God is Lig – wandel in sy Lig!

17 Jun. 2012 (RB) 15 Jul. 2012 TB

Skriflesing: 1 Joh. 1 Teksverse: 1 Joh. 1:5-7

Sing    Lofsang:  Ps. 100 v 1 & 4   (OAB)

           Na wet:     Ps. 40 v 4            (OAB)

           Na gebed Ps. 119 v 52       (OAB)

           Slotsang   Ps. 119 v 39       (OAB)

Inleiding

Wat verwag die Here van sy kerk? En as ons dit vra impliseer die vraag ook outomaties: “wat verwag die Here van my?” Dit is een van die vrae wat gelowiges oor al die eeue heen vra, veral in krisis tye en wanneer ons lewensbelangrike besluite moet neem. Wat verwag die Here van mense wat Hom opreg wil dien?

In 1 Joh. 1 kry ons ’n antwoord op bogenoemde vraag. Dit was een van die kwessies wat Johannes in sy brief wil opklaar en daarom skryf hy hierdie brief in die vorm van ’n preek omdat dit ten doel het om gemeente te leer. Hulle het ook gesukkel met die vrae “wat verwag God van ons? Wat beteken dit om ’n navolger van Jesus te wees?”

Om hierdie vrae te antwoord gebruik Johannes die beeld “God is lig - wandel in God se lig” en dan verduidelik hy wat dit beteken. Eerstens verduidelik hy wat beteken die stelling “God is Lig” en daarna wat dit beteken om in God se lig te wandel.

God is Lig

Hierdie stelling beskryf vir ons hoe lyk God se karakter en daarmee saam dan ook wat dit vir elke volgeling van Jesus beteken. Die tema van God wat Lig is loop soos ’n goue draad dwarsdeur die Bybel van Genesis 1 tot en met Openbaring 22. Lig staan vir alles wat eie aan God se wese is, dit wil sê vir alles wat reg en goed is. Lig wat goed is teenoor donker wat boos is, dit wil sê alles wat sonde is. Lig is iets konkreets wat wetenskapliks kan meet en bepaal.

Teenoor lig is donker. Donker is egter nie streng gesproke die teenoorgestelde van lig nie. Donker is die afwesigheid van lig en daarom kan mens nie donker meet of bepaal nie. Hoe donkerder dit is hoe minder lig is daar teenwoordig. Mens moet egter die hoeveelheid lig meet om te bepaal hoe donker dit is. Waar daar geen lig is nie is dit absoluut donker. Net so is sonde dit wil sê die boosheid nie die teenoorgestelde van goed en reg nie. Dit is die AFWESIGHEID van goed en reg. “God is Lig” verduidelik vir ons God se absolute heiligheid, dit wil sê daar is geen sonde teenwoordig nie soos ons dan ook hoor in 1 Joh. 1:5

God is lig, en daar is geen duisternis in Hom nie.

God is alles wat sonde nie is nie. God is liefde. Sonde is ’n gebrek aan ware liefde. Hierdie beeld van God is Lig en daar is geen duisternis in Hom nie, is nie maar bloot net ’n teoretiese beeld van God nie. Dit beskryf vir ons ten diepste wie God werklik is. Hy is die suiwer bron van lig. God is volkome heilig en Hy is nie besoedel met die boosheid van byvoorbeeld haat, leuens, vyandskap en al die ander sondes nie. God is suiwer liefde. Daarom is dit ook ’n onsinnige vraag om te vra of God regverdig optree in dit of dat wat Hy doen. Wanneer mens dit vra dan meet mens God se regverdigheid aan ’n maatstaf wat buite God is terwyl God self die maatstaf is waaraan regverdigheid gemeet word.

Dink so daaraan. Toe hulle bepaal het hoe lank een meter is, het hulle ’n maatstok geneem en bepaal dat dit die standaard is. Daardie maatstok word veilig gebere. Mens kan dus nie gaan meet of daardie maatstok een meter is nie, want dit is die maatstaf wat bepaal hoe lank ’n meter is. Enige maatstok wat daarmee verskil is verkeerd. Net so is God die maatstaf wat bepaal wat goed en reg is en enige iets wat daarmee verskil is verkeerd. God is Lig en daar is GEEN donker in Hom nie.

Die duidelikste beeld van God wat lig is, word verteenwoordig in Jesus wat as mens na die aarde gekom het om God se liefde soos ’n lig in ons donker sondige lewens in te skyn. Dit is waarvan Johannes ’n ooggetuie is soos ons hoor in 1 Joh. 1:1-4.

Van die begin af was Hy daar. Ons het Hom self gehoor; ons het Hom met ons eie oë gesien; ja, ons het Hom gesien en met ons hande aan Hom geraak. Hy is die Woord, die Lewe. Die Lewe het gekom; ons het Hom gesien en is getuie daarvan, en ons verkondig aan julle die Ewige Lewe wat by die Vader was en aan ons geopenbaar is. Hom wat ons gesien en gehoor het, verkondig ons aan júlle, sodat julle aan ons gemeenskap deel kan hê. En die gemeenskap waaraan ons deel het, is dié met die Vader en met sy Seun, Jesus Christus. Dit skryf ons sodat ons blydskap volkome kan wees.

Jesus Christus laat die volmaakte lig van God se liefde skyn op ’n donker wêreld wat God nie ken nie. Daar waar God se liefde soos ’n helder lig skyn kan die sonde nie langer bestaan nie. Daar is nie genoeg donkerte in die heelal om die lig van een klein kersie uit te doof nie. Hoeveel te meer sal die donker staande kan bly voor God se suiwer lig van geregtigheid?

Daarom beteken die stellig “God is Lig” ook

Wandel in sy lig

Wandel is ’n mooi Afrikaanse woord wat veel meer beteken as loop. Mens loop van een plek na ’n ander, maar mens wandel deur die lewe van jou geboorte tot aan die einde van jou lewe. Wandel in God se lig beteken dus: lewe jou lewe daar waar God se lig van liefde op jou skyn of nog eenvoudiger, om in God se lig te wandel beteken dat jy jou hele wese , dit wil sê alles wat jy dink, alles wat jy besluit en alles wat jy doen eers meet aan God se standaard. Dit beteken nie dat mens nou skielik volmaak word nie want die Here sê tog baie duidelik in 1 Joh. 1:8:

As ons beweer dat ons nie sonde het nie, bedrieg ons onsself en is die waarheid nie in ons nie.

en in 1 Joh. 1:10 beklemtoon die Here dit:

As ons beweer dat ons nie gesondig het nie, maak ons Hom tot leuenaar en is sy woord nie in ons nie.

Ons is nie die bron van lig nie, maar slegs die spieëls wat God se lig weerkaats. Net soos ’n spieël nie volmaak al die lig weerkaats wat daarop skyn nie, net so is ons in hierdie lewe ook nie volmaak nie. Sommige spieëls het dowwe kolle en weerkaats dus maar flouerig. Die rede waarom ’n spieël lig flou weerkaats is omdat daar iets tussen die spieël en die bron van lig is. Dink byvoorbeeld aan die maan. Dit weerkaats die son se lig op die aarde, maar wanneer die aarde se skaduwee op die maan val kan dit nie die son se lig weerkaats nie. Sonde is soos ’n skaduwee wat op ons val omdat dit soos ’n muur tussen ons en God is en dan is dit onmoontlik om God se lig te weerkaats soos ons hoor in 1 Joh. 1:6:

As ons beweer dat ons aan Hom deel het, en ons lewe in die duisternis, lieg ons en handel ons nie volgens die waarheid nie.

Hoe verder mens dan van God af wegbeweeg, hoe donkerder word dit in mens se lewe. Hoe meer mens sondig hoe verder beweeg mens van God af. As ons uit die donker van sonde in ons lewens wil wegbeweeg moet ons nader aan God se Lig kom. Die enigste manier hoe om dit te doen is deur Jesus Christus soos ons hoor in 1 Joh. 1:7:

Maar as ons in die lig lewe soos Hy in die lig is, het ons met mekaar deel aan dieselfde gemeenskap en reinig die bloed van Jesus, sy Seun, ons van elke sonde.

Hoe doen ons dit prakties? Hoe kom ons nader aan die Lig? Die Here spel dit vir ons uit in 1 Joh. 1:9:

Maar as ons ons sondes bely—Hy is getrou en regverdig, Hy vergewe ons ons sondes en reinig ons van alle ongeregtigheid.

Dit is eers wanneer ons bewus word van ons sonde dat ons daarteen kan stry. Ons word bewus van ons sondes wanneer ons, ons lewenswandel meet teen die volmaakte Lig van God se Woord. Mens kan eers die vuil kol op jou gesig raaksien wanneer jy in ’n spieël kyk. Net so kan jy eers die sonde in jou lewe raaksien wanneer jy na dit kyk in die spieël van God se Woord. As ek alles wat ek dink, alles wat ek besluit en alles wat ek doen meet teen die suiwer Lig van God, is die vraag “sal dit aan die standaard voldoen?” Indien nie maak dan soos die Here sê: Bely jou sondes teenoor die Here en weet dat Hy getrou is om ons te vergewe en te reinig van al ons ongeregtighede. Ons moet egter net baie goed onthou dat dit nie hier gaan oor verlossing nie. God gee verlossing uit genade sonder dat ons dit verdien vir elkeen wat glo aan Jesus Christus se dood aan die kruis en sy opstanding. Dit gaan hier oor hoe Jesus ons help om die sonde in hierdie lewe te oorwin. Dit is die pad van heiligmaking wat ons saam met die Here stap. Dit is soos ’n ghrieskol op jou hand. Die eerste keer wanneer jy dit was is dit nog daar, dit is net ligter, maar hoe meer jy dit was hoe ligter word dit totdat dit heeltemal skoon is. Hoe nader ons aan God se lig beweeg hoe minder word die sonde in ons lewens en hoe meer gehoorsaam ons sy heilige Woord.

Slot

Wat verwag die Here van ons as sy kerk? Hy verwag dat ons sal weet dat Hy die enigste bron van ware Lig is, dit wil sê Hy is die enigste bron van waarheid goedheid en regverdigheid is. Ons moet op Hom alleen vertrou. Ons moet met ons lewens al hoe nader aan die Lig beweeg, dit wil sê al hoe nader aan God beweeg sodat die lig van sy liefde deur middel van ons lewens al hoe helderder kan skyn in ’n donker wêreld wat Hom nie ken nie. Ons moet sy liefde weerkaats. Ons beweeg nader aan die lig van God se genade en liefde wanneer ons, ons sondes teenoor Hom bely. Wanneer ons, ons sondes teenoor Hom bely vergewe Hy ons sondes en reinig Hy ons daarvan. Hoe meer ons dit doen hoe nader beweeg ons aan God se lig.

Kom ons vat saam vir die jonger kinders. Net soos lig die donker wegvat, net vat Jesus al die verkeerde en lelike dinge wat ons doen weg. Al wat ons moet doen is om aan Jesus te glo en hoe meer ons dit doen hoe minder word ons sondes in ons lewe. Dan sien die mense wat Jesus nie ken dit raak en dit maak dat hulle Jesus ook wil leer ken. Die belangrikste wat julle moet onthou is “Glo in Jesus Christus”

Geliefdes: God is Lig – wandel in sy Lig!                          

Amen

Hou vas wat julle het, sodat niemand julle kroon wegvat nie

10 Jun 2012 (RB)

Skriflesing: Open. 3:7-13 Teksverse: Open. 3:8 & 11

Sing    Lofsang:   Ps. 145 v 1&9     (OAB)

           Na wet:      Ps. 130 v 1 & 2   (OAB)

           Na gebed  Ps. 9 v 1 & 7       (OAB)

           Slotsang    Sb. 18-7 v 1,11 & 12   (Sb 45)

Inleiding

Een van ons groot bekommernisse is dat kerk op die platteland al hoe kleiner word. Heelwat gemeentes wat baie jare oud is moes hul deure sluit. Dit is ook nie net die Dopperkerk wat krimp nie. Ons broeders en susters in die NG kerk sit met dieselfde probleem. Ons gemeentes is maar klein en onaansienlik. Ons lidmaat getalle is maar klein. Ons sukkel met finansies met begrotings wat maar net nie wil klop nie. Daar is nie vername persone by ons nie. Menslik gesproke lyk die prentjie maar donker vir die kerk op die platteland.

In hierdie brief aan Filadelfia vertel die Here vir ons die verhaal van ’n kerk wat baie in gemeen het met ons plattelandse gemeentes. Filadelfia of Alaseïr soos dit vandag bekend staan lê ongeveer 45km suidoos van Sardis op die hoofposroete langs die Kogamisrivier. Die stad was ook gereeld deur aardbewings geteister en dit is ook ’n paar keer deur aardbewings verwoes en moes dan weer opgebou word. Die gemeente daar was maar klein en onaansienlik. Hulle was arm en daar was ook nie juis vername mense daar by hulle nie. Verder het hulle ook groot teenstand van veral die Joodse gemeenskap, die sogenaamde Judaïste ervaar wat Jesus nie as God aanvaar het nie en wat ook sy lyding verwerp het. Hierdie Judaïste het hulle probeer wysmaak dat hulle geen toegang tot God gehad het nie omdat hulle in Jesus geglo het.

Geleentheid

Wanneer Jesus ’n brief aan die gemeente stuur vertroos Hy dan ook die gemeente. Filadelfia en Smirna is die enigste twee gemeentes wat nie bestraf of vermaan word nie. Dit is ook die enigste twee gemeentes wat vandag nog bestaan. Ten spyte daarvan dat hierdie gemeente maar klein en swak was, was hulle getrou aan hulle opdrag om die evangelie te versprei en het hulle vasgehou aan die boodskap van Jesus se volharding in die lyding tot versoening.

Jesus stel Homself op ’n besondere wyse bekend in sy brief aan die gemeente. Hy begin deur te sê dat Hy die Heilige, die ware God is. Die titel van ware God beklemtoon sy egtheid as God. Die verwysing na die sleutel van Dawid dui sy mag as Messias aan. Hy is die enigste ware God wat in beheer van alles is. Al het die Jode hulle uit die sinagoge uitgesluit is dit net Jesus wat toegang kan verleen na God se volmaakte koninkryk, die nuwe Jerusalem. As Christus die deur oopsluit kan niemand dit toesluit nie. Die verwysing in vers 8 na die deur wat Christus oopgesluit het, het ’n dubbele betekenis. In die eerste plek dui dit daarop dat die gemeente toegang het na die koninkryk van God ten spyte daarvan dat die Jode hulle uit die sinagoge uitgesluit het. Aan die ander kant dui dit ook op hul sendingtaak wat hulle het deurdat die poort na die Ooste vir hulle ooplê.

In ons teksvers sien ons ’n belangrike beginsel wat vir ’n gemeente nodig is om die oop deur wat Christus gee te kan gebruik. Filadelfia was klein en swak. Hulle kon dus nie uit hulle eie vermoë gebruik maak van die oop deur nie. Die belangrikste aspek wat vir elke kerk van alle tye nodig is, het hulle nagekom. Hulle het in geloof bly vashou aan Christus se boodskap van volharding en sy lyding. Dit is die boodskap van die evangelie of goeie nuus dat Jesus Christus vir ons sondes gely het aan die kruis en dat Hy met sy opstanding aan ons ’n nuwe lewe gegee het. Filadelfia het aan hierdie boodskap vasgehou en dit beteken dat hulle Christus nie verloën het nie. Dit is nie hul goeie werke wat hulle gedra het nie. Dit is God se genade in Jesus Christus en hulle het in geloof vasgehou daaraan.

Omdat hulle aan God se genade met geloof vasgehou het, kon hulle groot teenstander hulle nie onderkry nie, want op die uiteinde is dit maar die satan wat mense gebruik om die kerk teen te staan. Die troos is dat hy God nie kan oorwin nie en dat ook hy wat die gelowiges gedurig deur aankla sal moet erken dat God sy kerk liefhet.

Wat sê hierdie brief vir ons? Ons moenie teen ons swakheid vaskyk nie. Die feit dat ons maar min lidmate het en dat ons daarom ook sukkel met ons finansies hoef ons nie te keer om God se opdrag uit te voer nie. In 2 Kor. 12:9 hoor ons dat God se krag tot volle werking kom wanneer ons swak is:

Sy antwoord was: “My genade is vir jou genoeg. My krag kom juis tot volle werking wanneer jy swak is.” Daarom sal ek baie liewer oor my swakhede roem, sodat die krag van Christus my beskutting kan wees.

Dit is juis deur ons swakheid wat die Here se krag werk en daarom is ons gemeente se kleinheid en swakheid nie ’n nadeel nie, maar is dit juis ’n voordeel, want nou kan God se krag deur ons begin werk!

Om God se sending opdrag uit te voer moet ons net met geloof vashou aan die evangelie van Jesus Christus. Wat beteken dit prakties? Dit beteken doodeenvoudig dat ons nie spesiale vaardigheid of bekwaamheid nodig het om die evangelie te versprei nie. Al wat ons moet doen is om te glo in Jesus Christus se verlossing en dat ons teenoor almal wat oor ons pad kom kan getuig watter verskil Jesus in my lewe gemaak het. Dit is iets wat elke lidmaat, dit wil sê elke grootmens en elke kind in hierdie gemeente kan doen. Met my lewe wys ek vir die wêreld en met my mond getuig ek teenoor die wêreld watter verskil Jesus in my lewe maak. As Jesus nog nie ’n verskil in my lewe maak nie dan het ek nog nie by sy genade uitgekom nie. Dan is dit nodig dat ek in geloof (wat die Heilige Gees gee) na Hom toe kom en dat ek in geloof die verlossing wat Hy uit genade gee my eie maak.

Belofte

Elkeen wat met geloof vashou aan God se genade deel in die wonderlike belofte wat Hy gee. In die eerste plek is die belofte dat Hy ons in tye van beproewing sal vashou soos ons hoor in vers 10:

Omdat julle aan die boodskap van my volharding in lyding vasgehou het, sal Ek julle ook vashou in die tyd van beproewing wat oor die hele wêreld gaan kom om die bewoners van die aarde op die proef te stel.

Christene word nie gevrywaar van die beproewings wat oor die wêreld kom nie, maar ons het wel die belofte dat God ons sal vashou en sal dra wanneer die beproewings oor ons pad kom.

Die opdrag wat die Here aan sy kerk gee hoor ons in vers 11:

Hou vas wat julle het, sodat niemand julle kroon wegvat nie.

Die kroon waarvan hier gepraat word is die ewige lewe wat God gee. Hier word die beeld van ’n pilaar in God se tempel gebruik. Die gelowige staan stewig net soos ’n pilaar vas staan. Verder word God se Naam op elkeen geskryf. Dit dui op die vaste sekerheid dat elkeen wat glo aan God behoort en dat niks ons uit sy hand kan ruk nie. Hierdie belofte is egter net waar vir diegene wat glo in Jesus Christus en wat sy Naam bely as hul Heiland en Verlosser.

slot

God se krag kom juis tot volle werking wanneer ons swak is. Dit is juis dan wat God se krag in ons lewens sigbaar word en dan kan ek teenoor die wêreld getuig watter verskil Jesus in my lewe gemaak het. Dit is God se genade in Jesus Christus wat vir ons die belofte van die ewige lewe gee. Om deel te hê daarin moet ons luister na wat die Heilige Gees vir ons sê: “Hou in geloof vas aan God se genade.” Laat ons daarom vashou wat ons het sodat niemand ons kroon wegvat nie.

Amen

Leef die nuwe lewe wat God deur genade skenk

3 Jun 2012 (RB)

Skriflesing: 1 Pet. 1:1-16 Teksvers: 1 Pet. 1:3

Sing    Lofsang:   Ps. 33 v 1            (OAB)

           Na wet:      Ps. 38 v 1 & 17   (OAB)

           Na gebed  Ps. 33 v 5 & 11   (OAB)

           Slotsang    Ps. 31 v 4 & 5     (OAB)

Inleiding

Ons noem onself Christene, maar wat beteken dit werklik om ’n Christen te wees? Christenskap beteken tog veel meer as om te sê dat ek aan een of ander kerk behoort en dat ek gereeld op Sondae die eredienste bywoon. Is dit hoe ek myself as ’n Christen sien? As dit die somtotaal van my Christenskap is dan verstaan ek nog nie werklik wat dit beteken om ’n Christen te wees nie! As ek nie verstaan wat dit beteken om ’n Christen te wees nie, dan verstaan ek noodwendig ook nie wat dit beteken dat ’n Christen kerk van die Here is nie.

As ons vra wat beteken dit om werklik ’n Christen te wees, vra ons daarmee saam wat beteken dit om werklik kerk van die Here te wees? ’n Verkeerde idee van wat ’n Christen is bring ook mee dat ek ’n verkeerde idee het van wat kerk is. Dan is die uiterlike simbole en rituele van kerk vir my belangrik. Dan heg ek byvoorbeeld meer aandag daaraan oor watter beryming ons sing of oor watter instrument ons vir die begeleiding van die sang gebruik eerder as wat dit by my gaan dat ek met my sang God loof en prys. Dan stry ek byvoorbeeld daaroor oor watter klere gepas is om “kerk” toe te dra. Dan is die erediens die somtotaal van “kerk” vir my, maar as mens na my lewe kyk dan is die kerk van die Here nie sigbaar nie! Dan lyk my lewe maar net soos die wêreld daarbuite wat onmin stook, wat veroordelend is, wat my eie wil op mense wil afdwing en wat mense veroordeel wat nie by my wil inpas nie.

Die nuwe lewe

As Christen wees en kerkwees dan nie gaan oor die uiterlike simbole en rituele nie, wat beteken dit werklik om ’n Christen te wees? In hierdie eerste brief van Petrus sê die Here vir ons wat dit beteken om ’n Christen te wees. In die eerste plek word mens nie ’n Christen omdat jy so mooi of oulik of belangrik is nie. Dit is ook nie omdat jy iets gedoen het om dit te verdien nie. Dit is op grond van God se genade dat mens ’n Christen word soos ons hoor in 1 Pet. 1:3-4

Aan God, die Vader van ons Here Jesus Christus, kom al die lof toe! In sy groot ontferming het Hy ons die nuwe lewe geskenk deur die opstanding van Jesus Christus uit die dood. Nou het ons ’n lewende hoop op die onverganklike, onbesmette en onverwelklike erfenis wat in die hemel ook vir julle in bewaring gehou word.

Christus het die dood, wat die straf vir die sonde is, oorwin met sy opstanding. Daardeur gee Hy aan ons ’n nuwe lewe. Ons ontvang dit sonder dat ons dit verdien het.

Wat beteken dit dat ons ’n nuwe lewe het? Dit beteken dat ons lewe nou radikaal anders lyk as die sondige wêreld waarin ons leef. ’n Christen se lewe skyn soos ’n lig in ’n donker plek. Daarom word ’n Christen se lewe nie meer beheers deur sondige begeertes nie. Losbandigheid en dronkenskap is nie meer deel van sy lewe nie. So ook is vyandskap, haat, naywer, woede, rusies, verdeeldheid en skeuring ook nie meer deel van ’n Christen se lewe nie.

Lyk my lewe radikaal anders as die sondige wêreld waarin ek leef? Wat moet ek doen om te deel in die nuwe lewe wat God vir my gee? Die verkeerde antwoord is dat ek my lewe moet regruk en sorg dat ek ’n beter lewe begin lei. Die Here sê vir ons hoe ons deel kan kry aan die nuwe lewe wat Hy in sy groot genade aan ons gee soos ons hoor in 1 Pet. 1:5

En omdat julle glo, word ook julle deur die krag van God veilig bewaar vir die saligheid wat reeds gereed is om aan die einde van die tyd geopenbaar te word

God se genade is so groot dat Hy selfs die geloof wat Hy vra aan ons gee soos ons hoor in 1 Pet. 1:2:

Soos God die Vader dit vooraf bestem het, het Hy julle uitverkies en deur die Gees afgesonder om aan Hom gehoorsaam te wees en besprinkel te word met die bloed van Jesus Christus.

In sy genade gee God alles wat ons nodig het om deel te kry aan die nuwe lewe wat Hy gee. Daarmee saam gee Hy ook aan ons die verantwoordelikheid om met geloof wat Hy gee vas te gryp aan sy genade.

Die wonderlike troos van God se genade is dat Hy nie net aan ons verlossing skenk nie, maar dat Hy ons ook bewaar soos ons hoor in 1 Pet. 1:5:

En omdat julle glo, word ook julle deur die krag van God veilig bewaar vir die saligheid wat reeds gereed is om aan die einde van die tyd geopenbaar te word.

’n Christen weet daarom ook dat God permanent vir hom sorg en dat hy alles in sy lewe aan God kan toevertrou.

’n Christen is iemand wat die nuwe lewe uit genade van God ontvang deur die opstanding van Jesus Christus uit die dood.

Watter reaksie veroorsaak die nuwe lewe wat God gee?

Iemand wat die nuwe lewe van God ontvang het kan nie anders as om ’n onblusbare vreugde te ervaar nie. Selfs of dalk veral wanneer dit swaar gaan in sy lewe gee die nuwe lewe mens krag om te getuig van God se liefde en genade. Omdat die geloof wat God gee so belangrik is om daarmee vas te hou aan God se genade, word dit getoets deur swaarkry en lyding soos ons hoor in 1 Pet. 1:6-7:

Verheug julle hieroor, selfs al is dit nodig dat julle ’n kort tydjie bedroef gemaak word deur allerhande beproewings sodat die egtheid van julle geloof getoets kan word. Julle geloof is baie kosbaarder as goud, goud wat vergaan. Selfs die suiwerheid van goud word met vuur getoets, en die egtheid van julle geloof moet ook getoets word, sodat dit lof en heerlikheid en eer waardig mag wees by die wederkoms van Jesus Christus.

Swaarkry is nie lekker nie, maar dit is iets wat deel is van elkeen se lewe. Die manier waarop ’n gelowige swaarkry hanteer kan ’n baie sterk getuienis in mens se lewe wees. Petrus verwys herhaaldelik na lyding en beproewings in hierdie brief. Dit gaan hier egter nie om lyding in die algemeen nie. Dit gaan nie oor swaarkry wat as gevolg van siekte of rampe of jou eie sondigheid oor jou pad kom nie. Hier gaan dit oor swaarkry wat ons sou ervaar omdat ander mense teen ons diskrimineer omdat ons aan God gehoorsaam wil wees. Mense wat op die verkeerde pad is wil nie alleen op daardie pad wees nie. Hulle wil graag ondersteuning hê en daarom sal hulle alles in hul vermoë doen om diegene wat die regte ding wil doen af te kraak en te verkleineer. As net een of twee persone in ’n groep die regte pad wil loop, dan sal die res van die groep hul gewoonlik verkleineer en uitstoot.

Wanneer mens egter ’n nuwe lewe by God kry, dan wil mens nie meer saamgaan met die verkeerde dinge van jou sondige natuur nie omdat die Heilige Gees besig is om jou lewe te verander. Wanneer jy in ’n ander rigting loop as wat die meerheid gaan dan moet jy weet dat geloof getoets word. Vertrou jy eerder op God of vertrou jy op mense? Wanneer mens op God vertrou, veral in die aangesig van teenstand en diskriminasie dan besef jy dat om deel te hê aan die saligheid van God nie iets vir eendag is nie, maar dat dit nou reeds ’n werklikheid is. Die nuwe lewe wat God gee maak dit moontlik om ook onder swaarkry te volhard. Dan besef mens dat jy jou vreugde in die Here vind en nie in mense nie. Dit is net God wat jou gelukkig kan maak en nie mense nie daarom sê die Here ook vir ons in 1 Pet.1:14-16:

As gehoorsame kinders moet julle nie julle lewe inrig volgens die begeertes wat julle vroeër gehad het toe julle God nie geken het nie. Nee, soos Hy wat julle geroep het, heilig is, moet julle ook in julle hele lewenswandel heilig wees. Daar staan immers geskrywe: “Wees heilig, want Ek is heilig.”

Slot

Wat beteken dit om werklik ’n Christen te wees? Dit beteken dat ek ’n nuwe lewe ontvang uit God se genade deur Jesus Christus wat die dood oorwin het omdat ek glo. Dit beteken dat ek daardie nuwe lewe leef sodat ek kan besef dat ek nou reeds deel het aan die ewige saligheid saam met God. Geliefdes: Kom laat ons die nuwe lewe leef wat God uit genade skenk.

Amen

Die Here plant sy liefde deur middel van die kerk in ons harte sodat ons sy liefde kan weerkaats na diegene wat Hom nie ken nie

27 Mei 2012 (RB)

Skriflesing: Ef.:3 Teksverse: Ef. 3:6, 10 & 11

Sing    Lofsang:  Ps. 92 v 1            (OAB)

           Na wet:     Ps. 1 v 1 & 3       (OAB)

           Na gebed Ps. 31 v 1 & 17   (OAB)

           Slotsang   Ps. 84 v 3            (OAB)

Inleiding

Wie van ons wil nie graag weet wat die geheim is wanneer ons daarvan hoor nie? Dit is nou maar so dat wanneer ons van ’n geheim hoor, ons gewoonlik baie nuuskierig is om te hoor wat dit beteken. In hierdie gedeelte vertel die Here aan ons ’n geheim wat nog nooit tevore in die geskiedenis aan die mensdom bekend gemaak is nie. Dit is ook net ’n gewone geheim nie, nee dit is ’n geheim wat besig is om die hele wêreld te verander!

Wat is hierdie geheim?

Dwarsdeur ons teksgedeelte word daar na hierdie geheim verwys. Hierdie groot geheim is dat God alle mense baie baie lief het soos ons in ons teksvers hoor:

deur die verkondiging van die evangelie en in hulle verbondenheid met Christus Jesus, word ook mense wat nie Jode is nie, saam met ons deel van die volk van God en lede van die liggaam van Christus, en kry hulle ook saam met ons deel aan wat God belowe het.

Tot op die punt wat hierdie brief aan die gemeente in Efese geskryf is het daar ’n persepsie by die Jode bestaan dat die volk Israel eksklusiewe reg op God het. Dit het inderwaarheid aan die Jode ’n meerderwaardigheids gevoel gegee. Hulle het gedink dat hulle beter as die heidene was. Elkeen wat nie van Joodse afkoms was nie, is ’n heiden genoem, met ander woorde as jy nie deel is van die volk van God nie, dan is jy ’n heiden en dit is net Jode wat deel was van die volk van God. Indien dit waar is, beteken dit dat nie een van ons gered kon word nie! Dan was ons vir ewig verlore!

Die geheim wat die Here egter hier bekend maak is dat ook nie Jode deel kan word van die volk van God. Dit is nie jou afkoms wat bepaal of jy deel is van God se uitverkore volk nie, maar wel jou verbondenheid aan Jesus Christus. Die Evangelie is vir alle nasies beskore.

Evangelie beteken die Goeie Nuus van God se liefde soos ons hoor in Joh. 3:16:

“God het die wêreld so lief gehad dat Hy sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê.

Die groot geheim wat hier bekend gemaak word is dat God ook vir my baie lief het. As gevolg van die sonde is ons bang vir God en sy straf. Hy het tog immers gesê dat die straf vir ons sondes die ewige dood is! Die geheim wat God hier aan ons bekend maak is dat ons nie vir God bang hoef te wees nie omdat Hy ons oneindig baie lief het. Maak nie saak wie of wat ek is nie, God het my lief! Hierdie geheim moet nou aan die hele wêreld bekend gemaak word.

Hoe moet hierdie geheim bekend gemaak word?

Die Here sê vir ons dat hierdie geheim deur sy kerk aan die wêreld bekend gemaak moet word soos ons hoor in Ef.. 3:10&11:

Maar nou het God die ryke verskeidenheid van sy wysheid deur die kerk bekend laat word aan elke mag en gesag in die hemelruim, soos Hy Hom van ewigheid af al voorgeneem het om dit deur Christus Jesus, ons Here, tot uitvoering te bring.

Verder sê die Here vir ons in Ef. 3:7 dat hierdie werk wat Hy aan sy kerk toevertrou het ’n groot voorreg is. Paulus het besef watter groot voorreg dit was en daarom het hy die hele Asië deur gereis om hierdie opdrag van die Here uit te voer.

Hy was selfs in die tronk gegooi omdat hy die Evangelie verkondig het, maar dit het hom nie ondergekry nie. In hierdie brief leer die Here ons wat dit werklik beteken om kerk van die Here te wees. Ons het so dikwels ’n verkeerde idee van wat dit beteken om kerk van die Here te wees. Dit gaan so dikwels net om my en watter voordeel ek uit die kerk kry. Dit is dan wanneer ek gedurig krities is oor alles wat in die kerk gebeur.

Dit is dan wanneer ek so maklik vinger wys en indien ek enigsins van my negatiewe kritiek af kan wegkom dan is dit gewoonlik julle of hulle moet sorg dat hulle dit of dat doen of verander. Dit kom nie eers by my op dat dinge nie na my smaak verloop nie omdat ek nie bereid is om bietjie my moue op te rol en iets te doen nie. Nee dit is baie lekkerder om eerder kritiek te lewer op die werk wat ander doen. Dan gaan dit nie om die Here se opdrag om die Evangelie uit te dra nie. Dit gaan net oor my en watter voordeel ek daaruit kan kry.

’n Verdere gevolg van sulke denke is dat mense dikwels die houding in neem dat hulle nie deel van die kerk wil wees nie. Dit is dan ook wanneer hulle daardie hoogmoedige houding het van “ek wil niks met daardie skynheilige klomp in die kerk te doen hê nie! Ek dien die Here by myself en ek het nie die kerk daarvoor nodig nie.” As iemand so redeneer dan sê so ’n persoon eintlik dat hy beter is as die mense wat hy so kritiseer. Die probleem hiermee is dat iemand wat so ’n houding in neem ongehoorsaam is aan Christus, want Christus vergader die uitverkorenes deur middel van sy kerk met sy Woord en Gees. Verder is daar ’n groot klomp selfsug betrokke deurdat die persoon nie bereid is om sy gawes en liefde met ander gelowiges te deel nie.

Wanneer hierdie tipe hoogmoed aanwesig is by mense binne die kerk of by diegene wat hulself van die kerk afsonder dan is dieselfde sondige houding by hulle teenwoordig as wat daar by die Jode was. Hulle dink dat God eksklusief net vir hulle bedoel is. Die Here wys vir ons in hierdie gedeelte dat hoogmoed en selfsug nie plek het sy kerk nie. Die kerk van die Here moet nederig wees soos ons hoor in Ef. 3:8

Hoewel ek die geringste van al die gelowiges is, het Hy aan my hierdie voorreg gegee om aan die heidennasies die evangelie van die onpeilbare rykdom van Christus te verkondig.

Die kerk van die Here (dit wil sê ons as gelowiges) moet aan die Here gehoorsaam wees en nie ons eie selfsugtige begeertes najaag nie. Die taak wat die Here aan ons as sy kerk gegee het is om die liefde wat Hy in ons geplant het aan die wêreld te weerkaats. Met ander woorde ons moet aan die wêreld van God se liefde vertel, sy liefde wat Hy deur Jesus Christus vir ons bewys het. Ons moet deur middel van ons optrede God se liefde wys. Die wêreld word gedryf deur selfsug en die eie ek. Die kerk word gedryf deur liefde en omgee vir ons medemens.

Ons moet ongelukkig erken dat ons so dikwels deur selfsug en hoogmoed gemotiveer word en dat ons nie aan die Here gehoorsaam is nie.

Waar kry ons krag vandaan om die groot geheim van God se liefde aan die wêreld te verkondig?

In die gebed van Paulus vir die kerk van die Here wys Hy vir ons waar ons krag vandaan kom om aan Hom gehoorsaam te wees soos ons hoor in Ef.3:14-21:

Daarom kniel ek in gebed voor die Vader 15aan wie die hele gemeenskap van gelowiges in die hemel en op die aarde sy bestaan te danke het. 16Ek bid dat Hy deur sy Gees uit die rykdom van sy heerlikheid aan julle die krag sal gee om innerlik sterk te word, 17dat Christus deur die geloof in julle harte sal woon en dat julle in die liefde gewortel en gegrondves sal wees. 18Mag julle in staat wees om saam met al die gelowiges te begryp hoe wyd en ver en hoog en diep die liefde van Christus strek. 19Mag julle sy liefde ken, liefde wat ons verstand te bowe gaan, en mag julle heeltemal vervul word met die volheid van God.

20Aan Hom wat deur sy krag wat in ons werk, magtig is om oneindig meer te doen as wat ons bid of dink, 21aan Hom kom die eer toe, in die kerk, deur ons verbondenheid met Christus Jesus, deur al die geslagte heen tot in alle ewigheid. Amen.

Slot

Geliefdes, kom laat ons deur die krag van die Heilige Gees wegbeweeg van ons selfsug en hoogmoed. Kom laat ons gehoorsaam wees aan ons Here. Kom ons vertel aan die wêreld deur ons woorde en deur ons optrede van God se groot liefde. Kom laat ons die wêreld vertel:

“God het die wêreld so lief gehad dat Hy sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê.

Amen

Dit is net deur die krag van die Heilige Gees dat sy kerk lewe en groei

20 Mei 2012 (RB)

Skriflesing: Hand. 1:1-15 & 2:1-15 ; Teksvers: Hand. 1:8

Sing    Lofsang: Ps. 66 v   1          (OAB)

           Na wet:    Ps. 130 v 1 & 2   (OAB)

           Na gebed Sb. 4-8 v 1 & 2   (Sb 5 in swart Psalmboek)

           Slotsang  Ps. 105 v 1 & 3   (OAB)

Ons het in die week weer die hemelvaart van ons Here herdenk. Met Jesus se hemelvaart het daar ’n baie duidelike skeidslyn in die geskiedenis van die mensdom aangebreek. Die tyd tussen die derde en die laaste van die groot gebeure in die mensdom se geskiedenis het aangebreek. Die vier groot gebeure in die wêreld se geskiedenis is:

i   Die Skepping

ii   Die sondeval

iii  Christus se eerste koms as mens na die aarde toe

iv  Christus se wederkoms wanneer Hy kom om die wêreld te oordeel en om sy uitverkore kinders na Hom toe te neem.

Die tyd waar Christene deur die Gees die koninkryk van Jesus Christus vestig waar hulle ook al kom het aangebreek.

Maar voordat die kerk kon uitgaan om teenoor die hele wêreld van Jesus se koninkryk te getuig; soos ons in ons teksvers hoor; moes daar eers ’n belangrike gebeurtenis plaasvind. Christus moes sy Gees stuur soos Hy beloof het in Joh. 14:16

Ek sal die Vader vra, en Hy sal vir julle ’n ander Voorspraak stuur om vir ewig by julle te wees, naamlik die Gees van die waarheid.

Voordat die Heilige Gees gekom het, het die volgelinge van Jesus hulle eenkant afgesonder en hulle het volhard in gebed soos ons hoor in Hand. 1:12-15. Die kerk was ook baie klein, net omtrent 120 gelowiges.

Na die uitstorting van die Heilige Gees op Pinksterdag sien ons egter ’n heel ander prentjie van die kerk. In plaas daarvan om hulle af te sonder, gaan hulle uit en getuig soos ons hoor in Hand. 2:14 & 15:

Toe staan Petrus saam met die elf ander apostels op en onder leiding van die Heilige Gees spreek hy die mense toe: “Jode en julle almal wat in Jerusalem woon, ek moet vir julle verduidelik wat gebeur het. Luister na wat ek gaan sê: Hierdie mense is nie dronk soos julle dink nie, want dit is nog maar nege-uur in die môre.

Hulle het hulle ook nie laat afskrik deur negatiewe kommentaar nie. Alhoewel daar sommige mense was wat hulle van dronkenskap beskuldig het, het hulle hul nie daaraan gesteur nie. Petrus getuig selfs in die aangesig van teenkanting.

Die gevolg hiervan is wonderbaarlik soos ons hoor in Hand. 2:41:

Dié wat sy woorde aangeneem het, is gedoop, en omtrent drie duisend mense is op daardie dag by die getal van die gelowiges gevoeg.

Binne ’n dag groei die kerk van 120 na meer as 3000 en dit het ook nie daar opgehou nie. In Hand. 4:4 hoor ons dat binne enkele dae daarna die getal gelowiges aangegroei het tot omtrent vyf duisend. Spoedig het die kerk oor die hele Romeinse ryk versprei soos ons hoor in die res van die boek Handelinge. Daarvandaan het die kerk oor die hele wêreld heen versprei.

Daar is egter ook ’n ander sy van hierdie sukses verhaal. In die week het ek gelees hoe die kerk in Amerika krimp. Die afgelope jaar het daar ongeveer 3000 gemeentes ontbind. Hier in Suid-Afrika lyk die prentjie ook nie veel beter nie. Die lidmaattal daal of bly konstant ten spyte daarvan dat die land se bevolking bly toeneem.

Nou is die vraag: “Hoekom gebeur dit?” In die lig van ons teksvers kan ons maklik sê dat dit gebeur omdat die kerk nie gehoor gee aan die sending opdrag nie. Dit is waar, maar dit is nie die oorsaak nie, dit is maar slegs ’n simptoom van die onderliggende rede. Kom ons luister net weereens mooi wat die Here vir ons in ons teksvers sê.

Maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judea en in Samaria en tot in die uithoeke van die wêreld.

Uit ons teks is die antwoord duidelik. Dit is slegs wanneer die krag van die Heilige Gees aktief werksaam is dat die kerk op so ’n manier van Christus se wonderdade getuig dat ongelowiges daardeur by die kerk bygevoeg word.

Hoe lyk ons situasie? Is ons getuienis oor die verskil wat Jesus in ons lewens gemaak het effektief of selfs erger, het ons getuienis daaroor stil geraak? Ons is so geneig om te dink dat sending in ver lande moet plaasvind. Ons teksvers wys egter vir ons dat daar ’n volgorde is. Eers in Jerusalem, dit wil sê hier by ons, in ons eie dorp. Daarna Judea en die uithoeke van die wêreld. Hoeveel mense is ons op Reddersburg? Ongeveer die helfte is lidmate by die vier gemeentes op die dorp. Waar is die ander? Maar nog nader. Hoeveel van ons wie se name in die lidmaat register is, is maar net op papier lidmate?

Wat is die rede dat daar ’n louheid of selfs ’n doodsheid in die kerk is? Dit kan tog nie wees omdat ons nie die Heilige Gees ontvang het nie. God se beloftes staan tog vas en na die Pinkster gebeure het elke gelowige die Heilige Gees ontvang. Die uitstorting van die Heilige Gees is nie iets wat weer en weer moet gebeur nie! Die Here sê vir ons wat die rede is. In Ef. 4:30 hoor ons dat ons die Gees kan bedroef en in 1 Tess. 5:19 hoor ons dat ons die werking van die Gees kan teenstaan. Wanneer ons dit doen dan kan ons tog nie verwag dat die Gees se krag in ons werksaam moet wees nie, want die Gees werk nie met dwang nie. Hy werk uit liefde en liefde dwing nie.

Hoekom bedroef ons die Heilige Gees? Sonde is die oorsaak dat ons die Gees bedroef en teenstaan. Sonde veroorsaak dat ons verveeld raak met God en sy reëls. Herken ons die sonde in ons lewens? Erken ek nog enigsins dat daar sonde in my lewe teenwoordig is? Dit is eers as ek op daardie punt kom wat ek besef dat ek sonder God verlore is, dat ek werklik by God se genade kan uitkom. Dit is eers wanneer God se genade in my lewe lewendig is dat ek werklik daarvan kan getuig. Eers wanneer ek in verwondering besef hoe groot God se genade in my lewe is, dat ek werklik kan begin leef uit daardie genade en dat ek werklik die krag van die Heilige Gees in my lewe kan ervaar.

Deur die Nagmaal wys die Here op ’n sigbare wyse vir ons hoe sy genade lyk sodat ons geloof in Jesus se verlossing daardeur versterk kan word. Daardeur word ons weereens herinner aan Christus se soenverdienste en deur geloof kry ons deel daaraan. Kom laat ons aansit by die tafel van die Here sodat ons daardeur ook kan ervaar hoe die krag van die Heilige Gees in ons lewens ’n werklikheid word.

Amen

Die Heilige Gees is altyd by ons as ons Trooster, Helper, Bemoediger en Pleitbesorger

Joh. 14:15-31 Teksvers Joh. 14:16 & 17a

Ek sal die Vader vra, en Hy sal vir julle ’n ander Voorspraak stuur om vir ewig by julle te wees, naamlik die Gees van die waarheid.

Wat beteken Jesus se hemelvaart vir ons? Voor sy hemelvaart het Jesus ’n baie belangrike belofte gemaak soos ons hoor in Joh. 14:18:

“Ek sal julle nie as weeskinders agterlaat nie; Ek kom weer na julle toe.

En in Joh. 16:7 hoor ons:

Dit is tot julle voordeel dat Ek weggaan, want as Ek nie weggaan nie, sal die Voorspraak, die Heilige Gees, nie na julle toe kom nie; maar as Ek gaan, sal Ek Hom na julle toe stuur.

Jesus se hemelvaart beteken dat die Heilige Gees altyd by ons gaan bly.

In ons teksgedeelte hoor ons wat dit vir ons beteken. Daar hoor ons hoe Jesus sy dissipels voor berei op die gebeure wat binnekort gaan plaasvind. Daar is vier belangrike dinge wat hulle moet weet:

i      Hy moet gekruisig word,

ii     Hy sal opstaan uit die dood,

iii     Hy moet opvaar na sy Vader toe waar Hy aan sy regterhand sal sit as Koning van die heelal en

iv     Hy sal weer terug kom.

In Joh. 14 is Jesus veral besig om sy dissipels op sy Hemelvaart voor te berei. Na drie jaar wat hulle heeltyd saam met Hom was, moet hulle hoor dat hy nie maar saam met hulle gaan wees nie en daarom sê Hy twee keer in Joh. 14:1 & 27 dat hulle nie ontsteld of bang moet wees nie.  In ons teksverse hoor ons waarom hulle nie ontsteld moet wees nie.

Ek sal die Vader vra, en Hy sal vir julle ’n ander Voorspraak stuur om vir ewig by julle te wees, naamlik die Gees van die waarheid.

Jesus gaan wel weg, maar in sy plek kom die Heilige Gees om altyd by ons as ons Trooster, Helper, Bemoediger en Pleitbesorger te wees. Die Griekse woord; Parakletos; wat in die 83 vertaling met Voorsorg vertaal is, is moeilik om met ’n enkele woord in Afrikaans te vertaal. In die 33/53 vertaling is dit met Trooster vertaal en in sommige Engelse vertalings word dit met Raadgewer vertaal terwyl ander dit weer as Helper vertaal. Al hierdie vertalings is reg want Parakletos dra al hierdie betekenisse. Verder beteken dit ook Bemoediger, Advokaat, Verdediger.

In die tyd van Jesus was daar ’n duidelike onderskeid tussen die ryk mense en die arm mense. Die ryk mense kon hulself in die samelewing handhaaf want hulle kon regsverteenwoordiging bekostig terwyl die arm mense absoluut uitgelewer was omdat hulle nie kon bekostig om hulle regte te verdedig nie. Daarom het die gebruik ontstaan dat daar ’n “Parakletos” vir hulle aangestel word. So ’n persoon het dan namens die armes opgetree om hulle regte beskerm. Dit is dan ook wat die Heilige Gees vir ons kom doen. Christus het ons nie as weeskinders agter gelaat nie. Hy het die Heilige Gees gestuur om ons te vertroos, te bemoedig, te help en namens ons in te staan by die Vader.

Watter troos hou die wete dat die Heilige Gees altyd by ons bly, vir ons in? Ons vind ons troos in die sekere beloftes wat die Here vir ons in hierdie teksgedeelte gee. Ons hoor dat ons nie as weeskinders agtergelaat sal word nie en dat die Heilige Gees altyd by ons sal bly. Hiermee saam ook die belofte van vrede soos ons hoor in Joh. 14:17

Vrede laat Ek vir julle na; my vrede gee Ek vir julle. Die vrede wat Ek vir julle gee, is nie die soort wat die wêreld gee nie. Julle moet nie ontsteld wees nie, en julle moet nie bang wees nie.

Dit gee aan ons die sekere wete dat ons nie alleen staan in hierdie wêreld nie. Maak nie saak hoe groot die aanvegtinge is nie, ons weet verseker dat God ons nooit in die steek sal laat nie. Die verskil tussen die ware vrede van God en die wêreldse vrede is die troos dat ons weet dat ons nooit alleen is nie. Die wêreld se troos bestaan uit leë woorde wat jou aanmoedig om jouself te help. Jy moet maar die probleme hanteer en allerlei sinlose selfhelp programme word aan jou voorgehou. Teenoor dit is die ware vrede van God wat jou verseker dat jy nooit alleen staan nie en dat die Heilige Gees jou dra deur die moeilikhede in die lewe.

’n Verdere troos wat die Heilige Gees vir ons inhou, is dat ons Christus sal sien ten spyte daarvan dat Hy nie meer vir die wêreld sigbaar is nie. Die wêreld wil met hul oë sien en met hul hande vat, maar ons sien Jesus deur ons geloofsoë. Die Heilige Gees gee vir ons die geloof wat God vra. Ons glo in die oorwinning en verlossing van Jesus Christus.

Hiermee saam is ook die belofte dat Christus weer sal terugkom. Ons hoef egter nie sy wederkoms te vrees nie, want dit hou geen oordeel in vir diegene wat in Hom glo nie. Die Heilige Gees plant die liefde vir God in elkeen van ons wat glo se harte en daarom is ons verseker van God se liefde soos ons hoor in Joh. 14:23:

“As iemand My liefhet, sal hy my woorde ter harte neem; en my Vader sal hom liefhê, en Ons sal na hom toe kom en by hom woon.

Elkeen wat in Jesus se soenverdienste aan die kruis en sy opstanding glo hoef nie bang te wees vir God se oordeel nie. Die wat egter nie in Jesus glo nie sal nie die liefde van God ervaar nie, maar wel die volle oordeel van God oor die sonde.

Saam met Christus se verlossing kom daar ook ’n verantwoordelikheid. Ons moet sy opdragte uitvoer soos ons telkemale in ons teksgedeelte hoor (vgl Joh. 14:15; 21; 23). Johannes spel ook baie duidelik uit wat Christus se opdragte is, soos ons hoor in Joh. 13:34:

Ek gee julle ’n nuwe gebod: julle moet mekaar liefhê. Soos Ek julle liefhet, moet julle mekaar ook liefhê.

en ook in Joh. 15:12

Dit is my opdrag: Julle moet mekaar liefhê soos Ek julle liefhet.

Hierdie opdrag word weer in Joh. 15:17 herhaal:

Dit beveel Ek julle: Julle moet mekaar liefhê!”

Ons verantwoordelikheid is dat ons mekaar moet liefhê soos wat God ons liefhet. Dit beteken dat ons bereid moet wees om vir mekaar te moet opoffer. Ons idee van liefde is so dikwels dat ek ander sal help solank dit net nie iets van my vra nie. Jesus wys egter vir ons wat ware liefde is. Hy het sy lewe vir ons opgeoffer! Ons kan Jesus se opdrag uitvoer omdat die Heilige Gees in ons woon soos ons ook hoor in Joh. 14:26:

wanneer die Vader in my Naam die Voorspraak, die Heilige Gees, stuur, sal Hy julle alles leer en julle herinner aan alles wat Ek vir julle gesê het.

Christus se hemelvaart troos ons omdat ons die Heilige Gees as ons Trooster, Helper, Bemoediger en Pleitbesorger ontvang. Dit beteken dat ons nooit alleen is nie en dat ons daarom deur die krag van die Heilige Gees al die stampe en stote van die lewe kan hanteer, want Hy dra ons deur die swaar tye in die lewe.

Die krag van die Heilige Gees stel ons ook in staat om ons liefde aan God te bewys deurdat ons sy opdrag om mekaar lief te hê, kan nakom. Deur God se liefde wek die Heilige Gees ons op tot ’n nuwe lewe wat Christus deur sy soenverdienste aan die kruis vir ons verdien het. Christus se hemelvaart is ons versekering dat die krag van die Gees ook in ons lewe ’n werklikheid is. Ons deel daarin deur ons geloof in Jesus Christus. Laat ons daarom opnuut weer glo in Jesus oorwinning en verlossing deur die kruis en opstanding heen.

Amen

Word wakker uit julle doodslaap!

Word wakker uit julle doodslaap!

13 Mei 2012 (RB)

Skriflesing: Open.:1-6 Teksvers: Open. 3:2

Sing    Lofsang:  Ps. 8 v 1 & 4       (OAB)

           Na wet:     Ps. 40 v 4            (OAB)

           Na gebed Ps. 119 v 7          (OAB)

           Slotsang   Ps. 84 v 3            (OAB)

Inleiding

Julle het die naam het dat julle lewe, en tog is julle dood! Wat ’n verskriklike aanklag teen die kerk. Op die oog af volgens julle reputasie net in naam lewendig, maar eintlik is julle lankal dood! Dit is die aanklag wat Jesus teen die gemeente van Sardis gebring het. In die brief aanhef spreek Jesus weereens op ’n unieke wyse die gemeente aan wat spesifiek by daardie gemeente pas, net soos Hy met elk van die ander gedoen het, soos ons hoor in Open 3:1:

Skrywe aan die leraar van die gemeente in Sardis:

So sê Hy wat die sewe Geeste van God en die sewe sterre het:

Die sewe Geeste verwys na die volheid van die Heilige Gees en dit simboliseer die besondere teenwoordigheid van die Here self. Dit is net die volheid van die Heilige Gees wat die sluimerende en dooie Sardis weer tot lewe kan opwek. Die sewe sterre verwys na verwys simbolies na die sewe voorgangers waardeur Christus sy boodskap aan die gemeentes bring, dit wil sê Christus se boodskap kom deur die prediking na die gemeentes toe.

Anders as die ander gemeentes was die Gemeente in Sardis nie onder bedreiging of intimidasie van die heidense godsdienste of die Jode nie. Hulle was relatief welaf want Sardis was bekend as ’n sterk stadsvesting en sy handelsware soos goud en tekstielware. Op die oog af het dit gelyk of dit goed gaan met die gemeente, maar Jesus wys hulle daarop dat daar ’n baie ernstige probleem is. Hulle is geestelik dood! Anders as die ander gemeentes het Sardis ook nie sterk punte waarvoor hulle geprys kan word nie en dit dui vir ons op die erns van hul situasie.

Wat is die oorsaak van Geestelike doodsheid?

As ons wonder waarom Sardis geestelik dood was moet ons maar weer na Bybel toe draai om te hoor wat veroorsaak geestelike doodsheid. In Rom. 6:23 hoor ons:

Die loon wat die sonde gee, is die dood

Op verskeie ander plekke in die Bybel hoor ons hierdie selfde waarheid soos ook byvoorbeeld in Jak. 1:15:

Daarna, as die begeertes bevrug geraak het, bring dit die sonde voort; en as die sonde ryp geword het, loop dit uit op die dood.

Geestelike doodsheid word deur sonde veroorsaak.

Wat is die gevolg van geestelike doodsheid?

Hoe lyk geestelike doodsheid? Dit is ’n algemene apatie, dit wil sê ’n onverskillige gevoelloosheid teenoor alles. Dit is mense wat net nie meer opgewonde is oor die lewe nie. Dit is ’n mens wat sinies geword het in die lewe, dit wil sê iemand wat nie meer die mooi en die wonder van die lewe raaksien nie. Al wat hy raaksien is net donkerte en probleme. Niks is reg nie en niks word meer waardeur nie.

Moedeloosheid weens ’n gebrek aan vertroue in die sorg van ons hemelse Vader veroorsaak verder dat mens lamgelê word. Dit is amper asof ’n tipe depressie jou oorval deurdat jy nie werklik lus het om iets te doen of om betrokke te wees nie. Kommer veroorsaak naderhand dat mens die kleinste probleempie buite verband opblaas. Mens sien naderhand net nie meer kans vir die lewe nie. Dit is daardie gevoel wat jy het wanneer jy wakker word dat jy wens die nag wil net aanhou sodat jy weer in jou droomwêreld in kan ontsnap van die werklikheid waarmee jy nou weer te make het. Onvergewensgesindheid is ’n ander sonde wat mens lamlê. Dit is soos ’n bitter wortel wat in jou groei en al jou lewensvreugde steel. Hierdie is maar slegs enkele voorbeelde van sonde in ’n mens se lewe.

Hoe meer mens by sonde betrokke raak, hoe meer word mens afgestomp vir die lewe. Sonde het dieselfde effek as drank en/of dwelms in ’n mens se lewe. ’n Drank verslaafde begin heel onskuldig by een of twee drankies elke aand. Naderhand is een of twee nie meer genoeg nie en word dit naderhand vier of vyf en selfs die vyf is naderhand nie meer genoeg nie. Die wet van dalende meer opbrengs geld hier, met ander woorde jy moet al hoe meer gebruik vir al hoe minder plesier. Op die uiteinde vreet dit jou op sodat daar niks van jou oorbly nie. Dit is wat sonde in ’n mens se lewe doen.

Dit sluk jou naderhand heel in en ’n mens sien die effek daarvan in jou lewe. In plaas daarvan om liefde teenoor mekaar te bewys heers daar net ’n algemene selfsugtigheid waar elkeen vir homself is en die duiwel vang die agterse een. Daar is ’n grootskaalse onbetrokkenheid en geen sprake daarvan dat Christus se opdrag om die evangelie uit te dra nagekom word nie. So ’n geestelike doodsheid by sommige lidmate hou die gevaar in dat dit ook die ander lidmate kan oorval soos ’n dief in die nag. Wanneer iemand of ’n groepie konstant negatief is steek dit naderhand ook die ander aan wat positief is. Net soos wat een vrot appel in ’n vrugtebak die gesonde appels aantas.

Wat is die oplossing?

In Open 3:2 & 3a sê Jesus vir ons hoe ons van geestelike doodsheid ontslae moet raak. Die oplossing word ferm en kragtig in vyf definitiewe bevele gegee.

Word wakker en versterk wat nog by julle oorgebly het, wat op die punt staan om dood te loop. Wat julle doen, vind Ek nie goed genoeg voor die oë van my God nie. Dink daaraan hoe julle die evangelie ontvang en daarna geluister het. Hou daarmee vol en bekeer julle.

Die eerste bevel: “Word wakker!” Die gelowiges moet wakker word uit hulle slaap van selfvergenoegdheid. Raak ontslae van die apatie waarin julle so vasgevang is. Die tweede bevel is: “Versterk wat nog by julle oorgebly het.” Net soos wat mens uit die as van ’n vuur wat byna dood is die een of twee kooltjies voed wat nog warm is moet daar gekonsentreer word op dit wat nog goed en reg is. Die derde bevel is: “Onthou hoe julle die evangelie ontvang het en daarna geluister.” Stap terug op julle geestelike pad en kom weer terug op die pad daar waar julle die pad byster geraak het. Die vierde opdrag is: “Hou daarmee vol.” Bly gehoorsaam. Volhard daarin. Sardis wat bykans oninneembaar was vanweë sy strategiese posisie is twee maal oorval deur die vyand omdat hulle nie waaksaam was nie. Daarom is die opdrag dan ook, hou aan om te volhard en gedurig deur waaksaam te wees teen die sonde wat mens so maklik wil oorval. Die laaste opdrag is “bekeer julle.” Draai in jou spore terug weg van die sonde en die pad na die dood terug na die pad van die lewe. Bekering is slegs moontlik as mens in geloof vashou aan die soenverdienste van Jesus aan die kruis en sy oorwinning oor die dood deur sy opstanding. As mens in ’n geestelike doodsheid verval het, moet jy weer by God se genade by kruis uitkom. Dit sal jou in staat stel om radikaal anders as wat jy tot nou toe gedoen het, te begin leef.

As mens nie by die kruis en opstanding uitkom nie, wag daar baie ernstige gevolge soos ons in Open 3:3b hoor:

As julle nie wakker word nie, sal Ek onverwags kom soos ’n dief, en julle sal nie weet wanneer Ek op julle sal afkom nie.

Diegene wat God se genade en liefde in Jesus Christus verwerp sal die volle impak van God se wraak voel.

Troos

Alhoewel hierdie brief op ’n baie negatiewe manier begin, bevat dit tog ’n stukkie troos vir diegene wat bly vashou aan God se genade soos ons hoor in Open 3:5:

Elkeen wat die oorwinning behaal, sal sulke wit klere dra. Ek sal nooit sy naam uit die boek van die lewe uithaal nie, en Ek sal voor my Vader en voor sy engele verklaar dat hy aan My behoort.

Hulle sal vind dat die belofte wat die Here alreeds in Rom. 8:38 & 39 gemaak het, absoluut waar is. Anders as mense gaan God nie terug op sy beloftes nie:

Hiervan is ek oortuig: geen dood of lewe of engele of magte of teenswoordige of toekomstige dinge of kragte of hoogte of diepte of enigiets anders in die skepping kan ons van die liefde van God skei nie, die liefde wat daar is in Christus Jesus ons Here

Kyk na binne!

Die brief word afgesluit met uitdaging soos ons hoor in Open 3:6:

Elkeen wat kan hoor, moet luister na wat die Gees vir die gemeente sê.

In die lig van hierdie uitdaging moet ons nou vir onsself afvra: “Is ons gemeente geestelik dood?” Die moeilike deel van hierdie vraag is dat nie een van ons kan terugstaan en so na die gemeente kyk en die ander oordeel nie. Elkeen van ons is deel van die gemeente en daarom vereis hierdie vraag ’n kliniese en harde introspeksie by elkeen van ons, dit wil sê elkeen moet na binne kyk, daar waar dit ongemaklik is omdat dit naby aan my lyf is! Die vraag is dus eintlik: “Is daar van die simptome van geestelike doodsheid in my lewe te bespeur? Is ek besig om geestelik dood te gaan of nog erger, is ek reeds geestelik dood?”

Ek dink as ons eerlik is dan moet ons erken dat daar tot ’n mindere of meerdere mate by elkeen van ons van die simptome van geestelike doodsheid teenwoordig is. Daarom moet ons luister na wat die Gees vir ons sê: “word wakker uit die doodslaap waarin ons so stilweg ingeglip het!”                                      

Amen