Jesus se Hemelvaart beteken meer as wat ons werklik besef!

 Lees

Joh. 14: 1 – 21 Teksvers Joh. 14:16 & 20

Heidelbergse Kategismus Sondag 18

In ons teks ontmoet ons Jesus en sy dissipels waar hulle besig om ’n Paasmaal te nuttig. Dit is egter nie ’n rustige geleentheid nie, want dinge verloop anders as waaraan hulle gewoond is. Die maal  het begin met Jesus wat die dissipels se voete was en die ongemaklike konfrontasie tussen Jesus en Petrus waar Petrus eers nie wil toelaat dat hulle Meester sy voete was nie, omdat hy homself nie waardig geag het nie.

Kort daarna volg die ongemaklike gesprek oor een van die dissipels wat Jesus gaan verraai en Judas wat na dit die vertrek verlaat, terwyl die res van die dissipels nog nie mooi verstaan wat daar aangaan nie.

Dis amper of daar so half ’n gespanne atmosfeer daar onder die dissipels was en dit is die agtergrond van die volgende gesprek wat Jesus met sy dissipels in Joh. 14 het waarin Hy besig is om hulle voor te berei vir die dramatiese gebeure wat binnekort gaan volg, naamlik sy kruisiging en opstanding en dat Hy kort daarna nie meer as mens saam met hulle gaan wees nie.

Dit is teen hierdie agtergrond wat Jesus vir hulle sê: “Julle moet nie ontsteld wees nie. Glo in God; glo ook in My.” En daarna bemoedig hy hulle met die belofte dat Hy vir hulle ’n plek gaan voorberei waar hulle ewig saam met Hom en die Vader gaan woon.

Daarmee saam maak Hy dit weereens vir hulle duidelik dat Hy die enigste weg na die Vader is. Geloof in Jesus Christus is nodig om jou verhouding met God te herstel.

Dan gee Jesus vir hulle hierdie belofte soos ons hoor in
Joh. 14:16 & 18:

En Ek sal die Vader vra en Hy sal vir julle 'n ander Parakleet gee, sodat Hy vir ewig by julle kan wees. Hy is die Gees van die waarheid, wat die wêreld nie kan ontvang nie, omdat die wêreld Hom nie sien nie en ook nie ken nie. Julle ken Hom egter, omdat Hy by julle bly en in julle sal wees. Ek sal julle nie as weeskinders agterlaat nie; Ek kom weer na julle toe.

Die Griekse woord “Parakleet” is moeilik om te vertaal, want daar is nie ’n enkele Afrikaanse woord wat die volle betekenis deurgee nie. In die 83 Vertaling is dit met “Voorspraak” vertaal en in die 33/53 Vertaling is dit met “Trooster” vertaal.

Dis iemand wat nader geroep is om jou by te staan as ’n Trooster, Helper, Voorspraak, Advokaat en Bemoediger. Dit is belangrik om te verstaan dat die Parakleet nie bloot ’n “krag” of “gevoel” is nie. Hy is ’n persoon, naamlik die Heilige Gees, d.w.s God self wat by die gelowige teenwoordig is.

’n Verdere woord waar die betekenis in Afrikaans nie so duidelik deurkom nie is die woord “ander”. Die letterlike betekenis van die Griekse woord wat met “ander” vertaal is, is: “ ’n ander van die dieselfde soort”. ’n ander Parakleet van dieselfde soort.

Die Gees kom nie as ’n plaasvervanger van laer orde nie. Hy kom as dieselfde Goddelike teenwoordigheid. D.w.s die dissipels verloor nie vir Christus en kry “iets minder” in sy plek nie. Hulle ontvang God se eie teenwoordigheid deur die Gees.

Wat verder belangrik is, is Jesus se versekering dat Hy hulle nie as weeskinders sal agterlaat nie, maar dat Hy weer na hulle toe kom soos ons hoor in Joh. 14:18 en in Joh. 14:20 voeg Hy by “Op daardie dag sal julle weet: Ek is in my Vader, en julle in My en Ek in julle.”

Wat Jesus hier vir die dissipels sê is dat Hy in sy menslike gestalte nie meer saam met hulle gaan wees nie. Hy gaan egter nie weg nie. Hy gaan steeds by hulle wees, maar nou in sy Goddelike gestalte en dit is wat ons ook in Sondag 18 bely:

Christus is ware mens en ware God.  Wat sy menslike natuur betref, is Hy nie meer op aarde nie, maar wat sy Godheid, majesteit, genade en Gees betref, gaan Hy nooit meer van ons af weg nie.

Die geweldige troos wat ons hier ontvang is dat Christus se Hemelvaart beteken dat in die plek van sy Menslike gestalte kom God Drie-Enig. Die Seun bid tot die Vader. Die Vader stuur die Gees om by die gelowiges te bly, maar die Vader en die Seun is nie afwesig nie.

Alhoewel ons die drie Persone van God, naamlik Vader Seun en Heilige Gees kan onderskei, kan ons hulle nie losmaak van mekaar nie omdat die Drie-enige God onafskeidbaar werk. Waar die Gees is, is die Seun ook en waar die Seun is, is die Vader ook.

En dit is die geweldige troos wat Jesus se Hemelvaart vir ons ook inhou! Ons is nie alleen nie. God is by ons elke dag van elke oomblik. Ons is NOOIT alleen nie!

Ons belydenis in Sondag 18 sluit so mooi by hierdie waarheid aan. In Vraag en Antwoord 49 bely ons:

49  Vraag:  Watter nut het die Hemelvaart van Christus vir ons?

Antwoord: 

U Ten eerste dat Hy in die hemel ons Voorspraak by die Vader is.

In Joh. 14 belowe Jesus ’n Parakleet op aarde, maar in 1 Johannes 2:1 word Jesus ook ’n Parakleet genoem. Dus: Christus is ons hemelse Voorspraak by die Vader wat soos ’n advokaat vir ons intree, terwyl die Gees ons inwonende Trooster in ons is.

Die Hemelvaart beteken dus nie afstand nie, maar dubbele troos: naamlik ’n Voorspraak bó ons én ’n Trooster ín ons.

U Ten tweede dat ons ons menslike natuur in die hemel as 'n betroubare waarborg het dat Hy, as die Hoof; ook ons, sy lede, na Hom toe sal neem.

D.w.s Jesus wat as mens in die hemel is, is God se waarborg aan ons dat ons ook daarheen gaan.

U Ten derde dat Hy sy Gees as waarborg na ons toe stuur deur wie se krag ons soek na wat daar bo is, waar Christus is en aan die regterhand van God sit, en nie na wat op die aarde is nie.

Die Gees in ons is God se waarborg aan ons dat Hy nou reeds hier is. Die Gees is die bewys dat Christus steeds sy kerk vashou.

Christus se Hemelvaart beteken nie dat Christus daar van ver af regeer nie, maar dit beteken die Drie-Enige God woon nou reeds by en in sy volk.

Die dissipels was bang die Hemelvaart beteken verlies, afstand en verlatenheid, maar net die teenoorgestelde is waar. Die Hemelvaart open juis die weg vir die voller teenwoordigheid van God by sy volk. Voor sy Hemelvaart was Christus liggaamlik langs hulle, na sy Hemelvaart woon die Drie-Enige God deur die Gees in sy kerk. Die geweldige troos van Christus se Hemelvaart is die begin van sy wêreldwye teenwoordigheid deur die Heilige Gees.

Wat beteken Christus se Hemelvaart vir ons as gelowiges wat nou hier in 2026 midde in ’n samelewing leef wat onder geweldige ekonomiese druk staan vanweë hemelhoë brandstof pryse en die politiek wat so deurmekaar is waar dit lyk of misdaad en boewery besig is om die oorhand te kry? Wat sê dit vir ons wat die aftakeling van ouderdom so seer aan die lyf voel?

Christus se Hemelvaart sê vir ons: “God Drie-Enig het sy woning by sy kinders gemaak.” Daar waar jy op ’n Maandagoggend wakker word met spanning oor finansies of onsekerheid, begin jy nie die dag alleen nie. Daar waar jy die pyn en swakheid van ouderdom aan die lyf voel is jy nie alleen nie.

Christus is nie ver weg anderkant die sterre nie. Deur sy Gees is Hy teenwoordig in jou bekommernis, in jou besluitneming, in jou swakheid en uitputting.

Dit beteken nie die probleme verdwyn nie. Dit beteken jy dra dit nooit alleen nie, want Christus se Hemelvaart beteken Hy regeer steeds, selfs wanneer die wêreld chaoties lyk. Die wêreld voel dikwels chaoties omdat ons net die grondvlak sien. Christus se Hemelvaart herinner ons: “Daar is Iemand bó die chaos!”

Jesus sê “julle in My.” Dit beteken ons identiteit word nie deur chaos bepaal nie. Dit word deur Christus bepaal en dit beteken ons as kerk is nou ’n sigbare teken van God se teenwoordigheid wat anders leef.

Daarom moet ons kalm bly wanneer daar paniek is. Vrygewig wees in ’n wêreld wat net op eiebelang fokus. Daarom moet ons ook standvastig bly in donker tye en hoopvol wees in donker tye omdat God Drie-Enig se teenwoordigheid in ons lewens dit vir ons moontlik maak.

Christus se Hemelvaart beteken dat God Drie-Enig deur sy Gees in ons lewens teenwoordig is. Hoe verander dit die manier waarop jy na gebed kyk, veral wanneer dit voel asof jou woorde teen die plafon vasslaan?

In Rom. 8:26 hoor ons:

Die Gees staan ons ook in ons swakheid by: ons weet nie wat en hoe ons behoort te bid nie, maar die Gees self pleit vir ons met versugtinge wat nie met woorde gesê word nie. En God, wat die harte deurgrond, weet wat die bedoeling van die Gees is, want Hy pleit, volgens die wil van God, vir die gelowiges.

Wanneer dit vir jou voel of jou gebed teen die plafon vasslaan, weet dat die Heilige Gees jou Parakleet, jou Helper, jou Trooster is. Daarom is die fokus in jou gebed nie meer op jou prestasie van hoe goed jy bid nie. Die Heilige Gees as jou Parakleet, jou Trooster en jou Helper verskuif die fokus in jou gebed na God se teenwoordigheid in jou lewe.

Wanneer jy nie woorde het om te bid nie omdat die lewe te oorweldigend raak, weet dat die Gees self jou woordelose versugtings in ’n suiwer gebed omsit en dit voor die Vader bring. Die Gees neem jou rou emosie en "vertaal" dit in die taal van die hemel. Op aarde tree die Gees vir ons in en in die hemel waar Christus aan die regterhand van God sit, tree Hy vir ons in.

Wanneer die lewe vir jou te veel word, hoef jy nie te veg om deur te breek na God toe nie, want gebed is nie ’n taak of ’n werk wat jy moet verrig om God se aandag te kry nie. Deur gebed vind jy rus in God se teenwoordigheid, self al sug jy net omdat jy nie meer woorde het nie.

Wat beteken Jesus se Hemelvaart vir ons? Dit beteken God Drie-Enig is teenwoordig in jou lewe. Ons is nie weeskinders nie! Jy staan nie alleen wanneer die lewe jou wil omdop nie, want God is daar. Deur jou gebede vind jy rus in God se teenwoordigheid en selfs wanneer jy so oorweldig voel dat jy nie meer woorde het om te bid nie, is God steeds daar. Jou Parakleet vertaal selfs jou versugtinge in die taal van die hemel.

Amen

Die Heilige Gees is altyd by ons as ons Trooster, Helper, Bemoediger en Pleitbesorger.

Joh. 14:15-31 Teksvers Joh. 14:16 & 17a

Ek sal die Vader vra, en Hy sal vir julle ’n ander Voorspraak stuur om vir ewig by julle te wees, naamlik die Gees van die waarheid.

Hemelvaart Don 5 Mei 2016 Erediens 8 Mei 2016 GKE

Sing:

Sb 18-6 v1-5

Ps. 119-2 v 5

Ps. 119-2 v 26 & 27

Lied 428 v 1 - 4

Wat beteken Jesus se hemelvaart vir ons? Voor sy hemelvaart het Jesus ’n baie belangrike belofte gemaak soos ons hoor in Joh. 14:18:

“Ek sal julle nie as weeskinders agterlaat nie; Ek kom weer na julle toe.

En in Joh. 16:7 hoor ons:

Dit is tot julle voordeel dat Ek weggaan, want as Ek nie weggaan nie, sal die Voorspraak, die Heilige Gees, nie na julle toe kom nie; maar as Ek gaan, sal Ek Hom na julle toe stuur.

Jesus se hemelvaart beteken dat die Heilige Gees altyd by ons gaan bly.

In ons teksgedeelte hoor ons wat dit vir ons beteken. Daar hoor ons hoe Jesus sy dissipels voor berei op die gebeure wat binnekort gaan plaasvind. Daar is vier belangrike dinge wat hulle moet weet:

i      Hy moet gekruisig word,

ii     Hy sal opstaan uit die dood,

iii     Hy moet opvaar na sy Vader toe waar Hy aan sy regterhand sal sit as Koning van die heelal en

iv     Hy sal weer terug kom.

In Joh. 14 is Jesus veral besig om sy dissipels op sy Hemelvaart voor te berei. Na drie jaar wat hulle heeltyd saam met Hom was, moet hulle hoor dat hy nie maar saam met hulle gaan wees nie en daarom sê Hy twee keer in Joh. 14:1 & 27 dat hulle nie ontsteld of bang moet wees nie.  In ons teksverse hoor ons waarom hulle nie ontsteld moet wees nie.

Ek sal die Vader vra, en Hy sal vir julle ’n ander Voorspraak stuur om vir ewig by julle te wees, naamlik die Gees van die waarheid.

Jesus gaan wel weg, maar in sy plek kom die Heilige Gees om altyd by ons as ons Trooster, Helper, Bemoediger en Pleitbesorger te wees. Die Griekse woord; Parakletos; wat in die 83 vertaling met Voorsorg vertaal is, is moeilik om met ’n enkele woord in Afrikaans te vertaal. In die 33/53 vertaling is dit met Trooster vertaal en in sommige Engelse vertalings word dit met Raadgewer vertaal terwyl ander dit weer as Helper vertaal. Al hierdie vertalings is reg want Parakletos dra al hierdie betekenisse. Verder beteken dit ook Bemoediger, Advokaat, Verdediger.

In die tyd van Jesus was daar ’n duidelike onderskeid tussen die ryk mense en die arm mense. Die ryk mense kon hulself in die samelewing handhaaf want hulle kon regsverteenwoordiging bekostig terwyl die arm mense absoluut uitgelewer was omdat hulle nie kon bekostig om hulle regte te verdedig nie. Daarom het die gebruik ontstaan dat daar ’n “Parakletos” vir hulle aangestel word. So ’n persoon het dan namens die armes opgetree om hulle regte beskerm. Dit is dan ook wat die Heilige Gees vir ons kom doen. Christus het ons nie as weeskinders agter gelaat nie. Hy het die Heilige Gees gestuur om ons te vertroos, te bemoedig, te help en namens ons in te staan by die Vader.

Watter troos hou die wete dat die Heilige Gees altyd by ons bly, vir ons in? Ons vind ons troos in die sekere beloftes wat die Here vir ons in hierdie teksgedeelte gee. Ons hoor dat ons nie as weeskinders agtergelaat sal word nie en dat die Heilige Gees altyd by ons sal bly. Hiermee saam ook die belofte van vrede soos ons hoor in Joh. 14:17

Vrede laat Ek vir julle na; my vrede gee Ek vir julle. Die vrede wat Ek vir julle gee, is nie die soort wat die wêreld gee nie. Julle moet nie ontsteld wees nie, en julle moet nie bang wees nie.

Dit gee aan ons die sekere wete dat ons nie alleen staan in hierdie wêreld nie. Maak nie saak hoe groot die aanvegtinge is nie, ons weet verseker dat God ons nooit in die steek sal laat nie. Die verskil tussen die ware vrede van God en die wêreldse vrede is die troos dat ons weet dat ons nooit alleen is nie. Die wêreld se troos bestaan uit leë woorde wat jou aanmoedig om jouself te help. Jy moet maar die probleme hanteer en allerlei sinlose selfhelp programme word aan jou voorgehou. Teenoor dit is die ware vrede van God wat jou verseker dat jy nooit alleen staan nie en dat die Heilige Gees jou dra deur die moeilikhede in die lewe.

’n Verdere troos wat die Heilige Gees vir ons inhou, is dat ons Christus sal sien ten spyte daarvan dat Hy nie meer vir die wêreld sigbaar is nie. Die wêreld wil met hul oë sien en met hul hande vat, maar ons sien Jesus deur ons geloofsoë. Die Heilige Gees gee vir ons die geloof wat God vra. Ons glo in die oorwinning en verlossing van Jesus Christus.

Hiermee saam is ook die belofte dat Christus weer sal terugkom. Ons hoef egter nie sy wederkoms te vrees nie, want dit hou geen oordeel in vir diegene wat in Hom glo nie. Die Heilige Gees plant die liefde vir God in elkeen van ons wat glo se harte en daarom is ons verseker van God se liefde soos ons hoor in Joh. 14:23:

“As iemand My liefhet, sal hy my woorde ter harte neem; en my Vader sal hom liefhê, en Ons sal na hom toe kom en by hom woon.

Elkeen wat in Jesus se soenverdienste aan die kruis en sy opstanding glo hoef nie bang te wees vir God se oordeel nie. Die wat egter nie in Jesus glo nie sal nie die liefde van God ervaar nie, maar wel die volle oordeel van God oor die sonde.

Saam met Christus se verlossing kom daar ook ’n verantwoordelikheid. Ons moet sy opdragte uitvoer soos ons telkemale in ons teksgedeelte hoor (vgl Joh. 14:15; 21; 23). Johannes spel ook baie duidelik uit wat Christus se opdragte is, soos ons hoor in Joh. 13:34:

Ek gee julle ’n nuwe gebod: julle moet mekaar liefhê. Soos Ek julle liefhet, moet julle mekaar ook liefhê.

en ook in Joh. 15:12

Dit is my opdrag: Julle moet mekaar liefhê soos Ek julle liefhet.

Hierdie opdrag word weer in Joh. 15:17 herhaal:

Dit beveel Ek julle: Julle moet mekaar liefhê!”

Ons verantwoordelikheid is dat ons mekaar moet liefhê soos wat God ons liefhet. Dit beteken dat ons bereid moet wees om vir mekaar te moet opoffer. Ons idee van liefde is so dikwels dat ek ander sal help solank dit net nie iets van my vra nie. Jesus wys egter vir ons wat ware liefde is. Hy het sy lewe vir ons opgeoffer! Ons kan Jesus se opdrag uitvoer omdat die Heilige Gees in ons woon soos ons ook hoor in Joh. 14:26:

wanneer die Vader in my Naam die Voorspraak, die Heilige Gees, stuur, sal Hy julle alles leer en julle herinner aan alles wat Ek vir julle gesê het.

Christus se hemelvaart troos ons omdat ons die Heilige Gees as ons Trooster, Helper, Bemoediger en Pleitbesorger ontvang. Dit beteken dat ons nooit alleen is nie en dat ons daarom deur die krag van die Heilige Gees al die stampe en stote van die lewe kan hanteer, want Hy dra ons deur die swaar tye in die lewe.

Die krag van die Heilige Gees stel ons ook in staat om ons liefde aan God te bewys deurdat ons sy opdrag om mekaar lief te hê, kan nakom. Deur God se liefde wek die Heilige Gees ons op tot ’n nuwe lewe wat Christus deur sy soenverdienste aan die kruis vir ons verdien het. Christus se hemelvaart is ons versekering dat die krag van die Gees ook in ons lewe ’n werklikheid is. Ons deel daarin deur ons geloof in Jesus Christus. Laat ons daarom opnuut weer glo in Jesus se oorwinning en verlossing deur die kruis en opstanding heen.

Amen