

Daar is aanduidings dat dit nie heeltemal opgehef gaan word nie, maar dat dit op een of ander manier gaan voortduur na 30 April. Wat gaan die gevolge daarvan wees? Niemand kan verseker sê nie, maar wat almal eens is, is dat dit nie goed gaan wees nie.

Ons natuurlike reaksie is om te bid “Here asb. tog, neem net al hierdie slegte goed van ons af weg. Here laat die lewe asb. tog net weer na normaal terugkeer.”

En dit is nie net met hierdie Korona krisis die geval nie. Dit is eintlik maar met elke moeilikheid wat oor ons pad kom.

Die harde werklikheid is egter dat die Here nie noodwendig die probleme en die gevolge wat daarmee gepaard gaan, wat oor ons pad kom, wegneem nie. Hy kan en doen dit soms, maar meestal neem Hy dit nie weg nie.

Die troos wat die Here wel vir ons gee is dat selfs al word jou grootste vrese bewaarheid, dat jy nie alleen daar deur hoef te gaan nie. Dis hoekom Christus vir jou aan die kruis gesterf het sodat jy nooit weer deur God verlaat sal word nie. Jy is nie alleen in hierdie stryd nie en ons as Christene glo dit.

Tog word ons soms nog steeds oorweldig deur die krisisse wat oor ons pad kom. Die rede daarvoor is dat ons die hele krisis op een slag wil aanvat. Daarmee saam gaan haal ons ook die bobbejaan agter die bult uit met vrese oor goed wat moontlik mag gebeur, wat dalk tog nie sal gebeur nie.

Die Here gee vir ons krag en genade om deur die uitdagings wat Hy oor ons pad bring te oorleef. Hy gee egter net genoeg krag vir dit wat jy vandag moet hanteer. En dit is ons probleem. Ons is so geneig om te wil bekommer oor wat môre ook gaan gebeur.

Luister na wat die Here vir ons in Mat. 6 v 34 hieroor sê:

“Moet julle dus nie oor môre bekommer nie, want môre bring sy eie bekommernis. Elke dag bring genoeg moeilikheid van sy eie.”

Die Here gee vir ons krag en genade om vandag se probleem te hanteer.

In Heb. 4 v 16 hoor ons:

Kom ons gaan dan met vrymoedigheid na die genadetroon, sodat ons barmhartigheid en genade ontvang en so op die regte tyd gered kan word.

Gaan vra vir krag en genade om die moeilikhede te hanteer en vertrou die Here dat Hy vir jou krag en genade sal gee om elke probleem op sy eie tyd te hanteer.

Hoe eet mens 'n olifant op? Stukkie vir stukkie. Die Here gee vir jou genoeg krag om vandag se stukkie olifant op te eet. Môre sal Hy weer vir jou krag gee om môre se stukkie olifant op te eet.

Moenie jou siek maak met bekommernisse oor alles wat kan gebeur nie. Fokus op vandag. Vra vir die Here krag en genade om van dag te hanteer. Môre sal Hy vir jou weer krag gee om môre se probleme te hanteer.

Amen

Dag 5: - Is jy bereid om op die Here te vertrou?

Dinsdag 21 Apr. 2020 GKE Covet19 dagstukkies

Skrif: Gen. 12 v 1 - 4; Ps. 37 v 5

Een van die redes hoekom hierdie tyd van inperking so moeilik is, is omdat ons nie beheer het daaroor nie. 'n Mens wil in beheer van sy lewe wees. Ek wil self besluit waarheen my lewe op pad is en wat daarmee gaan gebeur.

In ons moderne samelewing word klem gelê op onafhanklikheid. Ons wil self besluit wat in ons lewens gaan gebeur en ons wil nie voorgesê word wat om te doen nie. Die probleem wat hiermee egter gepaard gaan is dat ons so onafhanklik raak dat ons dink dat ons God nie meer nodig het nie. Is dit nie dalk hoekom so baie mense wegraak uit die kerk uit nie?

In Psalm 37 v 5 hoor ons “Laat jou lewe aan die Here oor en vertrou op Hom; Hy sal sorg.” Tot watter mate het ons strewe na beheer ons vertroue op die Here in die wiele gery?

In hierdie tyd van inperking is dit juis hierdie strewe van ‘ek wil in beheer wees’, wat van ons af weggeneem is. Nou word ons voorgesê wat ons mag, en nie mag doen nie. Byvoorbeeld, wanneer jy in die supermark kom, is daar nou skielik sekere items wat jy nie meer mag koop nie. Dis nie dat die items nie meer beskikbaar is nie, maar omdat daar nou 'n regulasie is wat dit verbied. Jy word voorgesê waarheen jy mag gaan en nie mag gaan nie. Ons is nie meer in beheer nie.

Hierdie pandemie het dit wat bekend was in ons lewens omgekeer en die pad vorentoe lyk onbekend. Ons weet nie werklik wat wag nie en waarheen is ons op pad nie. Ons is nie in beheer nie!

In Gen. 12 v 1 hoor ons van Abraham wat ook op pad was die onbekende in.

“Die Here het vir Abram gesê: “Trek uit jou land uit, weg van jou mense en jou familie af na die land toe wat Ek vir jou sal aanwys.”

In Gen. 12 v 4 hoor ons dat Abraham toe weggetrek het die vreemde in. Wat het hom sover gebring om die Here te vertrou en te gehoorsaam? Hy het vertrou dat die Here sy belofte van seën sou nakom.

Abraham se vertroue in die Here het die wêreld geskiedenis verander. Uit sy nageslag is Jesus gebore wat gekom het om die wêreld van hulle sondeslawerny te verlos. Die Here het sy belofte van: “In jou sal die volke van die aarde geseën wees,” nagekom.

Is jy bereid om die Here te vertrou? As jy in Jesus glo dan moet jy weet dat die Here saam met jou die onbekende toekoms ingaan. Die sekerhede wat ons gehad het, was eintlik maar net 'n illusie, want daar is niemand wat met sekerheid kan sê wat die toekoms inhou nie. Met hierdie pandemie het die Here net weer die waarheid daarvan bevestig.

Is jy bereid om God te vertrou met die pad wat Hy vir jou uitgelê het? As jy in Jesus glo, kan jy verseker weet dat die Here net jou beste belang op die hart dra en dat Hy jou sal dra deur die onsekerhede van wat die toekoms inhou, want as jy in Jesus glo is jy 'n kind van die Here. Dit is jou geloof in Jesus, (dat Hy vir jou sondes gesterf het sodat jy weer met God versoen kan word,) wat die fondament van jou vertroue op die Here is.

Laat jou lewe aan die Here oor en vertrou op Hom; Hy sal sorg.

Amen

Dag 6: - Wanneer vrees en onsekerheid dreig om jou te oorweldig, onthou dat God jou liefhet en dat Hy vir jou sorg.

Woensdag 22 Apr. 2020 GKE Covet19 dagstukkies

Skrif: Mat. 10 v 29 – 31; 1 Joh. 4 v 9

Hierdie tyd van inperking is vol onsekerhede en onsekerheid voed vrees. Dit is 'n natuurlike neiging om te verwag dat iets slegs gaan gebeur en in tye van onsekerheid kom hierdie verwagting soveel te meer na vore.

Die bron van hierdie geneigdheid lê daarin dat ons vergeet van God se goedheid en sorg. Voel jy vandag onseker en bang oor wat die toekoms gaan inhou? Kom luister dan net weer hoe kosbaar jy vir God is en hoe besorgd Hy oor jou is:

Mat. 10 v 29 - 31

“Is twee mossies nie vir 'n sent te koop nie? En tog sal nie een van hulle op die grond val sonder die wil van julle Vader nie. Van julle is selfs die hare op julle kop almal getel. Moet dan nie bang wees nie. Julle is meer werd as baie mossies.”

Dit is nodig dat ons gereeld herinner word aan hoe lief God ons werklik het. Net soos wat jy gereeld vir jou geliefde sal sê en wys deur jou optrede dat jy hulle lief het, herinner God ons deur sy Woord hoe lief Hy ons het. Daarom is dit nodig dat jy elke dag tyd saam met God spandeer om uit sy Woord te hoor hoe lief Hy jou het. Luister bietjie weer na 1 Joh. 4 v 9:

Híerin is God se liefde vir ons geopenbaar: sy enigste Seun het Hy na die wêreld toe gestuur sodat ons deur Hom die lewe kan hê.

Wanneer vrees en onsekerhede jou wil oorweldig, onthou dat God jou so lief het dat Hy sy enigste Seun gestuur het om vir jou sondes aan 'n vervloekte kruishout te sterf sodat jy kan lewe. Met sy oorwinning oor die dood gee Jesus vir elkeen wat in Hom glo die ewige lewe. Al wat jy moet doen om die ewige lewe te ontvang is om in Jesus te glo, te glo dat Hy vir jou sondes gesterf het sodat jy weer met God versoen kan wees.

Wanneer ons van die ewige lewe hoor dan dink ons eerste daaroor dat dit beteken dat ons in die hiernamaals ewig saam met God gaan wees waar daar geen hartseer, trane, pyn of dood meer sal wees nie. Dis 'n lewende hoop waaraan ons moet vashou.

Die probleem kom dikwels in dat ons vergeet dat die ewige lewe baie meer as dit is. Die ewige lewe beteken ook dat God reeds in hierdie lewe saam met jou is en dat Hy vir jou meer nog sorg as wat Hy vir die mossies sorg. Die ewige lewe gaan nie bloot net daaroor om vas te klou aan die hoop en vrede wat ons eendag sal hê nie. Dit gaan om aanváárding van hoe geliefd ons nou is.

As die vrees en bekommernis in hierdie inperkingstyd dreig om jou te oorweldig, onthou God se liefde en sorg, want sy volmaakte liefde dryf alle vrees uit.

Amen