Hemelse Troos

 This meditation is also available in English

Hemelse Troos

Jes. 40 v 1 & 2 – 2020 Vertaling

“Troos, troos my volk!” sê julle God. Praat mooi met Jerusalem! Roep haar toe dat haar gedwonge arbeid voltooi is, dat haar skuld afbetaal is! Ja, sy het uit die hand van die Here 'n dubbele straf ontvang vir al haar sondes.”

 Elke mens het troos nodig in die lewe. Troos, met die stille tevredenheid en rus wat dit bring, is die belangrikste ding in die lewe en sterwe van elke mens.

 Die vraag: “Wat is jou enigste troos in lewe en in sterwe?” is 'n baie persoonlike vraag wat lastig kan wees. Dit is moeilik om na binne te kyk. Dit is maklik om ander mense se probleme raak te sien, maar nie so maklik om na myself te kyk nie.

 Ware troos kan net by God gevind word, want die grootste rede vir jou ongeluk is die hartseer van sonde wat tussen jou en God staan.

 Die inhoud van die troos wat net van God af kom behels in die eerste plek dat jy van die tirannie van jou eie self verlos moet word. Dit wil sê dat ek nie aan myself nie, maar aan my getroue Verlosser Jesus Christus behoort.

 Dit beteken dat ek die eiendom van God met liggaam en siel, in lewe en sterwe is, want Jesus het my met sy bloed gekoop. Hy het die volle losprys met sy lewe betaal om my van die mag van die bose te verlos. 

 Die troos wat ek hierin vind is die wete dat die Vader my onder sy heel besondere neem. Hy bewaar my op so 'n manier dat alles wat met my gebeur tot my eie beswil dien.

 Hierdie troos behels verder dat Heilige Gees op 'n besondere wyse met my besig is. Hy verseker my deur die woord en sakramente van die ewige lewe en Hy verander my sodat ek vir God wil lewe. Hy vervang die selfsug, vyandskap, haat, naywer en woede in my lewe met liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing.

Hoe vind ek hierdie hemelse Troos?

Die weg na hierdie troos is die weg van kennis. Dit begin nie by wat ek moet doen nie, maar by wat ek moet weet. En selfs in dit is ek nie op my eie nie. Die Heilige Gees bring my tot dit wat ek moet weet.

Daar is drie dinge wat ek moet weet:

    i.      Hoe groot my sonde en ellende is.

               Net soos die verlore seun moet ek tot inkeer kom.

   ii. Hoe ek van al my sonde en ellende verlos word.

              Ek moet die evangelie glo dat Jesus Christus in my plek die straf
    van die dood gedra het daar op Golgota aan die kruis en dat Hy het
    die dood oorwin het sodat ek kan lewe.

 iii. Hoe ek God vir so 'n verlossing dankbaar moet wees.

              Ek moet my deur die Gees laat lei in 'n lewe wat deur liefde vir my
    naaste en God gekenmerk word.

 Wat is jou enigste troos in lewe en in sterwe?

 My enigste troos in lewe en in sterwe is dat ek aan Jesus Christus behoort.

 Vind jou troos by ons Here. Gee ag op Jesus se uitnodiging
(Mat. 11 v 28 – 30):

“Kom na My toe, almal wat uitgeput en oorlaai is, en Ek sal julle rus gee. Neem my juk op julle en leer van My, want Ek is sagmoedig en nederig van hart, en julle sal rus kry vir julle gemoed. My juk is sag en my las is lig.”

Amen