Jou geloof maak jou vry

Datum: 23 Feb. 2020 GKE

Skriflesing:     Gal. 5 v 1 – 26

Teksverse:     Gal. 5 v 5 & 6 & 19 - 22

Wat is die verskil tussen om vry te wees teenoor om 'n slaaf te wees? Maar voordat ons dit beantwoord moet ons net eers uitmaak wat beteken vryheid.

In ons teks verduidelik die Here vir ons wat is ware vryheid en wat is valse vryheid. Valse vryheid kan na een van twee kante toe draai. Aan die een kant beteken dit dat jy nie van iemand afhanklik wil wees nie.

Dit is die probleem wat hier in die gemeentes in Galasië teenwoordig was. Daar was dwaalleraars wat as Judaïste bekend gestaan het. Hulle het geleer dat Christus se genade nie genoeg is nie.

Volgens hulle moes jy buiten Christus se genade die wet ten volle nakom om gered te word. Paulus maak dit egter hier duidelik dat daar nie so iets is soos Christus se genade en jou eie verdienste nie. Dis of die een of die ander. As jy die pad kies om deur eie verdienste gered te word dan verwerp jy Christus se genade. Hulle wou dus vry wees van hul afhanklikheid van Christus af om gered te word.

Met die wet het hulle dan ook bedoel al die reëls en regulasie wat die Joodse rabbi's opgestel het. Daar was meer as 600 sulke reëls en regulasies. Byvoorbeeld, jy mag nie op die Sabbat 'n stok gedra het nie, want dalk net dalk sleep die stok per ongeluk op die grond en maak 'n slootjie wat sou beteken dat geploeg het. Om te ploeg is werk en jy mag nie op die Sabbat werk nie.

Hulle het verder vereis dat jy besny moet word, want dit het jou in die Joodse volk ingelyf wat dan ook beteken het dat jy dan ook verplig was om al hierdie Rabbynse wette moes nakom om gered te word.

Wat ten diepste hier na vore kom is die mens se rebelse opstand teen God. Ons wil onafhanklik wees, dit wil sê ons wil nie van God afhanklik wees nie en dit is hierdie rebelse opstand wat ook by die Judaïste teenwoordig was.

Die ironie hiervan is egter dat in hulle strewe na vryheid deur onafhanklikheid het hulle nie vry geword nie. Hulle het slawe geword van mensgemaakte godsdienstige reëls.

Geliefdes, is jy 'n slaaf van mensgemaakte godsdienstige reëls? Die Galasiërs het hulself vasgebind aan die reëls en regulasies van die Joodse Rabbi’s. Dink bietjie daaroor na oor watter wettiese reëls en regulasies jy vir jouself opgemaak het. Is jy 'n slaaf daarvan?

In Gal. 5 v 5 hoor ons wat dit beteken werklik vry te wees.

Wat ons betref, deur die werking van die Gees is dit ons hoop en verwagting dat ons deur te glo, vrygespreek sal word.

Dit is slegs deur Christus dat jy waarlik vry kan wees.

Jy kan slegs in Christus waarlik vry wees wanneer jy van God se genade afhanklik is. God se genade in Jesus Christus wat sy lewe aan die kruis opgeoffer en wat die dood oorwin het om vir jou 'n nuwe lewe van vryheid te gee. Dit is die Goeie Nuus, die Evangelie van Jesus Christus. Al wat God vra is dat jy dit glo en God se genade is so groot dat die Heilige Gees vir jou die geloof gee wat Hy vra.

Daar is egter ook 'n ander valse vryheid wat Paulus hier uitlig. In Gal. 5 v 13 hoor ons:

Julle, broers, julle is tot vryheid geroep. Moet net nie julle vryheid misbruik as ’n verskoning om sonde te doen nie, maar dien mekaar in liefde.

Dit is verkeerde siening van vryheid dat jy kan doen net wat jy wil. Ek is mos gered, dus kan ek nou doen net wat ek wil!

Kom ons gebruik 'n praktiese voorbeeld om te verduidelik hoekom dit verkeerd is om so te dink, want as jy net doen wat jy wil is jy nie vry nie. Jy is nog steeds 'n slaaf.

'n Vis wat in 'n dam swem is vry om te swem waar hy wil in die water. Nou kom die vis in opstand, want hy wil nie gebind wees aan die grense van die water nie. Hy wil vry wees om te doen net wat hy wil. As hy buite die water wil wees, dan wil hy vry wees om buite die water te gaan.

Wat gaan gebeur wanneer daardie vis buite die water gaan? Hy gaan doodgaan! Daar is grense waarby jy nie kan beweeg nie. Die grens waarby jy nie kan beweeg nie is God se liefde. In Christus is jy vry om binne God se liefde te leef.

In Gal. 5 v 13 hoor ons dat ons mekaar in liefde moet dien en

in Gal. 5 v 22 & 23 hoor wat liefde in praktyk is. Hoe dit prakties is in jou dag tot dag lewe tot uiting kom:

Die vrug van die Gees, daarteenoor, is liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing. Teen sulke dinge het die wet niks nie.

Jy is vry om in vrede met jou medemens saam te leef. Jy is vry om geduldig te wees. Jy is vry om vriendelik te wees. Jy is vry om God se liefde in jou lewe uit te leef en wanneer jy dit doen dan sal ware vreugde en vrede in jou lewe ervaar.

Aan die ander kant is daar geen vryheid in die praktyke van die sondige natuur nie. In Gal. 5 v 15 hoor dat vyandskap, haat, naywer, woede, rusies, verdeeldheid veral 'n probleem in die gemeente was:

Maar julle byt en verskeur mekaar; pas op dat julle mekaar nie later heeltemal verslind nie.

Wanneer jy die praktyke van jou sondige natuur uitleef dan sal jy geen vreugde en vrede in jou lewe ervaar nie, want dan is jy maar nog steeds 'n slaaf van jou sondige natuur.

As jy op jou eie onafhanklik van God binne die grense van sy liefde wil bly sal jy vind dat dit onmoontlik is en daarom sê die Here vir ons in Gal. 5 v 16:

Laat julle lewe steeds deur die Gees van God beheers word, dan sal julle nooit swig voor begeertes van julle sondige natuur nie.

Jy laat jou lewe deur die Gees beheer wanneer jy die evangelie glo soos ons in Gal. 3 v 2 hoor:

Net een ding wil ek van julle weet: Het julle die Heilige Gees ontvang deur die wet van Moses te onderhou of deur die evangelie te glo?

In Gal. 5 v 6 hoor ons dat net jou geloof in Jesus Christus is wat vir jou ware vryheid gee.

In Christus Jesus is dit nie van belang of jy besny is of nie. Al wat van belang is, is geloof wat deur die liefde tot dade oorgaan.

Geliefdes, jou strewe na ware vryheid kan slegs bereik word wanneer jy in 'n lewende verhouding met God het. Dit is alleen moontlik deur jou geloof in die evangelie en jy kan slegs deur Jesus Christus ware vryheid smaak.

Geliefdes, is jy waarlik vry of is jy nog 'n slaaf? Jy is 'n slaaf wanneer jou godsdiens deur jou eie reëls en regulasies beperk word. Wanneer jy meer waarde daaraan heg om godsdienstige rituele en gebruike na te kom as om te glo en vertrou in die genade van Jesus Christus.

Dan sal jy ook vind dat godsdiens vir jou moeite is. Dis moeite om op Sondagoggend op te staan om 'n erediens by te woon. Dis moeite om jou Christenskap uit te leef. In die week is die praktyke van jou sondige natuur baie duideliker sigbaar as die liefdesvrug van die Gees. Dan sal jy ook vind dat jy uitgeput en oorlaai is.

Soek jou ware vryheid in Jesus Christus en aanvaar sy uitnodiging:

“Kom na My toe, almal wat uitgeput en oorlaai is, en Ek sal julle rus gee. Neem my juk op julle en leer van My, want Ek is sagmoedig en nederig van hart, en julle sal rus kry vir julle gemoed. My juk is sag en my las is lig.”

Amen

Bekeer julle en kom tot inkeer!

Datum: 16 Feb. 2020 GKE

Skriflesing:     Luk. 13 v 1 – 5

Teksverse:     Luk. 13 v 3 & 5

In ons teksgedeelte lig Jesus 'n baie belangrike probleem uit. Dit is 'n struikelblok waaroor gelowiges baie maklik struikel. Die probleem van eie geregtigheid. Die probleem dat jy dink jy is so bietjie beter as ander mense. Ek is glad nie so sleg nie. Ek is darem nie so sondig soos die ander mense nie.

In die gedeeltes wat ons teks vooraf gaan het Jesus die mense vertel van God se oordeel en nou bring een van hulle, die gruweldaad van Pilatus op wat Galileërs laat doodmaak het terwyl hulle besig was om te offer.

Om Jesus se antwoord te verstaan moet ons in gedagte hou wat die algemene opvatting van die tyd was dat wanneer iets sleg met jou gebeur, dit is omdat jy een of ander sonde gepleeg het.

Dit is ook 'n ook 'n opvatting wat ons in die Ou Testament vind. Dink maar aan Job se vriende wat hom beskuldig het dat hy gesondig het en dat dit die rede was hoekom al die rampe hom getref het.

In Joh. 9 hoor ons dat Jesus se dissipels dieselfde siening het wanneer hulle hom vra wat die rede was hoekom die man van geboorte af blind was. Was dit sy eie sonde of was dit sy ouers se sonde?

Dit is ook 'n opvatting wat ons vandag nog in ons samelewing het. Die Sjinese dra nou die gevolge van hulle goddeloosheid en daarom word hulle gestraf met hierdie Corona virus. Dieselfde argument was ook geopper toe die tsunami Japan getref het. God straf hulle oor alles wat hulle verkeerd doen.

Jesus het gepraat oor God se oordeel en nou vra hulle Jesus om kommentaar te lewer oor hoekom God se oordeel hierdie Galileërs getref het. Jesus antwoord hulle met 'n vraag:

“Dink julle dat hierdie Galileërs groter sondaars was as al die ander Galileërs omdat dit met hulle gebeur het?

En om die punt wat Hy wil maak te beklemtoon gebruik Jesus 'n ander voorbeeld van die toring van Siloam waar agtien mense dood was omdat dit inmekaar geval het.

In beide gevalle gee Hy dieselfde antwoord.

Nee, sê Ek vir julle, maar as julle julle nie bekeer nie, sal julle net soos hulle ook almal omkom!

God se Woord kan soms baie ongemaklik wees. Moenie na ander mense kyk nie. Kyk na jouself!

Eie geregtigheid is een van die dinge wat die kerk lamlê. Ons begin dink dat ons so bietjie beter as ander mense is. Dan sien ons die kerk as ons elite klompie mense wat heiliger is as ander mense.

Dis wanneer die kerk na binne begin fokus. In plaas van om 'n jammerte te hê vir verlore sondaars aan wie ons die goeie nuus van Jesus moet vertel, is ons vol oordeel vir hulle en ons moet sorg dat hulle ons nie met hul sondes vuilmaak nie.

Met hierdie skrifgedeelte bring Jesus ons weer terug na die harde werklikheid soos ons ook hoor in Rom. 10 v 10 -18

Daar staan immers geskrywe:

“Daar is nie een wat regverdig is nie, selfs nie een nie.

Daar is nie een wat verstandig is nie;

daar is nie een wat na die wil van God vra nie.

“Almal het afgedwaal, almal het ontaard. Daar is nie een wat goed doen nie, selfs nie een nie.

Vandag is voorbereiding. Volgende Sondag vier ons DV weer die Heilige Nagmaal. Voorbereiding is waar jy weer voor God stil word en jouself afvra of jy met die regte gesindheid Nagmaal wil gebruik.

As jy met 'n gesindheid van eie geregtigheid kom Nagmaal gebruik dan kan jy dit maar net sowel los, want wanneer jy dink dat jy so bietjie beter as ander mense is, dan sê jy eintlik daarmee dat jy nie Nagmaal nodig het nie.

Is dit nie dalk die rede hoekom ons so maklik van die Nagmaal af wegbly nie? Is dit nie die rede waarom ons so ongeërg is om eredienste by te woon nie. Is dit nie die rede waarom ons dankbaarheidslewe ook maar afgeskeep word nie?

Hoe moet ons dan onsself vir Nagmaal voorberei? In Jesus se antwoord op sy vraag of die mense wat deur die rampe getref is dan meer sondig is as die res, gee Hy vir ons die antwoord op die vraag oor hoe ons moet voorberei.

Nee, sê Ek vir julle, maar as julle julle nie bekeer nie, sal julle net soos hulle ook almal omkom.”

Jesus vra bekering en Hy voeg ook 'n waarskuwing by: “As julle, julle nie bekeer nie sal julle omkom.” Jesus bedoel nie hier maar net die fisiese dood van jou liggaam nie. Nee, geliefdes. Hy waarsku hier oor die ewige dood waar jy vir ewig van God vervreem sal wees in die ewige verdoemenis.

Wat beteken dit dat jy jou moet bekeer? Bekering behels basies drie dinge:

Ten eerste moet ek verstaan, hoe groot my sonde en ellende is. Eie geregtigheid kom juis na vore wanneer ek my sonde gering ag. God is Heilig en Hy kan nie sonde verdra nie. Daarom moet sonde gestraf word. Ek moet verstaan dat daar niks is wat ek kan doen om op te maak vir my sonde nie en daarom moet ek myself voor God verootmoedig. Ek moet my sonde teenoor God bely. Die doel hiervan is nie om my moedeloos te maak nie. Inteendeel, dit is juis sodat ek na God toe sal draai.

Daarom moet ek ten tweede verstaan hoe ek van al my sonde en ellende verlos word. Ek moet weet wat die evangelie van Jesus Christus is. Ek moet weet dat die goeie nuus van Jesus Christus daar is vir my. Dink daaraan wat Jesus vir jou gedoen het. Hy het vir jou gesterf toe jy nog 'n sondaar was!

God het jou so lief dat Hy sy Seun gestuur het om die prys van jou sonde in jou plek te betaal. Hy het sy lewe vir jou gegee. Hoe lief moet jy iemand hê om jou lewe vir hom te gee? Ons vergeet so maklik wat Jesus vir ons gedoen het!

Maar Jesus het nog meer gedoen as om net sy lewe vir jou te gee. Hy het die mag van die dood gebreek en sy opstanding is die bewys daarvan. Hy gee vir jou 'n nuwe lewe waar jy nie meer vasgebind is aan die slawekettings van die sonde nie.

God gee dit alles aan jou sonder dat jy iets hoef te doen om dit te verdien en daarom gee die Heilige Gees vir jou geloof sodat jy deur jou geloof kan vashou aan God se genade.

Dit bring ons dan ook by die derde punt, naamlik hoe ek vir God moet dankie sê omdat Hy my verlos het. Ek moet wegdraai van my ou sondige natuur af. Ek moet vra na God se wil en ek moet dit ook doen. Dit help nie net om te vra na God se wil nie, ek moet doen wat God in sy Woord vir my sê om te doen.

Ek moet met alles wat in my is stry teen my sondige natuur en vra na God se wil soos ons hoor in
Heb. 12 v 4:

Julle het nog nie so teen die sonde weerstand gebied dat dit vir julle ’n stryd om lewe of dood geword het nie.

My stryd teen die sonde is 'n stryd om lewe of dood en daarom kan ek dit nie op my eie doen nie. God se genade is so groot dat Hy sy Gees gestuur het om ons te help, ons te dra. Met my eie krag is dit onmoontlik om weerstand teen sonde te bied, maar met die krag van die Heilige Gees is dit moontlik. Daarom moet ek bid vir Heilige Gees want God belowe in
Luk. 11 v 3 dat Hy sy Gees sal gee aan elkeen wat daarom bid.

Geliefdes, wat sê die Here vir ons hier in Luk. 13 v 1 – 5? Jy moet na jou eie sondes kyk en jou bekeer, want as jy dit nie doen nie, sal jy met die ewige dood gestraf word.

Daarom geliefdes, Bekeer jou en kom tot inkeer! Gaan word in hierdie week van voorbereiding weer stil voor God. Lees weer wat in die Nagmaalsformulier staan agter in die Psalmboek. Gaan lees in Artikel 35 van die Nederlandse Geloofsbelydenis waaroor Nagmaal gaan.

Bekeer julle en kom tot inkeer.

Amen

Koninkryksburgers moet ligdraers wees

09 Feb. 2020 GKE

Skriflesing:   Mat. 5 v 14 – 48

Teksverse:   Mat. 5 v 14^a & 16

Die Koninkryk van God. Dit is 'n ander manier waarmee God vir ons verduidelik wat dit beteken om kerk van die Here te wees. Dit sê vir ons wat dit beteken om 'n Christin te wees en Watter invloed dit op jou lewe het wanneer jy sê dat jy 'n volgeling van Jesus Christus is.

Hiermee sê die Here vir ons dat Hy in beheer is en dat Hy heers oor alles en almal. In die preke hierdie jaar het ons al gehoor dat ons hoogste prioriteit moet wees om die Koninkryk te soek. Ons het ook gehoor dat die Koninkryk nie moeilik is om te vind nie want Jesus het met sy koms die Koninkryk naby gebring. Ons het verder gehoor dat dit 'n ewige Koninkryk is wat nou reeds bestaan en dat die burgers van hierdie Koninkryk geseën word.

Maar wat beteken die Koninkryk van God vir ons prakties in ons dag tot dag lewe? Dit is juis hier in die bergrede waarvan ons in Mat. 5 – 7 hoor wat vir ons uitspel wat die praktiese implikasies van die Koninkryk van God in ons daaglikse lewe is. Wat beteken dit vir my wanneer ek 'n weeksoggend opstaan vir werk en werk toe gaan? Wat sê dit vir ons kinders daar in die skool? Wat sê dit vir my wanneer in die winkel besig is om inkopies te doen? Wat sê dit vir ons wanneer ons saam met ons vriende om 'n braaivleisvuur ontspan?

Die Bergpreek verduidelik juis watse praktiese implikasie die Koninkryk van God vir ons dag tot dag lewe het.

Maar voordat ons daarby kom moet ons net eers weer onthou dat ons nie deur ons optrede kan verseker dat ons vir God aanvaarbaar hoef te wees nie. Met ander woorde jy hoef nie vir God te bewys dat jy goed genoeg is om sy kind te wees nie.

Jesus begin sy Berg preek met 'n uitspraak van seën. “Geseënd is die wat weet hoe afhanklik hulle van God is” en dan voeg Hy die belofte by “want aan hulle behoort die Koninkryk van die Hemele.” Dit is God se genade wat jou sy kind maak.

Hy maak jou 'n burger van sy Koninkryk omdat Hy wil, nie omdat jy iets moet doen of gedoen het om vir Hom te bewys dat jy goed genoeg is om burgerskap te verdien nie. God neem jou net soos jy is, maar omdat Hy jou so lief het, los Hy jou nie net soos jy is nie.

Jy word 'n kind van God omdat Jesus vir jou sondes aan 'n vervloekte kruishout gesterf het. Hy het die dood wat die straf vir die sonde is oorwin en met sy opstanding gee Hy vir jou 'n nuwe lewe. En hier in sy Berg preek verduidelik Hy hoe jy jou nuwe lewe moet leef. Jy weet dat jy 'n kind van God in sy Koninkryk is deurdat jy die evangelie, die goeie nuus van Jesus Christus glo.

Kinders van God moet ligdraers wees in sy Koninkryk. Hulle moet die sout daarvan wees. Kinders van God is ligdraers wat moet stry vir reg en geregtigheid. Net soos wat sout kos preserveer moet God se kinders reg en geregtigheid in sy Koninkryk preserveer.

Net soos 'n lamp wat op 'n lampstaander staan, lig uitstraal wat die hele vertrek verlig moet God se kinders lig uitstraal in sy Koninkryk. Jy straal lig uit wanneer jy die wet van God uitleef.

Daar is egter 'n manier om God se wet uit te leef sonder om lig uit te straal. Jesus sê in Mat. 5 v 20:

Ek sê vir julle: As julle getrouheid aan die wet nie meer inhou as dié van die skrifgeleerdes en die Fariseërs nie, sal julle nooit in die koninkryk van die hemel ingaan nie.”

Skrifgeleerdes en Fariseërs is die mense in die Joodse se samelewing wat die wet die getrouste na gekom het en tog sê Jesus dat dit nie goed genoeg is nie.

Die probleem is dat hulle, hul eie betekenis aan die wet toegeskryf en dit as die norm voorgehou het. Die groot probleem is dat hulle nie God se liefde in ag geneem het met hulle toepassing van die wet nie. Hulle toepassing van die wet was blote vormgodsdiens wat leeg is.

Ons hoor in 2 Tim. 3 v 5:

Hulle sal nog die uiterlike skyn van die godsdiens hê, maar die krag van die godsdiens sal hulle nie ken nie. Bly weg van sulke mense af.

Dit sê Paulus van mense wat selfsugtig, liefdeloos en onversoenlik is.

As jou navolging van die wet soos die Skrifgeleerdes en die Fariseërs is sonder God se liefde dan is jy soos 'n gloeilamp wat afgeskakel is wat geen lig uitstraal nie.

Dan gaan Jesus voort om te verduidelik met ses praktiese voorbeelde uit die alledaagse lewe wat Hy bedoel. Met elk van die voorbeelde hoor ons Jesus sê: “Maar Ek sê vir julle.......” Hiermee sê Jesus vir ons wat God werklik bedoel met sy wet, want Jesus IS God (1 van die persone van die 3 Eenheid naamlik Vader, Seun en Heilige Gees). God bedoel met sy wet dat jy sy liefde moet uitstraal. Die krag van God se liefde is die lig wat jy moet uitstraal.

In hierdie ses voorbeelde verduidelik Jesus hoe jy God se liefde uitstraal deur die nakoming van die wet. Die eerste voorbeeld handel oor versoening. Waar begin onmin tussen mense? Dit begin in jou denke. Wanneer jy kwade gedagtes teenoor iemand koester plant jy alreeds die saadjie van fisiese doodslag. Nie net moet jy nie iemand fisies doodmaak nie, jy moet ook nie in jou hart 'n wrok teenoor hom koester nie. As daar onmin tussen jou en jou medemens is, moet jy die saak regmaak. Jy moet dit as die hoogste prioriteit stel om vrede te maak. In Mat. 5 v 9 hoor ons:

Geseënd is die vredemakers,

want hulle sal kinders van God genoem word.

In die tweede en derde voorbeeld handel dit oor die diepste verhouding in jou lewe. Die verhouding tussen man en vrou wat hulself in trou aan mekaar verbind het. Weereens lê die wortel van egbreuk in die mense se hart. Dit begin reeds wanneer jy met begeerlike oë kyk na iemand anders as jou huweliksmaat.

Verder behels dit dat jy jou troubelofte baie ernstig moet opneem. Jy kan nie maar net oor enige onbenulligheid van jou huweliksmaat skei nie.

Wanneer God se liefde in jou brand sal jy nie geprikkel word deur iemand anders as jou huweliksmaat nie. Wanneer God se liefde in jou brand sal jy geen rede hê om van jou huweliksmaat te wil skei nie.

Die vierde voorbeeld handel oor jou integriteit. Hoe betroubaar is jou woord? Kan jy vertrou word om te doen wat jy sê jy sal doen. Wanneer God se liefde in jou brand sal jy jou woord nakom. Dan sal jy nie 'n eed benodig om iemand te oortuig dat jy die waarheid praat nie want as jy 'n eed nodig het dan sê jy eintlik daarmee dat wanneer nie 'n eed sweer nie, dat jy nie vertrou kan word nie.

Jou optrede is die getuienis dat jy vertrou kan word. Jou lig skyn in die donker wêreld daar buite wanneer jy doen wat jy gesê het jy sal doen.

Die vyfde voorbeeld gaan oor vergelding. Wat is jou eerste reaksie wanneer iemand teenoor jou iets verkeerd gedoen het? Ek sal jou terugkry. Jy sal betaal! In die Koninkryk van God werk dit egter radikaal anders. Moenie kwaad met kwaad vergeld nie. Die geweldspiraal moet verbreek word. Geweld moet met liefde beveg word.

Dis nie 'n maklike opdrag nie, maar dit beteken ook nie dat Christine hulself aan fisieke gevaar of mishandeling moet onderwerp nie. Dit gaan ook nie hier oor die pasifisme oorlogsdebat nie. Dit gaan ook nie daaroor dat ongeregtigheid moet seëvier nie.

Dit gaan oor wetlike verskille. Die wet het vereis dat jy jou bokleed as sekuriteit moes gee en Jesus sê hier dat jy verder moet gaan in jou geregtigheid as bloot net wat die wet vereis. Jy moet ook jou onderkleed gee. Jy moet meer doen as wat van jou verwag word.

Jy laat jou lig skyn wanneer jy gedrag verwerp wat deur weerwraak gemotiveer is. Jy moet eerder positief optree tot voordeel van jou teëstander, eerder as wat jy hom wil benadeel.

Die sesde voorbeeld handel oor liefde vir jou vyand. Wat is jou reaksie teenoor mense wat van nature geneig is om jou te haat of selfs wat jou sal mishandel en vervolg? Jou lig skyn wanneer jy radikaal anders optree deur jou vyand lief te hê. Vir hom om te gee en te werk tot sy voordeel. Maar nog meer as dit. Jy moet vir hulle bid dat God hulle harte sal verander dat hulle bekeer sal word. Wanneer dit gebeur sal daar nie meer vyandskap wees nie.

Kan ons dit volmaak regkry? Nee, geliefdes ons kan nie. Jesus is egter nie besig om ons moedeloos te maak met 'n onbereikbare ideaal nie. Hy is besig om ons uit te daag om te groei in gehoorsaamheid aan God se wil sodat ons al hoe meer soos Hy kan word. Deur die krag van die Heilige Gees en die geloof in Jesus Christus kan ons groei in geloof en gehoorsaamheid.

Is jy 'n kind van God?

Glo jy dat Jesus Christus vir jou sondes gesterf het? As jy dit glo is jy 'n ligdraer in hierdie wêreld. Laat jou lig so voor die mense skyn, dat hulle jou goeie werke kan sien en jou Vader wat in die hemel is, verheerlik.”

Amen

Geseënd is die wat weet hoe afhanklik hulle van God is

Datum: 2 Feb. 2020 GKE

Mat. 5 v 1 – 12

Teksverse Mat. 5 v 3 & 10

Is jy 'n burger van die Koninkryk van God? Wil jy ook deel in die seëninge wat burgers van die Koninkryk van God ontvang?

In die Bergrede hoor ons wat die sleutel is om te deel in seëninge van die Koninkryk van God. Die Bergrede is seker een van die grootste preke van alle tye. Jesus het sy bediening begin met die aankondiging: “Bekeer julle, want die koninkryk van die hemel het naby gekom” soos ons in Mat. 4 v 17 hoor. In Mat. 5 tot 7 wat ook as die Bergrede bekend staan hoor ons nou meer van hierdie Koninkryk van God. Die Bergrede is inderdaad die grondwet van die Koninkryk van God.

Jesus begin sy preek met die woorde “Geseënd is dié wat weet hoe afhanklik hulle van God is” Hoe kan jy ook deel hê in hierdie seën?

In Rom. 4 v 6 hoor ons:

So sê ook Dawid dat dié mens geseënd is wat deur God vrygespreek word buite wetsonderhouding om:

Dit is hieruit duidelik dat jy nie God se seën kan ontvang deur iets te doen om dit te verdien nie. God spreek jou vry. En dit is inderdaad wat Jesus sê “...wat weet hoe afhanklik hulle van God is....” Jy is van God afhanklik om sy seën te ontvang. Dit is net Hy wat dit vir jou kan gee.

Die kern van die sonde is dat die mens nie van God afhanklik wil wees nie en daarom is dit nodig dat jy jou voor God moet verootmoedig. Met ander woorde jy moet nadink oor jou sonde en dat sonde jou van God vervreem.

Jy moet verstaan dat jy niks kan doen om hierdie gebreekte verhouding met God te herstel nie. Dit is net God wat dit kan herstel deur die sonde te straf. Jesus het gekom om die straf vir die sonde te dra. Jy moet glo dat Jesus gekom het om jou straf vir die sonde te dra deur met sy lewe te betaal en dat Hy met sy opstanding vir jou 'n nuwe lewe saam met God verwerf het.

Met ander woorde jy moet weet hoe afhanklik jy van God is. Jy moet weet dat elke oomblik van jou bestaan totaal in God se hande is en dat Hy alles onderhou. Dit is net God wat dit moontlik maak dat ons kan lewe. En wanneer jy dit besef, dan besef jy dat jy reeds deur God geseën is.

Wat beteken dit om geseënd te wees? Wanneer Jesus sê dat jy geseënd is voeg Hy by “want aan hulle behoort die koninkryk van die hemel.” Jy staan in 'n nuwe verhouding tot God en jy dra die Koninkryk van God in jou hart saam en die Heilige Gees beheer jou lewe. Jy laat jou nie meer deur jou sondige natuur lei nie, maar jy laat jou deur die Heilige Gees lei.

Jy is nie meer bang vir God nie en vrees nie meer vir sy wraak nie. Jy beleef en ervaar die liefde van God in jou lewe en jy is seker dat daar niks is wat jou van die liefde van Christus kan skei nie.

Hierdie eerste saligspreking is dan ook die kern van die hele Bergrede. Christus se teenwoordigheid en die sy bemoeienis in jou lewe is dan ook die agtergrond waarteen die eise in Bergrede wat volg verstaan moet word.

God se seën sluit in dat Hy jou deur die Heilige Gees sal troos wanneer jy treur oor jou sonde en ongeregtigheid in jou eie lewe wanneer jy jou voor God verootmoedig, maar ook wanneer jy treur oor die ongeregtigheid wat daar in die samelewing teenwoordig is. God se troos sluit in dat jy nie in moedeloosheid sal verval wanneer jy die onreg in die wêreld sien nie. Jy sal vashou aan sy hoop in die wete dat Hy steeds in beheer is.

God se seën sluit in dat jy nou anders na die lewe kyk. Jy verruil jou hardvogtigheid vir sagmoedigheid. Jy gee om vir jou medemens. Dit sluit in dat jy met deernis in liefde uitreik na mense en hoe meer jy dit doen hoe warmer brand God se liefde in jou hart.

God se seën sluit in dat daar 'n begeerte in jou hart sal wees waar jy na God se geregtigheid verlang met die wete dat God steeds in beheer is en dat sy geregtigheid sal seëvier selfs al lyk dit soms nie so nie. Jy sal jou vertroue in God stel en hoe meer jy dit doen hoe meer sal jy God se teenwoordigheid in jou lewe raaksien.

God se seën behels dat daar vrede sal wees, veral in jou hart en dat jy sy vrede sal najaag en verruil vir die twis en onmin in die wêreld. In plaas daarvan om twis en onmin aan te blaas, span jy jou kragte in om vrede te bewerkstellig.

Hier kry ons dan ook 'n baie groot belofte. “Die vredemakers sal kinders van God genoem word.” Dit is hier waar ons sien hoe anders dit is in God se koninkryk. In die wêreld het die burgers van 'n land nie 'n persoonlike verhouding met die heerser van daardie land nie.

In God se Koninkryk staan die mense wat sy seën ontvang in 'n direkte persoonlike verhouding met Hom wat net so persoonlik is soos wat 'n pa se verhouding met sy kinders is. Jy het direkte toegang na God toe met die wete dat Hy daar is vir jou en dat Hy jou nooit in die steek sal laat nie.

Kinders van God lyk en leef anders as wat die wêreld doen en die wêreld hou nie van mense wat anders is nie, veral nie as hulle nie met die verkeerde van die wêreld wil saamgaan nie. Hier hoor ons weereens die belofte “want aan hulle behoort die koninkryk van die hemel.” Die belofte hier is dat jy deel van God se kinders is wat sy seën ontvang en jy weet dit want jy wil volgens God se norme en standaarde doen wat reg is, selfs al word jy vervolg daaroor.

Weereens ontvang ons die versekering van God se seën wanneer mense jou beledig en slegmaak omdat jy 'n Christin is en volgens Christelike standaarde wil leef.

Hiermee saam kom dan ook die belofte van 'n ewige heerlikheid saam met God waar Hy al die trane sal afdroog en daar geen pyn, leiding of dood meer sal wees nie.

God se Koninkryk sluit die hele wêreld in, die hele heelal in waar Hy in beheer is. Binne in hierdie Koninkryk is diegene wat sy seën ontvang. Jy kan weet of jy deel is van daardie groep mense want:

Geseënd is dié wat weet hoe afhanklik hulle van God is,

want aan hulle behoort die koninkryk van die hemel.

Diegene wat egter hulle rug op God draai ontvang sy straf en nie sy seën nie. Geliefdes, jy kan nie maar net aangaan met jou lewe asof God nie bestaan nie en dan verwag dat Hy jou sal seën nie.

weet jy hoe afhanklik jy van God is?

Luister na Jesus se uitnodiging:

“Kom na My toe, almal wat uitgeput en oorlaai is, en Ek sal julle rus gee.

Kom na Jesus toe. Glo die evangelie en ontvang God se seën.

Amen