Is daar hoop midde in lyding?

Job Preek 4

30 Sep. 2018 

Job 38:1-12; 39:34-38 & 42:1-6

Teksverse: Job 38:4; 42:5

Ons is vandag by ons vierde preek uit Job oor moeilike lewensvrae waarop daar nie altyd maklike antwoorde is nie. In die eerste preek het ons gehoor dat jy nie ʼn mooiweersgelowige moet wees nie. Dien God vir wie Hy is en nie vir dit wat jy van Hom ontvang nie.

In die tweede preek het ons gehoor dat ons nie altyd weet hoekom daar slegte dinge oor ons pad kom nie. Wat ons wel weet is dat God daar is en dat Hy ons nooit in die steek sal laat nie.

In die derde preek het ons stilgestaan by wat die Here van ons verwag wanneer ons ly. God verwag dat ons Hom sal vertrou. Dat ons dankbaar moet wees in tye van voorspoed en geduldig in tye van teëspoed.

In die vierde preek staan ons stil by die vraag: 

“Is daar hoop midde in lyding?” 

Hoop is die een ding wat jou staande hou wanneer lyding oor jou pad kom. Hoop maak dit moontlik om die lewe in die oë te kyk en die pad enduit te stap. Job wys vir ons dat ongeag jou omstandighede daar altyd hoop is wanneer jy die pad saam met God stap.

Job is nie ʼn maklike boek om te lees nie. Hebreeuse poësie is nie maklik nie, veral nie as dit in ʼn verhaal gebruik word nie. Na die inleiding waar ons hoor van die rampe wat Job getref het, vind daar ʼn uitputtende tweegesprek tussen Job en sy vriende plaas wat vir 35 hoofstukke aanhou.

Dis ʼn gesprek wat al in die ronde gaan sonder dat daar enige antwoorde kom oor Job se rampe. Wat dit vir ons sê is dat die menslike deelnemers absoluut geen antwoorde het vir Job se probleem nie, maak nie saak hoe lank hulle daaroor praat nie.

Dit is eers wanneer God tot die gesprek toetree dat daar antwoorde kom, maar tog is dit nie die antwoorde wat ons verwag nie. Op die oog af klink dit of die vrae wat God aan Job oor sy skepping vra nie eintlik vir Job nuwe inligting gee nie.

Die gesprek bevestig wel God se onbeperkte mag en wysheid, maar dit is nie iets wat Job alreeds geweet het nie. Dieperliggend spreek God Job se twyfel dat God nie regverdig is nie aan. In Job 38:4-7 hoor ons:

Waar was jy toe Ek die aarde se fondamente gelê het?

Praat as jy die antwoord het. Wie het die aarde afgemeet?

Weet jy dit? Wie het ’n maatlyn oor hom gespan?

Waarop is sy voetstukke neergesit?

Wie het hom aanmekaargesit daardie oggend toe die sterre

saamgesing het en al die hemelinge gejubel het?

Hier beskryf die Here die vestiging van die aarde op so ʼn manier wat Job se aanklag teëspreek dat die wêreld in chaos ontaard en dat die bose die oorhand gekry het.

Job is so vasgevang in sy pyn dat hy net die negatiewe raaksien. Is dit nie maar ook dikwels met ons die geval nie? Ons raak so oorweldig deur ons omstandighede dat alles net verkeerd en lelik is. Ons raak so vasgevang in die negatiewe dat ons naderhand glad nie meer raaksien wat goed en mooi is nie.

Die beskrywing van die see in Job 38:8-11 is besonders treffend.

Wie het die see opgedam toe hy begin uitborrel het?

Ek het hom met wolke bedek, hom met donkerte toegemaak.

Ek het vir hom perke gestel, hom agter slot en grendel gesit.

Ek het gesê: ‘Tot hiertoe mag jy kom, nie verder nie;

hier is die grens van jou magtige golwe.’

Die see is simbolies van chaos en boosheid. God is beheer van die see en Hy stel die perke. God het die boosheid oorwin.

Deur sy lyding het Jesus die mag van die boosheid gebreek. Hierin lê die groter hoop. Wanneer Jesus weer kom op die wolke gaan Hy die boosheid en lyding wat daarmee gepaard gaan finaal verban. In ʼn sekere sin deel ons met ons lyding in Jesus se lyding en daarom deel ons ook in sy oorwinning oor die boosheid.

Ons is nie maar net aan die noodlot uitgelewer is nie. Ons is nie op ʼn vliegtuig sonder ʼn loods nie. God is in beheer. Hy word nie onkant gevang nie. Dit is ʼn hoop waaraan ons vashou.

Die sekerheid dat God alles kan doen en dat sy raadsplan nie gekeer kan word nie is die hoop en troos wat ons nodig het midde in lyding. God laat nie maar alleen net lyding toe nie. Hy beheer dit. Hy laat nie toe dat lyding sy bose doelwitte bereik nie. Hy buig dit om sodat alles ten goede meewerk. God wat weet hoe om boosheid te gebruik om op die uiteinde sy doelwitte van goedheid te bereik, sal ook die donkerste lyding in my lewe gebruik om alles vir my ten goede te laat meewerk.

in Job 42:5 hoor ons:

Tot nou toe het ek net gehoor wat mense van U sê,

maar nou het ek U self gesien,

Job bely dat hy God op ʼn heel nuwe wyse leer ken het. Hy het in die verlede gedink hy ken God, maar toe besef hy dat hy net van God geweet het. Nou egter, het hy God persoonlik leer ken. Job bevestig dat sy verhouding met God heeltemal anders is as enige ander verhouding wat hy met mense het. Sy verhouding met God is kosbaarder as enigiets anders in sy lewe.

God gebruik lyding om jou nader aan Hom te bring. Wanneer jy ly en nie antwoorde kry oor hoekom nie, maar nogtans vashou aan jou verhouding sal jy ook God op ʼn heel nuwe manier leer ken.

Die hoop midde in lyding is dat God ʼn werklikheid word in jou lewe. Deur jou geloof in Jesus Christus leer jy om God te vertrou, selfs wanneer die lewe om jou deurmekaar is en jy nie verstaan hoekom nie. God word ʼn konkrete werklikheid en ʼn anker wat sin aan jou lewe gee.

Ons kry dikwels nie antwoorde op ons hoekom vrae nie. Job moes in die kookpot beland om getoets te word of hy opreg lewe ter wille van God. Hy moes leer om opnuut weer te sê: “Laat U wil met my geskied.”

Glo dat jou lewe in die hand van God is en berus daarin. Laat jou gebed ook wees “Laat U wil met my geskied.” Jou lewe word nie deur die noodlot bepaal nie, maar deur jou persoonlike verhouding met God.

Amen

Wat verwag die Here van ons wanneer ons ly?

23 Sep. 2018 GKE (preek 3)

Skriflesing Job 19

Teksvers Job 19 v 25 tot 27

Kyk na ʼn oorsig oor die boek Job by https://youtu.be/xQwnH8th_fs

Ons is steeds besig met ʼn preekreeks uit Job oor moeilike lewensvrae waarop daar nie altyd maklike antwoorde is nie. In die eerste preek oor Job het ons gehoor dat jy nie ʼn mooiweersgelowige moet wees nie. Dien God vir wie Hy is en nie vir dit wat jy van Hom ontvang nie.

In die tweede preek het ons gehoor dat ons nie altyd weet hoekom daar slegte dinge oor ons pad kom nie. Wat ons wel weet is dat God daar is en dat Hy ons nooit in die steek sal laat nie.

Vandag staan ons stil by die vraag: “Wat verwag die Here van ons wanneer ons ly?” In Job gee die Here vir ons ʼn antwoord wat verbasend eenvoudig is. In Job 1:11 hoor ons hoe die satan, die aanklaer voorspel het dat Job God sal vervloek as hy alles verloor. Met ander woorde Job sal sy verhouding met God verbreek en sy rug op God draai omdat hy God nie waardig genoeg sal ag om ʼn verhouding met God te hê nie.

Job doen egter net mooi die teenoorgestelde soos ons in Job 1:21 hoor:

“Sonder iets het ek in die wêreld gekom en sonder iets gaan ek daaruit. Die Here het gegee en die Here het geneem. Prys die Naam van die Here.”

Die Here het niks anders van Job verwag nie. Nêrens hoor ons dat God Job vir enige sonde vermaan nie. Al wat God van Job verwag het was dat hy God moes vertrou.

Wat verwag die Here van ons wanneer ons ly? Heel eenvoudig. Hou vas aan jou verhouding met Hom. Moenie opgee nie. Dit beteken egter nie dat die pyn van lyding vir God onbelangrik is nie. Dit beteken nie dat jy maar ewe gedwee net moet stilbly nie.

In Job 9:22 tot 24 hoor ons hoe Job sy diepste smart teenoor God uiter:

Eintlik is dit om ’t ewe, daarom dink ek: of ’n mens skuldig is of onskuldig, God vernietig jou tog. As ’n vloedramp skielik die dood bring, lag God oor die wanhoop van die onskuldiges. Hy gee die wêreld oor in die mag van die goddelose, en Hy maak die regters partydig. As dit nie Hy is wat dit doen nie, wie dan?

As mens so na hierdie aanklag luister sou mens verwag dat Job sy rug op God sou draai. Dat hy God sou vervloek. Maar verbasend genoeg, doen Job dit nie. Ten spyte van alles hou Job steeds aan God vas. Daar is steeds by hom hoop dat God sy saak sal opklaar.

Wat nog meer verbasend is, is hoe geduldig God met Job is. Alhoewel Hy vir Job sê dat Job homself moet voorberei soos ons hoor in Job 38:3, is dit duidelik dat God maar net hiermee vir Job sê dat Job nie weet waarvan hy praat nie. In sy gesprek met Job lei die Here vir Job om in te sien dat hy nie verstaan nie. In die lig van Job se aanklag teen God sien ons hier hoe groot God se genade is.

God sien in Job se hart dat hy in sy pyn en smart uitroep om te verstaan waarmee God besig is. Hierin sien ons hoe diep Job se verhouding met God is, dat selfs wanneer hy op die ashoop sit, hy God genoeg vertrou om sy hart teenoor God uit te stort.

Wat uitstaan is Job se vertroue. Job 13:15 & 16 hoor ons dat hy sy saak teenoor God mag stel. Dat God sal luister.

Al sou God my doodmaak, ek kan nie wag nie, ek moet my saak vir Hom stel. Dit kan selfs my redding wees, want geen godlose durf voor Hom kom nie.

Omdat Job nie sy rug op God gedraai het nie, weet hy dat hy nie ʼn godlose is nie en dat hy daarom met vrymoedigheid tot God kan nader.

In Job 19 v 25 tot 27 hoor ons dat Job ten spyte van sy omstandighede steeds hoop het.

Ek weet dat my Losser leef, uiteindelik sal Hy op die aarde triomfeer! Selfs nadat hierdie siekte my vel weggevreet het, sal ek nog lewe en God sien. Ek sal Hóm sien, met my eie oë sal ek Hom sien, Hom en niemand anders nie. Ek smag daarna met my hele lewe.

ʼn Losser was destyds min of meer soos ʼn voog vandag is. Wanneer iemand in armoede verval het, was daar ʼn verpligting op sy naasbestaande om hom los te koop uit sy omstandighede.

Job sien God as die een wat naaste aan hom is en hy het volle vertroue dat God hom sal loskoop uit sy benarde omstandighede. Job se vervalle en verrotte liggaam stoot sy vrou en broers af, lok selfs die spot van kindertjies uit en stoot sy getrouste vriende af. Daar is niemand na wie hy kan draai nie, maar hy het steeds hoop en daarom draai hy na God toe.

God het hom nie in die steek gelaat nie. In Jesus het God as ons Losser ons losgekoop van die elende waarin sonde ons gedompel het. Wanneer Job na God as sy Losser verwys, is dit ʼn profetiese heenwysing na Jesus Christus. Jesus is ons Losser, want Hy het ons met sy bloed vrygekoop. Deur Jesus kan ons ook met vrymoedigheid tot God nader.

Hou vas aan ons belydenis: Jesus is my enigste troos in lewe en in sterwe omdat ek met liggaam en siel in lewe en in sterwe nie aan myself nie, maar aan my getroue Verlosser, Jesus Christus behoort. Hy het met sy kosbare bloed vir al my sondes ten volle betaal en my uit alle heerskappy van die duiwel verlos.

Deur Jesus kan ons net soos Job sê: “ek weet dat God my Losser is.” Hier is egter ʼn belangrike beginsel ter sprake. Job het naby aan God geleef toe dit goed met hom gegaan het en daarom het hy die vrymoedigheid gehad om sy pyn en smart na God toe te bring. Sy verhouding met God voor sy rampe was sy anker. Op grond van sy verhouding met God het hy sy hoop op God gestel.

Moenie wag dat die lewe jou omdop voordat jy na God toe draai nie. Bou jou verhouding met God in goeie tye deur dit te anker met jou geloof in die evangelie van Jesus Christus. Dit is jou verhouding met God wat jou anker is wanneer jy deur donker dieptes gaan.

Moenie eers wag tot jy binne in die donker dieptes vasgevang is voordat jy ʼn verhouding met God bou nie. Maar selfs as jy dit nie gedoen het nie is God se genade so groot dat jy steeds jou hoop op God kan stel. Dit is net makliker en minder pynlik as jy dit voortydig doen.

Wat verwag die Here van ons wanneer ons ly? Wanneer jy deur die donker dieptes van lyding gaan kom na God toe. Jy mag jou hart teenoor Hom uitstort. Nie noodwendig so beskuldigend soos Job nie. Job se beskuldigings het ook vir hom pyn veroorsaak soos ons hoor in Job 42:6

en nou verag ek myself, nou sit ek vol berou, in sak en as.”

Wanneer jy in pyn is waarvoor daar nie ʼn verklaring is oor hoekom gebeur nie, stel jou vertroue in God as jou Losser. Stort jou hart teenoor God as jou Vader uit. Glo in Jesus Christus. Bring jou pyn en smart na God toe en moenie jou rug op Hom draai nie en Hy sal jou dra deur die donker dieptes van lyding wat oor jou pad kom.

Amen

Hoekom is daar lyding in die wêreld?

16 September 2018

Job preek 2

Skriflesing Job 2 & 10:1 - 3

Teksvers Job 10:2^b

Kyk na ʼn oorsig oor die boek Job by https://youtu.be/xQwnH8th_fs

Sing:

Toetredelied:                                      Ps. 33-1 v 11.

Lofsang                                                 Ps. 48-1 v 1           

Verootmoediging                                Ps. 119-2 v 7 & 10

Geloofsbelydenis                                Ps. 130-1 v 1 & 4

Antwoord op prediking                     Sb. 14-2  / Lied 516 Al sou dan ook die vyeboom nie bot nie.

Ons is op reis saam met Job om antwoorde op lewensvrae te kry waarop daar nie altyd maklik antwoorde is nie. Verlede week het ons stilgestaan by die vraag: “Hoe help lyding jou om te verstaan hoekom jy God moet dien en vir Hom moet lief wees?” Ons moet God alleen dien vir wie Hy is en nie vir dit wat ons van Hom ontvang nie. Moenie ʼn mooiweersgelowige wees nie.

Hierdie week staan ons stil by die vraag: 

“Hoekom is daar lyding in die wêreld?” 

Dit is inderdaad ook die brandende vraag wat Job het soos ons hoor in Job 10:2^b :

   maak aan my bekend waarom voer U hierdie stryd teen my.

Job wil weet HOEKOM Here?

En dit is ook dikwels die vraag wat ons vra wanneer ons ly. Hoekom het hierdie siekte my nou getref? Hoekom is daar soveel rampe in my lewe? Hoekom, hoekom, hoekom?

ʼn Antwoord wat dikwels op hierdie vraag voorgehou word, is dat slegte dade altyd gestraf word en goeie dade beloon word, met ander woorde daar is altyd vergelding vir jou dade. Jy moes iets verkeerds gedoen het en daarom het hierdie ramp jou getref.

Dis ʼn maklike manier om sin van die lewe te probeer maak en dit is inderdaad ook hoe Job se vriende die rampe in Job se lewe probeer verklaar het. Volgens hulle moes Job een of ander sonde gedoen het.

Dit is nie heeltemal ʼn ongeldige verklaring nie. Bv. Dawid se sonde met Batseba en hoe hy in pyn homself bekeer daaroor soos ons in Ps. 51 hoor. Soms bring jy baie elende oor jouself. Dink maar aan die persoon wat drank of dwelms misbruik. As jy onverskillig ry en jy kom in ʼn ongeluk, dan is dit redelik duidelik hoekom jy soveel skade moet ly. As daar enige sonde in jou lewe is wat swaarkry in jou lewe tot gevolg het, moet jy jouself van daardie sonde bekeer.

Dit is egter nie die rede vir Job se lyding nie. Dit is duidelik dat sonde by Job nie die oorsaak is van sy lyding was nie soos die Here in Job 2:3 bevestig:

Die Here vra toe vir Satan: “En my dienaar Job, het jy hom nou gesien? Sy gelyke kry jy nie op aarde nie: hy is vroom en opreg, hy dien My en vermy die kwaad. Hy het vroom gebly, al het jy My daartoe gebring om hom sonder rede te ruïneer.”

In Job leer ons dat die lewe baie meer kompleks is en dat elende en swaarkry in die lewe nie altyd ʼn direkte gevolg is van iets wat jy verkeerd gedoen het nie. Net so min as wat jy altyd die goeie verdien, net so gebeur daar soms ook sonder oorsaak rampe in jou lewe.

Job wou weet hoekom die rampe in sy lewe Hom getref het en ons wil dikwels ook weet “hoekom?” Daar is egter nie altyd ʼn antwoord op die vraag “hoekom” nie. Job vra hoekom, maar die Here gee nooit vir hom ʼn antwoord oor hoekom nie.

In die breë weet ons dat lyding ʼn oorsaak is van die sondeval. Dit beteken egter nie dat daar altyd ʼn een tot een oorsaak en gevolg afleiding gemaak kan word van ʼn spesifieke slegte gebeurtenis in jou lewe nie. Die lewe is baie meer ingewikkeld as dit.

Dit is inderdaad ook God se genade dat daar nie altyd ʼn een tot een oorsaak en gevolg verhouding is ten opsigte van dit wat ons in die lewe doen. Dink maar net as God elke verkeerde ding wat ons doen na meriete gestraf het. Die lewe sou onmoontlik gewees het. Deur God se genade in die evangelie van Jesus Christus is daar vergewing vir ons sondes.

Wat ons wel in Job leer is hoe jy ook deur lyding nader aan God beweeg. Deur ons verlies en verontwaardiging deur lyding gee God Homself aan ons op ʼn manier wat andersins nie moontlik is nie. Deur lyding kom daar ʼn dieper belewing van God wat mens op geen ander manier kan verkry nie.

Ons vra hoekom moet ons ly? In Job leer ons dat “hoekom” ʼn verkeerde vraag is. Waarom is dit ʼn verkeerde vraag? Job se talle hoekom vrae gerig aan God, bevraagteken God se regverdigheid. Bestuur God die wêreld regverdig? Hoekom laat Hy oënskynlik die goddeloses gedy, terwyl regverdiges moet ly?

In Ps. 73 hoor hoe Asaf ook met dieselfde vrae worstel:

In Ps. 73:13 & 14 hoor ons

¹³Dat ek die kwaad vermy het

en met ’n eed my onskuld verklaar het,

het dus niks gehelp nie,

¹⁴want elke nuwe dag

het vir my teenslae gebring

en elke nuwe môre straf.

In Ps. 73:16 hoor ons waar Asaf antwoorde gekry het:

Daarom het ek diep nagedink om dit te verstaan

en was dit vir my bitter moeilik

totdat ek in die heiligdom van God ingegaan het

In Job se gesprekke met sy vriende en sy vrae aan die Here hoor ons dat dit vir hom ook bitter moeilik was. Job eis antwoorde van God en dan antwoord God hom deur aan hom insig te gee oor die wonder van sy skepping. In Job 38-41 verduidelik God vir Job hoe kompleks die heelal is en dan gaan Hy verder deur die kompleksiteit van die lewende wesens wat Hy geskep het aan Job te verduidelik.

As te ware lei God vir Job in sy heiligdom in en Hy maak dit duidelik dat Job nie in ʼn posisie is om God te beskuldig nie. Job vra waarom is daar lyding? God se antwoord: “Ons leef in ʼn baie komplekse wonderlike wêreld wat nie ontwerp is om lyding te keer nie.”

Daar is nie maklike antwoorde op moeilike vrae nie. Dit is eers wanneer ons in die heiligdom van God ingaan en deur die bril van die evangelie kyk, dat ons leer om God te vertrou in dit wat ons nie verstaan nie. Deur lyding van Jesus Christus bring God versoening tussen die mens wat God in rebelsheid verwerp het en Homself.

Soms gebeur daar goed in jou lewe wat nie jou skuld is nie. Soms gebeur slegte dinge sonder dat jy enigiets gedoen het om dit te verdien. Wanneer dit gebeur wil ons net soos Job weet hoekom laat God dit toe? Hoekom moet dit nou juis met my gebeur? Wat het ek dan verkeerd gedoen?

Op al hierdie vrae antwoord God: “vertrou My. Vertrou dat Ek in beheer is, al lyk dit nie vir jou so nie. Vertrou my dat Ek jou nooit alleen sal laat nie. Vertrou dat Ek jou sal dra wanneer die lewe te swaar raak vir jou.”

As daar vyandskap tussen jou en God is, sal jy Hom nooit kan vertrou nie. Die evangelie is die enigste manier om met God versoen te word. Glo dat Jesus Christus jou Verlosser en Saligmaker is. Glo dat Jesus vir jou sondes aan ʼn vervloekte kruishout gesterf het en dat Hy met sy opstanding vir jou ʼn nuwe lewe gee.

Elkeen wat in Jesus Christus glo kan saam met Dawid sê:

Selfs al gaan ek deur donker dieptes,

sal ek nie bang wees nie, want U is by my.

In u hande is ek veilig.

Ons weet nie altyd hoekom daar slegte dinge oor ons pad kom nie. Wat ons wel weet is dat God daar is en dat Hy ons nooit in die steek sal laat nie. Vertrou in God. Vertrou dat Hy jou sal dra deur die donker dieptes van lyding wat oor jou pad kom.

Amen

Dien God en wees lief vir Hom omdat Hy God is

Job preek 1

9 Sep. 2018 GKE HKE

Skriflesing Job 1

Teksvers Job 1:9

Kyk na ʼn oorsig oor die boek Job by https://youtu.be/xQwnH8th_fs

Sing:

Toetredelied:                                      Lied 158 v 1 Bring my na u woning, Here.

Lofsang                                                 Ps. 46-1 v 1           

Verootmoediging                                Ps. 119-2 v 1 & 11

Geloofsbelydenis                                Sb. 12-3 v 1 & 2 / Lied 265 v 1 & 2 Enigste Here, enkele Wese.

Antwoord op prediking                     Ps. 42-1 v 1 / Lied 163 Soos ʼn wildsbok

Job is moontlik een van die Ou Testament se moeilikste boeke om te verstaan. Tog bied dit sinvolle antwoorde op lewensvrae wat moeilik is om te beantwoord.

Oor die volgende paar weke gaan ons op ʼn reis om saam met Job om antwoorde op lewensvrae te kry waarop daar nie altyd maklik antwoorde is nie.

Hierdie week staan ons stil by die vraag: Hoe help lyding jou om te verstaan hoekom jy God moet dien en vir Hom moet lief wees?

Mooiweersvriende. Almal weet wat ʼn mooiweersvriend is. Iemand wat net in voorspoed jou vriend is, op wie jy nie in teenspoed of by ongeleentheid kan reken nie.

Die satan beskuldig Job dat hy net ʼn mooiweersgelowige is. Wanneer God Job se vroomheid en opregtheid voorhou antwoord die satan Hom: Job 1:9 tot 11

⁹Toe antwoord die Satan die Here: “Dit is nie sonder rede dat Job U dien nie! ¹⁰U beskerm hom dan, en sy huis en al sy goed. U maak alles wat hy doen, voorspoedig. Selfs sy vee teel vinnig aan. ¹¹Maar raak nou net aan sy besittings en kyk of hy U nie in u gesig vervloek nie.”

Die satan se aanklag is, Job is maar slegs ʼn mooiweersgelowige. Hy dien God slegs omdat die Here hom seën. As die omgekeerde gebeur sal Job totaal anders reageer en sal hy sy rug op die Here draai.

Om hierdie gesprek reg te verstaan moet ons net eers bietjie stilstaan by agtergrond van die boek Job. Die boek Job is een van die wysheidsliteratuur boeke in die Bybel soos Spreuke ook is. Die doel van wysheidsliteratuur is om sekere groot lewensvraagstukke aan te spreek. Die vraagstuk wat in ons teks na vore kom is of jy sal aanhou om in ʼn verhouding met God te leef as die enigste voordeel wat jy uit die verhouding kry, God self is?

Dit gaan nie hier daaroor of God hier saam met die duiwel besig is met ʼn dobbelspel om die lotgeval van mense te bepaal nie. Die woord satan beteken letterlik “aanklaer.” In Hebreeus is die lidwoord die deel van die woord satan en in daardie konteks gee dit die betekenis van ʼn titel eerder as ʼn eienaam. Hiermee saam is die satan dan ook ʼn moeilikheidmaker. Hierdie gesprek tussen God en die satan bring die vraagstuk na vore. “Wat is jou motivering waarom jy God dien?”

Die aanklaer impliseer dat Job nie getrou en gehoorsaam is ter wille van God self nie, maar slegs omdat hy allerlei byvoordele uit die verhouding kry. Neem daardie byvoordele weg en Job sal God vervloek. Met ander woorde Job sal God verwerp omdat hy sal reken dat God vir hom waardeloos is. Neem net al die gunste en gawes weg en Job sal sy verhouding met God verbreek omdat hy dan sal reken dat God nie meer sy liefde en vertroue werd is nie.

Die valse evangelie van die voorspoedteologie moedig jou aan om ʼn mooiweersgelowige te wees. Jy moet net glo en dan sal God jou “seën” met rykdom, goeie gesondheid en dit sal baie voorspoedig met jou gaan. In ons teks word die valsheid van hierdie evangelie ontbloot.

Hierdie vraagstuk wat in Job na vore kom is nie maar net ʼn teoretiese akademiese vraagstuk nie. Dit is iets wat elkeen van ons ten diepste raak. Gaan jy God nog steeds dien as Hy alles van jou af wegvat. Jou besittings, jou gesondheid, jou kinders? As jy kaal gestroop word, gaan jy jou rug op God draai of nie?

Alles wat ons het is God se genade. Niks wat jy het, het jy gekry omdat jy dit verdien het deurdat jy ʼn goeie en vroom mens is nie. Jou gesondheid, jou verstand, jou talente en vermoëns, al jou besittings het jy enkel alleen op grond van God se genade. In Job leer ons die ongemaklike waarheid dat dit nie altyd goed gaan in jou lewe nie. Soms neem God tydelik sy materiële seëninge van jou weg en plaas Hy jou in ʼn posisie waar dit op die oog af lyk of Hy eerder jou vyand is.

Job het nooit insig gehad oor wat daar in die troonkamer van God gebeur het nie. Net so weet ons ook nie wat die rede is hoekom God sekere dinge in sy ewige raadsplan toelaat in ons lewens nie. Dit mag dalk voorkom asof God van jou vergeet het. Dat Hy nie omgee wat met jou gebeur nie.

Om sin te maak hiervan moet ons onthou wat die werklike perspektief van lyding is. In Job 1:1 hoor ons dat Job vroom en opreg was en dat hy God gedien het en die kwaad vermy het. Voorwaar ʼn navolgingswaardige voorbeeld. Tog was Job nie perfek nie soos wat ons verder aan in die boek hoor.

Daar was net een mens wat werklik onskuldig was en wat die allerverskriklikste lyding denkbaar deurgaan het. In die persoon van Jesus Christus het God self meer gely as wat Job of enige mens ooit gely het. Jesus het God verlatenheid ervaar sodat ons nooit weer deur God verlaat sou word nie. Hy het alles verloor, sy klere en al sy aardse besittings, selfs sy lewe en ook God se teenwoordigheid.

Jesus was nie die enigste wat gely het nie. In die perfekte verhouding wat daar tussen Vader Seun en Heilige Gees was, was daar nie meer harmonie nie. Die Vader en die Heilige Gees het saam met Christus gely. God het die ergste lyding wat daar denkbaar is verduur sodat Hy daardeur die gebroke verhouding tussen God en mens kon herstel.

Deur sy lyding het God Homself aan die mens terug gegee. Die doel van die evangelie is om die verhouding tussen God en mens te herstel, nie om allerhande beloftes van voorspoed en rykdom te verkry nie. Job het alles verloor, behalwe sy lewe omdat God die satan verbied het om Job se lewe te neem. Ten spyte daarvan dat Job alles verloor het, het hy een ding nie verloor nie, nl. God self. Job het niks anders as sy lewe en God gehad nie, maar nog steeds het God nie verwerp nie soos ons hoor in Job 1 v 20 tot 22:

²⁰Toe het Job opgestaan en sy klere geskeur. Hy het ook sy hare afgeskeer. Daarna het hy op die grond gaan lê en gesê:

²¹“Sonder iets het ek in die wêreld gekom en sonder iets gaan ek daaruit.

Die Here het gegee en die Here het geneem.

Prys die Naam van die Here.”

²²Onder alles het Job nie gesondig of God iets verwyt nie.

Die troos wat ons het is dat al verloor ons alles in die lewe, selfs die lewe self, dan het ons nog steeds vir God. Elkeen wat in Jesus Christus glo kan absoluut vashou aan die troos van Rom. 8:38 & 39

³⁸Hiervan is ek oortuig: geen dood of lewe of engele of magte of teenswoordige of toekomstige dinge of kragte ³⁹of hoogte of diepte of enigiets anders in die skepping kan ons van die liefde van God skei nie, die liefde wat daar is in Christus Jesus ons Here.

Die teendeel is egter ook waar. As jy nie in Jesus Christus glo nie, gaan jy alles verloor, want as jy nie vir God het nie, dan het jy niks.

Geliefdes, Christus het aan die kruis gesterf sodat God deel van jou lewe kan wees. Moenie God verruil vir wêreldse dinge nie. Moenie val vir die leuens van die voorspoed teologie nie. Die feit dat ʼn boek in ʼn Christelike boekwinkel verkoop word, beteken nie dat dit noodwendig die waarheid bevat nie. As daar ʼn prediker of boodskap in ʼn boek is wat jou beloof dat dit net goed met jou sal gaan en dat jy ryk en voorspoedig sal wees omdat jy glo of dit van God opeis, weet dit is ʼn leuen.

Moenie ʼn mooiweersgelowige wees nie. Dien God en wees lief vir Hom omdat Hy God is.

Amen.

Struikelblokke op ons pad van geloofsgroei – Ondankbaarheid

Luk. 17 v 11 tot 19 teksverse Luk 17 v 17 & 19

21 Jan 2018 GKE

Wanneer dink jy aan jou noodwiel? Net wanneer jy dit nodig het. In jou dag tot dag lewe is jou noodwiel nie juis iets wat voor in jou gedagtes is nie. Jy is wel bewus dat daar een in jou motor is, maar verder dink jy nie aktief daaraan nie. Wanneer jy egter in ’n krisis is met ’n pap band wat keer dat jy verder kan ry onthou jy baie gou van jou noodwiel.

Hoe dikwels gebruik ons God nie ook maar net soos ’n noodwiel nie? Solank dit goed gaan in my lewe is ek so besig dat ek nie regtig by God uitkom nie. My lewe is so besig dat ek selfs nie eers tyd het om op ’n Sondag saam met my broers en susters na Hom kan kom luister nie.

Wanneer daar egter ’n krisis oor my pad kom, dan onthou ek baie gou van God en is ek vinnig om in gebed tot Hom te nader. Die hoofsaak van hierdie gebed is dan ook :”Here vat tog asseblief hierdie moeilikheid uit my pad uit.” Wat is my reaksie wanneer Jesus die klip uit my pad rol? Is dit dankbaarheid of is dit dat ek maar net weer my noodwiel bere tot ’n volgende krisis oor my pad kom?

In hierdie verhaal leer ons hoe dankbaarheid ons nader aan God bring. Ons leer dat dankbaarheid ons help om in geloof te groei.

Ons hoor hier die verhaal van tien mans wat melaats was. Melaatsheid was ’n verskriklike siekte wat jou vel en jou senuwee stelsel aangetas het. In die gevorderde fase van die siekte het jy van jou ledemate begin verloor en begin blind word.

Wat hierdie siekte ook baie erg gemaak het was nie net die fisiese gevolge daarvan nie, maar ook dat dit jou sosiaal geïsoleer het. Volgens Moses se wet (Num 5 v 2 – 3 ; Lev 13: 45 – 46) moes jy jouself afsonder en mag jy nie naby iemand gekom het wat gesond was nie. As iemand nader gekom het moes jy daardie persoon waarsku deur hard te skree “onrein, onrein.”

Dit was hoekom hierdie mans op ’n afstand gebly het en geroep het. Hulle was inderdaad midde in ’n groot krisis en daarom het hulle gevra dat Jesus Hom oor hulle moes ontferm.

Jesus weet wat hulle behoefte is en daarom stuur Hy hulle sonder omhaal van woorde na die priester wat volgens Moses se opdragte in Levitikus 13 en 14 die enigste instansie was wat sulke mense weer rein kon verklaar en dan hoor ons dat ’n wonder plaasgevind het deurdat hulle op pad na die priester genees is.

In hierdie verhaal is daar nie baie detail oor die wonder self nie, want die hoofsaak is nie die wondergenesing opsigself nie. Die hoofsaak is die mans se reaksie op die weldaad wat Jesus vir hulle gedoen het. Ons hoor dat daar net een van die tien mans terug gedraai het en God geloof het en vir Jesus kom dankie sê het. Bowendien was hy nie eers ’n Jood nie, maar ’n Samaritaan! Die Jode was die uitverkore volk, maar hier sien ons dat God se genade vir alle mense bedoel is.

Die feit dat hy omgedraai het om Jesus te dank wys vir ons dat Jesus se wonders tekens is dat Hy God is en dat die man dit erken het deur om te draai. Hy loof God en sê vir Jesus dankie en dit bind hom persoonlik aan Jesus. Dit is juis sy dankbaarheid wat hom nader aan Jesus bring. Hy bind homself nie net aan Jesus omdat hy gesond geword het nie, maar ook omdat hy in Jesus iemand sien wat meer as net ’n blote wonderdoener is. Hy sien Jesus nie net as ’n spaarwiel nie.

In Jesus se reaksie sien ons dat daar ’n verskil is tussen die nege ondankbares en die dankbare man se eindbestemming. Die nege wat nie omgedraai het nie is wel ook genees, maar hulle kom nie by die dieper band met Jesus uit nie. Vir hulle was Jesus maar net ’n noodwiel.

Ons hoor so ’n stukkie hartseer in Jesus se vraag: “Was daar nie tien wat gesond gemaak is nie? Waar is die ander nege dan?” Dit is hartseer wanneer mens die nabyheid van God ontbeer. Hulle ondankbaarheid was nie die oorsaak dat hulle nie ’n band met Jesus opgebou het nie. Dit was maar slegs ’n simptoom van ’n dieper liggende probleem.

Jesus se antwoord aan die een wat omgedraai het wys vir ons dat ongeloof die oorsaak van hulle ondankbaarheid was. Jesus sê nie vir hom jou geloof het jou gesond gemaak nie. Ons geloof is nie die oorsaak van God se genade nie. God gee sy genade onverdiend uit sonder dat jy iets moet doen om dit te ontvang.

Jesus se antwoord was: “Staan op en gaan huis toe. Jou geloof het jou gered.” Jesus sien die dieper nood raak wat by hierdie man teenwoordig was. Hy het nie net nodig gehad om gesond gemaak te word nie, maar ook dat hy gered moes word. Sy dankbaarheid was maar net die gevolg. Sy geloof het gemaak dat hy dankbaar was.

Geliefdes, jou dankbaarheid is een van die maatstawwe wat jy kan gebruik om te meet of jy in geloof gegroei het. Het jy sedert Januarie 2017 in jou verhouding nader aan God beweeg? Hoe lyk jou dankbaarheid teenoor God? Gee jy aan God die eer vir alles wat jy in die lewe het? Gee jy aan God die eer dat Hy jou deur daardie krisis wat oor jou pad gekom het gedra het? Of het jy God maar net as ’n noodwiel gebruik en Hom weer weggebêre totdat die volgende krisis oor jou pad kom?

Hoe lyk jou gebede? Is dit wat jy vra baie meer en meer prominent as dit waarvoor jy dankie sê? In die Onse Vader is daar maar net een sinnetjie wat vra dat God in ons daaglikse behoeftes moet voorsien. Waarvoor het jy die afgelope week vir God dankie gesê?

Wat maak jy wanneer jy agterkom dat jy God maar eintlik net vir ’n noodwiel gebruik het?

Die antwoord is nie dat jy jou dankbaarheids-sokkies moet optrek nie!

Beweeg in geloof nader aan God. Beleef die wonder van die evangelie in jou lewe en jy sal vind dat jy groei in jou dankbaarheid teenoor God. Geloof maak jou bewus van God se teenwoordigheid in jou lewe en dan sal jy Hom dank vir dit wat Hy in jou lewe doen. Werk aan jou verhouding met God. Luister na sy stem in sy Woord. Spandeer tyd saam met Hom in gebed waar jy jou verwonder oor God se genade in jou lewe. Groei in geloof.

Amen

Struikelblokke op ons pad van geloofsgroei – Verkeerde verwagtings en wanvoorstelling van God se beloftes.

Jer. 29 teksvers Jer. 29 v 11
14 Jan 2018 GKE

Sing

Ps. 31-7 v 1 & 3
Ps. 103-1 v 1 & 2
Ps. 33-1 v 5 & 11
Ps. 33-1 v 1 & 2

Ek weet wat Ek vir julle beplan, sê die Here: voorspoed en nie teenspoed nie; Ek wil vir julle ’n toekoms gee, ’n verwagting!

Dit is een van die bekende Bybelverse wat mense lief is om aan te haal. Wat beteken dit vir u? Hierdie is een van daai Bybelverse waaraan mense maklik ’n verkeerde betekenis aan kan koppel deur dit buite konteks te gebruik. Buite konteks beteken om ’n vers in isolasie te sien sonder om in ag te neem wat voor of na dit geskryf is en ook om die breër konteks van die Bybel in geheel te ignoreer.

Byvoorbeeld, daar is ’n koerant plakkaat op ’n lamppaal met die woorde: “Die Haaie het die Bulle gevreet!” Wat beteken dit? As ons net na die woorde in isolasie kyk kan ons dalk aflei dat daar ’n klomp beeste in die see gaan swem het en ongelukkig het daar ’n skool haaie verbygekom. Kom ons voeg bietjie konteks by. In Suid-Afrika is daar rugbyspanne wat dierename het (Die breër konteks). Verdere konteks, die opskrif verwys na ’n berig in die sportblaaie in die koerant en daar was wedstryde waarin die verskillende rugbyspanne met dierename teen mekaar meegeding het.

As enige boodskap buite konteks gesien word, dan mis jy die ware betekenis daarvan. Net so met die Bybel. As jy Bybelversies buite konteks gebruik, vervlak jy die Bybel en mis jy die diepere betekenis daarvan. Verder mis jy ook die geleentheid om God werklik te leer ken soos Hy Homself in sy Woord aan ons openbaar. Die doel van geloofsgroei is om God al hoe beter te leer ken en daarom is dit belangrik om erns met die Bybel te maak en nie Bybelversies buite konteks te lees nie.

Wat beteken Jer 29 v 11 nie? As jy die vers buite konteks lees kan jy maklik by die verkeerde betekenis uitkom dat as ek net selfvertroue het en my hart volg sal God my uitermate seën, want Hy wil keer dat daar enige moeilikheid oor my pad kom. Hy wil hê dat ek baie ryk moet wees en dat ek daai blink nuwe sportmotor moet besit. Dit staan mos hier in die Bybel!

Nou weet elkeen van ons uit dure ondervinding dat die lewe nie net maklik is nie. Daar kom swaarkry dae. Daar kom hartseer dae. Daar is tye wanneer die lewe bitter moeilik is. Die meeste van ons word nie skatryk nie.

Kan u insien hoe ’n verkeerde lees van die Bybel u verder van God af neem eerder as nader aan God. As u die verkeerde betekenis van bv. Jer 29 v 11 glo en die werklikheid van die lewe dop jou onderstebo, dan is die logiese gevolgtrekking. God gee nie om nie. Dan begin jy God eerder wantrou as wat jy Hom vertrou. En so beweeg jy al hoe verder van God af weg.

Wat beteken Jer. 29 v 11 werklik? Wat is die konteks waarbinne hierdie vers na ons toe kom? Die boek Jeremia gaan oor hoe God mense se planne ontwrig en hulle drome omdop. Die agtergrond is dat die Jode in Ballingskap na Babel weggevoer is. Die vers kom binne die konteks van ’n skokkende boodskap van die profeet.

Die mense wat in Jerusalem na die Ballingskap agtergebly het, het gedink dat hulle huidige voorspoed ’n teken is dat God aan hulle kant is, terwyl Hy teen diegene is wat weggevoer is. Diegene wat in Ballingskap is mag dink dat God hulle eenkant toe gestoot het en dat Hy nie omgee nie.

Die boodskap wat die profeet hier stuur is nie goeie nuus vir enige van die twee groepe nie. God se oordeel word aangekondig oor diegene wat in Jerusalem agtergebly het, terwyl God sy doelwitte sal bereik deur die lewens van die mense wat in Ballingskap is. Hulle hoor egter die harde werklikheid dat hulle nie binnekort uit Ballingskap sal terugkeer nie. Die huidige generasie gaan hulle hele lewe in Ballingskap deurbring.

Hoe is Jer. 29 v 11 dan van toepassing op ons lewens? Ons moet in ag neem dat die vers binne die konteks van die boek Jeremia en die pad wat God met Israel gestap het, is. Verder ook dat dit gelees moet word binne die konteks van God se doel in Jesus Christus. All die beloftes van God vind hulle “ja” in Jesus Christus soos ons hoor in 2 Kor. 1 v 19 & 20.  As jy in Jesus Christus glo, dan het al die oordele wat die profete aangekondig het op die kruis neergekom waar jy weer met Christus versoen is. As jy met Christus verenig is, dan is al die beloftes wat God aan Abraham en sy nageslag gemaak het ook op jou van toepassing soos ons in Gal. 3 v 14 tot 29 hoor.

Deur Jeremia sê God vir die bannelinge dat hulle verstrooiing nie toevallig was nie. Dit is alles deel van God se groter raadsplan, selfs dit wat op die oogaf problematies en chaoties lyk. Hulle hoor ook dat binne die raadsplan van God dat hul ballingskap nie permanent is nie, maar dat Hy bepaal wat die tydsraamwerk daarvan is. Dit alles is gegrond op God se belofte aan Abraham wat vooruitgekyk het na die belofte van `n Seun uit sy nageslag, ons Here Jesus Christus soos ons hoor in Rom. 4. Ons kyk terug en sien hoe God getrou was in sy belofte met die koms van Jesus Christus.

God sê vir ons dat elkeen wat in Christus is, vreemdelinge en bywoners is in hierdie wêreld soos ons hoor in Heb. 11v3 en 1 Pet. 2v11. Ons kry swaar, ons bloei en gaan selfs dood en deur dit alles kan ons beproef word om te dink dat God ons eenkant toe gegooi het. Dit is nie waar nie want die Evangelie verseker jou dat God ’n plan het vir jou lewe. Dit is ’n plan van voorspoed en nie van teenspoed nie. Deur dit alles word jy gevorm na die beeld van Christus deur te deel in sy lyding. God se plan vir jou lewe is om al hoe nader aan Hom te leef. Sy plan is dat jy Hom werklik moet leer ken. Jy moet sy liefde leer ken en jy moet sy liefde uitleef. Die uiteindelike doel vir jou is om ’n oorwinnaar te wees en nie ’n slagoffer nie. God se plan vir jou is om ’n mede erfgenaam saam met die Koning te wees soos ons hoor in Rom. 8 v 12 – 39.

Hoe kan jy verseker wees van dit? Net soos die bannelinge van ouds kan jy weet, nie deur na jou huidige omstandighede te kyk nie, maar om vas te hou aan God se Woord en sy verbondsbeloftes. Dit mag wees dat jou lewe anders verloop as wat jy beplan en dat jou drome nie waar word nie. Dit mag wees dat jy ly en dat jy selfs jou lewe verloor, maar die belofte staan dat God wat Jesus uit die dood laat verrys het, jou ook saam met Hom uit die dood lewendig sal maak.

Geld Jer. 29 v 11 vir jou? As jy in Jesus Christus glo kan jy verseker weet dat die belofte ook vir jou is. Moenie die belofte van Jer. 29 v 11 vervlak tot ’n oppervlakkige hier en nou van aardse rykdom  nie. Dit mag beteken dat jy op die kort termyn moet swaarkry net soos die bannelinge vir eers in Babel moes agterbly, maar vir die lang termyn is jou toekoms verseker saam met Christus. Dit is 'n toekoms vir jou welsyn, en nie vir die kwaad nie; 'n toekoms van hoop, nie van wanhoop nie. ’n Toekoms waar jy saam met God die lewe aandurf. ’n Toekoms waar God jou vrede bepaal en nie jou omstandighede nie. Hou vas aan die ware betekenis van God se belofte in Jer. 29 v 11.

Amen

Struikelblokke op ons pad van geloofsgroei – Hoekom is daar lyding en boosheid in die wêreld?

1 Pet. 1 v 3 tot 9 teksverse 1 Pet. 1 v 6 & 7^{a
7 Jan 2018 GKE}

Iets wat nie groei nie, is besig om dood te gaan. So is dit ook met jou verhouding met God. As daar nie geloofsgroei is nie, is jou verhouding met God besig om agteruit te gaan. Wanneer ons praat van geloofsgroei dan beteken dit eenvoudig om God beter te leer ken om sodoende nader aan God te beweeg.

Een van die struikelblokke op die pad van geloofsgroei is die moeilike vraag “hoekom is daar soveel lyding en boosheid in die wêreld teenwoordig?” Hoe kan ’n liefdevolle God toelaat dat daar soveel lyding in die wêreld is? Waarom laat Hy toe dat ouers ’n onskuldige driejarige kind so verwaarloos en mishandel dat sy doodgaan? Waarom laat God toe dat ’n natuurramp duisende mense se dood veroorsaak? Hoekom keer God nie daardie selfmoord bomaanvaller wat onskuldige mense met sy aanval teiken? Hoekom laat God toe dat ek deur ’n ongeneeslike siekte afgetakel word? Hoekom laat God toe dat my geliefde stelselmatig deur so ’n verskriklike Altsheimers siekte stelselmatig vernietig word?

Vir sommige mense is dit so ’n groot struikelblok dat hulle heeltemal wegdraai van God af. As God liefdevol is, sal Hy nie wil hê dat onskuldige mense ly nie. As Hy almagtig is sal Hy sy almag gebruik om lyding te keer. As daar ’n liefdevolle en almagtige God is soos die Bybel ons leer, dan behoort daar nie lyding in die wêreld te wees nie. Daar is egter lyding in hierdie wêreld en daarom kan die God wat die Bybel aan ons voorhou nie bestaan nie. So redeneer hierdie mense.

Dit is ook ’n baie moeilike vraag vir gelowiges om te beantwoord. Hoe beantwoord jy as gelowige die aanklag dat God nie omgee nie of dat Hy nie in staat is om lyding te keer nie? Die maklike manier is om ’n kop in die sand benadering te volg deur bg. vraagstuk te systap. Die probleem met hierdie benadering is dat dit die ou duiwel ’n geleentheid gee om jou geloof aan te val, veral wanneer jy op jou kwesbaarste is wanneer jy die aanslag van lyding en boosheid persoonlik aan die lyf voel. Wanneer die lewe om jou donker word en jy binne in die storm staan, tik die ou duiwel jou op die skouer en sê: “Sien jy. Kyk na die gemors waarin jy nou is. Voel jy die pyn? Ek het jou mos al gesê, jy kan God nie vertrou nie. Hy gee nie vir jou om nie. Hy kan jou nie help nie. Dit is beter om van Hom af weg te draai.”

Waar vind ons antwoorde op hierdie moeilike lewensvrae? Daar is net een plek waar jy antwoorde kan vind. By God self in sy Woord. Wat sê God vir ons oor hierdie onmoontlike vraagstuk. Hoe kan God liefdevol en almagtig wees en nie lyding dadelik tot niet maak nie? In ons teks gee God vir ons ’n antwoord op hierdie moeilike vraag. In 1 Pet 1 v 6 hoor ons:

selfs al is dit nodig dat julle ’n kort tydjie bedroef gemaak word deur allerhande beproewings

God kan keer dat lyding plaasvind, maar Hy laat dit net vir ’n kort tydjie toe. Binne sy almag en raadsbesluit laat Hy dus lyding toe vir ’n kort tydjie. In die perspektief van God se ewigheid is lyding inderdaad net ’n kort tydjie.

Die vraag wat nog onbeantwoord is, is egter: “Gee God dan nie om nie?” Om hierdie vraag te antwoord moet ons kyk na wat God gedoen het. Hy het Homself aan die voorfront van lyding geplaas. In Jesus Christus het God die diepste diepte van pyn en lyding ervaar. Een ding is seker. God gee om. Hy gee soveel om dat Hy sy enigste Seun na die wêreld toe gestuur het sodat ons deur Hom die lewe kan hê. Ons hoor in 1 Pet. 1 v 3 & 4 dat God se ontferming so groot is dat Hy ons ’n nuwe lewe geskenk het deur die opstanding van Jesus Christus uit die dood. En dit gee vir ons ’n ’n lewende hoop op onverganklike, onbesmette en onverwelklike erfenis wat in die hemel ook vir ons in bewaring gehou word.

As ons net so bietjie terugstaan om perspektief te kry. Wat is die ergste wat met jou hier op aarde kan gebeur? Dit is dat jy jou lewe kan verloor en selfs dit kan jou nie van God se liefde skei nie. Die dood is nie meer ’n hopelose einde nie. Dit is slegs ’n deurgang na ’n ewige heerlikheid saam met God. In 1 Pet 1 v 4 is die belofte dat die gelowige se erfenis onverganklik, onbesmet en onverwelklik is. Daar is dus niks wat dit ongedaan kan maak nie. Dit is ’n vaste sekerheid wat op God se karakter gewaarborg word.

In 1 Pet 1 v 5 hoor ons dat geloof die sleutel is om hierdie erfenis wat God belowe te kry. Die wonderlike troos:

En omdat julle glo, word ook julle deur die krag van God veilig bewaar vir die saligheid wat reeds gereed is om aan die einde van die tyd geopenbaar te word.

In 1 Pet. 1 v 7 hoor ons dat jou geloof deur middel van lyding getoets word. Omdat geloof die sleutel is ten opsigte van jou versoening en verhouding met God is dit selfs kosbaarder as goud en net soos die suiwerheid van goud met vuur getoets word, word die egtheid van jou geloof deur die vuur van lyding getoets.

Dit is hier waar die tekkie die teer slaat. Wanneer jy binne in die chaos van pyn en lyding staan moet jy bly glo dat God net jou beste belang op die hart dra. Jy moet glo en vertrou dat God in beheer is, veral wanneer dit vir jou lyk of alles buite beheer is. Jy moet God vertrou en jou ore sluit vir die aanklag van die duiwel wat jou probeer oortuig dat jy God nie kan vertrou nie. Hoe meer jy op God vertrou, hoe hegter word jou verhouding met Hom, veral wanneer jy nie die uitkoms kan sien nie.

Daar is kere waar ons kan sien hoe God se belofte dat alles ten goede meewerk waar is. Daar is egter ook baie kere waar dit nie duidelik is nie en dit is hier waar jou geloof en vertroue in God jou deurdra. Om te bly vertrou dat binne die groter prentjie van God se raadsplan dat selfs dit wat vir my sinneloos lyk steeds sin maak.

Dit is soos ’n legkaart te bou van derduisende stukkies. As ek net na die een of twee legkaart stukkies kyk wat hier voor my is, sien ek nie die geheel van die prent wat die legkaart vorm raak nie. God se legkaart is groter as die grootste legkaart waaraan ons kan dink. God se legkaart is groter as die heelal wat so groot is dat ons nie werklik die grote daarvan kan begryp nie.

Wanneer jy in geloof God vertrou, veral wanneer jy geen uitkoms kan sien nie gee God die belofte dat jy met onuitspreeklike en heerlike blydskap vervul sal word. Dit bou jou verhouding met God en jy sal ervaar hoe God ’n werklikheid binne jou lewe is.

Geliefdes, moenie dat jou geloofspad saam met God belemmer word deur die vraagstuk van lyding nie. Moenie val vir die duiwel se leuen dat jy God nie kan vertrou nie. Hou jou oë op die kruis en opstanding van Jesus Christus. Bly glo dat God in beheer is en jy sal ervaar hoe jy op jou geloofspad nader aan God beweeg.

Amen