Moenie toelaat dat blokkasies jou van die krag van Jesus Christus se opstanding beroof nie want ons Here het regtig opgestaan

^{20 Apr. 2014 GKE}

Joh. 20 v 1-18; teksvers Luk 24 v 33 (Lees ook Mat. 28; Mar 16; Luk 24 & Joh. 20-21)

Lof-Psalm Ps. 92 v 1 (OAB)

Na Wet Ps. 38 v 1 (OAB)

Na Gebed Ps. 42 v 1 (OAB)

Slotsang Sb. 1-1 v 1 & 2 (Sb 24 in ou Swart Ps. boek)

Inleiding

Met Paasfees herdenk Christene wêreldwyd Jesus kruisdood en daarmee saam ook sy opstanding. Paasfees word as een van die belangrikste feeste op die Christelike kalender beskou. Die opstanding van Jesus Christus is die Christen se waarborg tot ’n nuwe lewe in God of anders gestel dit is ons waarborg van die ewige lewe wat nou reeds saam met God begin. Sonder die opstanding is ons geloof waardeloos soos die Here vir ons in 1 Kor. 15 v 17 – 19 sê:

¹⁷ En as Christus nie opgewek is nie, is julle geloof waardeloos en is julle nog gevange in julle sondes. ¹⁸ Dan is ook dié wat in Christus gesterf het, verlore. ¹⁹ As ons net vir hierdie lewe ons hoop op Christus vestig, is ons die bejammerenswaardigste van alle mense.

Christus se opstanding beteken vir ons die volgende:

1)    Ons Here leef! Ons aanbid nie ’n dooie God nie. Ons kyk nie terug in die verlede na God nie, maar ons kyk vorentoe na ’n lewe saam God.

2)    Ons kan dit doen want Jesus het die skeiding wat sonde tussen ons en God veroorsaak het, met sy kruisdood weggeneem. Sy opstanding is ons waarborg dat Hy die dood oorwin het. Dit gee vir ons die waarborg dat ons voor God staan asof ons nooit enige sonde gedoen het nie.

3)    Deur die opstanding word ons tot ’n nuwe lewe opgewek waar ons die heerlike teenwoordigheid van God ervaar.

4)    Verder is die opstanding ook vir ons ’n waarborg van ons eie salige opstanding in Christus. Die dood hou nie meer vir ons verskrikking in nie. Dit is ’n deurgang tot God waar ons vir ewig saam met God kan lewe sonder trane hartseer pyn of dood.

Hoekom ervaar ons dan nie altyd hierdie wonderlike voordele van die opstanding nie? Hoekom voel dit soms vir ons of God so ver is? Hoekom sukkel ons om hierdie nuwe lewe saam met God te leef? Hoekom kry my ou sondige natuur so dikwels die oorhand in die lewe?

Hier in ons teksgedeelte sien ons dat daar ’n paar blokkasies is wat kan keer dat ons die nut van opstanding in ons lewens kan ervaar. In die eerste plek is daar die blokkasie van vyandskap teen God. Tweedens is daar die blokkasie van woede teenoor God. Derdens die blokkasie van skuldgevoelens. Vierdens is daar die blokkasie hartseer en ’n gevoel van Godverlatenheid.

Blokkasie van Vyandskap:

Ons staan in die eerste plek stil by die blokkasie van vyandskap. In Mat 28v11-15 hoor ons:

¹¹ Terwyl die vroue op pad was, kom party van die wagte in die stad aan en vertel vir die priesterhoofde alles wat gebeur het. ¹² Die priesterhoofde het saam met die familiehoofde vergader en die volgende plan gemaak. Hulle het vir die soldate ’n groot som geld gegee ¹³ en gesê: “Julle moet sê: ‘Sy dissipels het in die nag gekom en sy liggaam gesteel terwyl ons geslaap het.’¹⁴ En as die goewerneur daarvan hoor, sal ons hom tevrede stel en sorg dat julle nie bekommerd hoef te wees nie.”

¹⁵ Die wagte het toe die geld gevat en gemaak soos hulle voorgesê is.

Hierdie storie word tot vandag toe onder die Jode vertel.

Die wagte wat hierdie gebeure aan die Priesterhoofde vertel was daar. Hulle het presies gesien wat gebeur het soos ons hoor in Mat. 28 v 2 – 4:

² Skielik was daar ’n geweldige aardbewing. ’n Engel van die Here het van die hemel af gekom, na die graf toe gegaan, die klip weggerol en daarop gaan sit.

³ Sy voorkoms was so blink soos weerlig en sy klere so wit soos sneeu. ⁴ Van skrik vir hom het die wagte gebewe en soos dooies geword.

Ten spyte daarvan weier die Priesterhoofde om die ware gebeure te glo en hulle dis ’n ander verduideliking daarvoor op. Net so is daar vandag ook mense wat weier om die vertelling van ooggetuies te aanvaar. Hulle glo nie die Bybel nie soos een persoon Donderdag op ’n internet besprekingsforum geskryf het in ’n bespreking oor hoe ons Goeie Vrydag moet vier:

Miskien moet julle eerste van alles uitvind of die karakter van Jesus ooit bestaan het want anders is al die menings pure verniet?

So is daar persone wat die absolute wonder en krag van Christus se kruisiging en opstanding mis omdat hulle weier om in Jesus Christus te glo. Die hartseer is dat as mens hiermee volhard, jy die moontlikheid in die gesig staar om vir ewig sonder God te wees.

Die blokkasie van woede

In die verhaal in Luk. 24v20-23 hoor ons van Kleopas wat bitter ontsteld was:

²¹ Ons het so gehoop dat dit Hy is wat Israel sou verlos. Maar boonop is dit vandag al die derde dag vandat die dinge gebeur het. ²² En nou het ’n paar vroue uit ons kring ons ook nog ontstel. Hulle was vanmôre vroeg by die graf ²³ en kon sy liggaam nie kry nie.

Kleopas is kwaad omdat hy meen dat Jesus hulle in die steek gelaat het. Hulle het so hard gehoop dat Jesus vir Israel sou verlos van die Romeinse onderdrukking.

Hoe dikwels gebeur dit dat ons ook teleurgesteld voel? Ons het een of ander verwagting gehad wat nie uitgewerk het nie en nou is ons kwaad vir die Here. Die probleem wat Kleopas gehad het was dat hy ’n verkeerde verwagting van Christus gehad het en dat hy ook nie die groter prentjie verstaan het nie. Hy het ’n aardse verwagting van Jesus gehad en hy het nie die groter prentjie van God se koninkryk raakgesien nie. Hoe dikwels is verwagting van Jesus net maar eintlik oor materiële gewin. Ons wil hê dat dit hier en nou moet goed gaan en dit verblind ons vir die teenwoordigheid van God net soos Kleopas en sy metgesel verblind was ten opsigte van Jesus se teenwoordigheid nie. Deur die Woord het Jesus egter Kleopas se verkeerde verwagting reggestel soos ons hoor in Luk 24v27:

Daarna het Hy by Moses en al die profete begin en al die Skrifuitsprake wat op Hom betrekking het, vir hulle uitgelê.

As ons dus kwaad is vir God omdat ons voel dat Hy ons teleurgestel het dan is dit nodig dat ons met sy Woord moet besig wees en wanneer ons dit doen dan sal God Homself aan ons bekendmaak.

Die blokkasie van skuldgevoelens

Petrus het die Here drie maal verloën. Dink net watter skuldgevoel Petrus moes gehad het. Dit is Petrus wat ewe manhaftig verklaar het soos ons in Luk. 22v33 hoor:

“Here, ek is bereid om saam met U selfs gevangenskap en dood in te gaan.”

Daarom dat hy ook so half terughoudend is wanneer hy en Johannes gaan kyk na Jesus se leë graf soos ons hoor in Joh. 20v3-4:

³ Petrus en die ander dissipel het toe uitgekom en na die graf toe gegaan. ⁴ Die twee het saam begin hardloop, maar die ander dissipel het vinniger as Petrus gehardloop en eerste by die graf gekom.

Dink net wat moes binne in Petrus se gemoed aangegaan het. Het Jesus regtig opgestaan? Hy moes weet en daarom het hy by die graf ingegaan waar Johannes net by die ingang bly staan het soos ons hoor in Joh. 20v6:

Ná hom het Simon Petrus ook daar aangekom, en hy het in die graf ingegaan.

In Luk. 24v12^b hoor ons:

Vol verwondering oor wat gebeur het, is hy terug huis toe.

Hoe dikwels word ons nie ook as gevolg van skuldgevoelens afgesny van Jesus af nie. Ek het al weer in sonde geval ten spyte van my beste intensies. Ewe grootpraterig het ek net soos Petrus verklaar:

“Here, ek is bereid om saam met U selfs gevangenskap en dood in te gaan.”

En nou staan my sonde al weer soos ’n muur tussen my en die Here. Skaam skuldig sien ek nie kans om vir Jesus in die oë te kyk nie. Genadiglik is dit die beste posisie om in te wees om die Here se genade te ontvang. Dit is eers wanneer ek besef dat ek tot die dood toe skuldig is dat ek werklik kan begryp hoe groot God se genade is. Jesus is getrou en Hy hou nie sy genade terug nie soos ons hoor in Luk. 24v34:

“Die Here het regtig opgestaan en Hy het aan Simon verskyn!”

Geliefdes, as ons deur skuldgevoelens oorweldig word is dit net nodig dat ons weer by Jesus uitkom sodat ons weereens die heerlikheid van sy teenwoordigheid kan ervaar.

Die blokkasie van hartseer en ’n gevoel van Godverlatenheid.

Maria Magdalena se hartseer het gekeer dat sy Jesus herken soos ons hoor in Joh. 20v11:

Maar Maria het buite by die graf bly staan en huil.

In Joh. 20v15 hoor ons:

Jesus vra haar toe: “Mevrou, waarom huil jy? Vir wie soek jy?”

Sy het gedink dit is die tuinopsigter, en sy het vir hom gesê: “Meneer, as u Hom weggevat het, sê vir my waar u Hom begrawe het, en ek sal Hom daar gaan haal.”

Dit gebeur soms dat hartseer ons heeltemal verblind vir die liefdevolle teenwoordigheid van die Here. Dit is die tye wanneer dit vir ons voel of die lewe net te veel is. Die genade is dat die Here verstaan en daarom laat Hy ons nooit alleen nie. Jesus het bange Godverlatenheid ervaar sodat ons nooit weer deur God verlaat sal word nie. Ons moet maar net luister vir sy stem. Jesus het nie vir Maria alleen gelaat nie. Hy het geduldig by haar gebly totdat sy Hom herken het soos ons hoor Joh. 20v16:

Jesus het vir haar gesê: “Maria!”

Sy draai na Hom toe en sê in Hebreeus vir Hom: “Rabboeni!” Dit beteken leermeester.

Wanneer ons deur hartseer verblind word moet ons maar net besig bly met die Here se Woord en ons sal sy liefdevolle stem daar hoor.

Slot

Die blokkasies wat keer dat ons deur die krag van Jesus se opstanding die liefdevolle teenwoordigheid van die Here ervaar is vyandskap teen God, woede, skuldgevoelens en hartseer. As hierdie blokkasies in die pad staan van u verhouding met die Here, kom na Jesus toe. Moenie toelaat dat blokkasies jou van die krag van Jesus Christus se opstanding beroof nie want ons Here het regtig opgestaan !!!!!

Amen

God is vir ons ’n toevlug en ’n beskerming

6 Apr 2014

Skriflesing Ps. 46 teksvers fokusvers Ps. 46:2

Liturgie

Ps. 46-1:1 & 6

Sb. 9-3:1 & 2

Sb. 15-7:4 & 5

Ps. 46-2:1 – 3

Inleiding

Die lewe is vol onsekerheid en benoudheid. Ons weet nie wat die toekoms vir ons inhou nie. Wie van ons weet of ons more nog hier gaan wees? Een van die lewensvrae wat baie onsekerheid en benoudheid by baie mense veroorsaak is: “wat wag vir my anderkant die dood?” Die hoofrede waarom mense bang is vir wat anderkant die dood lê is as gevolg van die mens se opstandigheid teen God. Die mens wat God se gesag in sy lewe verwerp en dit veroorsaak dat daar skeiding tussen mens en God is.

God se straf daarvoor is die ewige dood waar die mens vir ewig van God en sy liefde geskei sal wees. Elkeen van ons verdien daardie straf. As dit jou nie benoud maak nie, dan verstaan jy nie werklik die erns van die saak nie. Geliefdes, weet u wat wag anderkant die dood? Daar is twee alternatiewe, of ewig beskerm en getroetel in God se liefde of ewig sonder Hom in uiterste nood en ellende.

Waar kry ek sekerheid daaroor? In Ps. 46 hoor ons waar die Psalmdigter gaan troos en sekerheid soek het. Hy vertrou dat God se volk veilig en beskut is onder God se beskerming. In hierdie Psalm word God se konkrete bystand aan sy bedreigde volk in die loop van die geskiedenis besing. Dwarsdeur die Ou Testament is die verdrukking van Israel en God se verlossing ’n heenwysing na Christus wat die mensdom van die slawerny van die sonde verlos. Die uittog uit Egipte waar God sy volk verlos van die slawerny van Egipte. Die verlossing van die Jode uit die slawerny van die Ballingskap. Die doel van hierdie Psalm is om die aandag op die God van Israel wat op Sion in die tempel woon, te vestig en hoe Hy sy volk verlos van hul vyande. Ons grootste vyand is die sonde wat ons van God af wegskeur.

God beskerm ons (Ps. 46:2-4)

In Ps. 46:2-4 hoor ons hoe God sy volk beskerm teen hul vyande. In vers 2 bevestig die Psalmdigter :

God is vir ons ’n toevlug en ’n beskerming ;

Hy was nog altyd bereid om te help in nood

Die Hebreeuse woord wat met “toevlug” vertaal is, wys op die absolute vertroue wat op iets of iemand geplaas word om jou teen gevaar te beskerm. Die Hebreeuse woord wat met “beskerming” vertaal is, beteken letterlik ’n plek van veiligheid. God is vir die wat by Hom skuiling soek so ’n plek van veiligheid.

Mens kan God vertrou, want Hy is altyd te bereid om te help wanneer jy in nood verkeer. Die Hebreeuse woord wat met “nood” vertaal is, beteken ’n diepe emosionele pyn en ellende wat mens ervaar as gevolg van ’n sekere situasie of omstandigheid. Die mens se grootste nood is dat hy vanweë sy sondige opstand teen God van Hom geskei is. God het die mens gemaak om in ’n verhouding met Hom te leef. Wanneer daardie verhouding gebreek is, ervaar die mens diep emosionele pyn en ellende.

Wanneer jy so voel dan moet jy weet, jy kan God vertrou, maak nie saak wat gebeur nie. Al skud die berge. As daar aardbewings is wat ’n tsoenami veroorsaak kan jy God vertrou om jou te help. ’n Gevaar wat egter groter is as enige nood wat deur aardbewings, tsoenami, siekte of wat ook al hier op aarde is, is die gevaar van die ewige dood weens ons sondige opstand teen God. Wat is die ergste wat mens hier op aarde kan tref? Die liggaamlike dood. Wat is erger as die liggaamlike dood? Die ewige dood waar mens vir ewig helse smart en pyn sonder God se vertroosting ervaar.

God is nog altyd bereid om te help met die nood wat ons ervaar omdat ons sonde die verhouding tussen ons en God gebreek het.

Blydskap in die Godstad (Ps. 46:5-8)

Om te beklemtoon dat mens veilig by God is, beskryf die Psalmdigter op ’n ander manier God se sorg vir sy volk. In verse 5-8 word die volk se blydskap beskryf omdat God Homself as ’n lewendgewende rivierstroom aan sy volk gee. Water verteenwoordig lewe. Sonder water is daar nie lewe nie. In Open 21:6 hoor ons:

Ek is die Alfa en die Omega, die Begin en die Einde. Aan elkeen wat dors het, sal Ek te drinke gee uit die fontein met die water van die lewe, verniet.

God is die lewende water wat aan sy uitverkore kinders die ewige lewe gee.

Hy is snags teenwoordig by sy volk en daarom sal die Godstad niks oorkom nie. Die volke en nasies kan maar probeer om teenoor God in opstand te kom, dit sal hulle niks baat nie want God is almagtig.

In vers 8 word God se almag vir ons beskryf met sy Hebreeuse Naam Sebaot. Dit beteken letterlik ’n Almagtige heerser wat oor die heelal heers. Alles, dit wil sê elke mag of natuurkrag en elke volk en nasie, elke mens is aan sy heerskappy onderworpe. In die 83 Vertaling is sy naam vertaal met “die Here die almagtige” en in die Ou Vertaling is dit met “die Here van die Leërskare” vertaal. Ons kan dit ook vertaal met “die Here wat oor alles regeer.”

Die klem is dus hier op die almag van God. Daarom kan ons met vertroue by Hom skuiling soek omdat daardie skuiling wat Hy gee nie deur die vyand ingeneem kan word nie. Dit is soos ’n fort wat op ’n hoë berg wat omring is deur onklimbare steil kranse met hoë mure wat die fort bo-op daardie kranse omring. Dit is dus ’n vesting wat nie deur die vyand ingeneem kan word nie. Ons kan God dus vertrou om te help wanneer ons in nood verkeer omdat Hy almagtig is en daarom vir ons ’n veilige skuilplek gee. Die situasie of omstandighede verander nie, maar daai hopelose benoudheid (verlammende vrees) wat jy ervaar neem Hy weg en Hy dra jou veilig deur die gevaar. As ons eers eenmaal deur God se genade gered is, is daar niks wat ons van sy liefde kan skei nie.

Kom kyk wat die Here gedoen het (Ps. 46:9-12)

In hierdie laaste verse val die klem nou op wat die Here vir sy volk doen. God die Almagtige laat oorloë ophou. Hy breek die opstandige nasies se spiese en verbrand hulle oorlogswaens sodat hulle kan weet en erken dat Hy alleen God is. Daarom voel sy volk veilig by Hom.

In hierdie Psalm sê die Here vir ons hoekom sy volk vir niks bang was nie. Hulle het in hul nood gedink aan God se dade in die verlede en terwyl hulle dit gedoen het, het hulle onthou wat Hy alles vir hulle beteken het. Toe het hulle geweet dat hulle Hom kan vertrou en dat hulle vir niks meer bang hoef te wees nie. Op grond van God se troue verbondsliefde kan ons ook die beloftes vertrou wat Hy in Open 21:3-5 vir ons gee.

³Toe het ek ’n harde stem van die troon af hoor sê: “Kyk, die woonplek van God is nou by die mense. Hy sal by hulle bly; hulle sal sy volke wees, en God self sal by hulle wees as hulle God. ⁴Hy sal al die trane van hulle oë afdroog. Die dood sal daar nie meer wees nie. Ook leed, smart en pyn sal daar nie meer wees nie. Die dinge van vroeër het verbygegaan.”

⁵Toe sê Hy wat op die troon sit: “Kyk, Ek maak alles nuut.”

Hoe vind ons troos in hierdie Psalm?

As daar by my nog enige onsekerheid is oor wat anderkant die dood vir my wag en as dit my doodsbenoud maak kan ek my troos in Jesus Christus vind. Dan kan ons vashou aan ons belydenis in Sondag 1 van die Heidelbergse Kategismus dat my enigste troos in lewe en in sterwe is dat ek aan Jesus Christus behoort.

Toe ons op die punt gestaan het om veroordeel te word tot die ewige dood het God sy Seun in ons plek laat sterwe. Toe Jesus so benoud was dat Hy bloed gesweet het, was daar vir Hom geen skuilplek teen gevaar gewees nie. Daar was nie vir Hom ’n toevlug en beskerming gewees nie. In helse pyn en smart het Hy in bange Godverlatenheid uitgeroep: “My God my God, waarom het U my verlaat?” Daar was vir Hom geen troos of beskerming toe Hy die dood tegemoed gegaan het nie. Hy het dit gedoen sodat daar vir ons ’n toevlug en beskerming kan wees teen die vyand van ons sondige geaardheid. Op grond van wat Jesus Christus vir ons aan die kruis gedoen het kan ons ook met sekerheid sê:

Die Here, die Almagtige , is by ons, die God van Jakob is vir ons ’n beskutting

God is vir ons ’n toevlug en beskerming en daarom kan ons ook daarna uitsien dat Hy Homself as ’n lewendgewende rivierstroom aan ons sal gee. Hy is in die persoon van die Heilige Gees altyd by ons teenwoordig en daarom kan ons veilig by Hom voel. Kom ons soek skuiling teen die vyand van die sonde by God, want Jesus is vir ons ’n toevlug en ’n beskerming.

Amen

Kom saam met My en Ek sal julle vissers van mense maak

30 Mar 2014

Skriflesing Mat 4:12-22 teksvers Mat 4:19

Liturgie

Ps. 111-2:1 & 3

Ps. 112-2:1 & 3

Ps. 119-2:7,18 & 19

Sb 3-4:1 & 5

Inleiding

Wanneer mens belydenis van geloof aflê erken jy daarmee dat jy ’n volgeling / dissipel van Jesus wil wees. Wat beteken dit om ’n volgeling van Jesus te wees?

Tyd van voorbereiding

In ons teksgedeelte hoor ons van Jesus wat met bediening (sy werk) hier op aarde begin het en ook waar Hy sy eerste volgelinge geroep het. Om dit egter mooi te verstaan is dit nodig dat ons na die groter prentjie, dit wil sê die agtergrond van die gebeure kyk (konteks). Voor hierdie gebeure het daar twee belangrike gebeurtenisse in Jesus se lewe plaasgevind: sy doop en sy versoeking deur satan in die woestyn soos ons hoor in Mat. 3:31-4:11.

Hierdie gebeure was ’n belangrike tyd van voorbereiding vir Jesus se werk hier op aarde. Daarin het Jesus vir ons gewys dat Hy Homself volledig aan sy Vader se wil onderwerp het. Met sy doop wou Johannes Hom aanvanklik nie doop nie, want hy het gemeen dat hy wat Johannes is eerder deur Jesus gedoop moes word. Jesus maak egter sy besware stil deur te sê (Mat 3:15):

“Nogtans moet jy dit nou doen, want op hierdie manier moet ons aan die wil van God voldoen.”

Met sy versoeking het Hy gewys dat ons die satan oorwin deur volkome gehoorsaamheid aan God. Hiermee het Jesus gewys dat Hy self bereid was om te doen wat Hy van sy volgelinge verwag om te doen. Verder het Hy ook gewys dat oorgawe aan God se wil rus en kalmte bring.

Omdat Jesus egter die sondigheid van die mens geken het, het Hy baie meer gedoen as om net ’n voorbeeld te stel. Hy was tot die dood toe gehoorsaam aan God deur ons straf vir die sonde te dra en daarmee het Hy ons in staat gestel om aan God gehoorsaam te wees. Om ’n volgeling van Jesus te word beteken dus vir ons dat ons ook ’n tyd van voorbereiding moet deur gaan (katkisasie). Ons voorbereiding is egter anders as wat Jesus sin was. In ons tyd van voorbereiding moet ons God leer ken en leer hoe ons, ons verhouding weer met Hom in Jesus Christus herstel kan word.

Toe Jesus na die Woestyn toe gegaan het is Hy deur die Heilige Gees gelei om dit te doen soos ons hoor in Mat 4:1

Toe is Jesus deur die Gees die woestyn in gelei om deur die duiwel versoek te word.

Ons voorbereiding beteken ook dat ons deur die Heilige Gees gely word om die verlossing in Jesus Christus deur middel van geloof aan te gryp. Met ander woorde Ons kry kennis van die verlossing in Jesus Christus se kruisiging en opstanding deur te hoor en die Gees wek in ons die geloofsvertroue dat dit wat ons geleer het die waarheid is. Daarom word die belydenis van geloof ook ingely met “Glo u .....” Ons sal later tydens die belydenis aflegging in meer detail daarby stilstaan.

Daar is dus ’n tyd van voorbereiding nodig sodat ons kan weet wat ons moet glo om ’n volgeling van Jesus Christus te word.

Bekering

Bekering is ’n volgende aspek van ’n volgeling van Jesus. In Mat 4:17 hoor ons:

“Bekeer julle, want die koninkryk van die hemel het naby gekom.”

Wanneer jy ’n volgeling van Jesus is moet mens jouself bekeer. Bekering beteken ’n radikale rigting verandering in jou lewe. As jy ’n volgeling van Jesus word, kan jy nie maar net met sy ou lewe voorgaan nie. ’n Volgeling van Jesus is nie meer in opstand teen God se wil nie, maar daar is ’n opregte begeerte by hom/haar om gehoorsaam te wees aan God se wil.

Roeping

Bekering bring ’n radikale verandering in mens se lewe te weeg. Gely deur die Heilige Gees luister jy na die roepstem van Jesus. In Mat 4:20 hoor ons:

Hulle het dadelik die nette gelos en Hom gevolg.

en in Mat 4:22 hoor ons weer

hulle het dadelik die skuit en hulle pa verlaat en vir Jesus gevolg.

Dit beteken ’n volkome gehoorsaamheid aan die wil van God.

Wanneer Jesus ons roep om Hom te volg, maak Hy ook ’n belofte: (Mat 4:19)

Kom saam met My, en Ek sal julle vissers van mense maak.

’n Belofte dat Hy ons sal gebruik om te werk in sy koninkryk.

Jesus begin sy bediening deur die lig van God se Koninkryk te bring na daar waar die duisternis oorheers. Hy vestig Homself in Kapernaum aan die bopunt van die meer van Galilea. Dit is die gebied van Sebulon en Naftali wat verag was. In Jes. 8:23 hoor ons dat daar na hierdie gebied verwys word as die land van duisternis. Een van die groot temas in die Bybel is dat God lig is. As mens God dus nie ken nie, woon jy in die duisternis. Dit is juis na hierdie mense wat God nie ken nie, wat Jesus gaan.

Wanneer jy ’n volgeling van Jesus is, het jy die roeping om die evangelie (die goeie nuus van die versoening met God in Jesus Christus) te bring aan mense wat nog in die duisternis leef sonder God omdat hulle Hom nie ken nie. Dit is egter nie ’n taak wat ons in eie krag moet aanpak nie. Hy maak ons vissers van mense. God rus ons toe om die werk te doen wat Hy van ons vra.

Samevatting

Om ’n volgeling van Jesus te word, beteken dat ons moet leer wie Hy is en hoe Hy ons weer met God versoen. ’n Volgeling van Jesus luister na God en daar is by hom/haar ’n opregte begeerte om te doen wat God van ons vra. Jesus gebruik sy volgelinge om aan mense wat Hom nie ken nie te vertel wie Hy is en dat as hulle in Jesus glo hulle God ook persoonlik kan leer ken.

Die Here roep ons: “Kom saam met My” en wanneer ons belydenis van geloof aflê, antwoord ons Hom deur te sê: “ja Here ek wil die pad saam met U stap. Gebruik my in U koninkryk.”

Amen

Niks kan in hierdie wêreld vir ons blywende geluk gee nie, slegs God kan dit doen.

23 Mar 2014

Skriflesing Pred. 2 Teksvers Pred. 2v10&11

Liturgie

na Votum Ps. 48 v 1 & 3  (OAB)

Na Wet Ps. 119 v 1  (OAB)

Na gebed Ps. 119 v 39  (OAB)

Slotsang Ps. 46 v 1 & 6 (OAB)

Inleiding

Het u al ooit vir die grootste leuen in hierdie wêreld geval? As ek maar net ’n miljoen kan kry of wen dan sal ek gelukkig wees! As ek maar net genoeg geld het sodat ek nie meer so hoef te sukkel nie, dan sal ek gelukkig wees. As ek genoeg geld het dan kan ek bekostig om soveel plesier te hê as wat ek wil. As ek genoeg geld het dan kan ek koop wat my hart begeer. Dan kan ek daardie huis bekostig wat ek nog altyd wou gehad het. Ons dink so dikwels dat geld die sleutel tot geluk in hierdie lewe is. Die groot vraag is egter: “kan geld werklik vir ons blywende geluk kan verskaf?”

Hier in ons teks hoor ons hoe die Prediker (wat volgens die beskrywings in die boek Salomo is) ook geluk nagejaag het. Daarin vind ons sy soeke na geluk en die rede waarom hy dit nie gevind het nie. Daarna gaan ons ook hoor waar ons ware blywende geluk kan vind. In die eerste plek gaan ons nou stilstaan by Salomo se soeke na geluk.

Die soeke na geluk

Salomo wou bepaal hoe hy blywende geluk kon vind en daarom het hy ’n eksperiment uitgevoer om te bepaal hoe hy blywende geluk kon vind. In die eerste plek het hy plesier probeer soos ons hoor in Pred. 2v1:

Ek het by myself gedink: laat ek my oorgee aan plesier, laat ek die lewe geniet!

Dit het egter nie geslaag het nie soos ons hoor in Pred. 2v1b&2

Maar ook dit het niks opgelewer nie. Van lag moes ek sê: dis sinloos, en van plesier: wat bring dit?

Toe dit nie slaag nie het hy drank oorweeg soos ons hoor in Pred. 2v3:

Ek het gewonder wat sal gebeur as ek my aan wyn oorgee maar tog nog op soek bly na wysheid, as ek soos ’n dwaas leef totdat ek vasgestel het wat die beste is waarmee ’n mens hom sy lewe lank in hierdie wêreld besig kan hou.

Hierin kan ons sien dat hy nie maar net homself onnadenkend aan lewe van plesier en drank oorgegee het nie, maar dat hy werklik besig was om te probeer uitvind of mens daardeur blywende geluk kon vind, daarom sê hy dat hy bly soek het na wysheid.

Die volgende ding wat Salomo getoets het was om groot bouprojekte aan te pak. Hy het huise gebou het en wingerde aangeplant. Hy het tuine en parke aangelê waarin hy allerhande bome en vrugte bome geplant het. Hy het die nodige damme aangelê wat water vir die tuine moes verskaf. Verder het hy ook genoeg slawe en slavinne aangeskaf wat na al die werk moes omsien. Hy het besittings opgegaar en ook baie geld bymekaar gemaak soos ons hoor in Pred. 2v8a:

Ek het vir my silwer en goud opgegaar wat ek gekry het van konings en provinsies.

Verder het hy gesorg vir genoeg ontspanning soos ons hoor in Pred. 2v8b:

Ek het vir my sangers en sangeresse gewerf, talle mooi meisies met wie ek die lewe kon geniet.

Omdat hy dit kon doen, het hy alles vir hom gekry wat sy hart begeer het soos ons in Pred. 2v10 hoor:

Alles wat ek begeer het, het ek my veroorloof; ek het my geen plesier ontsê nie.

Dit laat mens dink aan die ryk filmsterre met hulle groot weelderige huise daar in Hollywood. Die groot partytjies wat hulle hou en al die meisies wat in sulke klien bikini’s daar om die swembad rondloop.

Dit bring ons maar net weereens by die vraag: “kan geld, werklik geluk koop?” Ons moet egter mooi dink voordat ons te vinnig “nee” antwoord omdat ons weet dat dit die regte antwoord is. Salomo het tog ook tot daardie slotsom gekom het soos ons hoor in Pred. 2v11:

Maar toe ek goed nadink oor alles wat ek gedoen het en oor alles waarmee ek my met soveel sorg besig gehou het, het ek gesien dat alles niks  was, ’n gejaag na wind. In hierdie wêreld bevredig niks nie

As ons doodeerlik met onsself is, dan sal ons erken dat ek ook graag so ’n miljoen of twee op die Lotto sal wil wen (selfs al speel ons nie Lotto nie, en dalk koop ek maar so dan en wan ’n Lottokaartjie). Is die denke dat geld geluk kan koop, nie maar die rede waarom soveel mense vir geldslenters gevang word nie en dan al hulle reserwefondse daardeur verloor? Is dit nie die rede hoekom ons soms so maklik ons swaarverdiende geld op riskante beleggingskemas waag nie?

Dit is eers wanneer ons die werklike rede verstaan waarom geld en rykdom nie geluk kan koop nie, dat ons verlos sal word om na rykdom te smag. Dit help nie ons staan net stil by vers 11 omdat Salomo gesê het dat die soeke na rykdom maar net ’n gejaag na wind is nie. Dit help selfs nie eens as ons ’n paar voorbeelde ophaal van die superrykes in ons wêreld wat ten spyte van al hul rykdom sielsongelukkig is nie, want daar is ook ryk mense wat wel gelukkig is. Rykdom en plesier is opsigself nie boos en verkeerd nie (ons gaan later stilstaan waarom nie). Vervolgens gaan ons nou stilstaan by die rede waarom geld en rykdom op hul eie nie geluk kan verskaf nie.

Geld en rykdom kan op hul eie nie geluk verskaf nie

Waarom het Salomo tot die slotsom gekom dat alles waarmee hy homself met soveel sorg besig gehou het, op niks uitgeloop het nie. Waarom was dit ’n gejaag na wind? Hy het wel gesê dat wysheid beter as dwaasheid is soos ons hoor in Pred. 2v14a:

Die wyse weet wat hy doen, vir die dwaas is daar net donkerte

Maar tog kom hy tot die slotsom dat selfs wysheid ook nie kan help nie, want so sê hy vir ons in Pred. 2v14b:

maar dit weet ek: een en dieselfde lot tref albei.

In Pred. 2 v 16 hoor ons die rede:

Die wyse sal net so min as die dwaas altyd onthou word. In tye wat kom, word alles vergeet. Die wyse sterf net soos die dwaas!

Die wyse sterf net soos die dwaas! Salomo was baie ryk en wys soos ons hoor in Pred. 2v9:

Ek was magtiger en ryker as almal voor my in Jerusalem. My wysheid het my goed te pas gekom.

Ten spyte van sy rykdom en wysheid kon hy nog steeds nie die straf vir die sonde ongedaan maak nie. Die wyse sterf net soos die dwaas. Met die sondeval is die mens uit die Paradys verban en is die mens aan die straf vir die sonde onderwerp, naamlik die dood. Met al die rykdom en wysheid van hierdie wêreld kan die mens nie die gevolge van die sondeval ongedaan maak nie! Die wyse sterf net soos die dwaas!

Is dit dan verkeerd om die lewe te geniet en is rykdom verkeerd? Nee geliefdes, rykdom opsigself is nie verkeerd nie, solank mens besef dat dit ’n gawe van God is soos ons ook hoor in Pred. 2v24:

Dit is nie aan die mens self te danke dat hy kan eet en drink en onder al sy arbeid nog die goeie kan geniet nie. Ek het ingesien dat dit ’n gawe uit die hand van God is.

Dit is slegs wanneer die soeke na rykdom en plesier ’n doel opsigself word, dat dit ’n gejaag na wind word. Wanneer mens jou geluk in rykdom en plesier soek, dan vind mens dat leeg en sinloos word. Sonder God word die lewe ’n gejaag na wind. Dit is net by God waar mens ware geluk en vrede kan vind.

Waar vind ons dus ware en blywende geluk?

Ons vind ware en blywende geluk alleen by God. Sonde veroorsaak dat ons van God afgeskei raak en wanneer ons van God geskei is, raak die lewe sinloos en leeg. Sonder God is die lewe ’n gejaag na wind. Dit is slegs deur Jesus Christus wat ons God weer kan vind omdat Hy alleen weer vir ons die lewe wat ons verloor het kan teruggee soos ons hoor in Joh. 11v25:

“Ek is die opstanding en die lewe. Wie in My glo, sal lewe, al sterwe hy ook

In Joh. 14v6 hoor ons dat Jesus die enigste weg tot die Vader is:

“Ek is die weg en die waarheid en die lewe. Niemand kom na die Vader toe behalwe deur My nie.

Samevatting

Deur die boek Prediker wys die Here vir ons watter lewenspad na leegheid lei en help Hy ons om te ontdek wat die ware doel met die lewe is. Hierdie kennis kan ons beskerm teen die leegheid wat daar in ’n lewe sonder God is. Hy leer vir ons dat dinge soos kennis, geld, plesier, werk en gewildheid geen betekenis het nie.  Ware bevrediging kom as ’n mens weet dat die dinge wat ons doen, deel van God se plan vir ons lewens is.  Deur sy lewende Woord in die boek Prediker help die Here ons om ons te bevry van ons ewige sug na mag, goedkeuring en geld én kan ons ook daardeur nader na God gebring word.

Geliefdes moenie geluk by verkeerde plekke soos plesier en rykdom soek nie. Laat ons eerder ons geluk by die Here in Jesus Christus soek, want niks kan in hierdie wêreld vir ons blywende geluk gee nie, slegs God kan dit doen.

Amen

Toewyding aan die Here kom uit die hart, nie deur middel van menslike tradisies nie

16 Mar. 2014        

Mar 7:1-23 teksverse 7 & 14

Ps. 31-1:1 & 3

Sb 7-2: 1 – 2

Ps. 86-1:6

Sb 9-3:1 & 2

Kan mens oorywerig wees in jou diens aan God? Kan mens te veel doen? Ja, mens kan! Wanneer mens die Here probeer dien deur menslike gebruike wat nie in die Skrif voorgeskryf word nie loop mens die gevaar om die Here op jou eie manier te probeer dien in teenstelling met wat God van ons vra. In Jes. 29:13 hoor ons hoe die Here Israel daarteen waarsku:

Die Here het gesê:

Hierdie volk is naby My met die mond, hulle eer My met wat hulle sê, maar hulle hart is ver van My af, hulle dien My soos mense dit wil hê,

nie soos Ek wil nie.

Dit is dan ook hierdie teks wat Jesus aanhaal wanneer die Fariseërs Hom konfronteer met die vraag (Mar. 7:5)

“Waarom handel u dissipels nie volgens die oorgelewerde gebruik van die voorgeslagte nie en eet hulle met onrein hande?”

Jesus se antwoord aan die Fariseërs en Skrifgeleerdes wys vir ons dat hierdie nie ’n ligtelike saak is nie (Mar. 7:6)

Die profeet Jesaja het julle mooi opgesom. Julle is skynheiliges

Jesus noem hulle skynheilig! Met ander woorde hulle gee voor dat hulle vreeslik heilig is, maar eintlik is hulle dit glad nie. Jesus wys hulle op hierdie valsheid deur hulle te wys op wat in Jes. 29:13 geskryf is:

soos daar geskrywe staan:

Hierdie volk eer My met hulle mond, maar hulle hart is ver van My af.

Dit help niks dat hulle My probeer dien deur leerstellings van mense

as gebooie van God voor te hou nie.

Op die oog af klink dit of die Fariseërs ’n punt het. Mens moet tog jou hande was voordat jy eet. Dit gaan egter nie hier daaroor nie. Die dissipels se hande was nie vuil nie. Dit was volgens die Fariseërs en die Skrifgeleerdes onrein, met ander woorde hulle was nie vir God aanvaarbaar nie. Die Jode het ’n magdom voorskrifte en rituele by die Skrif bygevoeg wat nie deur God voorgeskryf is nie. Een daarvan was dat hulle, hul hande op ’n plegtige wyse voor ete moes was, nie noodwendig omdat hulle vuil is nie, maar omdat hulle onrein is.

Hierdie gebruik was oënskynlik gegrond op ’n Bybelse voorskrif. Volgens Eks. 30:18–19;  40:31–32 moes die priesters hulle hande en voete by die tabernakel en tempel was. Dit was ’n plegtigheid wat by die diens van God gehoort het. Later is dit uitgebrei na alle Jode en by elke ete. Wat dus eintlik hier gebeur het is dat ’n voorskrif van God verdraai is en dat daar ’n heel ander betekenis daaraan geheg is as wat God bedoel het. Die werklike motief agter hierdie voorskrifte was om deur middel van die gebruike hulself vir God aanvaarbaar te maak. So word die genade van God opsy geskuif vir ’n werke gebaseerde godsdiens.

Soos ons laas week gehoor het kan ons met ons goeie dade niks voor God verdien nie. Hierdie week leer ons dat ons met mensgemaak tradisies en gebruike ook nie God se guns kan verdien nie. God gee aan ons die ewige lewe op grond van sy genade alleen soos ons hoor in Joh. 3:16-18

“God het die wêreld so lief gehad dat Hy sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê. God het nie sy Seun na die wêreld toe gestuur om die wêreld te veroordeel nie, maar sodat die wêreld deur Hom gered kan word. Wie in Hom glo, word nie veroordeel nie; wie nie glo nie, is reeds veroordeel omdat hy nie in die enigste Seun van God glo nie.

Die Fariseërs en die Skrifgeleerdes het voorgegee dat hulle baie vroom en opreg was in hul diens aan God. Jesus wys hulle egter op hulle valsheid soos ons hoor in Mar.7:6&7. Jesus gaan egter verder om hulle te ontmasker. Hy wys hulle daarop dat hulle eintlik nie net iets byvoeg nie, maar dat hulle die opdrag van die Here opsy skuif en dit vervang met iets wat teenstrydig is met die God se opdrag (Mar. 7:9-12)

“Julle verstaan die kuns goed om die gebod van God opsy te skuiwe en julle oorgelewerde gebruike in stand te hou. Moses het gesê: ‘Eer jou vader en jou moeder’ en: ‘Wie sy vader of sy moeder vloek, moet sekerlik doodgemaak word.’ Maar julle sê: ‘Iemand kan vir sy pa of sy ma sê: Enige gawe wat u van my sou kon kry, is korban,’ dit wil sê: ’n offergawe vir God. En so laat julle hom toe om hoegenaamd niks vir sy pa of sy ma te doen nie.

Die gevolg hiervan is baie ernstig soos ons hoor in Mar. 7:13

So ontneem julle die woord van God sy gesag deur julle oorgelewerde gebruike wat julle op julle beurt weer oorgelewer het.

Wanneer mens God op ’n ander manier dien as wat Hy wil hê, dan is jy nie besig om God te dien en eer nie. Inteendeel dan onteer jy God.

Dan brei Jesus nog verder uit om die saak aan almal wat gekom het om na Hom te luister te verduidelik soos ons hoor in Mar. 7:15

Niks wat van buite af in ’n mens ingaan, kan hom onrein maak nie; maar die dinge wat uit ’n mens uitkom, dit maak hom onrein.”

Na sy dissipels Hom verder daaroor uitgevra het, het Hy dit soos volg aan hulle verduidelik (Mar 7:18-19)

“So, dan verstaan julle dit ook nie? Begryp julle nie dat niks wat van buite af in ’n mens ingaan, hom onrein kan maak nie, omdat dit nie in sy hart ingaan nie maar in sy maag, en daarna uit sy liggaam uitgaan?”

Dit wat uit die hart uitkom word deur ons gesindheid bepaal. Dis nie allerlei gebruike wat bepaal hoe opreg ons in ons diens teenoor God is nie. Op die oog af lyk die tradisies en rituele vroom en voorbeeldig, maar eintlik beteken dit niks soos ons hoor in 2 Tim. 3:5

Hulle sal nog die uiterlike skyn van die godsdiens hê, maar die krag van die godsdiens sal hulle nie ken nie. Bly weg van sulke mense af.

Enkele voorbeeld daarvan: Onlangs was dit in die nuus van die pastoor wat sy gemeente laat gras eet het sodat hulle kan wys hoe toegewyd hulle aan God is. Hierdie voorbeeld klink dalk absurd. Ons sal ons nooit so iets doen nie. Ons sien maklik die ekstreme voorbeelde raak vir die gekheid wat dit is. Maar ons kyk dikwels die subtiele voorbeelde mis. Dink maar byvoorbeeld aan die gebruik dat die ds. en die kerkraad wit dasse met swart pakke moes dra. Nee, dis nie net die NG kerk waar dit gebeur nie. Daar was Gereformeerde Kerke waar hierdie gebruik ook voorgekom het!

Iets wat deesdae baie algemeen by Christene voorkom is die handhawing van ’n 46 dae vastyd voor Paasfees. “Ash Wednesday” soos dit in Engels genoem word, is die eerste dag van daardie vastyd. Dan word daar as op die voorkop aangesmeer. Dit dien dan as ’n teken van rou en verootmoediging voor die Here. Verder onderneem die mense wat daaraan deelneem dan ook om van iets te vas waarvan hulle baie hou. So is daar baie mense wat byvoorbeeld geen sjokolade en lekkernye eet in hierdie tyd nie. Hulle offer as te ware dit op vir die Here. Wat sê die Here daarvan? Luister na wat Hy in Kol. 2:23 daaroor sê:

Hierdie leerstellings het wel ’n skyn van wysheid met hulle selfgemaakte godsdiens, danige nederigheid en streng beheersing van die liggaam, maar dit het geen waarde vir die beteueling van die sondige drifte nie.

Geliefdes, nou kan ons maklik dink: “sjoe ons doen dit darem nie in ons gemeente nie!” Ons probeer nie om met mensgemaakte tradisies onsself rein, dit wil sê aanvaarbaar vir God maak nie. Maar is ons harte nie ook maar dikwels soos dié van die Fariseërs en Skrifgeleerdes nie? In Mar. 7:20-23 hoor ons:

“Maar,” het Hy verder gesê, “wat van binne af uit ’n mens kom, dit maak ’n mens onrein. Van binne af, uit die hart van die mens, kom die slegte gedagtes: onkuisheid, diefstal, moord, owerspel, hebsug, kwaadwilligheid, bedrog, losbandigheid, afguns, kwaadpratery, hoogmoed, ligsinnigheid. Al hierdie slegte dinge kom van binne af en dit maak ’n mens onrein.”

Hou ons nie maar alte dikwels onself baie vroom voor nie, maar in ons harte is al hierdie slegte dinge steeds teenwoordig. Ek is mos ’n goeie Christen, maar ons optrede wys die teendeel. Ons optrede getuig nie daarvan dat ons gehoorsaam is aan God se gebod nie.

Waar kry ons die krag vandaan om hierdie sondige drifte in toom te hou? Ons kry ons krag in by God alleen. Saam met Christus is ons deur die krag van die Heilige Gees uit die dood opgewek en daarom kan ons ook nou ’n nuwe lewe lei. Wanneer ons lewens deur die Gees van God beheers word, het ons Goddelike krag om te stry teen ons sondige drifte.

Samevatting

Mensgemaakte tradisies en gebruike skuif die genade van God opsy vir ’n werke gebaseerde godsdiens wat nog die uiterlike skyn van godsdiens het, terwyl dit heeltemal sonder krag is.

Met ons goeie dade kan ons niks voor God verdien nie. Netso kan ons met mensgemaak tradisies en gebruike ook nie God se guns kan verdien nie.

Wanneer ons God op ’n ander manier dien as wat Hy wil hê, dan is ons nie besig om Hom te dien en eer nie. Inteendeel dan onteer ons God.

Dit is net God se genade in Jesus Christus se soenoffer aan die kruis wat ons rein maak en dit is net wanneer ons lewens deur die Gees van God beheers word dat ons Goddelike krag het om te stry teen ons sondige drifte.

Geliefdes, kom ons wees waaksaam teen mensgemaakte tradisies en gebruike wanneer ons God aanbid.

Amen

Wat moet ek doen om die ewige lewe te verkry?

9 Mar. 2014        

Mat 19:16-30 tkv’se 16 ; 21 (Sien ook Mar 10:17-31 & Luk 18:18-30)

Ps. 128-1:1&4

Ps. 1-1:1&2

Ps. 130-1:1-4

Sb 17-1:1,5&6

Wat moet ek doen om die ewige lewe te verkry? Dit is een van die belangrikste lewensvrae waarvoor elke mens ’n antwoord moet kry. Die alternatief, ewige dood is nie ’n aantreklike alternatief nie. Of ek nou daarvan hou of nie, een van die twee alternatiewe is my voorland en daarom moet ek seker maak watter alternatief vir my gaan geld.

Wat moet ek doen om die ewige lewe te verkry? Dit is die vraag waarmee die ryk jongman in ons teks ook mee geworstel het. Uit die jongman se vraag is dit duidelik dat hy gedink het dat hy iets moes doen om die ewige lewe te verdien en ook dat hy onseker was oor sy ewige bestemming. Geliefdes is u seker oor u ewige bestemming? Wonder u ook soos hierdie jongman of daar nog iets kortkom? Omdat hierdie so ’n belangrike saak is, is dit natuurlik dat ek 100% seker wil maak.

Wanneer Jesus die jongman daarop wys dat net God goed is sê Jesus vir hom dat daar niks inherent goeds is in die mens nie. Die Here sê tog vir ons, “daar is niemand wat goed doen nie, selfs nie één nie” (Ps. 14:3; 53:4 ; Rom. 3:10 & 12). Hiermee is Jesus besig om hom voor te berei vir die boodskap wat volg sodat die jongman sal verstaan wat Jesus bedoel wanneer Hy vir hom sê: “as jy die ewige lewe wil ingaan, onderhou die gebooie.” Die jongman wil doodseker maak en daarom vra hy: “Watter gebooie bedoel u?” Jesus noem die gebooie wat almal oor verhoudings met ons naaste handel. Hy som dit op met: “jy moet jou naaste liefhê soos jouself.”

Die jongman se antwoord wys vir ons dat hy volgens hom ’n goeie lewe gelei het. Hy kom al die gebooie wat Jesus noem stiptelik na van jongs af. Geliefdes is ons nie ook maar soos hierdie jongman nie? Ek is mos ’n goeie mens. Ek kom my plig na. Ek is aktief in die kerk. Ek gee om vir my naaste. Ek sorg vir die armes want ek gooi mos bydrae vir die Diakonie in die sakie. Ek gee my fooitjie vir die karwag wat heeldag daar in die son staan. As daar ’n oproep vir nood is soos byvoorbeeld die aardbewings oorsee ’n jaar of wat terug en die droogte. Ek gee ook vir die kinderhuise. Ek is nie so sleg nie!

Dis wat hierdie jongman ook gedink het, maar tog is ’n daar onsekerheid by hom en daarom vra hy ook: “In watter opsig skiet ek nog te kort?” Dit is hier waar die kern van Jesus se boodskap na vore kom. Met hierdie hele aanloop het Jesus vir die jongman gewys dat daar niks inherent goed is in die mens nie. Die begin van die gesprek was eintlik nog baie onpersoonlik ten opsigte van wie is goed en wie is sleg. Hier maak Jesus dit egter persoonlik. Want tot op hierdie punt is die jongman nog daar waar hy na mense om hom rondkyk en dit is waar ons ook baie maal vashaak. Ek is nie so sleg nie, maar hierdie broers en susters saam met my beter hulle sokkies so bietjie optrek om nie eens te praat van die sondaars daar buite nie!

Die lewensles wat hierdie jongman en ons uit hierdie verhaal moet leer is dat ons onsself nie deur goeie dade kan red nie. Met sy opdrag aan die jongman om al sy besittings te gaan verkoop druk Jesus sy vinger op die seerplek van hierdie jongman se probleem. Vir hierdie jongman was dit sy besittings en sy rykdom. Hy was nie bereid om dit op te gee en homself en sy hele lewe aan die Here toe te wy nie. Dis die vraag wat elkeen van ons vandag ook moet antwoord. Wat staan tussen my en God? Geliefdes dit gaan hier oor meer as geld. Hierdie verhaal se doel is nie om ons te beveel om alles te verkoop en soos ’n monnik in afgesonderde toewyding te gaan leef nie.

Die doel is dat ek moet raaksien wat is dit wat tussen my en die Here staan? Wat is dit wat ek nie bereid is om vir die Here op te gee nie? Vir sommige van ons kan dit dalk ons besittings wees, maar dit kan ook iets anders wees. My werk, my sport, my gesin .....

Luther het gesê: “dit waaraan jy bereid is om die meeste tyd en geld te bestee is jou god, al sê jy ook dat jy ’n ander een dien.” Wat is dit wat ek nie bereid is om afstand van te doen nie?

Toe Jesus hierdie les vir sy dissipels verduidelik was hulle verslae soos ons hoor in Mat 19:25:

Toe die dissipels dit hoor, het dit hulle geweldig ontstel, en hulle het gesê: “Wie kan dan gered word?”

Volgens die Joodse godsdiens van daardie tyd het die ryk mense ’n beter kans gestaan op die ewige lewe vanweë hul rykdom en aansien. As dit vir ’n ryk mens net so onmoontlik was as wat dit vir ’n kameel is om deur ’n naald se oog te pas, watse kans is daar dan vir gewone mense?

Dit is eers wanneer ek besef dat dit vir my onmoontlik is om God se liefde te verdien dat ek werklik die troos in Jesus se antwoord in Mat 19:26 aan sy dissipels sal verstaan:

“Vir mense is dit onmoontlik, maar vir God is alles moontlik.”

Vir die mens is dit onmoontlik om God se straf vir die sonde te dra, maar dit was moontlik vir Jesus om dit in ons plek aan die kruis te dra. Dit is vir my onmoontlik om die ewige lewe te verdien, maar vir Jesus was dit moontlik want met sy opstanding het Hy die dood oorwin sodat ons kan lewe.

Jesus verseker sy dissipels in Mat 19:28 & 29 dat die ewige lewe nou reeds begin. Dat ons nou reeds kan deel in die vreugde God werklik te ken. Dit wat ons in hierdie lewe moet opgee om ’n navolger van Jesus te word is niks in vergelyking met die lewe wat ons saam met God sal hê nie.

En elkeen wat ter wille van my Naam afgesien het van huise of broers of susters of vader of moeder of kinders of grond, sal honderd maal soveel ontvang en die ewige lewe as erfenis kry.

Diegene wat dit egter self in eie krag probeer verdien sal laaste wees en nie die vreugde van ’n lewe saam met God ervaar nie. Die wat laaste is ter wille van God sal eerste wees.

Geliefdes, wat moet ek doen om die ewige lewe te verkry? Ek moet besef dat ek met my goeie dade niks voor God kan verdien nie. Ek moet weet dat ek nie goed is nie, maar dat net God goed en volmaak is. Ek moet verstaan dat dit net God se genade is wat aan my die ewige lewe gee. Ek moet glo dat Jesus my straf aan die kruis in my plek gedra het en dat Hy met sy opstanding aan my lewe gegee het. Wanneer ek dit glo dan sal ek insien dat ek dit wat tussen my en God staan aan God kan opdra en dat ek in die plek daarvan ware lewe saam met God sal hê, nou en ook in die ewige toekoms waarheen ek op pad is.

Wat moet ek doen om die ewige lewe te verkry? Glo. Glo in Jesus Christus.

Amen

Emosies wat by die meeste mense voorkom wat ’n lewenskrisis moet hanteer

Wanneer mens ’n lewenskrisis in die gesig staar kan dit soms voel of dit meer is as wat jy kan hanteer. Jou emosies is op ’n “roller coaster ride” en jy voel of dit jou gaan versmoor. Welmenende vriende en familie probeer jou bystaan maar dit voel vir jou of hulle oproepe op jou om sterk te wees die saak net moeiliker maak, want jy is nie sterk nie en jy weet nie hoe om sterk te wees in die situasie nie! Dit laat ’n gevoel van magteloosheid agter omdat jy voel dat jy nie kan “cope” nie en dat daar daarom iets fout met jou moet wees.

Dit is egter ok om oorweldig te voel, veral as dit ’n groot lewenskrisis is. Om jou te help om hierdie “roller coaster ride” van jou emosies te verstaan volg hier ’n beskrywing van die tipiese emosies wat by die meeste mense voorkom wat ’n lewenskrisis in die gesig staar.

Die aard en erns van die lewenskrisis (bv. soos die verlies aan werk, die opbreek van verhoudings, egskeiding, beserings wat opgedoen word, blootstelling aan misdaad, finansiële krisisse en persone wat met siektes soos kanker gediagnoseer word)  bepaal dan ook natuurlik hoe intens die emosies ervaar word.

’n Belangrike saak wat in ag geneem moet word is dat die emosies wat hieronder aangetoon word nie noodwendig ’n spesifieke volgorde aandui nie, aangesien ’n mens se gemoed dikwels rondskuif tussen die emosies . Verder is dit belangrik dat al die emosies wat genoem word nie noodwendig by elke persoon voorkom nie. Sommige persone sal almal ervaar terwyl ander weer net sekere van die emosies ervaar. Soms gebeur dit ook dat jy terugkeer na ’n emosie wat jy reeds ervaar het. Dit kan ook gebeur dat ’n mens by ’n sekere emosie vashaak.

Die beskrywing van die emosies help mens om te verstaan wat met jou aangaan in jou hantering van die krisis en verder ook dat die verskillende emosies wat jy ervaar normaal is . Wanneer mens weet wat die emosies is wat jy kan verwag na aanleiding van ’n krisis, dan help dit jou om te weet hoe om daarop te reageer.

Emosies van skok / ontkenning en isolasie

Hierdie emosie kom veral voor by mens direk nadat jy slegte nuus verneem of ’n lewenskrisis oor jou pad kom. Mens ervaar ’n gevoel van onwerklikheid. Emosionele gevoelloosheid, paniek, angs kom algemeen voor. Soms huil mens sonder dat jy werklik beheer oor jou trane het. Dikwels ontken mens doelbewus of selfs onbewustelik die krisis en wil jy ook nie hê dat ander mense daarvan moet weet nie. Mens probeer die skyn voorhou dat niks verkeerd is nie. In die geval ’n ernstige siekte soos kanker gryp mens dikwels na allerlei moontlikhede soos ’n tweede opinie, ander medikasie ens .

Emosies van opstandigheid en aggressie

Mens voel gefrustreer met dit wat met jou gebeur en daarom ervaar jy gevoelens van opstandigheid en magteloosheid. Mens vra vrae soos:

s    “Waarom ek?”

s    “Wat het ek dan verkeerd gedoen om dit nou te verdien?”

s    “Hoe kan God toelaat dat so iets met my gebeur?”

s    Mens voel kwaad vir hulself, vir ander en selfs ook vir God en hulle haal dikwels ook hul woede op ’n onredelike wyse die mense rondom hulle uit soos die dokter, die dominee en veral op die mense naaste aan hulle.

’n Onderhandelingsfase

In jou verwerking van die krisis wat in jou lewe plaasgevind het gebeur dit ook dat mens met God probeer onderhandel om die ewewig as te ware te probeer herstel. Mens maak bv. sulke beloftes dat as God jou genees jy sal ophou met rook of dat jou van nou af aan baie meer tyd sal spandeer om jou medemens te help. Hierdie beloftes wat mens maak, stel jy in baie gevale onrealistiese hoë eise aan jouself wat baie moeilik volhoubaar is.

’n Tydperk van rou

Weens die verlies wat mens ervaar rou jy daaroor en dit veroorsaak dat jy terneergedruk voel. Jy voel nie lus om iets te doen nie en dit veroorsaak gevoelens van isolasie en soms voel jy ook gedisorganiseer. Jy voel ook hartseer, bang en onseker.

Aanvaarding

’n Mens kom by die punt waar jy aanvaar wat gebeur het. In die geval van terminale siekte vind daar ’n hernude belangstelling plaas om jou sake in orde te kry en om praktiese aspekte daarvan af te handel.