Met sewe kruiswoorde sê Jesus vir ons hoe lief Hy ons werklik het

07 Apr. 2012 (RB)

Skriflesing: Luk. 23:13 – 43 ; Joh. 19:17-35 ; Mat. 27:45 – 46

Teksverse: Luk. 23;34, 43, 46; Joh. 19: 26-28, 30; Mat 27:46

Sing    Lofsang:   Ps. 116 v 8 - 10            (OAB)

           Na wet:      Ps. 130 v 2 & 4             (OAB)

           Na gebed  Sb. 18-6 v 1 , 3 & 5      (OAB)

           Slotsang   Ps. 31 v 3 , 4 & 12        (OAB)

Inleiding

Wat beteken Paasfees werklik vir ons? Volgens die winkeladvertensies lyk dit of Paasfees gaan oor sjokolade paashase en sjokolade eiers. Die haas en die eier is oeroue simbole van vrugbaarheid, want die tydperk waarin ons Paasfees vier, is in die noordelike halfrond vroeë lente, ’n tydperk van nuwe lewe. Vir Christene is dit egter nie waaroor Paasfees gaan nie. Christene herdenk met Paasfees die kruisiging en opstanding van Jesus Christus 2000 jaar gelede wat plaasgevind het in die tyd wat Joodse Paasfees gevier is.

Wat is die werklike betekenis van Jesus se kruisiging en opstanding vir ons? Hierdie betekenis kom duidelik na vore uit die sewe kruiswoorde wat Jesus aan die kruis uitgespreek het. Met sewe kruiswoorde sê Jesus vir ons hoe lief Hy ons werklik het en daarom gaan ons vanoggend stilstaan by die sewe kruiswoorde. Sewe is die volheidsgetal van God en met sewe kruiswoorde hoor ons die volle omvang van Jesus se liefde vir ons.

In die eerste kruiswoord bid Jesus vir sy vyande.

Luk. 23 v 34 : “Vader, vergeef hulle want hulle weet nie wat hulle doen nie!”

Wie is Jesus se vyande? Die maklike antwoord is hulle wat Hom gekruisig het. Hulle wat saam geskree het “kruisig Hom!” Daarmee wys ons gerieflik die vinger weg van onsself af. Die korrekte antwoord is dat alle mense as gevolg van sonde vyande van God is. Die ongemaklike antwoord is dat ek Jesus se vyand is en daarmee wys die vinger direk terug na my toe! Die troos wat ons in hierdie bede van Jesus vind is dat Hy ook vir my aan die kruis gesterf het soos ons ook hoor in Rom. 5 v 8:

Maar God bewys sy liefde vir ons juis hierin dat Christus vir ons gesterf het toe ons nog sondaars was.

Hierin sien ons hoe ware liefde van God haat oorwin. Die verantwoordelikheid wat hieruit voortspruit is dat ek ook my vyande moet vergewe soos wat God my vergewe. Is ek bereid om God se liefde in my lewe te laat werk of leef ek nog in vyandskap met God en my naaste?

In die tweede kruiswoord sien ons Jesus se liefde in die verlossing wat Hy aan boetvaardige mense skenk.

Saam met Jesus het is daar twee misdadigers gekruisig. Een van hulle het die vertroostende woorde van Luk. 23 v 34 gehoor:

“Ek verseker jou: Vandag sal jy saam met My in die paradys wees.”

Waarom het net een hierdie troos gehoor? Slegs een het besef hoe verlore hy in sy sonde is terwyl die ander een Christus gespot het en ander vir sy sonde blameer het. Die een wat gered is het in diepe ootmoed by Jesus gesmeek soos ons hoor in Luk. 23 v 42: “dink aan my wanneer U in u koninkryk kom.”

Volhard ek nog in my sonde waar ek alles en almal blameer of het ek al tot die diepe besef van my verlorenheid gekom sodat ek by Jesus verlossing kan soek? Die troos wat ons in die tweede kruiswoord ontvang is Jesus se liefde vir verlore sondaars wat by Hom verlossing vind.

In die derde kruiswoord hoor ons die ware vertroosting van Jesus se liefde vir diegene wat naby Hom is.

Joh. 19v26-27: “Daar is u seun ........ daar is jou moeder”

In Jesus se diepe nood dink Hy nie aan homself nie, maar sien Hy steeds die pyn en lyding van hulle wat vir Hom dierbaar is raak. Met hierdie kruisgebeure het die profesie van Simeon aan Jesus se moeder waar geword:

En wat jou betref, ’n swaard sal deur jou siel gaan

In hierdie derde kruiswoord sien ons Jesus se liefde raak in sy omgee vir die pyn en lyding van elkeen wat naby Hom is. Sy liefde bied ware vertroosting omdat Hy empatie het met die seer wat ons in hierdie wêreld ly.

Die troos wat ons hierin vind is dat Jesus ook vir ons omgee en dat ons met vertroue na Hom toe kan gaan vir troos wanneer ons pyn en lyding ervaar. Net soos wat Johannes vir Maria in sy huis geneem het, sal ons hemelse Vader al sy kinders in sy huis opneem waar Jesus vir hulle plek voorberei het.

Na hierdie derde kruiswoord was daar drie uur duisternis. Voor die duisternis rig Jesus Hom tot die mense. Na die duisternis rig Hy Homself tot sy lyde in die vierde en vyfde kruiswoorde. Die duisternis dui ook vir ons die dieptepunt van Jesus se lyding aan.

In die vierde kruiswoord hoor ons Jesus se uitroep van Godverlatenheid.

Mat. 27v46:  “My God, my God, waarom het U My verlaat?”

Deur die eeue heen hoor ons hoe mense kerm van Godverlatenheid. Daar was egter net een geval in die geskiedenis waar God werklik sy rug op iemand gedraai, toe Hy Homself van Jesus ontrek het. Dit is wat die ware hel is, naamlik om totaal deur God verlaat te word. Daardeur het Jesus die volle straf gedra van die uitverkorenes.

Die troos wat ons in die vierde kruiswoord ontvang is dat Jesus uit liefde Godverlatenheid ervaar het sodat ons nooit hoef uit te roep: “My God, my God, waarom het U My verlaat?” In ons swaarste aanvegtinge kan ons verseker weet dat God ons nooit alleen laat nie. Hy is daar en daarom kan ons met vertroue by hom hulp en skuiling soek wanneer die lewe moeilik raak en kan ons vashou aan sy belofte wat Hy in Rom. 8 v 38 – 39 vir ons gee:

Hiervan is ek oortuig: geen dood of lewe of engele of magte of teenswoordige of toekomstige dinge of kragte 39of hoogte of diepte of enigiets anders in die skepping kan ons van die liefde van God skei nie, die liefde wat daar is in Christus Jesus ons Here.

Met die vierde kruiswoord hoor ons Jesus se liefde in sy geestelike lyde wat Hy in ons plek gedra het.

In die vyfde kruiswoord hoor ons van Jesus se liggaamlike lyde.

Joh. 19v28 “Ek is dors.”  Jesus het na liggaam en siel gely en daarmee bewys Hy sy liefde vir ons deurdat Hy ons liggaamlik en geestelik verlos. Hiermee kry ons die troos dat ons by Jesus die lewende water kan kry wat vir ons ’n lafenis vir ons lyding en droefheid hier op aarde. Die troos is ook verder dat Jesus ons daarmee verseker dat die lyding hier op aarde van verbygaande aard is. Ons sien daarna uit om na hierdie lewe vir ewig by God te wees waar daar geen hartseer pyn of lyding sal wees nie en dat God self al ons trane sal afdroog. Ons kan nou reeds troos by God vind met die sekere wete dat “die lyding wat ons nou moet verduur, nie opweeg teen die heerlikheid wat God vir ons in die toekoms sal laat aanbreek nie.” soos hy ons belowe in Rom. 8 v18. Gaan soek ons, ons troos by die Here of verval ons nog steeds in ’n troostelose moedeloosheid wanneer die lewe ons omdop?

Die vierde en vyfde kruiswoorde was uitroepe van smart en daarmee troos Jesus se liefde ons omdat Hy bereid was om in ons plek die smart te dra. Die sesde en sewende kruiswoorde is uitroepe van oorwinning.

In die sesde kruiswoord hoor ons hoe Jesus se liefde vir ons ’n nuwe begin in die lewe gee.

Joh. 19 v 30: “Dit is volbring!” Hiermee sê Jesus vir ons dat sy werk as slaaf voltooi is en dat sy werk as Koning begin. Hy het die oorwinning behaal deur volledig vir ons sondes te betaal. Dit is dan ook ’n draaipunt in die wêreldgeskiedenis. Die mag van die sonde is gebreek. Sonde het nie meer ’n houvas op ons nie. Ons het nou ’n nuwe lewe saam met God.

In die sesde kruiswoord hoor ons hoe Jesus se liefde die troos op ons lewensweg is. Al dreig my lewe om sy doel te mis en doelloos te wees is daar vir my die hoop van ’n nuwe begin saam met God. Vir elkeen wat die sesde kruiswoord ter harte neem is daar die hoop dat my lewe sinvols sal wees en dat ek my lewensdoel saam met God sal bereik.

Met die sewende kruiswoord sê Jesus vir ons dat Hy nou ’n nuwe betekenis aan die dood gee.

Luk. 23v46. “Vader, in u hande gee Ek my gees oor.” Met sy lewe het Jesus vir ons gewys hoe om te leef. Nou wys Hy vir ons hoe om te sterf. Een ding in die lewe is seker, naamlik dat ons gaan sterf. Dit wat agter die dood lê bly vir ons ’n onsekerheid. Hier wys Jesus vir ons dat ons, ons nou ook in die dood veilig in die Vader se hande kan toevertrou omdat die dood nie meer ’n straf is nie.

Vir die ongelowige is die dood ’n absolute hopeloosheid en ’n einde aan alles. Vir die gelowige is die dood egter slegs ’n deurgang na ’n volgende bedeling waar ons ewig saam met God sal wees. Omdat Jesus in ons plek die straf vir die sonde gedra het hoef ons nie God se woede in die dood te vrees nie en daarom kan ons vertrou dat God ons veilig sal bewaar. Die troos wat ons hierdeur ontvang is die wete dat ek nou in ’n toestand van onsekere donkerte ingaan waar ek myself nie kan beskerm nie. Daarom vertrou myself aan God se troue Vaderlike sorg toe. Ek vertrou dat U my in die nuwe dag sal wakker maak.

Daarom is die dood vir die gelowige nie die einde nie, maar ’n deurgang tot die nuwe dag van heerlikheid saam met God.

Samevatting

Die ware betekenis van Jesus se kruisdood en opstanding kom duidelik na vore uit die sewe kruiswoorde wat Jesus aan die kruis uitgespreek het. Met die sewe kruiswoorde sê Jesus vir ons hoe lief Hy ons werklik het In die eerste kruiswoord bid Jesus vir sy vyande en daarin sien ons hoe God se liefde ons haat oorwin. In die tweede kruiswoord hoor ons van Jesus se liefde vir verlore sondaars wat by Hom verlossing vind. In die derde kruiswoord hoor ons van Jesus se liefde wat ware vertroosting bied omdat Hy empatie het met die seer wat ons in hierdie wêreld ly.

In die vierde en vyfde kruiswoorde hoor ons van Jesus se lyde. Hy het geestelik en liggaamlik gely. Met die vierde kruiswoord hoor ons van sy Godverlatenheid sodat ons nooit deur God verlaat sal word nie. In die vyfde kruiswoord hoor ons dat niks ons van sy liefde kan skei nie en dat ons uitsien na ’n bedeling waar daar geen lyding meer sal wees nie. Die sesde en sewende kruiswoorde is uitroepe van oorwinning. Met die sesde kruiswoord hoor ons dat daar ’n nuwe begin is vir elkeen wat deur sonde ontspoor is. In die sewende kruiswoord hoor ons dat die dood vir die gelowige nie die einde is nie, maar ’n deurgang tot die nuwe dag van heerlikheid saam met God.

Kom ons vind ons verlossing en vertroosting in die liefde van Jesus wat Hy aan die kruis vir ons gewys het en nie in die oppervlakkigheid van hierdie wêreld nie.

Amen

Die HERE gee in die oorvloed van sy troue verbondsliefde vir ons skuiling teen storms van die lewe

25 Mar. 2012 (RB) Ps. 5 ; Teksverse Ps. 5 v 8 & 9

Sing    Lofsang: Ps. 34 v 1 , 2 & 5          (OAB)

           Na wet:    Ps. 119 v 1                    (OAB)

           Na gebed Ps. 86  v 3                    (OAB)

           Slotsang  Ps. 31 v 1 & 17             (OAB)

Inleiding

Soms dop die lewe ons om. Dinge gebeur waaroor ons geen beheer het en dit voel of ons maar net meegesleur word. Die ergste is daardie gevoel dat ons niks daaraan kan doen nie. Dit is wanneer mens moedeloos word en nie weet watter kant toe nie. Elkeen van ons weet maar alte goed watter dinge in die lewe ons moedeloos maak. Dit is daardie dinge wat dit vir ’n mens laat voel of ons in ʼn hoek gedruk word waaruit ons maar net nie self kan uitkom nie.

Geliefdes: Wat doen mens wanneer dit vir jou voel of die lewe sy rug op jou gedraai het en jy weet nie watter kant toe nie?

In Psalm 5 sien ons dat Dawid ook so benoud gevoel het. Ons leer egter in Ps. 5 dat Dawid gevind het dat die enigste antwoord by God lê. Die HERE sê vir ons in Ps. 5 dat Hy in die oorvloed van sy troue verbondsliefde vir ons skuiling gee teen storms van die lewe.

Met Ps. 5 antwoord God drie belangrike vrae in ons lewens:

F    Waar kry ek antwoorde op my lewenskrisse?

F    Waar kry ek geloofsekerheid?

F    Hoe verander my geloofsvertroue my lewe?

Waar kry ek antwoorde op my lewenskrisse?

In ons teks sien ons dat Dawid in ʼn worstelstryd betrokke was waar sy vyande leuens oor hom versprei het. Uit die Psalm weet ons egter nie wat die omstandighede was wat aanleiding gegee het dat Dawid hierdie Psalm geskryf het nie. Dit is wel in die Psalm baie duidelik dat dit meer was as wat hy as mens kon hanteer.

Dit sien ons duidelik in die intensiteit van sy gebed. In verse 2 en 3 bid hy:

“Luister tog na my woorde, Here, hoor hoe ek sug. Gee tog aandag aan my hulpgeroep, my Koning en my God, want tot U bid ek.”

Dawid is benoud en sy gebed raak al hoe intenser hoe verder hy gaan. HERE hoor my gebed! Verstaan my probleem, HERE help my! Hoor u Dawid se benoudheid geliefdes? Deur die eeue heen het gelowiges vertroosting gevind in die Psalms. In die Psalms praat die Psalmdigters met God. Hulle stort hulle diepste emosies teenoor God uit. Hulle prys God en besing sy lof in die Psalms, maar hulle lê ook hul diepste wroegings voor God neer. In die Psalms leer God ons ook dat ons met ons vreugdes en lewenskrisse na Hom toe moet kom. As jy nie weet wat om te bid nie, haal dan die Psalms aan in jou gebede en weet dat die Heilige Gees jou daardeur help bid want die Psalms is ook die geïnspireerde Woord van God. As jy werklik benoud is en nie weet watter kant toe nie, bid maar gerus :

        “Luister tog na my woorde, Here,
        hoor hoe ek sug. Gee tog aandag aan my hulpgeroep,
        my Koning en my God,
        want tot U bid ek.”

Waar kry ek antwoorde op my lewenskrisse? Ek kry alleen by God antwoorde wanneer ek in gebed tot Hom nader. Wanneer ek in ’n worstelstryd is het ek geloofsekerheid nodig sodat ek op God kan vertrou om my te help in krisistye.

Waar kry ek geloofsvertroue?

Ps. 5 toon die Heilige Gees vir ons baie duidelik aan wat die oorsprong van ’n mens se geloofsekerheid is. In ons teksvers hoor ons hoe Dawid in vertroue tot God nader. Waar kom hierdie vertroue vandaan? Verse 5 tot 8 maak dit duidelik waar dit vandaan kom.

Dawid sê in sy gebed dat God hoogmoediges en leuenaars uitroei en dat Hy moordenaars en bedrieërs verafsku.

“U is nie ’n God wat onreg verdra nie,
die kwaad het by U geen  plek nie.
 Hooghartiges durf nie voor U kom nie.
U haat almal wat onreg doen,
U roei alle leuenaars uit.
Die Here verafsku moordenaars en bedrieërs.”

Sulke mense het geen reg om tot God te nader nie! Tog sê Dawid in vers 8 dat hy tot die HERE mag nader en in sy teenwoordigheid Hom mag aanbid. Bedoel Dawid hiermee dat hy beter is as die mense wat hy in verse 5 tot 7 genoem het?

Nee geliefdes! Dit is dieselfde Dawid wat as gevolg van sy owerspel met Batseba moord gepleeg het. Dawid roem nie hier op sy goeie hoedanighede nie. Hy probeer God nie tevrede stel met sy vroom lewe nie. Dawid sê nie hier: “Ek is beter as daardie slegte mense en daarom is ek vir God aanvaarbaar terwyl hulle nie is nie.” Kom ons luister weer mooi na wat hy sê:

        “Maar ek, ek mag deur u groot liefde in u huis ingaan
        en in u heilige tempel buig met die eerbied
        wat aan U verskuldig is.”

Die Hebreeuse woord wat met groot liefde vertaal is, kan ook vertaal word met troue verbondsliefde.

Die grondrede van Dawid se geloofsekerheid lê dus nie in sy eie pogings om God te probeer tevrede stel nie, maar wel in God se troue verbondsliefde wat Hy teenoor sondaars bewys. God se verbondsliefde verwys na sy verbond wat Hy in die eerste plek met Abraham opgestel het en wat Hy met Abraham se nageslag herbevestig het, ook met Dawid. Die verbond kom volledig van God af waarin Hy belowe om ’n God te wees vir sy volk en Hy van hulle verwag om sy volk te wees. In die verbond bevestig God sy liefde vir sy volk en Hy gee daardie liefde sonder dat Hy verplig is om dit te doen.

God se verbond is ook weer in die Nuwe Testament in Christus met ons as Abraham se geestelike nageslag herbevestig. Op grond van hierdie verbond gee God sy liefde aan die ons. Die inisiatief vir die verbond het immers van God af gekom op grond van sy liefde vir ons. Dit is op hierdie verbondsliefde wat Dawid hom beroep.

God vertel vir ons in die Nuwe Testament hoe groot hierdie liefde van Hom werklik is. In 1 Johannes 4:9-10 sê die HERE vir ons baie duidelik presies wat God se liefde behels:

        “Hierin is die liefde van God tot ons geopenbaar,
        dat God sy eniggebore Seun in die wêreld gestuur het,
        sodat ons deur Hom kan lewe.
        Hierin is die liefde: nie dat ons God liefgehad het nie,
        maar dat Hy ons liefgehad het en sy Seun gestuur het
        as ’n versoening vir ons sondes.”

U sien dus geliefdes, ons geloofsekerheid is gevestig in God se troue verbondsliefde. God het ons so lief dat Hy sy Seun gestuur het as versoening vir al ons sondes. Uit ons eie sal ons nooit goed genoeg wees vir God nie, maar in Christus staan ons vlekkeloos voor God. Ons hoef niks te doen om vir God aanvaarbaar te wees nie. Christus het alles reeds klaar vir ons gedoen!

God se troue verbondsliefde in Jesus Christus is die fondament waarop my geloofsvertroue gebou word.

Hoe verander my geloofsvertroue my lewe?

In vers 9 bid Dawid dat die HERE hom moet leer wat reg is en dat die HERE hom moet help om sy wil te doen. Letterlik staan daar soos die 33/53 vertaling dit ook vertaal:

“Here, lei my in u geregtigheid om my vyande ontwil;
        maak u weg voor my reg.”

Wanneer Dawid die HERE vra om hom te lei in sy geregtigheid, dan vra hy vir die HERE om hom te lei om die sonde te vermy en om die wil van die HERE te doen. Christus som dit soos volg in Mat 22:37 op:

“‘Jy moet die Here jou God liefhê met jou hele hart en met jou hele  siel’ en met jou hele verstand..

In wese vra Dawid dus vir die HERE om hom te help om die HERE ten volle te vertrou en volmaak lief te hê.

In die tweede plek vra Dawid vir die HERE:

        “maak u weg voor my reg”

Wat Dawid hier vir die HERE vra is dat die HERE sy pad wat Hy vir Dawid uitgelê het moet reguit maak. Dawid vra dus hier dat die Here hom moet help om die pad te loop wat die Here vir hom uitgelê het. Om dit van die Here te bid vra geloofsvertroue en geloofsvertroue vind ons slegs in God se troue verbondsliefde wat Hy ten volle in Jesus Christus aan ons bewys het. Geloofsvertroue maak dat ek by God vrede vind, selfs wanneer alles in my lewe skeefloop. Deur God se krag kan ons die pad loop wat Hy vir ons uitgelê het.

Hoe verander geloofsvertroue my lewe? Met geloofsvertroue kan ek die pad loop wat God vir my uitgelê het. Geloofsvertroue gee vir my moed om selfs die moeilikste lewensomstandighede aan te pak want ek weet dat God my daardeur sal dra.

Slot

Geliefdes,

·        wanneer alles in die lewe skeef loop,

·        wanneer dit vir voel of daar geen einde aan al die moeilikhede gaan wees nie,

·        wanneer dit vir my voel of die lewe soos ʼn tsunami oor my spoel en ek net meer kan asemhaal nie, moet Ons weet: 

Ons kry antwoorde op ons lewenskrisse wanneer ons in gebed tot God nader. Die geloofsvertroue wat ons daarvoor nodig het is in God se troue verbondsliefde geanker. God bewys sy troue verbondsliefde aan ons in Jesus Christus wat vir ons sondes aan die kruis gesterf het en wat deur sy oorwinning oor die dood aan ons ’n nuwe lewe saam met God gee. Die wonderlike genade van God is dat geloofsvertroue vir my moed gee sodat ek kans sien vir die moeilikste lewensomstandighede omdat ek weet dat God my daardeur sal dra.

Wanneer die lewe te veel word weet dan dat Hy in die oorvloed van sy troue verbondsliefde vir ons skuiling gee teen storms van die lewe.

Amen

Jesus se laaste week op aarde

JESUS AS MENS : SY LAASTE WEEK OP AARDE

‘n Bybellees program vir stiltetyd of huisgodsdiens met die aanloop tot Paasfees  (opgestel deur ds. Joepie Marais NG Kerk Reddersburg wat hy goedgunstelik met ons deel)

  

·         Ons gaan die Here Jesus dag vir dag volg as die Man van Smarte

·         Ek alleen/ons as gesin gaan met diepe respek en deernis Sy lyding, pyn, smart, spot  en haat met ’n hart wat diep geraak is, volg.

·         By elke dag is daar  LESSE.  Dink daaroor, praat met mekaar  en bid daaroor.

1.      Die Sondag – ’n Palmtak voor Sy voet -  Mat. 21:8, Joh.12:13

Lees -  Mat. 21:1-11, Luk.19:28-44 en Sagaria   9:9 en 10

Lesse:  Die skare se “prys Hom” (Hosanna) was oppervlakkig.  Hulle wou ‘n politieke bevryder hê.  Jesus hoor daarin reeds “Kruisig Hom”.  Is my hart skoon van enige bybedoeling as volgeling van Jesus?

Die les van die eseltjie:  “Die Here het hom nodig” – my gawes, my besittings, ook vir mý. Oordink die les van kanse (tyd) wat God ons gee.  Tyd wat verbygaan (Luk. 19:44)

2.      Die Maandag – ’n Sweep in Sy hand – Joh. 2:15

Lees - Mat. 21:12-17, Joh. 2:13-21 en Psalm 69:10

Lesse:  Jesus se ywer vir die Kerk spreek ons aan.  Die sweep is simbolies:  verwyder alles uit die Kerk wat om die eiegewin van mense gaan en die dieper les: later sal die sweep van God Hom tref – in ons plek om ons harte te suiwer van enige bybedoelings.  Die les van kinderstemme wat spontaan Jesus eer.  Kinders is vir Jesus baie belangrik! Wie die koninkryk van God nie soos ’n kindjie ontvang nie, sal daar nooit ingaan nie. (Mar 10:15)

3.      Die Dinsdag – ’n Koringkorrel moet sterwe - Joh. 12:24

Lees - Joh. 12:20-36 (een van die diepsinnigste gedeeltes in die Bybel)

Lesse:  Die Grieke se besoek:  hulle wou Jesus net bewonder.  Vir hulle was die kruis dwaasheid (1 Kor.1:23).  Waarskuwing:  ’n Godsdiens sonder die Kruis is van geen waarde! Daarom antwoord Jesus hulle so. Onthou Jesus kies die kruis doelbewus, daarom moet ons onsself verloën, ons kruis opneem en Hom volg (Mar. 8:34). Oordink die les van die koringkorrel. Maak Joh.12:24 jou lewenskeuse.

4.      Die Woensdag – ’n Albasterfles wat gebreek is -  Mark. 14:4

Lees - Markus 14:1-9, Mat. 26:1-13

Lesse:  Simon, die melaatse, gebruik die maaltyd by sy huis as ’n dankie-sê-geleentheid vir wat Jesus vir hom gedoen het.  En ons?  Kom ons gebruik ons geleenthede.  Dieselfde les leer ons by Maria:  net die beste is goed genoeg vir Hom!  Kom ons praat en bid oor die gehalte van ons toewyding aan Jesus.

5.      Die Donderdag – ’n Verraderlike soen -  Mat. 26:48

Lees - Markus 14:10-50 (lees gerus die hele hoofstuk).  Markus 14:44 en 45

Lesse:  Neem verse 17 – 19 vir diepe selfondersoek.  Ek sal Hom mos nooit kan verraai nie! Of sal ek Hom in die steek kan laat soos Petrus na alles wat Hy vir mý gedoen het?  “Wee die man   .” (vers 21).  Moenie soos Petrus te selfversekerd wees nie.  Oordink die diep Getsemane-gebeure en bid daaroor.

6.      Die Vrydag -  ’n Kruis op ’n heuwel -  Joh.19:17

Lees - Joh.19:1-37

Lesse:  Lees die Goeie Vrydag gebeure met ’n hart wat stil, gesuiwer, verbaas, diep geraak en verbind is.

Oordink die Kruiswoorde:     Vader vergeef hulle  - Luk, 23:34

Daar is u seun - Joh. 19:26 en 27

Vandag sal jy saam met My … - Luk. 23:43

My God, my God  Mark.- 15:34

Ek is dors – Joh. 19:28

Dit is volbring – Joh. 19:30

Vader in U hande – Luk. 23:46

7.      Die Saterdag – ’n Graf in ’n tuin -  Mat. 27:59

Lees -  Mat. 27:57-66 en Joh. 19:38-42

Lesse:  Lees in hierdie somber verhaal die les van verlies:  die grootste verlies is om Jesus te verloor.  Dank die Here dat jy Hom nooit sal verloor nie omdat Hy klaar in ons plek die straf vir die sonde, die dood, gestraf is. Josef en Nikodemus:  Mens kan nie ’n geheime dissipel van Jesus bly nie.  Veral nie as jy by Sy Kruis was nie! 

“Here help my om U altyd openlik te bely!”

VERKLARING VAN DIE BYBELGENOOTSKAP VAN SUID-AFRIKA NA AANLEIDING VAN 'N PETISIE TEEN 'N NUWE AFRIKAANSE BYBELVERTALING

22 Maart 2012

VERKLARING VAN DIE BYBELGENOOTSKAP VAN SUID-AFRIKA NA AANLEIDING VAN 'N PETISIE TEEN 'N NUWE AFRIKAANSE BYBELVERTALING

Dit het onder die aandag van die Bybelgenootskap van Suid-Afrika (BSA) gekom dat daar skrywes per e-pos die rondte doen wat mense versoek om teen die Afrikaanse Bybelvertaling wat tans onderneem word, op te tree.

Die rede wat aangevoer word (en daar word aangehaal presies soos dit in die petisie  staan), is dat die vertaling “Jesus Christus, die Seun van God, as 'n gewone mens  omskryf” asook dat die vertaling “Beoog Om Jesus Christus Totaal En Al Uit DIE  MESSIAANSE PROFESSIEë Uit Te Vertaal, Deur KLEINLETTERS Te Gebruik Inplaas

van GROOT LETTERS.” Verder word gesê: “Met Jesus Christus uit hierdie Nuwe  vertaling (2016) word die GODHEID VAN JESUS CHRISTUS Totaal en al wegvertaal,  en kan ENIGE (NEW AGE) god nou in hierdie skrifgedeelte in geredeneër word.”

Die BSA wil hom ten sterkste teen hierdie e-posse uitspreek aangesien dit van alle waarheid ontbloot is. Hierdie aantygings word in 'n baie ernstige lig beskou.

Ons gee graag aan u meer inligting oor die Afrikaanse vertaling van die Bybel wat tans onderneem word:

Hierdie vertaling is deur die kerke wat Afrikaans as voertaal gebruik, aangevra omdat  daar ‘n behoefte aan ‘n bronteksgeoriënteerde of direkte vertaling van die Bybel in  Afrikaans is. Die BSA inisieer self nie nuwe Bybelvertalings sonder die goedkeuring van  die betrokke kerkgenootskappe nie en voer dus net die opdrag van die kerke uit met  hierdie vertaling.

Die vertaalopdrag wat opgestel is in medewerking met die kerke is “skep ‘n goed  verstaanbare bronteksgeoriënteerde Afrikaanse vertaling wat geskik is vir voorlesing en  gebruik in eredienste, asook vir kategese, Bybelstudie en persoonlike gebruik.” Dit word  verder omskryf as ’n vertaling wat ’n getroue weergawe van die betekenis van die  bronteks moet wees, terwyl beelde, metafore, styl en struktuur van die bronteks sover  moontlik behou moet word. Die vertaling moet van hoë letterkundige gehalte en goed  verstaanbaar wees. Verklarende voetnotas moet gebruik word om inligting te voorsien  wat nie in die vertaling self voor die hand liggend is nie.

Die vertalers van hierdie vertaling eerbiedig die Nuwe-Testamentiese verstaan van die  Ou Testament en aanvaar sonder voorbehoud die Ou Testament as deel van die  Christelike Bybel. Die vertalers is deeglik bewus daarvan dat daar vir die Nuwe  Testament op bepaalde plekke in die Ou Testament, naas die gewone betekenis ook ’n  “verborge” of “dieper” betekenis is, wat verwysings is na Christus en dit wat Hy sou kom  doen. Die vraag wat vooraf baie lank beredeneer is, was die volgende: Moet die  “verborge” of “dieper” Nuwe-Testamentiese verstaan van ’n teks reeds in die vertaling  van die Ou Testament neerslag vind, met die gevolg dat die voor die hand liggende  betekenis op die agtergrond skuif; of moet die gewone betekenis vertaal word met die  gevolg dat die Nuwe-Testamentiese verstaan van die teks, nie aangedui word nie? Dit was duidelik dat dit onmoontlik is om sowel die voor die hand liggende betekenis as die  dieper betekenis tegelyk te verwoord of in druk aan te dui in die vertaling.

Omdat die vertalers egter wel die Nuwe-Testamentiese verstaan van gedeeltes in die  Ou Testament eerbiedig, is besluit om in die vertaling al daardie gevalle waar die Nuwe  Testament ʼn verwysing na Christus in ’n woord of woorde van die Ou Testament sien, in  die Ou Testament met ’n voetnoot te merk. Sodoende kan die leser se aandag gevestig  word op die Nuwe-Testamentiese verstaan van die bepaalde woord of woorde en dít  sonder verlies van die betekenis daarvan in die Ou-Testamentiese verband. In die Nuwe  Testament sal daar ook na die betrokke Ou-Testamentiese gedeelte terugverwys word.  Hierdie oplossing tas die Godheid van Christus geensins aan nie, want die voetnoot dui  juis aan dat ’n spesifieke teks ’n verborge verwysing na Christus bevat.

Die probleem kan kortliks geïllustreer word aan die hand van ’n voorbeeld. In Hosea  11:1 staan daar die bekende woorde (volgens die 1953-vertaling): “Toe Israel ’n kind  was, het Ek hom liefgehad, en uit Egipte het Ek my seun geroep.” Dit verwys sonder  enige twyfel na die twaalf stamme van Israel wat deur Moses uit Egipte uitgelei is. Dit is  die gewone betekenis in die verband van Hosea 11:1, en in die 1953-vertaling is “seun”  tereg nie met ’n hoofletter gedruk nie. Volgens Matteus 2:15 bevat Hosea 11:1 egter ’n  profesie wat verwys na die kind Jesus se terugkeer uit Egipte saam met Josef en Maria  ná die dood van Herodes. Op grond daarvan het die vertalers in 1933/53 en in 1983  “Seun” in Matteus 2:15 met ’n hoofletter laat druk. Dit is egter onmoontlik om die teks in  Hosea 11:1 deur die gebruik van hoofletters vir die leser as ’n verwysing na Christus  aan te dui sonder verlies van die gewone betekenis in die verband van Hosea 11:1. Dit  gaan met ’n voetnoot verduidelik word.

Let verder asseblief daarop dat, in verskillende tale, die oorgrote meerderheid  Bybelvertalings nie hoofletters gebruik in Ou-Testamentiese tekste wat in die Nuwe  Testament as verwysings na Christus aangedui word nie. Dit geld onder andere vir die  baie bekende Jesaja 53. Dit sluit in Engelse Bybels soos die King James Bybel (van  1611), New International Version, Good News Translation, English Standard Version,  Contemporary English Version, The Message, American Standard Version, The Net  Bible, New Century Version, New Jerusalem Bible, New Living Translation, 1890 Darby  Bible, ensovoorts. Ons is bewus daarvan dat enkele ander Engelse vertalings wél  hoofletters gebruik, maar dit is nie die algemene gebruik nie. Hoofletters word ook nie in  die Duitse Luther Bibel en Gute Nachricht Bibel gebruik nie. So ook nie in Franse,  Italiaanse, Spaanse en vier Nederlandse Bybels wat ons nagegaan het nie. In Afrikaans  is daar nie hoofletters in die 1983-vertaling en die Bybel vir Dowes asook ander  Afrikaanse vertalings wat in die mark is nie. Dit is duidelik dat die gebruik van hoofletters  hoofsaaklik beperk is tot uitgawes van die Nederlandse Statevertaling wat ná 1900  gedruk is en slegs enkele ander vertalings. Die Afrikaanse vertalings van 1933/53 het  die gebruik van die Statevertaling van ná 1900 nagevolg. Dit is algemeen bekend dat  die Hebreeuse taal nie enige “hoofletters” gebruik nie.

Sommige kerke het die BSA wel oor hierdie saak van hoofletters genader en die BSA is  die afgelope twee jaar met daardie kerke in gesprek. Daar is kerke wat, soos in die  1983-vertaling, die gedeeltes in die Ou Testament met kleinletters gedruk wil hê, en  daar is ’n paar ander kerke wat, soos in die 1933/1953-vertaling, die betrokke gedeeltes  met hoofletters gedruk wil hê. Ons kan die versekering gee dat die BSA besig is om op baie verantwoordelike wyse, met al die kerke wat die Afrikaanse Bybel gebruik, hierdie  saak te hanteer.

Ons wil dit baie duidelik stel dat vir die Bybelgenootskap en die vertalers die geloof in  die drie-enige God, Vader, Seun en Heilige Gees, ononderhandelbaar is, en die  Bybelgenootskap of sy medewerkers sal nooit, soos die e-pos beweer, die Godheid van  Christus misken nie of op enige wyse daartoe bydra “dat Jesus Christus gelykgestel sal  word aan enige (New Age) god” nie. Sodanige bewerings tas die integriteit en  geloofsoortuiging van die Bybelgenootskap en die vertalers aan en word in die  sterkste taal verwerp. U kan absoluut seker wees daarvan dat GEEN Bybelvertaling  van die BSA die Godheid van Christus ontken of in die “new age” rigting beweeg nie.  Die BSA is sedert 1820 betrokke by en verantwoordelik vir betroubare Bybelvertalings in  al 11 die tale van ons land en sal nooit die betroubaarheid van die Goeie Nuus  ondermyn nie. 

Die vertaling waaraan tans gewerk word, sal ’n uiters deeglike vertaling van die Bybel  wees en ons glo dat, wanneer dit verskyn, dit baie Afrikaanssprekendes tot geloof en  nuwe lewe in Jesus Christus, die Seun van God, sal lei. Ons is ook oortuig daarvan dat  dit ’n instrument in die hande van die Heilige Gees sal wees om gelowiges te laat groei  in die “kennis van die Seun van God”. Mag hierdie vertaling God in alles verheerlik!

Ons vind dit heeltemal onaanvaarbaar dat mense oningeligte en onwaar aannames per  e-pos versprei. Ons ervaar dit as blote verdagmakery.  Besoek asseblief die webtuiste  van hierdie vertaling www.nuwekerkbybel.co.za vir die korrekte inligting.

U word dus vriendelik, dog dringend, versoek om te help om hierdie saak met die korrekte inligting reg te stel en hierdie dokument so wyd as moontlik te versprei.

In diens van die Woord

Ds. Gerrit Kritzinger

Uitvoerende Hoof

Jesus se opstanding beteken dat ons waarlik léwe, nou en in die toekoms!

11 Mar. 2012 (RB) 1 Kor. 15; Teksverse 1 Kor. 15 v 3 & 4

Sing    Lofsang:   Ps. 84 v 1 & 2               (OAB)

           Na wet:      Sb. 7-2 v 1 & 2             (Beryming uit Open 22)

           Na gebed  Ps. 42  v 5                    (OAB)

           Slotsang   Sb. 18-7 v 1 , 3 , 11 & 12 (Beryming uit Open 21)

SONDAG 17

45  Vraag:  Watter nut het die opstanding van Christus vir ons?

Antwoord:  Ten eerste het Hy deur sy opstanding die dood oorwin sodat Hy ons die geregtigheid wat Hy deur sy dood verwerf het, deelagtig kon maak (a). 

Ten tweede word ons nou ook deur sy krag tot 'n nuwe lewe opgewek (b). 

Ten derde is die opstanding van Christus vir ons ’n betroubare waarborg van ons salige opstanding (c).

(a) Rom. 4:25;  1 Pet 1:3;  1 Kor. 15:16.  (b) Rom. 6:4;  Kol 3:1, 5;  Ef. 2:5, 6.  (c) 1 Kor. 15:20, 21.

Inleiding

Wat beteken dit vir ons dat Christus opgestaan het? Ons hoor elke Sondag wanneer die ds. die geloofsbelydenis lees”

Christus het vir ons sondes gesterf, volgens die Skrifte; Hy is begrawe en op die derde dag opgewek, volgens die Skrifte.

Maak hierdie belydenis enigsins ’n verskil in ons lewens?

Die vraag by Sondag 17 van die Heidelbergse Kategismus is:

Watter nut het die opstanding van Christus vir ons?

Dit beteken doodeenvoudig: “Maak Christus se opstanding ’n verskil in my lewe?” In 1 Kor. 15 v 14 hoor ons wat die gevolge is as Christus nie opgestaan het nie:

En as Christus nie opgewek is nie, is ons prediking sonder inhoud en julle geloof ook sonder inhoud.

As Christus nie opgestaan het nie, dan is ons almal besig om vanmore ons tyd te mors. Dan kan ons maar net sowel die kerkdeure toesluit en iets anders gaan doen. Dan help dit nie dat ons Bybellees en bid nie. Dan het ek nou reeds 8 jaar van my lewe vermors om te gaan studeer en predikant te word. As Christus nie opgestaan het nie, dan was al die tyd en moeite wat julle as kerk van die Here daaraan bestee het tevergeefs!

Die Christendom staan of val by die opstanding van Jesus Christus. In 1 Kor. 15 v 17 tot 19 hoor ons:

as Christus nie opgewek is nie, is julle geloof waardeloos en is julle nog gevange in julle sondes. Dan is ook dié wat in Christus gesterf het, verlore. As ons net vir hierdie lewe ons hoop op Christus vestig, is ons die bejammerenswaardigste van alle mense.

Jesus Christus se opstanding is een van die kern aspekte van ons geloofslewe en daarom MOET dit ’n verskil in ons lewens maak. In 1 Kor. 15 v 20 hoor hoe Paulus triomfantlik uitroep:

Maar nou, Christus is opgewek uit die dood, as eersteling uit dié wat gesterf het.

Omdat die Here dit vir ons in sy lewende Woord sê, weet ons dat Christus se opstanding ’n verskil in ons lewens KAN maak!

Watter verskil maak Jesus Christus se opstanding in my lewe? Daar is drie areas wat my hele lewe omvat, naamlik die lewe wat agter my lê (my verlede), die lewe vorentoe (die toekoms hier op aarde) en dit wat na die dood vir my voorlê. In Kort kan ons sê: “Jesus se opstanding beteken dat ons waarlik léwe, nou en in die toekoms!”

Die eerste groot voordeel wat Christus se opstanding inhou is:

My verlede het nie meer ’n houvas op my nie!

Die mens is ’n slaaf van sy verlede. Dit wat in my verlede gebeur het is dikwels die tronk wat my vashou en keer dat ek die wonderlike geleenthede wat voor my lê kan aangryp. Elke verkeerde ding wat ek in die verlede gedoen het en elke verkeerde ding wat met my gebeur het, is soos slawekettings wat my vasbind en vashou. Dit bind my vas aan alles wat sleg en verkeerd is in hierdie lewe. Dit bind my vas aan my sondige natuur sodat ek nie daarvan kan loskom nie.

In Gal v 19 hoor ons ’n paar voorbeelde van so ’n sondige natuur:

Die praktyke van die sondige natuur is algemeen bekend: onsedelikheid, onreinheid, losbandigheid, afgodsdiens, towery, vyandskap, haat, naywer, woede, rusies, verdeeldheid, skeuring, afguns, dronkenskap, uitspattigheid en al dergelike dinge.

My sondige verlede keer dat ek loskom van verkeerde begeertes wat dan aanleiding gee tot onsedelikheid, onreinheid, losbandigheid.

My sondige verlede gee aanleiding tot afgodsdiens en towery, dit wil sê ek vertrou op iets of iemand anders as die lewende God om my deur die lewe te help. Ek vind dit onmoontlik om by God troos te vind en ek probeer maar self regkom met die gevolg dat ek in absolute moedeloosheid verval elke slag as daar iets in my lewe gebeur wat nie goed is nie. Ek kry nie reg om die mense in my verlede te vergewe nie en daarom is vyandskap, haat, naywer, woede, rusies, verdeeldheid, skeuring en afguns deel van my lewe.

My sondige verlede bind my vas aan dronkenskap en uitspattigheid. Dit maak dat mense hulle dronk drink om byvoorbeeld ’n geleentheid te vier. Dit maak dat kinders aand vir aand in kuierplekke rondhang sodra hulle onder hul ouers se toesig uit is.

Jesus se opstanding maak ons los van hierdie sondes wat keer dat ons werklik die lewe leef wat God vir ons beplan het. In 1 Kor. 15 v 22 sê die Here vir ons:

Net soos almal deur hulle verbondenheid met Adam sterf, so sal almal in Christus lewend gemaak word.

Daarom bely ons ook:

Die Here het deur sy opstanding die dood oorwin sodat Hy ons die geregtigheid wat Hy deur sy dood verwerf het, deelagtig kon maak

Dit beteken eenvoudig die sonde in ons verlede geen houvas op ons het nie en dat ons nie meer voor God skuldig staan daaroor nie omdat Christus met sy opstanding die dood oorwin het en daarmee het Hy die straf vir die sonde (die dood) ten volle betaal.

Die eerste ding wat Christus se opstanding in my lewe verander is dat my sondige verlede nie meer ’n houvas het op my nie. Die twee voordeel wat sy opstanding inhou is:

Ek kan nou die lewe leef wat God vir my beplan het.

In 1 Pet 1v3 hoor ons

Aan God, die Vader van ons Here Jesus Christus, kom al die lof toe! In sy groot ontferming het Hy ons die nuwe lewe geskenk deur die opstanding van Jesus Christus uit die dood.

Die tweede groot verandering wat Christus se opstanding in my lewe teweeg bring is dat ek nou ’n nuwe lewe het. Daarom is onsedelikheid, onreinheid, losbandigheid, afgodsdiens, towery, vyandskap, haat, naywer, woede, rusies, verdeeldheid, skeuring, afguns, dronkenskap en uitspattigheid nie meer deel van my lewe nie.

In die plek van hierdie sondige lewe waaraan ek verslaaf was het ek nou ’n nuwe lewe en daarom is die vrug van die Gees ook deel van my lewe. In Gal 5 v 22 hoor wat die vrug van die Gees is:

Die vrug van die Gees, daarteenoor, is liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing.

My lewe word deur vreugde en vrede gekenmerk. Ek is dankbaar teenoor die Here wanneer dit goed gaan met my. Ek beleef die Here se seën in die groot en klein dinge in my lewe. Wanneer ek byvoorbeeld in die oggend wakker word is ek dankbaar teenoor die Here dat ek nog ’n dag het om te lewe. Wanneer die beproewings in die lewe soos siekte en al die ander moeilikhede wat ons in die lewe ervaar oor my pad kom, dan is ek geduldig en blymoedig omdat ek weet dat die Here my nie in die swaarkry dae verlaat nie. Inteendeel ek ervaar hoe die Here my deur die swaarkry dae dra.

My lewe word gekenmerk deur vriendelikheid, goedhartigheid, getrouheid, nederigheid en selfbeheersing. Ek dra nie wrokke en bitterheid in my rond nie en ek kry reg om na die Here te luister wanneer Hy in Kol 3 v 13 vir my sê:

Wees geduldig met mekaar en vergewe mekaar as die een iets teen die ander het. Soos die Here julle vergewe het, moet julle mekaar ook vergewe.

In kort vind ek dit al hoe makliker om die Here se liefdesopdrag in sy wet na te kom. Wanneer ek struikel en val dan vind ek vergifnis en verlossing by Jesus en sy opstanding.

Die tweede verandering wat Jesus se opstanding in ons lewens teweeg bring is dat ons nou die lewe kan leef wat God vir ons beplan het en daarom bely ons ook dat ons nou deur sy krag tot 'n nuwe lewe opgewek.

Die derde voordeel wat Jesus se opstanding vir ons inhou is:

Ons het ’n lewende hoop waaraan ons vashou

Daar is een ding in die lewe waarvan ons seker is, naamlik dat elkeen van ons een of ander tyd gaan doodgaan. Vir baie mense is daar egter saam met hierdie sekerheid ook ’n groot onsekerheid omdat hulle nie weet wat gaan van hulle word nie. Christene wat met geloof vashou aan Christus se opstanding het nie laasgenoemde onsekerheid nie omdat ons ’n vaste hoop het waaraan ons vashou. In 1 Kor. 15 v 53 & 54 hoor ons:

Hierdie verganklike liggaam moet met die onverganklike beklee word, en hierdie sterflike liggaam met die onsterflike. En wanneer hierdie verganklike liggaam met die onverganklike beklee is, en hierdie sterflike liggaam met die onsterflike, dan sal die woord wat geskrywe staan, vervul word: “Die dood is vernietig, die oorwinning is behaal.”

Ons hoef nie meer bang te wees vir die dood nie omdat ons ’n lewende hoop het. Vir die Christen wat met geloof vashou aan Jesus se opstanding is die dood nie die einde nie, maar slegs ’n heerlike deurgang na die volgende bedeling waar ons ewig saam met God sal wees, verlos van die elende en hartseer van hierdie wêreld. Daarom bely ons ook dat die opstanding van Christus vir ons ’n betroubare waarborg van ons salige opstanding is.

Slot

Die opstanding van Christus is die belangrikste aspek van ons geloofslewe wat ons lewens drasties verander. In die eerste plek beteken dit dat my verlede nie meer ’n houvas op my het nie. In die tweede plek beteken dit dat ek nou hiervandaan vorentoe die lewe kan leef wat God vir my beplan het. In die derde plek beteken dit dat ons ’n lewende hoop het om ewig saam met God te wees sonder hartseer, dood of pyn.

As hierdie lewensverandering nog nie deel is van u lewe is nie, kom na Jesus Christus toe en neem sy uitnodiging aan wat Hy in Mat 11 v 28 aan ons rig:

“Kom na My toe, almal wat uitgeput en oorlaai is, en Ek sal julle rus gee.

Hou in die geloof wat die Heilige Gees vir ons gee vas aan die verlossing wat Jesus met sy kruisiging en opstanding aan ons gegee het en ervaar die nuwe lewe wat Christus vir ons gee, want Jesus se opstanding beteken
dat ons waarlik léwe, nou en in die toekoms!

Amen

Moenie moedeloos word nie, Christus dra sy kerk deur tye van swaarkry

4 Mar. 2012 (RB) Open. 2 v 8 tot 11

Sing    Lofsang: Ps. 147 v 1 & 2             (OAB)

           Na wet:    Ps. 130 v 1 & 2             (OAB)

           Na gebed Ps. 86  v 1 & 6             (OAB)

           Slotsang  Ps. 31 v 1 &3                (OAB)

Voel u soms moedeloos omdat dinge net al hoe slegter word. Niks wil reg loop nie. Die een probleem is skaars opgelos of daar is twee ander in sy plek! Dan wonder ons soms waarom ons as Christene so swaar moet kry in hierdie lewe. Dit kan so erg raak dat ons selfs begin twyfel of God werklik omgee. Sien God regtig my ellende raak?

Die gelowiges in Smirna het ook goeie rede gehad om so te voel, want hulle het regtig swaar gekry ten spyte daarvan dat hulle in ’n stad gewoon het wat as ’n juweel van die gebied bekend was. Binne ’n stad waar die gemiddelde inwoner welvarend was, was hulle die uitgeworpenes en die armste van die armes. Verder het hulle gebuk gegaan onder erge vervolging vanweë hulle Christelike geloofsoortuiging. Die Jode het elke geleentheid gebruik om hulle onder verdenking te plaas en om hulle sleg te maak by die stadsowerhede. Die gevolg was dat hulle in ’n groot mate uitgesluit was en dat hulle geen geleenthede ontvang het in daardie stad nie. Hulle kon nie werk kry nie, met die gevolg dat hulle werklik arm was. In hierdie brief troos die Here die gelowiges in Smirna wat so swaarkry.

Hierdie brief is ook aan Christus se kerk oor al die eeue heen gerig en dit bring inderdaad ook vertroosting vir sy kerk wat swaarkry in hierdie wêreld. Daar is mense wat voorhou dat dit net goed moet gaan met die kerk, maar dit is ’n valse beeld van die kerk dat gelowiges nie sal swaarkry nie. Gewoonlik is die boodskap wat hiermee saamgaan om die werklikheid van swaarkry weg te praat dat mense wat swaarkry se geloof nie sterk genoeg is nie. Dit is egter ’n verkeerde idee van kerkwees wat uit die misplaasde voorspoed teologie na vore kom. Daardie foutiewe leer wat voorhou dat verlossing in hierdie wêreld gesetel is. Daar is geen sprake van sonde verlossing nie en God word inderdaad gebruik soos ’n gelukspakkie waar dit net gaan oor die materiële voordele wat God kan gee en nie oor God self nie. Die voorspoed teologie verkondig op die uiteinde maar net die groot leuen van die satan: “as ek net eers ’n miljoenêr is, dan sal ek gelukkig wees.”

Met hierdie brief leer die Here sy kerk dat dit nie net altyd voorspoedig sal gaan met sy kerk nie, inteendeel die Here sê inderdaad vir ons dat ons gaan swaarkry! Die lewe is nie altyd net lekker en goed nie. Ek is seker dat elkeen van ons dit uit ons lewenservaring sal kan bevestig. Hierdie brief aan die gelowiges in Smirna word ook gerig aan elkeen wat voel dat die wêreld buite beheer geraak het.

Reeds in die inleiding maak Christus dit baie duidelik dat Hy omgee vir sy kerk en dat hulle Hom na aan die hart lê. Hy stel Homself bekend soos ons hoor in Open 2:8:

So sê die Eerste en die Laaste, wat dood was en weer lewend geword het

Christus is die begin en die einde en hiermee sê Hy vir ons dat Hy alles omvat. Daar is nie iets wat buite sy beheer is nie. Hy IS die begin en die einde! In Hom, deur Hom en uit Hom bestaan alle dinge. Verder sê Hy vir ons dat Hy alles deurgemaak het, selfs tot in die dood toe, maar dat die dood Hom nie kon vashou nie. Hy het die dood oorwin. Hiermee sê Christus dat niks buite sy beheer is nie. Maak nie saak wat die gelowiges in Smirna moet deurmaak nie, Christus het dit reeds gedoen.

Dan hoor ons van sy wonderlike vertroosting in Open 2 v 9:

Ek ken julle verdrukking en julle armoede, en tog is julle ryk. Ek weet ook van die kwaadstokery van die mense wat daarop aanspraak maak dat hulle Jode is, en dit nie is nie, maar tot die sinagoge van die Satan behoort.

Christus wat alles in hierdie lewe beheer weet van hulle swaarkry. Die Griekse woord wat met ken en weet vertaal is kom net in die verlede tyd voor. Daarmee sê dit vir ons dat Christus van die begin af weet wat die omstandighede is en dat Hy absoluut verstaan.

Christus sê vir die gelowiges in Smirna: “Ek ken julle armoede”. In Grieks is daar twee woorde wat armoede aandui. Die een woord beskryf die gebrek aan sekere besittings terwyl die ander woord iemand beskryf wat absoluut niks het nie. Dit is hierdie laasgenoemde woord wat gebruik word om die armoede van die gelowiges in Smirna te beskryf. Ten spyte daarvan sê Christus egter ook “en tog is julle ryk!” Op die oog af gaan dit baie sleg met hierdie gelowiges, maar hulle het ’n skat wat groter is as enige materiële rykdom wat daar is, die verlossing in Jesus Christus.

Christus weet wat hulle omstandighede is en dat die Jode hulle onder verdenking plaas by die owerhede. Daarom die verwysing na die sinagoge van satan. Satan beteken ook “teenstander” en die Jode was groot teenstanders van die Christene. Hiermee troos die Here ons ook. Hy weet wat elkeen van ons se omstandighede is. Hy weet waarmee ons sukkel en wat maak ons bekommerd. Hy troos ons ook met die wete dat ons ’n geestelike skat het wat baie meer werd is as enige materiële rykdom wat daar is. Die Here sê hier vir ons dat ons nie moet val vir daardie leuen van die satan nie “as jy maar net ’n miljoenêr is, dan sal jy gelukkig wees”. Ware rykdom en geluk lê nie in aardse besittings nie.

Na hierdie vertroosting ten opsigte van dit wat die gelowiges alreeds deurgemaak het, bemoedig die Here hulle vir dit wat nog voorlê soos ons hoor in Open 2 v 10:

Moenie bang wees vir wat julle alles gaan ly nie. Kyk, die duiwel gaan party van julle in die tronk laat gooi, sodat julle in beproewing sal kom, en julle sal tien dae lank baie swaar kry. Bly getrou tot die dood toe, en Ek sal julle die lewe as kroon gee.

Hiermee sê die Here dat daar inderdaad swaar tye is wat voorlê, maar dat hulle nie daarvoor hoef bang te wees. Die Here gee twee redes waarom hulle nie bang hoef te wees, naamlik: Eerstens dat dit net ’n kort tydjie gaan duur. Die verwysing na tien dae se swaar kry dui daarop dat die lyding net ’n beperkte tyd sal duur. Verder verseker die Here hulle dat Hy diegene wat hulle volle vertroue op Hom stel deur die lyding sal dra.

Geliefdes, op wie vertrou ons wanneer dit swaar gaan in die lewe? As ons op Jesus Christus vertrou, geld hierdie belofte vir ons ook dat die swaarkry van hierdie lewe net vir ’n beperkte tyd sal duur en dat daar ’n einde aan sal kom. Verder verseker die Here ons ook dat ons nie alleen is nie, maar dat Hy ons daardeur dra.

Dan sluit die brief af met die wonderlike troos en hoop wat dit inhou vir diegene wat hoor en luister, dit wil sê ag slaan op wat die Here sê en wat inderdaad reageer op die boodskap van die Here. Elkeen wat sy verlossing in Jesus Christus soek en vind sal die lewe as oorwinningskroon ontvang. Dit verseker dat hulle nie deur die tweede dood, dit wil sê die ewige dood waar mens ewig van God en sy liefde geskei is en waar mens net die oordeel van God ervaar, getref sal word nie. Wat is die ergste wat met ons in hierdie lewe kan gebeur? Dat ons lewe van ons weggeneem word. Diegene wat in Jesus Christus glo kry die versekering dat selfs die fisiese dood nie die einde is nie, maar dat dit ’n heerlike deurgang is tot die volgende bedeling waar ons ewig saam met God sal lewe.

Geliefdes, moenie dat bekommernisse en lyding in hierdie lewe ons onder kry nie. Hou vas aan die heerlike wete dat Christus sy kerk dra deur tye van swaarkry.

Amen