Vroue in die Bybel 04 – Die Samaritaanse vrou

 Datum:  23 Aug. 2020 Gereformeerde Kerk Empangeni – Ds. George van der Walt

Skriflesing: Joh. 4 v 1 - 26

Teksvers: Joh. 4 v 10

 

Die preek is ook in video formaat beskikbaar by:

1) Ons facebook-blad Gereformeerde Kerk Empangeni

- volledige erediens 

2) Op ons YouTube kanaal Gereformeerde Kerk Empangeni

- Preek alleen

Ons staan vandag stil by die verhaal van 'n vrou waarvan ons nie eens haar naam ken nie. Sy word net bekend gestel as die Samaritaanse vrou. Sommige mense noem haar ook die vrou by die put.

 

In hierdie verhaal van hierdie naamlose vrou kan elkeen van ons, onsself ook vind. Sy verteenwoordig die gewone mens in die samelewing. In haar verhaal sien ons hoe God omgee vir 'n gewone mens en dit gee vir elkeen van ons die troos dat God ook vir my omgee.

 

Haar verhaal begin waar sy Jesus by die buite die dorp ontmoet toe sy in die middel van die dag kom water haal het. Sy is so 'n bietjie geïrriteerd toe Jesus vir haar vra om vir Hom water te gee. Sy kom immers in die middel van die dag na die put toe om nie deur ander mense gekonfronteer te word nie omdat sy deur die mense eenkant toe gestoot is.

 

En nou doen hierdie vreemdeling iets wat ongehoord is. Mans het nie met vreemde vrouens in die openbaar gepraat nie. Jode het nie met Samaritane gepraat nie. Maar ten spyte van haar geïrriteerdheid, is hierdie 'n ontmoeting wat haar lewe gaan verander.

 

In hierdie ontmoeting sien ons hoe Jesus hierdie vrou begelei om 'n behoefte wat sy het, maar nie van weet nie, te identifiseer. Sy het 'n behoefte aan lewende water, maar sy weet nie dat sy dit het nie.

 

Al wat sy weet is dat sy 'n behoefte het wat nie bevredig word nie. Sy verstaan nie wat hierdie behoefte binne in haar is nie en daarom verstaan sy ook nie wat Jesus met lewende water bedoel nie. Lewende water is nie fisiese water wat mens uit 'n put kan skep nie.

 

Die dors waarvan Jesus hier praat is ook nie 'n fisiese dors nie. Dit is 'n geestelike dors na 'n lewende verhouding met God wat deel is van elke mens se wese. Die rede hoekom sy en ook elke mens soos ek en jy so 'n geestelike dors het, kom reeds van die begin af toe ons eerste voorouers in opstand teen God gekom het en ons daardeur afgesny het van die bron van lewende water.

 

Dit veroorsaak ook dat verhoudings tussen mense skipbreuk ly. Dit was die rede hoekom sy in die middel van die dag na die put toe gekom het omdat haar verhouding met die mense in haar gemeenskap nie gesond was nie.

 

Dit is die rede hoekom daar tussen haar as 'n Samaritaan en Jode vyandskap was. Dis die rede hoekom daar spanning heers tussen etniese groepe. Dis die rede hoekom daar tussen geslagte gediskrimineer word.

 

Net soos gewone put water nie jou dors permanent kan les nie, kan enige iets anders as lewende water, ook nie jou geestelike dors les nie.

 

Lewende water is die ewige lewe, dit wil sê die versekering wat die Heilige Gees vir jou gee dat God jou liefhet, dat Hy jou vergewe het en dat Hy deel is van jou lewe op grond van sy genade. Jy drink lewende water wanneer jy God se genade, liefde, vergifnis en teenwoordigheid in jou lewe beleef.

 

Wanneer die vrou tot die besef kom dat Jesus nie besig is om van die put se water te praat nie, vra sy vir Hom om vir haar daarvan te gee. Sy verstaan nog steeds nie wat dit is nie, want sy dink dit sal haar verlos om na die put toe te kom. Sy dink dit sal haar help sodat sy nie per ongeluk iemand by die put ontmoet nie. Sy verstaan nie dat dit wat sy wil hê, nie haar probleem gaan oplos nie.

 

Op hierdie punt lyk dit of Jesus nou maar die punt van lewende water waarmee Hy besig was gelos het en heeltemal 'n ander gesprek begin wanneer Hy vir haar sê: “Gaan roep jou man en kom terug hierheen.”

 

Jesus is egter nie besig om die onderwerp te verander nie. Hy sit nou sy vinger op die seerpunt van die probleem. Hy wys vir haar wat die rede is, hoekom sy nie haar geestelike dors verstaan nie. Hy wys vir haar wat dit is wat keer dat sy verstaan wat lewende water is.

 

Jesus bring haar sonde, dit wat sy probeer wegsteek na vore. Jesus doen dit nie om haar te veroordeel nie. Hy doen dit nie in die openbaar sodat sy verneder word nie, want Hy is steeds besig met 'n privaat gesprek met haar.

 

Die rede hoekom Hy dit doen, is sodat sy kan raaksien wat dit is wat keer dat haar geestelike dors geles kan word. Sy moet raaksien dat sy besig is om haar verkeerde verhoudings te gebruik om haar geestelike dors te red. Sy is besig om putwater te drink in plaas van lewende water.

 

Hierdie vrou is nou op 'n baie ongemaklike plek. Dit is nie maklik wanneer die lig op dit geskyn word, wat jy so diep probeer wegsteek nie. Maar dit is nodig dat dit moet gebeur, anders sal jy nooit werklik by die lewende water uitkom nie.

 

Wat is daar in jou lewe wat keer dat jy lewende water drink? Dit is 'n gesprek wat jy met Jesus in die privaatheid van jou binnekamer moet voer. In 1 Joh. 1 v 9 sê die Here vir ons:

Maar as ons ons sondes bely — Hy is getrou en regverdig, Hy vergewe ons ons sondes en reinig ons van alle ongeregtigheid.

 

Die vrou probeer om die fokus van hierdie gesprek weg te skuif van haar af en daarom bring sy die onderwerp van die plek van aanbidding op, deur te vra: “waar hulle moet aanbid?”

 

Jesus antwoord haar dat die tempel in Jerusalem die regte plek is om te aanbid, maar dat die wêreld op 'n draaipunt in die geskiedenis is waar dit nie meer nodig gaan wees om in die tempel te aanbid nie. Jesus verwys na 'n tyd en daarmee bedoel Hy die tyd van sy kruisiging. Jesus se soenoffer aan die kruis maak dit moontlik dat mense nou direkte toegang tot die lewende water gaan verkry.

 

Jy drink die lewende water deur God in gees en waarheid te aanbid. Jy aanbid in gees en waarheid deur op grond van Jesus se soenoffer aan die kruis tot God te nader.

 

In hierdie gesprek met die vrou het Jesus haar gelei om Hom as die Messias te herken. Deur sy Woord en Woordverkondiging lei Jesus jou ook om Hom as die Messias te herken en wat dit vir jou lewe beteken.

 

Deur die verhaal van die Samaritaanse vrou by die put herinner Jesus vir jou (net soos Hy haar herinner het) dat jy geskep is om lewende water te drink. Hierdie vrou, die verwerpte een, se verhaal vertel vir ons dat jy geskep is om in 'n lewende verhouding met God te leef.

 

Jy is geskep om deur God genade, sy liefde en aanvaarding te beleef. Deur God se liefde word die vyandskap tussen mense van elke ras en kleur en geslag begrawe. Jy is geskep vir God se liefde in jou lewe en om daardie liefde te gebruik om jou medemens lief te hê.

 

Die hele skepping word in 'n verhouding met God saamgebind. Dit is God se liefde wat ons saambind. Dit is God se liefde wat jou dra deur die lewe. Kom drink die lewende water, Jesus, sodat jy God se liefde wat Hy vir jou het, kan vind.

 

Moenie put water drink om jou geestelike dors te les nie, want jy gaan weer dors kry. Jesus sit hier by die put vir jou en wag. Kom kry jou lewende water by Hom.

Amen

Jesus gee lewende water aan almal wat dors het

Skriflesing:     Joh. 4v1 – 30 Teksverse Joh. 4v10

Preek Sondag 8 Des. 2013 (GKE)

na Votum Sb 4-6  

Na Wet Ps. 99-2 v 1 & 4 (NAB)

Na gebed Ps. 119-2 v 8 & 9  (NAB)

Slotsang Ps. 84-1 v 1 tot 3 (OAB)

Woorddiens

Een van die dae herdenk ons weer die geboorte van Jesus Christus. Dit is weer ’n tyd om te besin wat die menswording van God almagtig in die persoon van Jesus Christus werklik vir ons beteken.

Die verhaal van die Samaritaanse vrou by die put wys vir ons hoe Jesus ’n mens se lewe verander. Dit is ’n bekende verhaal wat so baie sê dat daar elke slag iets nuut uitstaan wanneer ons weer daarna luister.

Dit vertel die verhaal van ’n vrou wat deur die lewe eenkant toe gestoot is. Verder het sy die lewe vir haarself nog moeiliker gemaak met die verkeerde keuses wat sy gemaak het. En dan onverwags kom Jesus in haar lewe in met ’n versoek vir ’n bietjie water. Dit is egter ’n versoek wat die vrou bewus maak van ’n veel dieper dors as ’n fisiese dors na water.

So half onwillig word sy gelei om na binne te kyk, daardie selfondersoek wat ’n mens maar eerder wil vermy omdat dit ongemaklike waarhede aan die lig bring. Aanvanklik is sy so half ongeërg met Jesus: “Hoe vra jy, wat ’n Jood is, vir my, ’n Samaritaanse vrou, water om te drink?”

Die Samaritane en die Jode het nie goed met mekaar oor die weg gekom nie omdat die Jode die Samaritane as tweede klas burgers behandel het omdat die Samaritane van gemengde afkoms was. Hulle was die nageslag van die Israeliete wat met die Assiriërs ondertrou het nadat dié hulle in Ballingskap weggevoer het.

Jesus laat Hom egter nie deur hierdie rassediskriminasie tussen die Jode en die Samaritane afsit nie. Sy antwoord bring die diepste nood van hierdie vrou na vore: “As jy geweet het wat God gee, en wie dit is wat vir jou sê: ‘Gee My ’n bietjie water om te drink,’ sou jy Hom gevra het, en Hy sou vir jou lewende water gegee het.”

Die vrou verstaan egter nog nie werklik nie. Sy dink dit gaan nog steeds oor fisiese water en sy antwoord so half en half met ’n afjak. “Meneer, jy het nie eens ’n skepding nie, en die put is diep. Waar gaan jy die lewende water vandaan kry? Jy is tog nie tot meer in staat as ons voorvader Jakob wat hierdie put vir ons gegee het en self saam met sy seuns en sy diere daaruit gedrink het nie?”

Geliefdes is dit nie hoe dit ook maar in ons lewens gaan nie? Hierdie vrou het ’n behoefte na iets meer in die lewe as wat sy tans het. En dan kom die Here in haar lewe in en wys dit vir haar, maar sy sien dit nog nie raak nie. Hoeveel keer gryp die Here nie in ons lewens in en dan sien ons nie die werklike rede daarvoor raak nie?

Hoeveel maal sien ons net soos hierdie vrou net die fisiese materiële behoeftes raak, maar ons mis die geestelike behoeftes? Here help tog net asb. met hierdie probleem wat ek het. Laat dit asb. tog net beter gaan met my geldsake. Here as ek tog net ’n ander motor kan kry. As dit tog maar net beter met my gesondheid kan gaan. En so raak ons verstrengel in die oppervlakkigheid van die materialistiese hier en nou. Is ons slegs bekommerd oor die tydelike dinge in ons lewens, maar ons mis die dieper geestelike sake wat ewigheidswaarde het.

Jesus raak egter nie ongeduldig met die vrou nie. Hy verduidelik nog verder vir haar dat enige iemand wat maar net van hierdie fisiese water drink, dit wil sê vashaak by die wêreldse dinge maar net weer dors gaan kry. Solank as wat ons, ons geestelike dors met wêreldse dinge probeer les gaan dit nooit geles word nie. Partytjies, drank, dwelms rykdom, mag gaan nooit ons geestelike dors les nie.

Net die lewende water wat Jesus self vir ons gee kan daardie dors les. .....wie van die water gedrink het wat Ek hom sal gee, sal in alle ewigheid nooit dors kry nie. Nee, die water wat Ek hom sal gee, sal in hom ’n fontein wees met water wat opborrel en vir hom die ewige lewe gee.

Die lewende water wat Jesus verniet gee, het Hom baie duur gekos. Hy moes met sy lewe aan ’n vervloekte kruishout daarvoor betaal sodat ons kan lewe. Sodat ons in vrede met mekaar en in vrede met God kan leef. Sodat ons werklik by die dinge kan uitkom wat saak maak in die lewe deur vir mekaar om te gee.

Nou eers besef die vrou waarvan Jesus praat en sy vra vir Hom om vir haar van daardie water te gee. Voordat sy egter van die water kan kry moet daar nog iets gebeur. Sy moet eers haar eie hulpeloosheid vanweë haar sonde raaksien en daarom sê Jesus vir haar: “Gaan roep jou man en kom terug hierheen.”

Sy probeer nog wegskram deur te sê dat sy nie ’n man het nie, maar daar is niks wat ’n mens vir God kan wegsteek nie. Wanneer Jesus die volle werklikheid vir haar blootlê probeer sy nog ’n maal. Sy maak gebruik van die taktiek wat ons as kinders vervolmaak het. So binne die eerste vyf minute vra iemand vir die wiskunde onnie iets oor die naweek se rugby en voor jy jou oë kan uitvee is die periode om.

So probeer sy om die aandag van haarself af weg te lei met vraag oor waar daar aanbid moet word. Ons doen dit vandag nog geliefdes. So neem ons ook die fokus van Jesus af weg deur ons besig te hou met allerlei kleinighede soos wat die presiese modestyl moet wees waaraan ons kleredrag moet voldoen of watter liedere ons mag en nie mag sing nie of wat die grote moet wees van die houers waaruit ons Nagmaalwyn moet drink.

Jesus laat egter nie toe dat die vrou die fokus verskuif nie. Hy bring die gesprek weer terug na wat werklik saak maak. As ons nie met Gees en in waarheid ons fokus op Jesus gerig hou nie raak ons die spoor byster.

Ons sien ook in hierdie verhaal watter radikale invloed Jesus se lewende water het op die lewe van hierdie vrou. Sy wat uitgestoot was en haarself eenkant gehou het en wat nie eens water saam met die ander vroue by die put water kom haal het nie, gaan nou uit en vertel aan almal wat sy tot nou toe vermy het die Goeie Nuus van die lewende water wat Jesus vir haar gegee het.

As ons eers eenmaal van Jesus se lewende water gedrink het kan ons nie maar net op die ou trant aangaan nie. As Jesus se lewende water nog nie soos ’n fontein in my opborrel en oorloop nie moet ek myself afvra of ek nie nog steeds besig is met die vermydingstaktieke wat hierdie vrou probeer het nie.

Hierdie verhaal hou ook vir elkeen ’n geweldige troos in. As Jesus bereid was om geduldig tyd te spandeer aan ’n vrou wat deur die samelewing eenkant toe gestoot is sodat sy van die lewendgewende water kon drink wat net by Hom beskikbaar is, kan ek ook weet dat Jesus vir my ook van sy lewende water wil gee.

Jesus is soos water wat lewe oor die dor woestyn van my lewe bring. Hierdie verhaal bring elkeen van ons voor ’n besliste keuse. Gaan ek aanvaar dat Jesus die Messias is wat my van die dorre sondeslawerny kom verlos het? En as ek dit aanvaar, is ek bereid om die implikasies daarvan te aanvaar dat ek ’n nuwe lewe saam met God gaan stap? Gaan ek aanvaar dat ek God se wil in my lewe moet aanvaar?

Geliefdes, het jy dors? Kom dan na Jesus toe want Hy gee lewende water aan almal wat dors het.

Amen