Waar sal my hulp vandaan kom?

 This devotional is also available in English

Waar sal my hulp vandaan kom?

Psalm 121 v 1 & 2

’n Pelgrimslied. Ek kyk op na die berge: waarvandaan sal daar vir my hulp kom? My hulp kom van die HERE wat hemel en aarde gemaak het.

Waar gaan soek jy hulp wanneer die lewe te moeilik word?

 Die pelgrims wat op pad was na Jerusalem was bang vir die gevare langs die pad. Hierdie Psalm is 'n gebed wat uiting gee aan die vaste hoop en vertroue dat God hulle dag en nag sal beskerm.

 Hulle kyk hemelwaarts na God vir hulp in hul benoudheid en dan verklaar hulle met vaste sekerheid: “My hulp kom van die HERE wat hemel en aarde gemaak het.”

 Die pelgrims vestig hulle hoop op die HERE. Die Naam “HERE” is 'n persoonlike naam van God wat beteken “EK IS” soos ons in Eks. 3 v 14 hoor: Toe sê God vir Moses: “EK IS WAT EK IS. Jy moet vir die Israeliete sê: ‘EK IS’ het my na julle toe gestuur.”

 Die Naam van God “EK IS” (YHWH in Hebreeus, uitgespreek as Yaweh) beteken:

1. Hy is die ewige God wat van altyd af bestaan.
Hy is die begin en die einde, die Alfa en die Omega.

2. Hy is 'n God van verhoudings.
Hierdie Naam van God word net in die Bybel gebruik wanneer God se persoonlike verhouding met sy mense ter sprake is

3. Hy is altyd met ons.
God is persoonlik betrokke in mense se lewens. Hy is nie 'n veraf God nie.

4. Hy is die onveranderlike God wat altyd dieselfde is.

5. Hy is volkome heilig en verhewe bo die mensdom.

6. Hy is getrou aan sy ewige verbond.
Toe God sy verbond (Ek sal vir jou 'n God wees en jy en jou nageslag moet my volk wees) met Abraham gesluit het, het Hy homself as Yahweh voorgestel en daarmee het Hy beloof dat Hy altyd getrou sal wees aan sy beloftes.

7. Hy is vol misterie wat nooit te volle geken kan word nie.
Ons kan God nooit ten volle ken nie, maar wat ons nodig het om van Hom te weet, openbaar Hy deur sy Gees in sy Woord vir ons. Alhoewel ons Hom nooit ten volle kan ken nie, kan ons groei in ons verhouding met Hom.

In die Nuwe Testament hoor ons nog verder wat “EK IS” beteken. Jesus stel Homself voor as “EK IS”.

Die sewe “EK IS” uitsprake van Jesus:

1.  Ek is die brood van die lewe. Joh. 6 v 35
Net soos wat brood jou liggaam voed, is Jesus die Brood wat jou geestelik voed.

2.  Ek is die lig vir die wêreld. Joh. 8 v 12
Jesus is die Lig wat die duisternis van die sonde verdryf. Hy bring hoop en ewige lewe vir elkeen wat in Hom glo.

3.  Ek is die deur vir die skape. Joh. 10 v 7
Jesus is die enigste weg na God toe.

4.  Ek is die goeie herder. Joh. 10 v 11
Jesus is die herder van sy skape, sy eiendom. Hy sorg vir sy skape en maak seker dat hulle alles kry wat hulle nodig het. Hy dra die belange van sy kudde op die hart en Hy dra die volle verantwoordelikheid van hulle. Hy lê sy lewe vir sy skape af. Christus het sy lewe opgeoffer sodat elkeen wat in Hom glo kan lewe.

5.  Ek is die opstanding en die lewe. Joh. 11 v 25
Jesus het die mag van die dood met sy opstanding gebreek. Met ander woorde Hy is magtig om ook aan elke sondaar lewe uit die dood te gee.

6.  Ek is die weg, die waarheid en die lewe. Joh. 14 v 6
Jesus is die weg na die ware ewige lewe. Werklik lewe kan net by Jesus gevind word.

7.  Ek is die ware wingerdstok. Joh. 15 v 1
Ons is die lote wat voortspruit uit hierdie wynstok en word gesnoei sodat ons vrug kan dra. Deur die swaarkry in die lewe waar jy deur die skerp lem van die snoeiskêr gesnoei word laat Hy dit wat seer is ook ten goede meewerk in jou lewe.

Waar gaan soek jy hulp wanneer die lewe te moeilik word? Gaan soek jou hulp by “EK IS” wat jou oneindig liefhet.

Hy het sy Seun, (die waaragtige God wat ter wille van jou mens geword het) gestuur, sodat jy kan lewe omdat Hy jou so lief het

Amen