Die Koninkryk van God is 'n ewige koninkryk waar God regeer

Datum: 19 Jan. 2020 GKE

Skriflesing Open. 21 v 1 22 v 5

Teksverse   Open. 21 v3; 21 v 22 & 22 v 3

 Die jaar is vinnig besig om spoed op te tel. Alle aanduidings is dat dit 'n jaar vol uitdagings gaan wees. Dit is juis vir sulke situasies wat vol onsekerheid en kommer is dat die Here vir ons die boek Openbaring gegee het om ons te troos.

Johannes het oorspronklik hierdie brief van Openbaring aan die sewe gemeentes in Klein-Asië geskryf om hulle te bemoedig. Hulle is deur die samelewing eenkant toe gestoot omdat hulle nie met die hoofstroom wou saamgaan om al die verskillende afgode en die keiser van die Romeine te aanbid nie en ook omdat hulle, hul nie met die meerderheid se waardes wou vereenselwig nie. Ironies genoeg is hulle as ateïste beskou juis omdat hulle nie in die Romeinse afgode wou glo nie.

Die boodskap in Openbaring het hulle gelei om die lewe en die onderdrukking waaraan hulle blootgestel is uit 'n ander perspektief te benader. Dit gee die versekering dat gelowiges wat getrou is aan God se tuiste by God is wat eenmaal wanneer Christus weer kom reg sal laat geskied aan gelowiges. Dit beteken egter nie dat hulle uit die huidige lewe en die wêreld moes ontvlug in die toekoms in nie. Die perspektief is dat hulle die hede vanuit die perspektief van Christus terugkeer moet beleef.

Dit is ook die boodskap wat die Here ook vir ons bring wat hier aan die begin van die jaar 2020 staan. Beywer julle vir die Koninkryk van God want dit het naby gekom. Julle is nou deel van 'n ewige koninkryk waar God regeer.

Met ander woorde Hy is in beheer selfs al lyk dit of die wêreld in chaos gedompel is. God is besig met sy ewige raadsplan en ons is deel daarvan. Hy is met ons op pad die toekoms in en daarom kan ons ook die lewe met durf en moed aanpak. Al lyk dit asof die bose besig is om die oorhand te kry, verseker God ons dat sy oordeel op pad is.

In Openbaring vind ons baie beelde en visioene. As mens nie die groter prentjie van Openbaring se boodskap volg nie kan jy maklik verstrik raak in die detail. In Openbaring hoor ons dat God in die geskiedenis met mense gemoeid is om sy Koninklike heerskappy te vestig. Hy doen dit deur verlossing of oordeel te bring.

In die aanloop tot hoofstuk 21 hoor ons van God se oordeel wat deur verskillende beelde uitgebeeld word soos die sewe seëls wat waarmee die boek van die lewe verseël is wat oopgemaak word, die trompette wat oordeel aankondig en daarna word dit beskryf as sewe bakke vol van God se toorn wat uitgegiet word. Hierdie eindgebeure word omarm deur die vertellings in Open. 17 v 1 – 19:5 oor die sedelose Babilon wat in skrille kontras met die bruid van die Lam en die nuwe Jerusalem (Open. 21 v 9 tot 22 v 5) staan.

Dit dwing jou om 'n keuse te maak. Daar is nie 'n goue middeweg tussen Babilon en die Nuwe Jerusalem nie. Geliefdes soos u reeds gehoor het, moet jy die evangelie glo om te deel in die Nuwe Jerusalem anders sal jy deel in die oordeel wat vir Babilon bestem is.

Om te deel in die Nuwe Jerusalem moet jy glo dat jy vanweë jou sondes verlore is. Jy moet glo dat Jesus Christus vir jou sondes aan ’n vervloekte kruishout gesterf het. Jy moet glo dat Hy die dood oorwin het met sy opstanding en dat Hy vir jou daarmee verlos uit die doodsbestaan van sonde en vir jou 'n lewe saam met God in ruil gee. Jy moet die opregte begeerte hê om met jou hele lewe dank aan Hom te bewys, opreg voor Hom te wandel en in ware liefde en eensgesindheid met jou naaste te lewe.

Vir elkeen wat die evangelie glo is Open. 21 v 1 tot 22 v 5 'n geweldige troos. As mens luister na die oordeel van God en wat dit vir die goddeloses inhou is die Nuwe Jerusalem 'n baken van hoop wat vir jou moed gee.

In Open. 21 v 1 tot 8 vind ons 'n kort samevatting van die Nuwe Jerusalem en wat dit beteken. Open. 21 v 9 – 22 v 5 gee dan 'n uitgebreide verduideliking daarvan.

Ons teks begin met die goeie nuus dat alles nuut gemaak gaan word. Dit wat oud en gebroke was gaan nie meer bestaan nie. Die verwysing na die see wat nie meer daar gaan wees nie is 'n verwysing na die dood. Die see is 'n simbool van die dood en dit sal nie meer bestaan in die nuwe hemel en die nuwe aarde nie. Deur die sonde het die dood in die wêreld gekom en nou is die dood finaal oorwin. Dit sal nie meer bestaan nie.

Dan word die nuwe Jerusalem in Open 21 v 2 vergelyk met 'n bruid wat vir haar bruidegom versier is. In Open. 21 v 9 word hierdie beeld uitgebrei. Die gelowige word met 'n bruid vergelyk. Dit wys op die aard van die verhouding tussen God en gelowiges. 'n Absolute intieme verhouding waar niemand tussenbeide kan kom nie.

Die heilige stad word in detail deur verskillende beelde beskryf. Dit beskryf vir ons hoedat die Nuwe Jerusalem gevul word met die heerlikheid en grootsheid van God. Die edelstene en edelmetale beklemtoon God se heerlikheid wat dit uitstraal. 

Die afmetings het die simboliese betekenis om klem te lê op God se volmaakte teenwoordigheid. Daar is ook nie 'n tempel meer nie omdat die hele stad 'n tempel is op grond van God se volmaakte teenwoordigheid.

Die rivier en die boom wat elke maand vrugte dra wys simbolies dat God oorvloedig sorg om lewe te gee en in stand te hou. Daar is nie meer dood en verval nie. Daar is geen duisternis nie want God se lig verlig alles. Lig verteenwoordig lewe en dit kom van God af. Dit is net God wat lewe kan gee. Duisternis verteenwoordig die dood en wat nie meer daar is nie en daarom is daar geen duisternis meer nie.

Die poorte word nie gesluit nie, maar tog sal slegs diegene wat die reg daartoe het toegang tot die stad kry. Net die wat in die evangelie van Jesus Christus glo kry toegang tot die stad. Hulle wat nie glo nie sal nie toegang kry nie. Hulle mag nie deel in die voorreg om in God se teenwoordigheid te wees nie. Slegs diegene wie se name in die Boekrol van die Lam opgeskryf is het vrye toegang, maar hulle wat volhardend nee gesê het vir God is op pad na die poel van vuur, met ander woorde weg van God af.

Die fokus van hierdie gedeelte is om sigbaar te demonstreer dat God in sy allerheiligste teenwoordig is. In die Nuwe Jerusalem is God volmaak teenwoordig en sy heerlikheid vul alles en almal.

In die Nuwe Jerusalem is die hoogtepunt van aanbidding, naamlik om God van aangesig tot aangesig te sien. Deur Christus kry jy toegang tot God en nou kan jy Hom in die oë kyk om Hom met hemelse oorgawe te dien.

Die wonderlike troos en hoop wat die Here vir ons in Openbaring gee is dat ons nou reeds kan begin deel daarin. Nog nie in die volmaaktheid wat kom nie, maar dit is nou reeds moontlik om God te ken en om sy teenwoordigheid in jou lewe te beleef. Die Heilige Gees is elke dag by jou. Diegene wat met geloofsoë kyk sal reeds die heerlike teenwoordigheid van God in jou lewe raaksien.

Maak dit u ook opgewonde? God is nou reeds teenwoordig in jou lewe en Hy sal ewig teenwoordig wees want die Koninkryk van God is 'n ewige koninkryk. Kom na Jesus toe. Glo die evangelie en beleef vir ewig die vreugde van die Nuwe Jerusalem

Amen

Die Koninkryk van God het naby gekom

Datum: 12 Jan. 2020 GKE

Lees: Mat. 4 v 12 – 17; Mar. 1 v 14-15

Teksverse: Mat. 4 v 17 & Mar. 1 v 15

Ons het verlede week die jaar begin met die opdrag: “Soek eers die koninkryk van God en vra na sy wil.” Die koninkryk van God is een van die groot temas wat soos 'n goue draad dwarsdeur die Bybel loop. Hierdie week gaan ons verder met die tema en ons gaan so bietjie stilstaan by die vraag: “Wat beteken dit wanneer ons na die koninkryk van God verwys?” Die tema van hierdie week se preek is: “Die Koninkryk van God het naby gekom.”

Johannes se gevangeneming is die einde van sy bediening en dit lui die begin van Jesus se openbare optrede in. Met sy prediking het Johannes die voorbereidingswerk gedoen vir Jesus se optrede.

Beide Johannes en Jesus begin hulle prediking met die boodskap: “Bekeer julle, want die koninkryk van die hemel het naby gekom.”

Wat is die koninkryk van die hemel of die koninkryk van God soos dit in die ander evangelies genoem word? Eenvoudig gestel, die Koninkryk van God is sy hele skepping waar Hy as soewereine Koning regeer. Dit sluit die fisiese sowel as die geestelike dimensie in, dit wil sê die totaliteit van alles wat bestaan. Dit begin reeds met die skepping en dit strek dwarsdeur die geskiedenis tot in die ewige toekoms in.

Kort na die skepping het daar egter 'n probleem ontstaan. Die mens het in opstand gekom teen God se gesag. Die mens het hom laat verlei deur die slang om nie God se gesag te vertrou nie. Die mens wou self die gesag hê om vir homself te besluit. Die mens wou nie gehad het dat God namens hom besluit nie. Dit is maar nog steeds die teken van ons tyd. Die mens wil outonoom wees. Niemand mag vir hom voorsê nie.

Dit het verskriklike gevolge vir die mens ingehou. Waar hy eens 'n volwaardige burger van God se koninkryk was, het hy nou 'n buitestaander geword wat nie meer toegang het tot al die voordele wat hy as burger van die koninkryk van God gehad het nie. Daar hang as te ware 'n donker wolk wat die sonskyn van die mens af wegkeer oor die koninkryk.

God as Koning laat egter nie sy koninkryk in die steek nie. Direk na die sondeval belowe Hy reeds dat daar iemand sal kom wat die vloek van die mens se opstand sal breek soos ons in Gen. 3 v 15 hoor:

Ek stel vyandskap tussen jou en die vrou, tussen jou nageslag en haar nageslag. Haar nageslag sal jou kop vermorsel en jy sal hom in die hakskeen byt.”

En so word hierdie belofte dwarsdeur die Ou Testament herhaal. Die Koning is op pad om die skade te herstel. Hy kom egter nie soos wat die verwagting is as 'n triomferende koning nie. Hy word as eenvoudige mens gebore en noudat Hy volwasse is bring Hy die goeie nuus: “Bekeer julle, want die koninkryk van die hemel het naby gekom.” Die son begin deurbreek deur die donker wolke wat die mens van God vervreem het. Die koninkryk waarvan die mens homself met sy rebelse opstand vervreem het is nou weer binne bereik. Die mens kan nou weer 'n volwaardige burger word en al die voordele van burgerskap geniet.

Hoe kan dit gebeur? Jesus se oproep: “bekeer julle” is die antwoord. Die woord bekeer beteken dat daar 'n radikale verandering moet plaasvind. 'n 180 grade terugdraai van die pad waarop jy is. Die metamorfose wat 'n wurm na 'n skoenlapper ondergaan.

Hoe word hierdie verandering teweeg gebring? In Mar. 1 v 15 word dit mooi verduidelik:

“Die tyd het aangebreek, en die koninkryk van God het naby gekom. Bekeer julle en glo die evangelie.”

Die verandering wat jy moet ondergaan is om totaal weg te draai vanaf jou eie outonomiteit na 'n totale afhanklikheid van God se genade. Om van jouself af weg te draai na God se genade.

Om te verstaan dat dit alleen God se genade is wat jou burgerskap in ere herstel. Om te verstaan dat daar niks is wat jy kan doen om jou burgerskap te herstel nie. Dis om na God toe kom en te erken. Here ek kan nie. Ek is verlore sonder U.

Om die goeie nuus te glo dat God self gekom het om jou burgerskap vir jou terug te gee. Om die evangelie van Jesus Christus te glo. Om werklik te verstaan wat dit beteken dat Jesus gekom het om die prys te betaal. Om te verstaan dat Hy met sy lewe betaal het sodat jy weer jou burgerskap kan terugkry. Die duurste prys wat 'n mens kan betaal het Jesus betaal, naamlik met sy lewe. Om te verstaan dat hy die houvas en die mag van die dood gebreek het toe Hy die dood met sy opstanding vernietig het.

Wanneer jy dit gedoen het vind die wonder van God se genade in jou lewe plaas. Net soos die wurm in 'n skoenlapper verander, verander die Heilige Gees jou in 'n nuwe mens. 'n Nuwe mens wat nie meer sy identiteit in die dinge van hierdie wêreld soos status, rykdom soek nie. Nou bepaal wie jy is nie meer jou identiteit nie. Nee jou identiteit word nou bepaal deur wie se eiendom jy is. Jesus het jou duur gekoop deur met sy bloed vir jou te betaal en daarom is jy nou 'n Koningskind.

Geliefdes, volgens watter identiteit leef jy? Leef jy nog volgens jou ou identiteit as rebelse opstandige teen God se gesag, of leef jy volgens nuwe identiteit as 'n koningskind wat duur gekoop is deur die bloed van Jesus Christus? Hier aan die begin van die nuwe jaar is dit belangrik dat ons elkeen net so bietjie terugstaan en boeke vat van waar ek is. Wat is my antwoord op die vraag volgens wie se identiteit ek leef?

Hoe lyk my prioriteite? Is God elke dag deel van my lewe of bere ek Hom in 'n boksie en haal Hom net uit op Sondagoggende as ek lus voel? Is die kerk vir my 'n prioriteit? Is dit vir my belangrik dat die kerk sy werk doen waarvoor Christus ons geroep het? Help ek daarmee of is ek eintlik 'n struikelblok wat in die pad staan?

Is my liefde vir my broers en susters en vir my medemens tasbaar sigbaar? Lyk my lewe anders as die wêreld daar buite? As mense my van Maandag tot Saterdag dophou, sal hulle raaksien dat ek 'n Christin is?

Geliefdes die Here roep ons om eerstens te soek na die koninkryk van God en te vra na sy wil.

“Die tyd het aangebreek, en die koninkryk van God het naby gekom. Bekeer julle en glo die evangelie.”

Amen. 

Beywer julle allereers vir die koninkryk en wil van God.

Son 5 Jan 2020 (GKE)

Skriflesing: Mat. 6 v 25 – 34

Teksvers Mat. 25 v 33

Die nuwe jaar het reeds met 'n drafstap begin. Wat gaan die jaar wat voorlê vir ons inhou? Daar is reeds uit linkse politieke groepe dreigemente dat die registrasieproses by universiteite ontwrig gaan word. Die wetgewing om onteiening sonder vergoeding te doen is reeds in 'n gevorderde stadium en sal heel waarskynlik in hierdie jaar deurgevoer word. Eskom het al weer kennis gegee dat beurtkrag moontlik weer toegepas gaan word.

Al hierdie bekommernisse het 'n negatiewe invloed op die ekonomie en dit kan bydra dat die krediet agentskappe ons land se krediet status nog verder afgradeer? Al hierdie onsekerhede laat mens wonder oor hoe dit alles ons persoonlik gaan raak? Gaan die maatskappy vir ek wie werk hierdie ekonomiese storms oorleef en gaan ek nog 'n werk hê? Hoe gaan ons oorleef in hierdie komende jaar?

Wat sê die Here vir ons oor al hierdie onsekerhede wat ons so bekommerd maak? In Mat. 6 v 25 tot 32 hoor ons:

²⁵“Daarom sê Ek vir julle: Moet julle nie bekommer oor julle lewe, oor wat julle moet eet of drink nie, of oor julle liggaam, oor wat julle moet aantrek nie. Is die lewe nie belangriker as kos en die liggaam as klere nie? ²⁶Kyk na die wilde voëls: hulle saai nie en hulle oes nie en hulle maak nie in skure bymekaar nie; julle hemelse Vader sorg vir hulle. Is julle nie baie meer werd as hulle nie? ²⁷Trouens, wie van julle kan deur hom te bekommer sy lewe met een enkele uur verleng? ²⁸En wat bekommer julle julle oor klere? Let op hoe groei die veldlelies: hulle swoeg nie en hulle maak nie klere nie. ²⁹Maar Ek sê vir julle: Selfs Salomo in al sy prag was nie geklee soos een van hulle nie. ³⁰As God dan die gras van die veld, wat vandag nog daar is en môre verbrand word, so versier, hoeveel te meer sal Hy dan nie vir julle sorg nie, julle kleingelowiges?

³¹“Julle moet julle dus nie bekommer en vra: ‘Wat moet ons eet of wat moet ons drink of wat moet ons aantrek?’ nie. ³²Dit is alles dinge waaroor die ongelowiges begaan is. Julle hemelse Vader weet tog dat julle dit alles nodig het.

Hierdie verse beskryf die mens se beheptheid met materiële dinge. Dit beskryf inderdaad die leefwêreld van ons tyd. Die fisiese materiële dinge kan so maklik jou fokus in die lewe word en hier sê die Here vir ons dat dit 'n verkeerde fokus is. Wanneer dit jou fokus is, word God uit die prentjie geskuif.

In ons teksvers Mat. 6 v 33 gee die Here vir die regte perspektief waarop ons moet fokus:

beywer julle allereers vir die koninkryk van God en vir die wil van God, dan sal Hy julle ook al hierdie dinge gee.

Die hele hoofstuk van Mat. 6 handel oor jou intieme verhouding met God en wat dit vir jou beteken. Hier in ons teksvers hoor ons dan dat ons, ons moet beywer vir die koninkryk en wil van God.

Dit bring die vraag na vore: “het ek deel aan die koninkryk van God?” Die enigste manier hoe jy kan deel in die koninkryk van God is om die evangelie te glo. Jy moet glo dat Jesus vir jou sondes aan 'n vervloekte kruishout gesterf het en dat Hy met sy opstanding vir jou 'n nuwe lewe saam met God gee.

Hier gee die Here vir ons die perspektief van wat dit beteken om te deel te hê aan die koninkryk van God. Om deel te hê aan die koninkryk van God beteken om jou bekommernisse vir God te gee in die sekere wete dat Hy jou sal versorg.

Beywer julle allereers vir die koninkryk en wil van God. Hiermee nooi die Here ons uit om al ons bekommernisse en onsekerhede vir die jaar wat voorlê aan Hom te gee en dan gee Hy vir ons die belofte dat Hy vir ons sal sorg. Inderwaarheid kan ons sê dat God ons uitnooi om dit ons nuwejaarsvoorneme te maak. Beywer julle allereers vir die koninkryk en wil van God.

Die vraag is nou: “Hoe doen jy dit prakties? Hoe moet jy maak om jou vir die koninkryk en wil van God te beywer? In die eerste plek beteken dit dat jy jou fokus op God moet plaas deur te glo in die evangelie van Jesus Christus.

Dit beteken ook dat jy plek en tyd vir God in jou lewe moet maak. Maak tyd om na Hom te luister deur tyd saam met Hom in sy woord te spandeer. Maak tyd om eredienste by te woon. Jou erediensbywoning is vir jou 'n goeie aanduiding tot watter mate jy aan God se wil gehoorsaam wil wees. Vgl. Heb. 10:25 waar die Here vir ons sê:

Ons moenie van die samekomste van die gemeente af wegbly soos party se gewoonte is nie, maar mekaar eerder aanmoedig om daarheen te gaan, en dit des te meer namate julle die oordeelsdag sien nader kom.

Maak tyd om met Hom te praat in gebed. Nie net 'n vinnige gebed voor jy gaan slaap nie. Die Here sê vir ons in Ef. 6:18 bid gedurig vir al die gelowiges. Bid vir mekaar. Gebed gaan nie net om vir God te vra wat ons wil hê nie. Dit gaan daar om vir God te vra wat sy wil in jou lewe is. Maak tyd om te bid.

Beywer jou vir die koninkryk en wil van God beteken om Hom te vertrou. Om te vertrou dat Hy sy woord gestand sal doen. Om te vertrou dat Hy jou nooit alleen sal laat nie. Om te vertrou dat Hy vir jou alles sal gee wat jy nodig het. Om te vertrou dat Hy alles wat gebeur ten goede sal laat meewerk soos Hy in Rom. 8:28 belowe. Om te glo en vertrou dat niks jou van sy liefde sal skei nie soos Hy ons in Rom. 8 v 38 & 39 belowe.

Dit beteken ook dat ons sal verstaan dat God weet wat ons nodig het en dat dit dikwels verskil van wat ons dink ons nodig het. Dit beteken dat ons, ons belydenis van Sondag 10 van die Heidelbergse Kategismus sal leef deur te glo dat die almagtige en oralteenwoordige krag van God waardeur Hy hemel en aarde en al die skepsels asof met sy hand nog onderhou en so regeer dat lower en gras, reën en droogte, vrugbare en onvrugbare jare, voedsel en drank, gesondheid en siekte, rykdom en armoede en alles, ons nie per toeval nie, maar uit sy Vaderhand toekom.

Dit beteken dat ons in alle teëspoed geduldig en in voorspoed dankbaar sal wees. Verder dat ons ook vir die toekoms 'n vaste vertroue in ons getroue God en Vader sal stel dat geen skepsel ons van sy liefde sal skei nie, aangesien alle skepsels so in sy hand is dat hulle sonder sy wil nie kan roer of beweeg nie

Om jou te beywer vir die koninkryk en wil van God beteken dat ons gehoorsaam sal wees wanneer Hy vir ons sê dat ons mekaar moet liefhê soos ons in Joh. 10 v 34 & 35 hoor.

Dit beteken die koninkryk van God sigbaar sal word in ons leefwyse. Dit beteken dat ons ligdraers in die wêreld sal wees deur ons roeping uit te leef om dissipels te gaan maak en hulle deur ons voorbeeld sal leer om alles te onderhou wat Jesus ons beveel het.

Dit beteken dat ons, ons nie sal laat oorweldig deur bekommernisse van wat moontlik in die toekoms kan gebeur nie. Dit beteken dat ons die nuwe lewe wat Christus vir ons gegee het sal leef.

Geliefdes, gaan die nuwe jaar tegemoet sonder kommer met die wete dat God vir jou sal sorg. Beywer jou vir die koninkryk van God en vra na sy wil.

Amen

Laat die kinders tot My nader want die Koninkryk der hemele is hul erfdeel sê die Heer

Ontvang die Koninkryk van God in kinderlike afhanklikheid

Datum: 17 Nov. 2019 GKE

Mark 10:13 – 16

Teksvers: Mark 10:14 & 15

Een ding is baie seker. Kinders is vir Jesus baie belangrik. In Mat. 18 v 6 hoor ons:

 “Elkeen wat een van hierdie kleintjies wat in My glo, van My afvallig maak, vir hom is dit beter as hy met ’n groot meulsteen aan sy nek in die diep see verdrink.

Jesus was verontwaardig toe sy dissipels gekeer het dat die mense kinders na Hom toe wou bring.

Maar toe Jesus dit sien, was Hy verontwaardig en het Hy vir hulle gesê: “Laat die kindertjies na My toe kom en moet hulle nie verhinder nie, want die koninkryk van God is juis vir mense soos hulle.

Die rede waarom Jesus se dissipels probeer keer het was omdat kinders in die tyd van Jesus, kinders nie belangrik was in die samelewing nie. Kinders is as 'n las beskou want hulle het geen bydra gelewer tot die gesin se welvaart of eer nie.

Geen ordentlike Joodse man sou in die openbaar aandag aan vrouens en kinders gee nie, veral nie 'n bekende rabbi nie. Daarom is dit nie vreemd dat sy dissipels probeer keer het dat die mense die kinders na Jesus toe bring nie.

Jesus het Homself egter nie laat bind deur die sosiale norms van sy tyd nie. Hy het gekom om die koninkryk van God binne almal se bereik te bring. Die norme van God se koninkryk is anders as die sondige wêreldse norme wat neersien op onbelangrike mense.

In God se koninkryk is daar nie onbelangrike mense nie. Die regte van die geringstes is net so belangrik soos die regte van die vooraanstaande mense in die samelewing. God gee baie om vir diegene op wie daar neergesien word. Veral die wel en wee van kinders is vir God baie belangrik.

Jesus se verontwaardiging met sy dissipels spruit voort uit se liefde vir die kinders wat die mense na Hom toe gebring het omdat die Koninkryk van God ook vir kinders bedoel is wat so maklik in die samelewing uitgesluit word.

In hierdie verhaal hoor ons weereens hoe die beeld van 'n huisgesin gebruik word om vir ons te verduidelik hoe die verhouding tussen God en sy huisgesin; dit wil sê sy kerk; moet wees.

In Mar. 13 v 15 hoor ons:

Dit verseker Ek julle: Wie die koninkryk van God nie soos ’n kindjie ontvang nie, sal daar nooit ingaan nie.”

Ons hoor dat ons net soos klein kindertjies in kinderlike afhanklik en vertroue tot God moet nader.

Die koninkryk van God is daar waar God regeer in jou hart en lewe en dit gaan gepaard met al die seëninge wat daaruit voortspruit. Om die koninkryk van God te ontvang beteken om gered te word en die ewige lewe te ontvang.

Dit beteken ook dat jy God se liefde sal beleef wat die Heilige Gees in jou hart uitstort en verder nog dat die Heilige Gees jou verander om al hoe meer soos Jesus te word. Waar God in jou lewe regeer word Fil. 4:7 'n werklikheid in jou lewe:

die vrede van God wat alle verstand te bowe gaan, sal oor julle harte en gedagtes die wag hou in Christus Jesus.

Die troos hier is dat kinders wat na Jesus toe gebring word deel in al die seëninge wat die Koninkryk van God inhou. Daarom is dit so belangrik dat ouers hulle kinders na Jesus toe moet bring.

Hierdie week sien ons die sakrament van die heilige doop wat 'n sigbare teken en seël is om vir ons te wys hoe God in ons werk deur die krag van die Heilige Gees. Volgende week gaan ons met die sakrament van die Heilige Nagmaal ook sien hoe God se genade in ons werk.

Deur die doop word ons in die kerk van God opgeneem en van alle ongelowiges en vreemde godsdienste afgesonder om heeltemal sy eiendom te wees en sy merkteken en vaandel te dra.

Die teken van die Doop is water en dit wys vir ons dat net soos water vuilheid van jou liggaam afwas dat jy van jou sonde deur die bloed van Jesus skoon gewas is. Ons sien ons hoe God se genade in ons werk en dat Hy ons daarmee sy eiendom maak.

Daar is geen spesiale krag in die water wat gebruik gaan word nie. Dit illustreer maar net vir ons hoe ons deur God se genade gered word. Uitwendig sien ons die water, maar inwendig werk die Heilige Gees die geloof in ons sodat ons die evangelie glo.

Die goeie nuus dat Jesus Christus vir ons sondes aan 'n vervloekte kruishout gesterf het. Dat Hy ons sondes op Hom geneem het en dat Hy die dood oorwin het met sy opstanding en daarmee vir ons die ewige lewe gee.

Wanneer ons, ons kinders laat doop kry ons daarmee die versekering dat die genade van God ook vir ons kinders bedoel is. Daarom is dit belangrik dat julle julle kinders leer wat die betekenis van hulle doop is.

Jesus sê vir ons in Mar. 10 v 14:

Laat die kindertjies na My toe kom en moet hulle nie verhinder nie

Daarom is dit vir julle as ouers belangrik om te sorg dat julle, jul kinders eredienste toe bring sodat hulle ook daarin die Here kan ontmoet en leer ken. Julle moet oppas dat julle nie toelaat dat wêreldse prioriteite struikelblokke in julle kinders se pad is nie.

Die wêreld het Sondae ook nou oorgeneem en maak dit vol met buitemuurse aktiwiteite. Moenie toelaat dat dit voorrang kry bo julle en julle kinders se tyd saam met God nie. Die lewe is deesdae so gejaag dat dit maklik gebeur dat kinders so besig gehou word met wêreldse dinge dat daar nie meer tyd is vir God is nie. As jy kind in jong dae leer dat kerk nie belangrik is nie, moenie verbaas wees as hy kerklos raak wanneer hy groot word nie.

Verder is dit belangrik dat julle ook tyd maak vir huisgodsdiens sodat julle kinders kan leer dat mens elke dag saam met God deur die lewe gaan. Daarom belowe julle ook met die doop dat julle, jul kinders sal onderrig en laat onderrig. Dit is belangrik dat kinders katkisasie moet bywoon, maar katkisasie kan nie die tuis onderrig wat ouers moet gee, vervang nie.

Moenie soos die dissipels deur julle aksies keer dat julle kinders na Jesus toe kom nie. Slaan ag op sy woorde:

Laat die kindertjies na My toe kom en moet hulle nie verhinder nie, want die koninkryk van God is juis vir mense soos hulle.

In Mar. 10 v 16 hoor ons dat Jesus sy arms om die kindertjies gesit het, hulle die hande opgelê en hulle geseën het. Dit is 'n wonderlike belofte wat die Here vir ons gee. Wanneer ons, ons kinders na Hom toe bring sal Hy hulle seën. Indien julle sou toelaat dat wêreldse dinge julle kinders van Jesus af weg hou, ontneem julle, jul kinders van sy seën.

Geliefdes, laat julle kinders tot Jesus nader want die Koninkryk der hemele is hul erfdeel en ontvang saam met hulle die Koninkryk van God in kinderlike afhanklikheid.

Amen

06. Wat beteken dit om kerk van die Here te wees?

God, die Skepper van hemel en aarde is in Christus my Vader wat vir my in goeie en moeilike tye sorg

Lees: Rom. 8 v 18 – 35 & Hand. 17 v 24 - 28 

Teksverse: Hand. 17 v 27 & 28 en Rom. 8 v 38 & 39

Heidelbergse Kategismus: Sondag 10

Datum: 10 Nov. 2019 GKE

In die Bybel gebruik God verskillende beelde om om te verduidelik hoe ons verhouding met Hom moet wees. Onder andere gebruik Hy die beeld van 'n huisgesin om te verduidelik hoe die verhouding van die gelowiges met mekaar en met Hom moet wees.

Ons het gehoor dat ons ons as kerk van die Here soos broers en susters is. Verlede week het ons na aanleiding van ons belydenis in Sondag 9 van die Heidelbergse Kategismus gehoor dat ons verhouding met God is soos die verhouding tussen 'n vader en sy kinders.

Vandag staan ons stil by God se sorg vir ons. Net soos 'n Vader sy gesin versorg en bewaar, versorg en bewaar God sy huisgesin dit wil sê sy kerk.

In ons belydenis kom ons die woord “voorsienigheid” tee wat ons nie so baie gebruik nie. Dit is nie 'n woord wat direk net so in die Bybel gebruik word nie, maar dit beskryf vir ons hoe God ons bewaar en versorg soos wat ons in so baie plekke in die Bybel hoor.

Die woord “voorsienigheid” kom van die woord voorsien. Dit het te doen met die manier waarop God voorsien in die lewe. Daar is twee fasette daarby betrokke, naamlik onderhouding en regering.

Die Kategismus verduidelik dit soos volg:

27  Vraag:  Wat verstaan jy onder die voorsienigheid van God?

Antwoord:  Die almagtige en oralteenwoordige krag van God (a)  waardeur Hy hemel en aarde en al die skepsels asof met sy hand nog onderhou en so regeer (b) dat lower en gras, reën en droogte (c), vrugbare en onvrugbare jare, voedsel en drank, gesondheid en siekte (d), rykdom en armoede (e) en alles, ons nie per toeval nie, maar uit sy Vaderhand toekom (f).

(a) Hand 17:25-28;  Jer 23:23, 24;  Jes 29:15, 16;  Eseg 8:12.  (b) Heb 1:3.  (c) Jer 5:24;  Hand 14:17.  (d) Joh 9:3.  (e) Spr 22:2.  (f) Matt 10:29;  Spr 16:33.

Ons glo vas en seker dat dit die waarheid is, dit wil sê ons bely dit want God sê dit in die Bybel vir ons soos ons byvoorbeeld in Hand. 17 v 27b & 28a hoor:

Hy is nie ver van enigeen van ons af nie, want deur Hom lewe ons, beweeg ons en bestaan ons.

Deur Hom lewe ons, beweeg ons en bestaan ons. Daar is niks wat gebeur sonder dat God daarby betrokke is nie. In die algemene loop van die lewe praat ons maklik dat iets toevallig gebeur het. Deur die saamloop van omstandighede het dit of dat gebeur. Dit het net so uitgewerk.

Wanneer ons egter deur ons geloofsoë daarna kyk dan is dit so dat niks maar net toevallig gebeur nie. Daar is niks in hierdie lewe wat God onverhoeds betrap nie.

Hierin lê ook 'n geheimenis opgesluit. Want ons kan maklik redeneer dat as God alles beheer, dat ek geen verantwoordelikheid het nie. Dit werk egter nie so nie. God neem nie die mens se verantwoordelikheid weg nie. Ek kan nie maar net terugsit en sê dat die verkeerde besluite wat ek geneem het nie my skuld is nie. Dit werk ongelukkig nie so nie.

Hoe werk dit dan dat God alles beheer, maar dat ek nog steeds 'n verantwoordelikheid het? Dit is 'n vraag wat mens kan moeg maak sonder dat jy by 'n antwoord uitkom. Met ons beperkte verstand kan ons nie die almag van God omvat of ten volle verduidelik nie. Wat ons wel weet is dat ons kan leef met die vertroue dat God in beheer is, maar dat ek nog steeds my verantwoordelikhede moet nakom en verantwoordelikheid vir my besluite moet aanvaar.

Hier is ook nog 'n verdere ongemaklikheid wat na vore kom. Dis alles goed en wel om te sê dat God iets beskik het wat goed is. Daardie keer toe die motor wat oor die rooi lig gery het, my net rakelings gemis het. Ons as gelowiges bely met reg dat dit God is wat ons bewaar het.

Maar wat van die keer toe daar wel 'n ongeluk was en daar mense dood is? Die jong kind wie se lewe nog voor lê. Waar was God dan toe? Ons kan nie net bely dat dit wat goed is van God af kom nie. As dit wat sleg is nie ook uit sy Vaderhand kom nie, dan is Hy nie almagtig nie, met ander woorde God is nie in beheer nie. Daarom bely ons dat vrugbare en onvrugbare jare, gesondheid en siekte uit sy Vaderhand kom. Daar is niks wat buite om God se beheer gebeur nie.

Wat beteken dit vir ons dat ons weet dat God in beheer is? In die kategismus bely ons:

28  Vraag:  Wat baat dit ons dat ons weet dat God alles geskep het en dit nog deur sy voorsienigheid onderhou?

Antwoord:  Dat ons in alle teëspoed geduldig (a) en in voorspoed dankbaar (b) kan wees.  Verder dat ons ook vir die toekoms 'n vaste vertroue in ons getroue God en Vader (c) kan stel dat geen skepsel ons van sy liefde sal skei nie (d), aangesien alle skepsels so in sy hand is dat hulle sonder sy wil nie kan roer of beweeg nie (e).

(a) Rom 5:3;  Jak 1:3;  Ps 39:10;  Job 1:21, 22.  (b) 1 Tess 5:18;  Deut 8:10.  (c) Ps 55:23;  Rom 5:4.  (d) Rom 8:38, 39.  (e) Job 1:12;  2:6;  Spr 21:1;  Hand 17:2.

Wanneer dinge nie verloop soos ons graag sou wou hê dit moet verloop nie, moet ons nie moedeloos word nie. Moenie in wanhoop verval nie. Ons verstaan dalk nie hoekom nie, maar ons weet God besig is met sy ewige raadsplan en dat selfs as ons nie nou verstaan nie, dat dit deel maak van God se groter prentjie. Dit is soos om na 'n klein deeltjie van 'n groot tapisserie se agterkant te kyk. Jy sien nie hoe lyk die groter prent wat dit uitbeeld nie. Daarom moet ons geduldig op God bly vertrou.

Die gevaar is ook daar dat wanneer dinge goed gaan ons vergeet dat dit eintlik van God af kom. Ons kyk so maklik teen ons eie bydra en prestasie vas dat ons vergeet dat dit eintlik van God af kom. Ja, dit is so dat ek hard gewerk het en dat ek nou begin om die vrugte van my arbeid te pluk. Ek moet steeds onthou dat God dit vir my gegee het. Hy het my die verstand en vermoë gegee om te kan bereik wat ek bereik het. Daarom moet ek dankbaar wees vir die voorspoed wat ek beleef.

Hierdie belydenis dat God in beheer is bring vir ons 'n geweldige troos. Ons kan met vertroue vorentoe na die toekoms kyk. Ons weet nie wat gaan gebeur nie, maar ons weet dat God daar sal wees om my te dra. Hy hou nie noodwendig die slegte dinge weg nie, maar Hy los jou nooit alleen nie want daar is absoluut niks wat jou van God se liefde skei nie.

Rom. 8:38 & 39

Hiervan is ek oortuig: geen dood of lewe of engele of magte of teenswoordige of toekomstige dinge of kragte of hoogte of diepte of enigiets anders in die skepping kan ons van die liefde van God skei nie, die liefde wat daar is in Christus Jesus ons Here.

Jesus weet wat dit beteken om deur die donker tye te gaan. Hy het immers Godverlatenheid beleef daar aan die vervloekte kruishout. Hy het die hoogste prys betaal toe Hy sy lewe gegee het.

Wat is die ergste wat met jou in hierdie lewe kan gebeur? Jy verloor jou lewe. Die grootste troos is om te weet dat selfs dit jou nie eers van God se liefde kan skei nie, want Hy het die angel van die dood gebreek. Daar wag nie verskrikking anderkant die dood nie. Net God se liefde en ewige teenwoordigheid waar daar geen pyn, lyding, hartseer of dood meer sal wees nie.

Hierdie troos is egter net vir die gelowiges wat in die Goeie Nuus van Jesus Christus glo. Dit is slegs vir hulle wat glo dat Jesus vir jou sondes betaal het met sy dood aan 'n vervloekte kruishout en dat Hy met sy opstanding die mag en verskrikking van die dood gebreek het en dat Hy dit vir elkeen gee wat in Hom glo.

Geliefdes, daar is niks wat buite om God se beheer gebeur nie. Toeval bepaal nie jou lewe nie. God het jou pad uitgelê en Hy sal jou nie in die steek laat nie. Daar is niks wat jou van sy liefde kan skei nie.

Bly vertrou op God. Wees geduldig in tye van swaarkry en wees dankbaar vir die goeie dinge wat God oor jou pad bring.

Amen

05. Wat beteken dit om kerk van die Here te wees? Huisgesin 3

God, die Skepper van hemel en aarde is in Christus my Vader op wie ek kan vertrou

Joh. 1v1 tot 18;  Teksvers Joh. 1v12 & 13

3 Nov. 2019 GKE

Sondag 9

26  Vraag:  Wat glo jy as jy sê:  Ek glo in God die Vader, die Almagtige, die Skepper van die hemel en die aarde?

Antwoord:  Ek glo dat die ewige Vader van ons Here Jesus Christus wat die hemel en aarde met alles wat daarin is, uit niks geskep het (a) en deur sy ewige raad en voorsienigheid nog onderhou en regeer (b), ter wille van sy Seun Christus my God en Vader is.  (c) Op Hom vertrou ek so dat ek nie daaraan twyfel dat Hy my, met alles wat vir liggaam en siel nodig is, sal versorg nie (d).  Hy sal ook al die kwaad wat Hy in hierdie jammerdal oor my beskik, tot my beswil verander (e), omdat Hy dit as 'n almagtige God kan (f) en ook as 'n getroue Vader wil doen (g).

(a) Gen 1 en 2;  Eks 20:11;  Job 33:4, 38, 39;  Hand 4:24;  14:15;  Ps 33:6;  Jes 45:7.  (b) Heb 1:3;  Ps 104:27-30;  115:3;  Matt 10:29;  Ef 1:11:  (c) Joh 1:12;  Rom 8:15;  Gal 4:5-7;  Ef 1:5.  (d) Ps 55:23;  Matt 6:25, 26;  Luk 12:22.  (e) Rom 8:28:  (f) Jes 46:4;  Rom 10:12.  (g) Matt 6:32, 33;  7:9-11.

Inleiding

Hoe lyk ’n ideale vader? Die ware vaderfiguur is ’n simbool van liefde, goedgesindheid en sorg. Hy is iemand wat jy kan vertrou, iemand wat jy kan navolg en bowenal iemand wat jy kan liefhê. Waar vind ons ’n ideale vader? Ons manne wat alreeds kinders het moet maar kyk of ons gaan pas by die kriteria en die jongmanne moet maar kyk of hulle kans sien vir die ideaal wat gestel word, want dit is voorwaar ’n baie hoë standaard wat gestel word.

As ek so na myself kyk dan moet ek erken dat daar baie geleenthede was waar ek ver te kort geskied het as ’n vader. As ons werklik ’n ideale vader wil hê, dan is daar maar net een: ons Vader wat in die hemel is. Wanneer ons, ons geloof bely met die Twaalf Artikels, dan begin ons by God ons Vader. “Ek glo in God die Vader, die Almagtige Skepper van hemel en aarde.”

Die hoofgedagte van hierdie belydenis is: “Die Skepper is my Vader” In hierdie belydenis gaan dit nie soseer oor die detail van die skepping of hoe dit plaasgevind het nie. Die hoofsaak van die belydenis gaan oor die Persoon, die Ewige God wat die hemel en die aarde uit niks geskep het en wat my verhouding met Hom is. Dit gaan dus nie hier oor die skepping op sigself nie, maar veel eerder oor wie dit is wat geskep het. In Ps. 19v2 hoor ons die wonderlike skeppingslied wat getuig oor die almal van God:

Die hemel getuig van die mag van God,

die uitspansel maak die werk van sy hande bekend.

As ons die wonder van God se skepping aanskou, dan sê dit vir ons iets van die almag en die grootheid van die Skepper wat dit uit niks uit tot stand gebring het. Dan kan ons ook maar net saam met Dawid die wonder van God besing soos hy dit in Ps. 8v2 doen:

Here, ons Here, hoe wonderbaar is u Naam oor die hele aarde,

hoe glansryk alles wat U in die hemelruim geplaas het!

Maar daarmee saam kom die vraag dan ook na vore: “waarom sou die almagtig God wat die hemel en die aarde geskep het Homself met ons klein nietige mense bemoei?” Ps. 8v5:

⁴ As ek u hemel aanskou, die werk van u vingers, die maan en die sterre waaraan U ’n plek gegee het,

⁵ wat is die mens dan dat U aan hom dink, die mensekind dat U na hom omsien?

In ons belydenis lê die sleutel. Ons bely “Ek glo in God die Vader....” Ons verwys na God as ons Vader omdat Hy Homself so in sy ewige Woord openbaar. Hierin lê die sleutel van ons verhouding met God. Ons verwys nie na Hom as my alleen God nie, want dit sou ’n verkeerde verhouding aandui. As ek na God verwys as my God, dan kom daar so ’n sweempie van beheer en manipulasie deur. My God.....? Met ander woorde God is my besitting wat ek aangeneem het. Die inisiatief van die verhouding lê dus by my! Heeltemal in stryd met die Skrif!

Nee geliefdes, ons bely, dit wil sê ons glo vas en seker dat God, die Vader van Jesus Christus ter wille van sy Seun Christus ook my Vader is. As dit van my as mens afgehang het sou ek nooit vir God gekies het nie. Die mens het dan juis in rebelse opstand teen God se gesag sy rug op God gedraai en God verwerp. (Vgl. Joh. 1v11)

Hy het na sy eiendom toe gekom, en tog het sy eie mense Hom nie aangeneem nie.

En tog deur God se genade word almal nie verwerp nie. Daar is sommiges wat tot God mag nader soos die Here ook vir ons in Joh. 1v12 en 13 sê:

¹² Maar aan almal wat Hom aangeneem het, dié wat in Hom glo, het Hy die reg gegee om kinders van God te word. ¹³ Hulle is dit nie van nature nie, nie deur die drang van ’n mens of die besluit van ’n man nie, maar hulle is uit God gebore.

Gedring deur die Heilige Gees neem die uitverkore kinders van God, Jesus Christus se verlossingsdaad aan die kruis deur geloof aan en daardeur kry hulle die voorreg om kinders van God genoem te word. Elkeen wat glo dat Jesus Christus vir sy of haar sondes aan die kruis gesterf het en dat Jesus vir hulle die ewige lewe verwerf het met sy oorwinning van die dood, mag vir die ewige God wat die hemel en die aarde geskep het Vader noem.

Geliefdes, sien u die verskil tussen net my God en ons belydenis se my God en Vader? My God alleen dui op ’n baie manipulerende verhouding tussen God en die mens waar die mens in beheer is, terwyl my God en Vader dui op ’n baie intieme verhouding. Die verhouding tussen ’n pa en sy kind is baie nou en intiem. Ons beleef dit ook wanneer ons klein kleuterkindertjies vir ons pappa sê. En dit is inderwaarheid ook die vlak van ons verhouding met ons Hemelse Vader. (Vgl. Rom. 8 15)

Die Gees wat aan julle gegee is, maak julle nie tot slawe nie en laat julle nie weer in vrees lewe nie; nee, julle het die Gees ontvang wat julle tot kinders van God maak en wat ons tot God laat roep: “Abba!” Dit beteken Vader.

Abba is ’n Aramese woord wat aanvanklik deur kleuters gebruik is en kan inderwaarheid as pappa vertaal word. Abba Vader dui dan ook op die kinderlike vertroue wat ons as kinders van God in Hom het. Sien u die Groot verskil geliefdes? My God: arrogant, manipulerend met die inisiatief wat van my af uitgaan teenoor Abba Vader wat op ons absolute kinderlike vertroue in God ons Vader dui. Met Abba Vader kom al die inisiatief van God en nie van ons nie. God wat sy Seun uitstuur en die Heilige Gees wat vir ons die geloof gee om Jesus Christus se verlossingsdaad ons eie te maak.

Daarom glo ons ook vas en seker dat die ewige Vader van ons Here Jesus Christus ter wille van sy Seun Christus ook ons God en Vader is. Ons glo dat Hy die hemel en aarde met alles wat daarin is, uit niks geskep het en ook dat Hy dit deur sy ewige raad en voorsienigheid nog onderhou en regeer. Omdat God ons Vader is weet ons verseker dat ons met kinderlike vertroue op Hom kan staatmaak. In Joh. 1v16 sê Hy vir ons:

Uit sy oorvloed het ons almal genade op genade ontvang.

Uit die oorvloed van God se genade weet ons dat Hy ons met alles wat vir liggaam en siel nodig is sal versorg. Ons vertrou ons Vader met kinderlike vertroue en daarom weet ons ook dat Hy al die kwaad wat Hy in hierdie jammerdal oor ons beskik, tot ons beswil sal verander. In die prediking oor Sondag 10 sal ons in meer detail op hierdie aspek ingaan.

Ons vertrou dat God ons Vader vir ons sal sorg omdat Hy dit as Skepper van hemel en aarde KAN doen, maar veral ook omdat Hy dit WIL doen as ons Vader.

Elkeen wat Jesus Christus aangeneem het, dié wat in Hom glo, het Hy die reg gegee om kinders van God te word. Wanneer ons dus bely :

“Ek glo in God die Vader, die Almagtige, die Skepper van die hemel en aarde”

Dan doen ons dit in die wete dat God, die Skepper van hemel en aarde, in Christus my Vader is op wie ek kan vertrou.

Geliefdes, wanneer ons die slaggate op ons lewenspad in 2011 tref, hou vas aan die wete dat ons ’n Hemelse Vader het op wie ons kan vertrou. In daardie seerkry en hartseer dae, gaan na jou Hemelse Pappa sodat Hy jou met sy liefde kan toevou. Hoeveel te meer gaan ons nie die vreugdes van die lewe geniet wanneer ons dit met ons Hemelse Vader kan deel nie. Geliefdes hou vas aan die wete dat die Almagtige God en Skepper van die Hemel en die Aarde in Christus ons Vader is op wie ons kan vertrou.  

Amen